Σο Μανγκέλα τι Βακερέλ Τουμένγκε η Αφοσιωμέ Αγάπη ι Ιεχωβάσκι;

1. Σο βακερέλα αμένγκε ο Ιεχωβά τι κεράς;

Η ΑΦΟΣΙΩΜΕ αγάπη ισί μπουτ σημαντική ι Ιεχωβάσκε. (Ωσηέ 6:6) Μανγκέλα τι ντικχέλ ότι ισί σημαντική αμένγκε-ντα. Αντράλ κατά προφήτης Μιχαίας, ο Ντεβέλ βακερέλα αμένγκε “τι μανγκάς ι αφοσιωμέ αγάπη”. (Μιχ. 6:8, υποσ.) Αλλά για τι κεράς-λες ανταβά, πρέπει τι τζανάς σο ισί αφοσιωμέ αγάπη.

2. Σο ισί η αφοσιωμέ αγάπη;

² Σο ισί η αφοσιωμέ αγάπη; Ο λάφι «αφοσιωμέ αγάπη» αρακχάσα-λες περίπου 230 φορές κι Μετάφραση ι Νεβέ Ντουνιάσκι. Σο ισί; Άμα εκ τζενό τθερέλα αφοσιωμέ αγάπη, μανγκέλα εκχέ γιαβερέ τζενές αζόμ μπουτ σο να κα τσσιναβέλ τι μανγκέλ-λες ντα κα ατσσόλ πιστά πασέ λέστε. Ανταβά λάφι βακέρντιβελα πο μπουτ κι αγάπη σο τθερέλα ο Ντεβέλ ι τζενένγκε, αλλά βακέρντιβελα επίσης κι αγάπη-ντα σο τθερένα ο τζενέ ο εκ ι γιαβερέσκε. Ο Ιεχωβά ισί ο πο λατσσό παράδειγμας οπράλ ανταλέστε. Ανταλέ μαθημάστε, κα ντικχάς σαρ σικαβέλα ο Ιεχωβά αφοσιωμέ αγάπη κο τζενέ. Κο γιαβέρ μάθημας, κα ντικχάς σαρ μπορίνασα αμέν σαρ υπηρέτες ι Ιεχωβάσκε τι μοιάζας λέστε κάνα σικαβάσα αφοσιωμέ αγάπη ο εκ κο γιαβέρ.

Ο ΙΕΧΩΒΑ ΙΣΙ «ΠΦΕΡΝΤΟ ΑΦΟΣΙΩΜΕ ΑΓΑΠΗ»

3. Καλά πράγματα μουτθαντάς ο Ιεχωβά κο Μωυσής πέσκε;

³ Χάνικ αφού νασλέ ο Ισραηλίτες κατά Αίγυπτος, ο Ιεχωβά βακερντάς κο Μωυσής κάτι σο τθερέλας τι κερέλ Λέσκε ναβέσαρ ντα Λέσκε ιδιοτητέντζαρ. Βακερντάς: «Ιεχωβά, Ιεχωβά, Ντεβέλ σο τζιτζίνελα ντα πφαμπόλα ι γιαβερένγκε, σο να χολιάνελα εύκολα, ντα ισί πφερντό αφοσιωμέ αγάπη ντα αλήθεια, σο σικαβέλα αφοσιωμέ αγάπη χιλιάδες τζενένγκε, σο συγχωρίνελα λάθη ντα αμαρτίες». (Έξοδ. 34:6, 7) Ανταλέ σουκάρ λαφίντζαρ, ο Ιεχωβά βακερντάς κο Μωυσής κάτι μπουτ σημαντικός για την αφοσιωμέ αγάπη σο σικαβέλα. Καβά ισί ανταβά σημαντικός πράγμας;

4, 5. (α) Σο βακερντάς ο Ιεχωβά πέσκε; (β) Καλά ερωτήσεις κα ντικχάς;

⁴ Για τι σικαβέλ αμένγκε πο νεαυτός, ο Ιεχωβά να βακερντάς σάντε ότι τθερέλα αφοσιωμέ αγάπη αλλά ότι ισί «πφερντό αφοσιωμέ αγάπη». Ατζέκ εφτά φαρ βακέρντιβελα ανταβά κι Αγία Γραφή. (Αριθ. 14:​18· Νεεμ. 9:​17· Ψαλμ. 86:​15· 103:8· 145:8· Ιωήλ 2:​13· Ιωνάς 4:2) Σαρέ ανταλά φαρ, βακέρντιβελα σάντε ι Ιεχωβάσκε, ποτές τζενένγκε. Ισί μπουτ σημαντικός ότι ο ίδιος ο Ιεχωβά ντινάς αζόμ μπαρί προσοχή κι αφοσιωμέ αγάπη σο τθερέλα. Σίγουρα, η αφοσιωμέ αγάπη ισί σημαντική λέσκε.b Άκ’ σόσκε ο βασιλιάς Δαβίδ βακερντάς ακαλά λάφια: «Ιεχωβά, τι αφοσιωμέ αγάπη ερεσέλα μέχρι κο ουρανός . . . Καζόμ σημαντική ισί τι αφοσιωμέ αγάπη, Ντέβλα! Κι βουτσσάλ τι πακίνγκι τσσουβένα-πες ο τσσαβέ ι τζενένγκε». (Ψαλμ. 36:5, 7) Ισί η αφοσιωμέ αγάπη ι Ντεβλέσκι αζόμ σημαντική αμένγκε καζόμ ισινέ ι Δαβιδίσκε;

⁵ Για τι αγαβάς πο λατσσές σο μανγκέλα τι βακερέλ αφοσιωμέ αγάπη, κα ντικχάς ντούι ερωτήσεις. Κάστε σικαβέλα ο Ιεχωβά αφοσιωμέ αγάπη; Nτα σαρ βοηθίντιβασα κάνα ο Ιεχωβά σικαβέλα αμένγκε αφοσιωμέ αγάπη;

ΚΑΣΤΕ ΣΙΚΑΒΕΛΑ Ο ΙΕΧΩΒΑ ΑΦΟΣΙΩΜΕ ΑΓΑΠΗ;

6. Κάστε σικαβέλα ο Ιεχωβά αφοσιωμέ αγάπη;

⁶ Κάστε σικαβέλα ο Ιεχωβά αφοσιωμέ αγάπη; Η Γραφή βακερέλα ότι μπορίνασα τι μανγκάς μπουτ πράγματα σαρ ισί «ι μολ ντα ο λάδι», «ι διόρθωση», «ο σικλιαριπέ» ντα «ι σοφία». (Παρ. 12:1· 21:​17· 29:3) Όμως, η αφοσιωμέ αγάπη να σικάντιβελα ποτές πραγματένγκε. Σικάντιβελα σάντε τζενένγκε. Αλλά ο Ιεχωβά να σικαβέλα αφοσιωμέ αγάπη κάσκε τι αβέλ. Σικαβέλα-λα οντουλένγκε σο ισί μπουτ λατσσέ αμαλά λέσαρ. Αμαρό Ντεβέλ ισί αφοσιωμέ πι αμαλέντε. Τθερέλα μπουτ σουκάρ σκοπός λένγκε ντα να κα μουκχέλ-λεν σο-ντα τι αβέλ-πες.

7. Σαρ σικαντάς ο Ιεχωβά ότι μανγκέλα σαρέ ι τζενέν;

⁷ Ο Ιεχωβά σικαντάς ότι μανγκέλα σαρέ ι τζενέν. Ο Ιησούς βακερντάς κο Νικόδημος: «O Ντεβέλ μανγκλάς αζόμ μπουτ ι ντουνιάς [σαρέ ι τζενέν] σο ντινάς πι μοναδικέ Τσσαβές, για μα τι καταστραφίντιβελ οντουβά σο σικαβέλα πίστη λέστε, αλλά τι τθερέλ ζωή για πάντα».​—Ιωάν. 3:1, 16· Ματθ. 5:​44, 45.

8, 9. (α) Σόσκε σικαβέλα ο Ιεχωβά αφοσιωμέ αγάπη πι υπηρετόνγκε; (β) Σο κα ντικχάς πο τελέ;

⁸ Σαρ βακερντάμ πο οπρέ, ο Ιεχωβά σικαβέλα πι αφοσιωμέ αγάπη σάντε οντουλένγκε σο ισί μπουτ λατσσέ αμαλά λέσαρ, δηλαδή πι υπηρετόνγκε. Ανταβά ντικχίντιβελα μπουτ λατσσές οντουλένταρ σο βακερντάς ο βασιλιάς Δαβίδ ντα ο προφήτης Δανιήλ. Για παράδειγμας, ο Δαβίδ βακερντάς: «Μα τσσίναβ τι σικαβές τι αφοσιωμέ αγάπη οντουλένγκε σο τζανένα-τουτ». «Η αφοσιωμέ αγάπη ι Ιεχωβάσκι ατσσόλα για πάντα οντουλένγκε σο νταρένα λέσταρ». Ο Δανιήλ βακερντάς: «Ω! Ιεχωβά, σο ισινάν αληθινός Ντεβέλ, τούι σο . . . σικαβέσα αφοσιωμέ αγάπη οντουλένγκε σο μανγκένα-τουτ ντα κερένα το εντολές». (Ψαλμ. 36:​10· 103:​17· Δαν. 9:4) Σαρ βακερένα ανταλά λάφια, ο Ιεχωβά σικαβέλα αφοσιωμέ αγάπη πι υπηρετόνγκε επειδή τζανένα-λες, νταρένα λέσταρ, μανγκένα-λες ντα κερένα λέσκε εντολές. Ο Ιεχωβά σικαβέλα πι αφοσιωμέ αγάπη σάντε οντουλέντε σο υπηρετίνενα-λες αντικάς σαρ μανγκέλα βοβ.

⁹ Πριν τι υπηρετίνας ι Ιεχωβάς, σικαβέλας αμένγκε σάντε ι αγάπη σο σικαβέλα σαρέ ι τζενένγκε. (Ψαλμ. 104:​14) Όμως, σαρ υπηρέτες λέσκε, σικαβέλα αμένγκε πι αφοσιωμέ-ντα αγάπη. Ο Ιεχωβά βακερέλα πι υπηρετόνγκε: «Να κα τσσιναβάβ τι σικαβάβ τούκε μι αφοσιωμέ αγάπη». (Ησ. 54:​10) Βα, σαρ ντικχλάς ο Δαβίδ-ντα «ο Ιεχωβά κα ξεχωρίνελ οντουλές σο ισί αφοσιωμέ λέστε». (Ψαλμ. 4:3) Σο πρέπει τι τσσίντελ-αμέν ανταβά τι μανγκάς τι κεράς; Ο ψαλμωδός βακερντάς: «Κον ισί γκοντιαβέρ κα ντικχέλ-λεν ανταλά ντα κα σκεφτίνελ προσεκτικά σαρ σικαβέλα ο Ιεχωβά πι αφοσιωμέ αγάπη». (Ψαλμ. 107:​43) Ανταγιά λατσσί συμβουλή αβέλα κατά Ιεχωβά, οτθάρ ακανά κα ντικχάς τριν τρόπους σο ο Ιεχωβά σικαβέλα πι αφοσιωμέ αγάπη ντα σαρ βοηθίντιβασα κάνα σικαβέλα-λα αμένγκε.

ΣΑΡ ΒΟΗΘΙΝΕΛΑ-ΑΜΕΝ Η ΑΦΟΣΙΩΜΕ ΑΓΑΠΗ Ι ΙΕΧΩΒΑΣΚΙ;

10. Σαρ βοηθίνελα-αμέν η αφοσιωμέ αγάπη ι Ιεχωβάσκι σο ατσσόλα για πάντα; (Ψαλμός 31:7)

¹⁰ Η αφοσιωμέ αγάπη ι Ιεχωβάσκι ατσσόλα για πάντα. Ανταβά βακέρντιβελα 26 φορές κο Ψαλμός 136. Κο πρώτος εδάφιος διαβάνασα: «Ευχαριστίνεν ι Ιεχωβάς αντράλ τουμαρέ γκίσταρ, σόσκε βοβ ισί λατσσό· η αφοσιωμέ αγάπη σο σικαβέλα αμένγκε ατσσόλα για πάντα». (Ψαλμ. 136:1) Κο εδάφια 2 μέχρι 26 αρακχάσα ο ρεφρέν «σόσκε λέσκι αφοσιωμέ αγάπη ατσσόλα για πάντα». Καζόμ διαβάνασα ο γιαβερά εδάφια ανταλέ ψαλμόσταρ, σίγουρα κερέλα αμένγκε εντύπωση σο ντικχάσα καζόμ μπουτέ τροπόντζαρ σικαβέλα αμένγκε ο Ιεχωβά αφοσιωμέ αγάπη, μάλιστα χωρίς τι ατσσόλ. Ο ρεφρέν «σόσκε λέσκι αφοσιωμέ αγάπη ατσσόλα για πάντα» κερέλα-αμέν τι αβάς σίγουροι ότι η αγάπη σο τθερέλα ο Ντεβέλ πι λαόσκε να κα αλλάνελ. Καζόμ ζορ λάσα σο τζανάσα ότι ο Ιεχωβά να κα μουκχέλ ποτές πι υπηρετόν! Οκιά μπάνταρ, κάνα αρχίνελα τι σικαβέλ πι αγάπη εκχέ τζενέσκε σο υπηρετίνελα-λες ατσσόλα πασέ λέστε, ντα πο μπουτ κο ντιβεσά σο αβέλα στεναχώρια. Σαρ βοηθίντιβασα; Επειδή τζανάσα ότι ο Ιεχωβά ισί πασέ αμέντε ντέλα-αμέν ι χαρά ντα ι ζορ σο χρειαζίντιβασα για τι νταϊντίνας ο στεναχώριες σο τθεράσα ντα τι συνεχίνας τι πφιράς κο ντρομ σο γκερέλα κι ζωή.​—Διαβάνεν Ψαλμός 31:7.

11. Σο τσσίντελα ι Ιεχωβάς τι συγχωρίνελ σαρ βακερέλα ο εδάφιος Ψαλμός 86:5;

¹¹ Η αφοσιωμέ αγάπη ι Ντεβλέσκι τσσίντελα-λες τι συγχωρίνελ. Κάνα ο Ιεχωβά ντικχέλα εκχέ αμαρτωλέ τζενές σο μετανιωσάλο ντα σο τσσιναβέλα ο μπέτι πράγματα σο κερέλας, η αφοσιωμέ αγάπη τσσίντελα-λες τι συγχωρίνελ-λες. Ο ψαλμωδός Δαβίδ βακερντάς ι Ιεχωβάσκε: «Να κερντάς αμένγκε σύμφωνα με το αμαρτίες σο κερντάμ, ούτε αντάς οπρ’ αμέντε οντουβά σο αξίναας για το λάθη σο κερντάμ». (Ψαλμ. 103:​8-11) Ο Δαβίδ, οντουλένταρ σο νακχλάς, τζανέλας καζόμ μπαρό πράγμας ισινέ τι χαν εκχέ τζενές ο τύψεις. Αλλά σικλιλό επίσης ότι ο Ιεχωβά ισί “έτοιμος τι συγχωρίνελ”. Σο τσσίντελα ι Ιεχωβάς τι συγχωρίνελ; Η απάντηση ισί κο εδάφιος Ψαλμός 86:5. (Διαβάνεν) Βα, σαρ βακερντάς ο Δαβίδ πι προσευχιάτε, ο Ιεχωβά συγχωρίνελα επειδή ισί πφερντό αφοσιωμέ αγάπη σαρέ οντουλένγκε σο ντένα-λες βίκος.

12, 13. Σο κα βοηθίνελ-αμέν άμα χάνα-αμέν ο τύψεις ι πουρανέ αμαρτιένγκε σο κερντάμ;

¹² Κάνα κεράσα εκ αμαρτία, ισί σωστός, ατζέ-ντα λατσσό, τι τθεράς τύψεις. Ανταβά μπέκιμ τι τσσίντελ-αμέν τι μετανιώνας ντα τι κεράς πράγματα για τι διορθώνας αμαρέ λάθη. Μερικοί υπηρέτες όμως να τσσιναβένα τι τθερέν τύψεις πουμαρέ πουρανέ αμαρτιένγκε. Βον συνεχίνενα τι πακιάν ότι ο Ιεχωβά ποτές να κα συγχωρίνελ-λεν, παρόλο σο μανγκλέ συγχώρηση ντα τσσιναντέ ο λάθος πράγματα σο κερένας. Κα βοηθίντιβεν τι τσσιναβέν τι νιωθίνεν αντικάς άμα κα αγαβέν ότι ο Ιεχωβά μανγκέλα μπαγιά τι σικαβέλ τουμένγκε πι αφοσιωμέ αγάπη.

¹³ Σαρ βοηθίντιβασα: Παρόλο σο ισινάμ ατελείς, μπορίνασα τι υπηρετίνας χαρούμενα ι Ιεχωβάς με πάκι συνείδηση. Ανταβά αβέλα-πες σόσκε «ο ρατ ι Ιησούσκο, λέσκε Τσσαβέσκο, καθαρίνελα-αμέν σαρέ κατά αμαρτίες». (1 Ιωάν. 1:7) Κάνα η ατέλεια κερέλα-τουμέν τι χασαρέν τουμαρί ζορ, μα μπιστρέν ότι ο Ιεχωβά μανγκέλα μπαγιά τι συγχωρίνελ-τουμέν άμα μετανιωσάλεν. Ντικχέν σαρ σικαντάς ο Δαβίδ ι σχέση σο τθερέλα ι αφοσιωμέ αγάπη με την συγχώρηση. Γραφιντάς: «Επειδή, σαρ ναστί γκιντιόλα καζόμ ντουρ ισί ο ουρανός κατά πφουβ αντικάς ναστί γκιντιόλα η αφοσιωμέ αγάπη σο τθερέλα οντουλένγκε σο νταρένα λέσταρ. Καζόμ ντουρ ισί η ανατολή κατά δύση, αζόμ ντουρ τσσουντάς αμένταρ αμαρέ λάθη». (Ψαλμ. 103:​11, 12) Βα, ο Ιεχωβά ισί έτοιμος τι «συγχωρίνελ μπουτ».​—Ησ. 55:7.

14. Σαρ σικαντάς ο Δαβίδ ο τρόπος σο αρακχαβέλα-αμέν η αφοσιωμέ αγάπη ι Ντεβλέσκι;

¹⁴ Η αφοσιωμέ αγάπη ι Ντεβλέσκι αρακχαβέλα. Αντράλ εκχέ προσευχιάταρ κο Ιεχωβά, ο Δαβίδ βακερντάς: «Τούι ισινάν ο τθαν σο γκεραβάβα-μαν· κα αρακχαβές-μαν για μα τι πφανγκιόλ μο γκι. Κα μπουτσσαβές ντονταλάι μάνταρ τζενέν σο κα ντεν βίκος κατά χαρά σο κα τθερέν επειδή σώνεσα-μαν. . . . Οντουβά σο ντέλα μπέσα κο Ιεχωβά αρακχάντιβελα λέσκε αφοσιωμέ μανγκιμάσαρ». (Ψαλμ. 32:7, 10) Κο πουρανέ μπρεσά, ο βουτσσέ ντουβάρια σο τθερέλας εκ πόλη αρακχαβένας ι τζενέν κατά ντουσμάνια. Η αφοσιωμέ αγάπη ι Ιεχωβάσκι ισί σαρ εκ βουτσσό ντουβάρι σο αρακχαβέλα-αμέν σαρέ κατά πράγματα σο κα μπορίνενας τι κερέν ζιάνι κι φιλία σο τθεράσα λέσαρ. Επίσης, η αφοσιωμέ αγάπη ι Ιεχωβάσκι τσσίντελα-λες τι ταρτίνελ-αμέν πασέ πέστε.​—Ιερ. 31:3.

15. Σαρ ισί η αφοσιωμέ αγάπη ι Ιεχωβάσκι σαρ εκ τθαν σο αρακχαβέλα-αμέν;

¹⁵ Ο Δαβίδ βακερντάς ατζέκ εκ παράδειγμας για τι σικαβέλ σαρ αρακχαβέλα ο Ντεβέλ πι λαός. Γραφιντάς: «Ντέβλα μου, . . . ισινάν ο τθαν σο αρακχαβέλα-μαν, ο Ντεβέλ σο σικαβέλα μάνγκε αφοσιωμέ αγάπη». Ο Δαβίδ βακερντάς ακαβά-ντα ι Ιεχωβάσκε: «Βοβ ισί μι αφοσιωμέ αγάπη ντα μο κάστρος, ο τθαν σο αρακχαβέλα-μαν ντα Οντουβά σο σώνελα-μαν, μι ασπίδα ντα Οντουβά σο αρακχλόμ αρακχαϊπέ λέστε». (Ψαλμ. 59:​17· 144:2) Σόσκε βακερντάς ο Δαβίδ ότι η αφοσιωμέ αγάπη ι Ιεχωβάσκι ισί σαρ τθαν σο αρακχαβέλα ντα πύργος; Κάι-ντα τι τζουβντιάσα κι πφουβ, άμα ισινάμ υπηρέτες λέσκε, ο Ιεχωβά ντέλα-αμέν ο αρακχαϊπέ σο χρειαζίντιβασα για τι αρακχαβάς ι φιλία σο τθεράσα λέσαρ. Ανταλά λάφια αρακχάσα-λεν κο Ψαλμός-ντα 91. Οντουβά σο γραφιντάς ανταβά ψαλμός βακερντάς: «Κα βακεράβ κο Ιεχωβά: “Τούι αρακχαβέσα-μαν, τούι ισινάν μο κάστρος”». (Ψαλμ. 91:​1-3, 9, 14) Ο Μωυσής-ντα βακερντάς ότι ισί σαρ τθαν σο αρακχαβέλα. (Ψαλμ. 90:1, υποσ.) Χάνικ πριν τι μερέλ, ο Μωυσής βακερντάς ατζέκ εκ σουκάρ παράδειγμας. Γραφιντάς: «Ο Ντεβέλ αρακχαβέλα κατά πουρανέ μπρεσά, ασταρέλα-τουτ πι ζουρανέ μουσιέντζαρ σο ατσσόνα για πάντα». (Δευτ. 33:​27) Σο σικαβέλα αμένγκε ι Ιεχωβάσκε ο λάφι «ασταρέλα-τουτ πι ζουρανέ μουσιέντζαρ σο ατσσόνα για πάντα»;

16. Καλέ ντουέ τροπόντζαρ ισινάμ ευλογιμέ; (Ψαλμός 136:23)

¹⁶ Κάνα ισινάμ σίγουροι ότι ο Ιεχωβά κα αρακχαβέλ-αμέν, λοκχιόλα αμαρό γκι. Αλλά μπάζιμα μπέκιμ τι νιωθίνασα ότι να τθεράσα ιτς ζορ ντα ότι ναστί κεράσα τίποτα για τι αρακχάς-λα πάλι. Σο κα κερέλ ο Ιεχωβά αμένγκε κάνα κα αβέλ-πες κάτι ασακό; (Διαβάνεν Ψαλμός 136:​23) Κα ασταρέλ-αμέν πι ζουρανέ μουσιέντζαρ, κα βάντελ-αμέν κοβλές ντα κα βοηθίνελ-αμέν τι ατσσάς πάλι αμαρέ πιντρέντε. (Ψαλμ. 28:9· 94:​18) Σαρ βοηθίντιβασα; Τζανάσα ότι πάντα μπορίνασα τι ντας μπέσα κο Ντεβέλ. Ανταβά κα βοηθίνελ-αμέν μα τι μπιστράς ότι ισινάμ ευλογιμέ ντουέ τροπόντζαρ. Ο εκ τανό ισί ότι τθεράσα ο αρακχαϊπέ ι Ντεβλέσκο κάι-ντα τι τζουβντιάσα. Ντα ο γιαβέρ ισί ότι αμαρό Ντατ σο μανγκέλα-αμέν πφαμπόλα αμένγκε μπουτ.

ΙΣΙΝΑΜ ΣΙΓΟΥΡΟΙ ΟΤΙ Ο ΝΤΕΒΕΛ ΝΑ ΚΑ ΤΣΣΙΝΑΒΕΛ ΤΙ ΣΙΚΑΒΕΛ ΑΜΕΝΓΚΕ ΑΦΟΣΙΩΜΕ ΑΓΑΠΗ

17. Καλέ πραγμάσκε ισινάμ σίγουροι επειδή ο Ιεχωβά σικαβέλα αμένγκε αφοσιωμέ αγάπη; (Ψαλμός 33:​18-22)

¹⁷ Σαρ σικλιλάμ, σο-ντα δυσκολίες τι τθεράσα, ισινάμ σίγουροι ότι ο Ιεχωβά κα βοηθίνελ-αμέν τι συνεχίνας τι αβάς λατσσέ αμαλά λέσαρ. (2 Κορ. 4:​7-9) Ο προφήτης Ιερεμίας βακερντάς: «Κατά αφοσιωμέ αγάπη ι Ιεχωβάσκι να ερεσλάμ ατζέ κο τέλος αμαρό, σόσκε βοβ ποτές να κα τσσιναβέλ τι τζιτζίνελ αμένγκε». (Θρ. 3:​22) Ισινάμ σίγουροι ότι ο Ιεχωβά να κα τσσιναβέλ τι σικαβέλ αμένγκε αφοσιωμέ αγάπη επειδή η Γραφή βακερέλα αμένγκε ότι «η γιακχ ι Ιεχωβάσκι ντικχέλα οντουλέν σο νταρένα λέσταρ, οντουλέν σο μπεκλεντίνενα τι σικαβέλ λένγκε πι αφοσιωμέ αγάπη».​—Διαβάνεν Ψαλμός 33:​18-22.

18, 19. (α) Σο πρέπει τι τθεράς αμαρέ γκοντιάτε; (β) Σο κα ντικχάς κο γιαβέρ μάθημας;

¹⁸ Σο πρέπει τι τθεράς αμαρέ γκοντιάτε; Πριν τι αρχίνας τι υπηρετίνας ι Ιεχωβάς, σικαβέλας αμένγκε ι αγάπη σο σικαβέλα σαρέ ι τζενένγκε, αλλά σαρ υπηρέτες λέσκε βοηθίντιβασα κατά αφοσιωμέ-ντα αγάπη σο σικαβέλα. Ανταγιά αγάπη, τσσίντελα ι Ιεχωβάς τι ανγκαλιάνελ-αμέν πι ζουρανέ μουσιέντζαρ σο αρακχαβένα. Κα τθερέλ-αμέν πάντα πασέ πέστε ντα κα κερέλ σαρέ οντουλά σο ντινάς-αμέν πο λάφι τι κερέλ. Μανγκέλα τι αβάς λέσκε αμαλά για πάντα! (Ψαλμ. 46:1, 2, 7) Οτθάρ, σο-ντα δοκιμασία τι νακχάσα, ο Ιεχωβά κα ντελ-αμέν ι ζορ σο χρειαζίντιβασα για τι ατσσάς λατσσέ αμαλά λέσαρ.

¹⁹ Ντικχλάμ σαρ σικαβέλα ο Ιεχωβά αφοσιωμέ αγάπη πι υπηρετόντε. Μπεκλεντίνελα όμως αμένταρ-ντα τι σικαβάς αφοσιωμέ αγάπη ο εκ ι γιαβερέσκε. Σαρ μπορίνασα τι κεράς-λες ανταβά; Ο γιαβέρ μάθημας κα κερέλ λάφι ανταλέ σημαντικέ πραγμάσκε.