Σαρ Κχανγκιρί, τι Βοηθίνεν ι Τζενέν σο Κερένα Μελέτη τι Ερεσέν κο Μπολντιπέ

1, 2. Κον μπορίνελα τι βοηθίνελ εκχέ τζενές σο κερέλα μελέτη τι ερεσέλ κο μπολντιπέ;

«ΜΠΕΪΝΤΙΝΑΒΑΣ μπουτ οντουλά σο σικλιάβας μι μελετιάτε», βακερέλα η Έιμι, σο τζουβντιόλα κο Φίτζι. «Τζανάβας ότι ανταγιά ισινέ η αλήθεια. Αλλά σάντε κάνα αρχισάλομ τι κεράβ παρέα ι πφραλέντζαρ ντα ι πφενίντζαρ κερντόμ ο αλλαγές σο έπρεπε τι κεράβ ντα ερεσλόμ κο μπολντιπέ». Ανταβά σικλιαρέλα-αμέν κάτι σημαντικός: Εκ τζενό ισί πιο σίγουρος ότι κα ερεσέλ κο μπολντιπέ κάνα βοηθίνενα-λες ο γιαβερά κι κχανγκιρί.

² Ο κάθε εκ αμένταρ μπορίνελα τι βοηθίνελ τι μπαριόλ η κχανγκιρί. (Εφεσ. 4:​16) Ντικχέν σο βακερέλα η Λεϊλάνι, εκ σκαπάνισσα σο τζουβντιόλα κο Βανουάτου: «Βακερένα ότι σαρό ο γκαβ μπαριαρέλα ι χουρντές. Πακιάβα ότι ανταβά αβέλα-πες κάνα κεράσα εκ μελέτη-ντα. Ο πιο μπουτ φαρ σαρί η κχανγκιρί βοηθίνελα εκχέ τζενές τι αβέλ κι αλήθεια». Η φαμιλί, ο αμαλά ντα ο δάσκαλοι βοηθίνενα εκχέ χουρντές τι μπαριόλ ντα τι αβέλ γκοντιαβέρ. Κερένα-λες ανταβά κάνα ντένα ζορ ι χουρντές ντα σικλιαρένα-λες σημαντικά πράγματα. Αντικάς ο πφραλά-ντα, μπορίνενα τι ντεν συμβουλές ντα ζορ ι τζενέν σο κερένα μελέτη, ντα τι ντεν-λεν ο λατσσό παράδειγμας για τι βοηθίνεν-λεν τι ερεσέν κο μπολντιπέ.​—Παρ. 15:22.

3. Σο σικλιόνα οντουλένταρ σο βακερέλα η Άνα, ο Ντορίν ντα η Λεϊλάνι;

³ Σόσκε πρέπει τι χαιρίνας κάνα γιαβερά βοηθίνενα ι τζενέν σο κεράσα-λεν μελέτη; Ντικχέν σο βακερέλα η Άνα, εκ ειδική σκαπάνισσα κι Μολδαβία: «Εκ τζενό χρειαζίντιβελα βοήθεια μπουτέ πραγματέντε ντα ισί μπουτ δύσκολος τι βοηθίνελ-λες σάντε οντουβά σο κερέλα-λες μελέτη». Ο Ντορίν, εκ ειδικός σκαπανέας σο υπηρετίνελα βοβ-ντα κι Μολδαβία, βακερέλα: «Μπουτ φαρ, γιαβερά πφραλά βακερένα εκ λάφι σο ερεσέλα κο γκι κι τζενέσκο, εκ λάφι σο με να κα σκεφτίναβας ποτές». Η Λεϊλάνι βακερέλα ατζέκ εκ πράγμας: «Κάνα εκ τζενό σο κερέλα μελέτη ντικχέλα ότι ο γιαβερά κι κχανγκιρί μανγκένα-λες ντα πφαμπόνα λέσκε, ανταβά βοηθίνελα-λες τι αγαβέλ ότι ισινάμ ο λαός ι Ιεχωβάσκο».​—Ιωάν. 13:35.

4. Σο κα ντικχάς ανταλέ μαθημάστε;

⁴ Μπορεί όμως τι πουτσένα-τουμέν: “Σαρ μπορίναβα τι βοηθίναβ εκχέ τζενές τι ερεσέλ κο μπολντιπέ άμα να κεράβα με λέσκι μελέτη;” Κα ντικχάς σο τι κεράς κάνα ο πφραλά ντα ο πφενιά βακερένα αμένγκε τι τζας λέντζαρ εκχέ μελετιάτε σο κερένα ντα σο τι κεράς κάνα εκ τζενό αρχίνελα τι αβέλ κο συναθροίσεις. Επίσης, κα ντικχάς σαρ μπορίνενα ο πρεσβύτεροι τι βοηθίνεν ι τζενέν σο κερένα μελέτη τι ερεσέν κο μπολντιπέ.

ΚΑΝΑ ΤΖΑΣΑ ΕΚΧΕ ΜΕΛΕΤΙΑΤΕ ΣΟ ΚΕΡΕΛΑ ΕΚ ΓΙΑΒΕΡ

5. Σο πρέπει τι κερέν κάνα οντουβά σο σικλιαρέλα βακερέλα τουμένγκε τι τζαν λέσαρ εκχέ μελετιάτε σο κερέλα;

⁵ Εκχέ μελετιάτε, οντουβά σο σικλιαρέλα ισί υπεύθυνος τι βοηθίνελ ι τζενές τι αγαβέλ ο Λάφι ι Ντεβλέσκο. Άμα οντουβά σο σικλιαρέλα κα βακερέλ τουμένγκε τι τζαν λέσαρ εκχέ μελετιάτε σο κερέλα, τουμαρί μπουτί οτθέ ισί τι βοηθίνεν-λες. (Εκκλ. 4:9, 10) Αλλά σο μπορίνενα τι κερέν για τι βοηθίνεν καζόμ πιο λατσσές αβέλα-πες κι μελέτη;

6. Σαρ μπορίνενα τι κερέν οντουβά σο βακερέλα ο εδάφιος Παροιμίες 15:​22 κάνα τζάνα εκχέ μελετιάτε σο κερέλα εκ γιαβέρ;

⁶ Προετοιμάντιβεν. Πρώτα, μανγκέν οντουλέσταρ σο σικλιαρέλα τι βακερέλ τουμένγκε χάνικ πράγματα ι τζενέσκε σο κερέλα μελέτη. (Διαβάνεν Παροιμίες 15:​22) Για παράδειγμας, πουτσέν: «Μπορίνεσα τι βακερές μάνγκε χάνικ πράγματα ι τζενέσκε σο κερέλα μελέτη; Καβά μάθημας κα κερέν; Σο μανγκέσα τι ατσσικιαρέλ πι γκοντιάτε ανταλέ μαθημάσταρ; Ισί κάτι σο πρέπει ή δεν πρέπει τι κεράβ ή τι βακεράβ κι μελέτη; Σο πακιάσα ότι κα βοηθίνελ ι τζενές τι ερεσέλ κο μπολντιπέ;» Σίγουρα, οντουβά σο σικλιαρέλα να κα μουτθαβέλ τουμένγκε πράγματα σο δεν πρέπει τι σικλιόν, αλλά οντουλά σο κα βακερέλ μπορεί τι βοηθίνεν. Εκ ιεραπόστολος, η Τζόι, βακερέλα ασακέ πράγματα οντουλένγκε σο λέλα πι μελετιέντε. Βόι βακερέλα: «Ανταλά πράγματα βοηθίνενα οντουλέν σο αβένα μάντζαρ εκχέ μελετιάτε τι μανγκέν τι βοηθίνεν ι τζενιά ντα τι αγαβέν σαρ μπορίνενα τι βοηθίνεν».

7. Σόσκε πρέπει τι προετοιμάντιβεν κάνα τζάνα εκχέ μελετιάτε σο κερέλα εκ γιαβέρ;

⁷ Άμα εκ πφραλ ή εκ πφεν κα βακερέλ τουμένγκε τι τζαν εκχέ μελετιάτε σο κερέλα, κα αβέλας λατσσό τι προετοιμάντιβεν. (Έσδρ. 7:​10) Ο Ντορίν βακερέλα: «Ισί μπουτ σουκάρ κάνα ο πφραλ σο αβέλα μάντζαρ κι μελέτη προετοιμάντιβελα. Αντικάς, μπορίνελα τι βακερέλ κάτι σο κα βοηθίνελ ι τζενές». Ο τζενό σο κερέλα μελέτη κα ντικχέλ ότι προετοιμαντέν-τουμέν ο ντούι-ντα λατσσές, ντα κα μανγκέλ τι κερέλ-λες βοβ-ντα ανταβά. Ατζέ-ντα άμα ναστί προετοιμάντιβενα μπουτ λατσσές, ντεν χάνικ τουμαρέ σαατίσταρ για τι αρακχέν ο σημαντικά σημεία.

8. Σο μπορίνενα τι κερέν για τι ερεσέλ τουμαρί προσευχή κο γκι εκχέ τζενέσκο σο κερέλα μελέτη;

⁸ Η προσευχή ισί μπουτ σημαντική κι μελέτη. Οτθάρ, σκεφτίνεν πιο τζανγκλέ σο κα βακερέν άμα οντουβά σο σικλιαρέλα κα μανγκέλ τουμένταρ τι κερέν προσευχή. Αντικάς τουμαρί προσευχή κα ερεσέλ κο γκι κι τζενέσκο σο κερέλα μελέτη. (Ψαλμ. 141:2) Η Χαναέ, σο τζουβντιόλα κι Ιαπωνία, ατζέκ ατζέκ ντέλα-πες γκοντί ο προσευχές εκχέ πφενιάκε σο συνεργαζίντιβελας ι πφενιάσαρ σο κερέλας-λα μελέτη. Η Χαναέ βακερέλα: «Αγαβάβας ότι ισινέ λατσσί αμαλίν ι Ιεχωβάσκι ντα μανγκάβας τι μοιάζαβ λάτε. Επίσης, νιωθίναβας ότι μανγκέλας-μαν κάνα βακερέλας μο ναβ πι προσευχιέντε».

9. Σο μπορίνενα τι κερέν για τι αβέν λατσσέ συνεργάτες εκχέ μελετιάτε σαρ βακερέλα ο εδάφιος Ιακώβου 1:19;

⁹ Βοηθίνεν οντουλές σο σικλιαρέλα. «Οντουλά σο τζάνα εκχέ μελετιάτε σο κερέλα εκ γιαβέρ ασουνένα καζόμ αβέλα-πες η μελέτη. Βον μπορίνενα τι βακερέν κάτι σο κα βοηθίνελ, αλλά να κερένα μπουτ λάφι, σόσκε αγαβένα ότι οντουβά σο σικλιαρέλα τθερέλα ι ευθύνη τι κερέλ ι μελέτη», βακερέλα η Ομαμουγιόβι, εκ ειδική σκαπάνισσα κι Νιγηρία. Σαρ μπορίνενα τουμέν τι αγαβέν κάνα τι κερέν λάφι ντα σο τι βακερέν; (Παρ. 25:​11) Τι ασουνέν λατσσές οντουλές σο σικλιαρέλα ντα ι τζενές σο κερέλα μελέτη. (Διαβάνεν Ιακώβου 1:​19) Σάντε αντικάς κα αβέν έτοιμοι τι βοηθίνεν κο σωστός σαάτι. Όμως, πρέπει τι σκεφτίνεν πριν τι κερέν λάφι. Για παράδειγμας, δεν πρέπει τι κερέν μπουτ λάφι, τι τσσιναβέν οντουλές σο σικλιαρέλα ή τι αλλάνεν ο θέμας. Αλλά εκχέ χουρντέ λαφίσαρ, εκχέ παραδειγμάσαρ ή εκχέ ερωτησιάσαρ τι βοηθίνεν ι τζενές σο κερέλα μελέτη τι αγαβέλ πιο λατσσές οντουβά σο ντικχένα οντιά στιγμή. Μπάζιμα, μπορεί τι νιωθίνενα ότι να τθερένα μπουτ πράγματα τι βακερέν. Άμα όμως ισαρένα ι τζενές ντα σικαβένα ότι πφαμπόνα λέσκε, κα βοηθίνεν-λες μπουτ.

10. Σαρ μπορίνενα τουμαρέ εμπειρίες τι βοηθίνεν εκχέ τζενές σο κερέλα μελέτη;

¹⁰ Βακερέν τουμαρέ εμπειρίες. Άμα ανταβά κα βοηθίνελ, κα μπορίνενας τι βακερέν χάνικ λαφίντζαρ κο τζενό σο κερέλα μελέτη σαρ σικλιλέν ι αλήθεια, σαρ νακχαντέν εκ δυσκολία ή σαρ ντικχλέν ο βας ι Ιεχωβάσκο τουμαρέ ζωγιάτε. (Ψαλμ. 78:4, 7) Τουμαρί εμπειρία μπορεί τι αβέλ ακριβώς οντουβά σο τθερέλα ανάγκη τι ασουνέλ ο τζενό. Μπορεί τι μπαριαρέλ λέσκι πίστη ή τι τσσίντελ-λες τι συνεχίνελ τι κερέλ πράγματα για τι ερεσέλ κο μπολντιπέ. Μπορεί επίσης τι σικαβέλ λέσκε σαρ τι νακχαβέλ εκ δοκιμασία σο τθερέλα. (1 Πέτρ. 5:9) Ο Γκαμπριέλ, σο τζουβντιόλα κι Βραζιλία ντα ακανά ισί σκαπανέας, ντέλα-πες γκοντί κάτι σο βοηθιντάας-λες κάνα κερέλας μελέτη. Βοβ βακερέλα: «Κάνα ασουνάβας ο εμπειρίες ι πφραλένγκε, αγαντόμ ότι ο Ιεχωβά ντικχέλα ο δοκιμασίες σο νακχάσα. Αφού βον ντινέ-λεν πέρα, με-ντα μπορίναβας τι κεράβ-λες ανταβά».

ΚΑΝΑ ΕΚ ΤΖΕΝΟ ΑΒΕΛΑ ΚΟ ΣΥΝΑΘΡΟΙΣΕΙΣ

11, 12. Σόσκε πρέπει τι καλωσορίνας αντράλ αμαρέ γκίσταρ εκχέ τζενές σο αβέλα κι συνάθροιση;

¹¹ Για τι ερεσέλ εκ τζενό κο μπολντιπέ, πρέπει τι τζαλ σαρέ κο συναθροίσεις ντα τι βοηθίντιβελ λένταρ. (Εβρ. 10:​24, 25) Μάλλον, οντουβά σο κερέλα-λες μελέτη κα βακερέλ λέσκε πρώτη φαρ τι αβέλ κι συνάθροιση. Κάνα κα αβέλ κι Αίθουσα Βασιλείας, σαρέ μπορίνασα τι ντας-λες ζορ αμαρέ λαφίντζαρ για τι συνεχίνελ τι αβέλ. Σαρ μπορίνασα τι κεράς-λες ανταβά;

¹² Καλωσορίνεν αντράλ τουμαρέ γκίσταρ ι τζενές σο κερέλα μελέτη. (Ρωμ. 15:7) Άμα εκ τζενό κα νιωθίνελ λατσσές κι συνάθροιση, κα μανγκέλ τι συνεχίνελ τι αβέλ. Χωρίς τι ανέν-λες σε δύσκολη θέση, χαιρετίνεν-λες ντα γνωρίνεν λέσκε γιαβερέν-ντα. Κερέν λέσαρ λάφι σόσκε οντουβά σο σικλιαρέλα-λες μπορεί μα τι αβέλ οτθέ ή μπορεί τι τθερέλα τι κερέλ κάποια πράγματα κι Αίθουσα Βασιλείας. Τι ασουνέν λατσσές σο βακερέλα ντα τι σικαβέν λέσκε ενδιαφέρον. Σαρ μπορεί τι βοηθίνελ ανταβά ι τζενές σο κερέλα μελέτη; Ντικχέν σο αβιλό-πες κο Ντμίτρι, σο μπολντιλό πριν από χάνικ μπρεσά ντα ακανά ισί διακονικός υπηρέτης. Καζόμ ντέλα-πες γκοντί πι πρώτη συνάθροιση, βακερέλα: «Εκ πφραλ ντικχλάς ότι λατζάβας ντα μπεσάβας αβριάλ κατά Αίθουσα Βασιλείας ντα αβιλό λατσσιμάσαρ τι λελ-μαν για τι τζας γιεκ αντρέ. Μπουτ τζενέ αβιλέ τι χαιρετίνεν-μαν. Ατσσιλόμ πουταρντέ μόσαρ. Μπεϊντιντόμας αζόμ μπουτ σο κα μανγκάβας τι τθεράς συνάθροιση κάθε ντιβές. Ποτές να νιωσάλομας αντικάς γιαβέρ φαρ».

13. Σαρ κα βοηθίνελ τουμαρό λατσσό παράδειγμας ι τζενές σο κερέλα μελέτη;

¹³ Ντεν ο λατσσό παράδειγμας. Τουμαρό λατσσό παράδειγμας κα βοηθίνελ ι τζενές σο κερέλα μελέτη τι αγαβέλ ότι αρακχλάς ι αλήθεια. (Ματθ. 5:​16) Ο Βιτάλι, σο ακανά ισί σκαπανέας κι Μολδαβία, βακερέλα: «Ντικχάβας σαρ τζουβντιόνας, σαρ σκεφτίνενας ντα σαρ συμπεριφερίντιβενας ο γιαβερά κι κχανγκιρί. Ανταβά κερντάς-μαν τι αβάβ σίγουρος ότι ο Μάρτυρες ι Ιεχωβάσκε πφιρένα μπαγιά κι Ντεβλέσκο ντρομ».

14. Σαρ μπορεί τι βοηθίνελ τουμαρό παράδειγμας εκχέ τζενές τι ερεσέλ κο μπολντιπέ;

¹⁴ Για τι ερεσέλ κο μπολντιπέ εκ τζενό σο κερέλα μελέτη, πρέπει τι κερέλ πι ζωγιάτε οντουλά σο σικλιόλα. Ανταβά νανέ πάντα εύκολος. Αλλά κάνα ντικχέλα σαρ βοηθίντιβενα τουμέν κατά αρχές ι Γραφιάκε, μπορεί τι μανγκέλ τι κερέλ-λεν βοβ-ντα. (1 Κορ. 11:1) Σκεφτίνεν σο αβιλό-πες κι Χαναέ, σο βακερέλα: «Ντικχάβας ότι ο πφραλά ντα ο πφενιά κερένας πουμαρέ ζωγιάτε οντουλά σο σικλιάβας. Ντικχάβας σαρ κα μπορίναβας τι νταβ ζορ, τι συγχωρίναβ ντα τι σικαβάβ αγάπη. Πάντα βακερένας λατσσέ πράγματα ι γιαβερένγκε. Μανγκάβας τι μοιάζαβ λέντε».

15. Σαρ βοηθίνελα-αμέν ο εδάφιος Παροιμίες 27:​17 τι αγαβάς σόσκε πρέπει τι αβάς αμαλά εκχέ τζενέσαρ σο κερέλα μελέτη καζόμ συνεχίνελα τι αβέλ κο συναθροίσεις;

¹⁵ Αβέν αμαλά ι τζενέσαρ σο κερέλα μελέτη. Καζόμ εκ τζενό συνεχίνελα τι αβέλ κο συναθροίσεις, μα τσσιναβέν τι σικαβέν λέσκε ενδιαφέρον. (Φιλιπ. 2:4) Κα μπορίνενας τι κερέν λέσαρ λάφι. Χωρίς τι ανέν-λες σε δύσκολη θέση, ισαρέν-λες σο κερντάς αλλαγές ντα πουτσέν-λες σαρ τζάλα πι μελετιάτε, σαρ ισί λέσκι φαμιλί ντα λέσκι μπουτί. Ανταβά μπορεί τι ανέλ-τουμέν πιο πασέ. Κάνα αβένα αμαλά ι τζενέσαρ, βοηθίνενα-λες τι ερεσέλ κο μπολντιπέ. (Διαβάνεν Παροιμίες 27:​17) Η Χαναέ ακανά ισί τακτική σκαπάνισσα. Καζόμ ανέλα πι γκοντιάτε ο βακίτι σο αρχισάλι τι τζαλ κο συναθροίσεις, βακερέλα: «Καζόμ κεράβας αμαλέν κι κχανγκιρί, μπεσάβας σαρ σαρ ι συναθροισιένγκε, ντα τζάβας ατζέ-ντα κάνα ισινόμας κχινί. Νακχάβας σουκάρ μι νεβέ αμαλέντζαρ, ντα ανταβά βοηθιντάς-μαν τι τσσιναβάβ τι κεράβ παρέα οντουλέντζαρ σο να υπηρετίνενας ι Ιεχωβάς. Μανγκάβας τι αβάβ πιο πασέ κο Ιεχωβά αλλά εμ κο πφραλά ντα κο πφενιά. Οτθάρ, αποφασιντόμ τι μπολντιάβ».

16. Σο γιαβέρ μπορίνενα τι κερέν για τι βοηθίνεν εκχέ τζενές σο κερέλα μελέτη τι νιωθίνελ ότι ισί σημαντικός ι κχανγκιριάκε;

¹⁶ Καζόμ εκ τζενό σο κερέλα μελέτη συνεχίνελα τι κερέλ αλλαγές πι ζωγιάτε, βοηθίνεν-λες τι νιωθίνελ ότι ισί σημαντικός ι κχανγκιριάκε. Μπορίνενα τι κερέν-λες ανταβά κάνα σικαβένα φιλοξενία. (Εβρ. 13:2) Καζόμ ανέλα πι γκοντιάτε ο βακίτι σο κερέλας μελέτη, ο Ντενίς, σο υπηρετίνελα κι Μολδαβία, ντέλα-πες γκοντί: «Μπουτ φαρ ο πφραλά καλίνενας μαν ντα μι ρομνιά για τι κεράς παρέα. Βακερένας αμένγκε σαρ ντικχλέας ο βας ι Ιεχωβάσκο πουμαρέ ζωγιάτε. Ανταβά ντινάς-αμέν μπουτ ζορ. Οντουλά παρέες βοηθιντέ-αμέν τι αβάς σίγουροι ότι μανγκάας τι υπηρετίνας ι Ιεχωβάς ντα ότι κα τθεράας εκ μπουτ σουκάρ ζωή άμα κα κεράας-λες ανταβά». Κάνα ο τζενό κα αβέλ μπίμπολντο ευαγγελιζόμενος, μανγκέν λέσταρ τι νικιόν γιεκ κο έργος. Ο Ντιέγκο, εκ πφραλ κατά Βραζιλία, βακερέλα: «Μπουτ πφραλά βακερένας μάνγκε τι νικιάς κο έργος. Ανταβά βοηθιντάς-μαν μπουτ τι σικλιάβ-λεν λατσσές. Αντικάς, σικλιλόμ μπουτ πράγματα ντα νιωσάλομ πιο πασέ κο Ιεχωβά ντα κο Ιησούς».

ΣΑΡ ΜΠΟΡΙΝΕΝΑ ΤΙ ΒΟΗΘΙΝΕΝ Ο ΠΡΕΣΒΥΤΕΡΟΙ;

17. Σαρ μπορίνενα ο πρεσβύτεροι τι βοηθίνεν ι τζενέν σο κερένα μελέτη;

¹⁷ Νακχέν σαάτι ι τζενέντζαρ σο κερένα μελέτη. Πρεσβύτεροι, άμα σικαβένα ότι μανγκένα ι τζενέν σο κερένα μελέτη ντα πφαμπόνα λένγκε, μπορίνενα τι βοηθίνεν-λεν τι ερεσέν κο μπολντιπέ. Μήπως κα μπορίνενας τι κερέν λέντζαρ λάφι κο συναθροίσεις; Βον κα αγαβέν ότι πφαμπόνα λένγκε άμα ντένα-τουμέν γκοντί λένγκο ναβ, ντα πιο μπουτ κάνα αρχίνενα τι ντεν απαντήσεις. Μήπως κα μπορίνενας καέκ φαρ τι αρακχέν σαάτι για τι τζαν εκχέ μελετιάτε σο κερέλα εκ γιαβέρ πφραλ ή πφεν; Μπορεί τι βοηθίνεν ι τζενές σο κερέλα μελέτη πιο μπουτ οντουλέσταρ σο μπεκλεντίνενα. Η Τζάκι, εκ σκαπάνισσα σο τζουβντιόλα κι Νιγηρία, βακερέλα: «Μπουτέ τζενένγκε κερέλα λένγκε εντύπωση κάνα σικλιόνα ότι ο πφραλ σο αβιλό μάντζαρ λένγκε μελετιάτε ισί πρεσβύτερος. Εκ τζενό σο κερέλα μελέτη βακερντάς: “Εκ παπάζι να κα κερέλας-λες ποτές ανταβά. Τζάλα σάντε κο χουλανέ ντα σάντε άμα κα ποκινέν-λες!”» Οντουβά τζενό ακανά τζάλα κο συναθροίσεις.

18. Σαρ μπορίνενα ο πρεσβύτεροι τι κερέν οντουβά σο βακερέλα ο εδάφιος Πράξεις 20:28;

¹⁸ Σικλιαρέν ντα ντεν ζορ οντουλέν σο τθερένα μελέτες. Πρεσβύτεροι, τθερένα ι μπουτ σημαντική ευθύνη τι βοηθίνεν ι πφραλέν ντα ι πφενίν τι κερέν λατσσές πουμαρό έργος ντα πουμαρέ μελέτες. (Διαβάνεν Πράξεις 20:​28) Άμα οντουλά σο σικλιαρένα λατζάνα τι κερέν ι μελέτη ανγκλά-τουμέντε, πουτσέν-λεν άμα μανγκένα τι κερέν-λα τουμέν. Η Τζάκι βακερέλα: «Μπουτ φαρ ο πρεσβύτεροι πουτσένα-μαν σαρ τζάνα μο μελέτες. Κάνα τθεράβα εκ δυσκολία εκχέ μελετιάσαρ, ντένα-μαν μπουτ λατσσέ συμβουλές». Ο πρεσβύτεροι μπορίνενα τι κερέν μπουτ πράγματα για τι ντεν ζορ οντουλέν σο τθερένα μελέτες ντα τι βοηθίνεν-λεν μα τι τσσιναβέν τι κερέν ο πιο λατσσό. (1 Θεσ. 5:​11) Η Τζάκι βακερέλα κάτι γιαβέρ-ντα: «Μπεϊντίναβα κάνα ο πρεσβύτεροι ντένα-μαν ζορ ντα βακερένα μάνγκε ότι εκτιμίνενα οντουλά σο κεράβα. Ασακέ λάφια λοκχιαρένα-μαν σαρ εκ ποτήρι σουρντό πανί κάνα κερέλα κάψα. Λένγκο ισαριπέ βοηθίνελα-μαν τι νιωθίναβ ότι κεράβα λατσσές μο μελέτες ντα μπαριαρέλα μι χαρά».​—Παρ. 25:25.

19. Καλέ πραγμάσκε μπορίνασα τι αβάς χαρούμενοι σαρέ;

¹⁹ Ατζέ-ντα άμα να τθεράσα εκ μελέτη, μπορίνασα τι βοηθίνας εκχέ τζενές τι ερεσέλ κο μπολντιπέ. Κάνα τζάσα εκχέ μελετιάτε σο κερέλα εκ γιαβέρ, μπορίνασα τι προετοιμάντιβας λατσσές για τι βακεράς κάτι σο κα βοηθίνελ οντουλές σο σικλιαρέλα. Μπορίνασα τι αβάς αμαλά ι τζενέντζαρ σο κερένα μελέτη κάνα κα αρχίνεν τι αβέν κι Αίθουσα Βασιλείας, ντα μπορίνασα τι αβάς λατσσό παράδειγμας λένγκε. Ο πρεσβύτεροι ντένα ζορ εμ ι τζενέν σο κερένα μελέτη κάνα νακχένα σαάτι λέντζαρ εμ οντουλέν σο τθερένα μελέτες κάνα σικλιαρένα-λεν ντα ισαρένα-λεν. Ισινάμ μπουτ χαρούμενοι κάνα μπορίνασα τι κεράς κάτι, ατζέ-ντα κάτι χουρντό, για τι βοηθίνας εκχέ τζενές τι μανγκέλ ντα τι υπηρετίνελ αμαρέ Νταντές, ι Ιεχωβάς!