Ο Παύλος Μπουτσσάντιβελα κι Ρώμη

Ο τρίτος ταξίδι ι Παυλόσκο μπιτισάλο κι Ιερουσαλήμ. Οτθέ ασταρντέ-λες ντα τσσουντέ-λες κι φυλακή. Εκ ιράτ εκχέ φαντασιάτε, ο Ιησούς βακερντάς λέσκε: “Κα τζας κι Ρώμη ντα κα βακερές ο λατσσέ αμπέρια οτθέ”. Ι Παυλός γκερντέ-λες κατά Ιερουσαλήμ κι Καισάρεια, ντα μπεσλό ντούι μπρεσά κι φυλακή. Κάνα αβιλό ο σαάτι τι δικάντιβελ ανγκλάλ κο κυβερνήτης Φήστος, ο Παύλος βακερντάς: “Μανγκάβα τι δικάνελ-μαν ο Καίσαρας, κι Ρώμη”. Ο Φήστος βακερντάς: «Κο Καίσαρας μανγκλάν τι τζας, κο Καίσαρας κα τζας». Σοράν τσσουντέ ι Παυλός εκχέ καραβίστε για τι τζαλ κι Ρώμη, ντα ντούι πφραλά, ο Λουκάς ντα ο Αρίσταρχος, γκιλέ παλά-λέστε.

Καζόμ ισινέ κι ντεριάβ, ασταρντάς-λεν εκ μπουτ ζουρανί μπαρμπάλ σο ατσσικιαρντάς μπουτ ντιβεσά. Σαρέ αμντίνενας ότι κα μερέν. Αλλά ο Παύλος βακερντάς: “Μουρσάλεν, εκ άγγελος αβιλό μι σουνέστε ντα βακερντάς μάνγκε: «Μα ντάρα, Παύλε. Κα ερεσές κι Ρώμη, ντα σαρέ οντουλά σο ισί τούσαρ κο καράβι κα αβέν αρακχαντέ». Λεν θάρρος! Να κα μεράς”.

Η μπαρί μπαρμπάλ ατσσικιαρντάς 14 ντιβεσά. Τελικά νικίστιλε κατά ντεριάβ,ντα ερεσλέ εκχέ νησίστε κι Μάλτα. Ο καράβι νταπλάς τελέ κο κούμι ντα αβιλό κομμάτια, αλλά σαρέ ο 276 τζενέ σο ισινέ κο καράβι σωσάλε. Μερικοί σο τζανένας μπάνιος κολυμπίνενας ενώ γιαβερά τσσουντέ-πες οπράλ κο καστά ντα κο κομμάτια κατά καράβι ντα νικίστιλε αβρί. Ο τζενέ κι Μάλτα σικαντέ λένγκε λατσσιπέ ντα τσσουντέ γιακ για τι τατιόν.

Τριν μασεκά πο σοράν, ο στρατιώτες γκερντέ ι Παυλός κι Ρώμη εκχέ γιαβερέ καραβίσαρ. Κάνα ερεσλέ οτθέ, ο πφραλά γκιλέ τι ντικχέν-λες. Κάνα ο Παύλος ντικχλάς-λεν, ευχαριστιντάς ι Ιεχωβάς ντα λιντάς θάρρος. Παρόλο σο ισινέ φυλακισμέ, μουκχλέ-λες τι μπεσέλ εκχέ νοικιαμέ κχερέστε καζόμ κα αρακχαβέλας-λες κάποιος στρατιώτης. Οτθέ μπεσλό ντούι μπρεσά. Μπουτ τζενέ τζάνας τι ντικχέν-λες, ντα βοβ βακερέλας λένγκε για τη Βασιλεία ι Ντεβλέσκι ντα σικλιαρέλας-λεν ι Ιησούσκε. Επίσης ο Παύλος γραφιντάς επιστολές ι κχανγκιρίνγκε σο ισινέ κι Μικρά Ασία ντα κι Ιουδαία. Ισί μπαγιά ότι ο Ιεχωβά χρησιμοποιηντάς ι Παυλός για τι βακερέλ ο λατσσέ αμπέρια σαρέ κο τθεμά.