Ο Λαός ι Ιεχωβάσκο Μανγκέλα ι Δικαιοσύνη

1. Καγιά δοκιμασία αρακχλάς ανγκλά-πέστε ο Ιωσήφ, ντα σο κερντάς;

Ο ΙΩΣΗΦ, ι Ιακωβίσκο τσσαβό, αρακχλάς ανγκλά-πέστε εκ πφαρί δοκιμασία. Εκ τζουβέλ βακερέλας λέσκε: «Σοβ μάντζαρ». Ισινέ η ρομνί λέσκε κυριόσκι, ι Πετεφρίσκι. Ο Ιωσήφ να ασουντάς-λα. Εκ τζενό αντιβές κα μπορίνελας τι πουτσέλ πο νεαυτός: “Σόσκε γκιλό κόντρα ο Ιωσήφ οντουλέ πειρασμόστε;” Ο Πετεφρής να ισινέ οτθέ. Ντα ο Ιωσήφ ισινέ δούλος οντουλέ κχερέστε. Ανταγιά τζουβέλ σίγουρα κα μπορίνελας τι τσσιντικιαρέλ-λες μπουτ άμα να ασουνέλας-λα. Ο Ιωσήφ όμως, κάθε φαρ σο βόι βακερέλας λέσκε τι σοβέλ λάσαρ, να ντέλας-λα καν. Σόσκε; Βοβ βακερντάς: «Σαρ κα μπορίναβας τι κεράβ ανταβά μπουτ μπέτι πράγμας ντα αντικάς τι τζαβ κόντρα κο Ντεβέλ;»​—Γέν. 39:​7-12.

2. Σαρ τζανέλας ο Ιωσήφ ότι τι τζαλ εκχέ παντριμέ τζουβλιάσαρ ισινέ αμαρτία κόντρα κο Ντεβέλ;

² Σαρ τζανέλας ο Ιωσήφ ότι τι τζαλ εκχέ παντριμέ τζουβλιάσαρ ισινέ εκ «μπουτ μπέτι πράγμας» κο γιακχά λέσκε Ντεβλέσκε; Ο Νόμος ι Μωυσίσκο, σο βακερέλας ι ξεκάθαρη εντολή: «Δεν πρέπει τι τζας γιαβερέσαρ ενώ ισινάν παντριμέ», γραφίντιλο ντούισελ μπρεσά πο σοράν. (Έξοδ. 20:​14) Ο Ιωσήφ όμως τζανέλας ι Ιεχωβάς αζόμ λατσσές σο αγαβέλας σαρ ντικχέλας Βοβ ο λουμνιπέ. Για παράδειγμας, ο Ιωσήφ σίγουρα τζανέλας ότι ο σκοπός ι Ιεχωβάσκο ι μπιαβέσκε ισινέ τι παντρίνελ εκ μουρς εκχέ τζουβλιάσαρ. Ντα ασουντάας σο κερντάας ο Ιεχωβά ντούι φαρ για τι αρακχαβέλ λέσκε προγιαγιά, ι Σαρρά, για μα τι λατζαβκιαρέν-λα. Πο σοράν, ο Ντεβέλ αρακχαντάς ι Ισαακίσκε ρομνιά, ι Ρεβεκκά. (Γέν. 2:​24· 12:​14-20· 20:​2-7· 26:​6-11) Καζόμ ο Ιωσήφ ντέλας-πες γκοντί ανταλά πράγματα, αγαβέλας σο ισινέ σωστός ντα σο ισινέ λάθος κο γιακχά κι Ντεβλέσκε. Επειδή τθερέλας μανγκιπέ πι Ντεβλέσκε, ι Ιεχωβάσκε, μανγκέλας λέσκε δίκαιοι κανόνες-ντα. Οτθάρ, σο-ντα τι αβέλας-πες, κα ντέλας-λεν καν.

3. Σο κα σικλιάς ανταλέ μαθημάστε;

³ Μανγκένα τουμέν ι δικαιοσύνη; Σίγουρα βα. Αλλά σαρέ ισινάμ ατελείς, ντα άμα να τθεράσα αμαρί γκοντί, ο ντουνιάς μπορεί εύκολα τι κερέλ-αμέν τι ντικχάς ι δικαιοσύνη σαρ ντικχέλα-λα βοβ. (Ησ. 5:​20· Ρωμ. 12:2) Οτθάρ, κα σικλιάς σο ισί δικαιοσύνη ντα σο λατσσιπέ ντικχάσα κάνα μανγκάσα-λα. Σοράν, κα ντικχάς τριν πράγματα σο μπορίνασα τι κεράς για τι μανγκάς πο μπουτ ι Ιεχωβάσκε κανόνες.

ΣΟ ΙΣΙ ΔΙΚΑΙΟΣΥΝΗ;

4. Σο λάθος πράγματα πακιάνα ι δικαιοσυνιάκε μπουτ τζενέ;

⁴ Μπουτ τζενέ πακιάνα ότι κον ισί δίκαιος, ισί μπαρικανό, κρίνελα ι γιαβερέν ή αμντίνελα-πες πο οπρέ κατά γιαβερά. Αλλά ο Ντεβέλ να μπεϊντίνελα-λεν ιτς ανταλά. Κάνα ο Ιησούς ισινέ κι πφουβ, σικαντάς καζόμ μπαρό λάθος κερένας ο αρχηγοί ι θρησκειάκε αζομάν, σο τσσουβένας ανγκλάλ πουμαρί δικαιοσύνη. (Εκκλ. 7:​16· Λουκ. 16:​15) Εκ τζενό σο ισί μπαγιά δίκαιος, ποτές να αμντίνελα-πες πο οπρέ κατά γιαβερά.

5. Σαρ σικαβέλα η Αγία Γραφή, σο ισί δικαιοσύνη; Βακερέν παραδείγματα.

⁵ Η δικαιοσύνη ισί σουκάρ ιδιότητα. Χάνικ λαφίντζαρ, μανγκέλα τι βακερέλ τι κεράς ανταβά σο ισί σωστός ντα δίκαιος κο γιακχά κι Ιεχωβά Ντεβλέσκε. Κι Αγία Γραφή, ο λάφια σο μεταφράντιβενα «δικαιοσύνη» σικαβένα εκχέ τζενές σο ντέλα καν κο πο σωστοί κανόνες​—κο κανόνες κι Ιεχωβάσκε. Για παράδειγμας, ο Ιεχωβά ντινάς εντολή ότι ο τζενέ σο μπικινένας έπρεπε τι τθερέν τίμια ζυγαριά. (Δευτ. 25:​15) Ο πουρανό εβραϊκός λάφι σο μεταφράντιβελα «τίμιος» μπορίνελα τι μεταφράντιβελ «δίκαιος» ντα. Οτθάρ, εκ Χριστιανός σο μανγκέλα τι αβέλ δίκαιος κο γιακχά κι Ντεβλέσκε κα αβέλ τίμιος σαρέ οντουλέντε σο κερέλα πι μπουτιάτε. Ατζέ, εκ δίκαιος τζενό να μανγκέλα ιτς τι ντικχέλ εκχές τι αδικίντιβελ. Ντα για τι κερέλ ι Ιεχωβάς «τι χαιρίνελ σαρέ κο πράγματα», εκ τζενό σο ισί μπαγιά δίκαιος ντέλα-πες γκοντί σαρ ντικχέλα ο Ιεχωβά λέσκε αποφάσεις.​—Κολ. 1:10.

6. Σόσκε μπορίνασα τι ντας μπέσα κο κανόνες κι Ιεχωβάσκε σο σικαβένα σο ισί σωστός ντα σο ισί λάθος; (Ησαΐας 55:8, 9)

⁶ Η Αγία Γραφή βακερέλα ότι ο Ιεχωβά ισί Οντουβά σο λέσταρ νικιόλα η δικαιοσύνη. Οτθάρ, βοβ βακέρντιβελα “ο τθαν σο μπεσέλα η δικαιοσύνη”. (Ιερ. 50:7) Επειδή ο Ιεχωβά λατσσαρντάς-λεν σαρέ, σάντε βοβ τθερέλα ο δικαίωμας τι τσσουβέλ κανόνες για τι σικαβέλ σο ισί σωστός ντα σο ισί λάθος. Ο Ιεχωβά ισί τέλειος, οτθάρ αγαβέλα μπουτ πο λατσσές αμένταρ σο ισί σωστός ντα σο ισί λάθος, σόσκε αμαρί γνώμη μπουτ φαρ επηρεάντιβελα κατά ατέλεια ντα κατά αμαρτία. (Παρ. 14:​12· διαβάνεν Ησαΐας 55:8, 9) Όμως, επειδή ισινάμ κερντέ τι μοιάζας κο Ντεβέλ, μπορίνασα τι ντας καν κο δίκαιοι κανόνες λέσκε. (Γέν. 1:​27) Ντα μπεϊντίνασα τι κεράς-λες ανταβά. Αμαρό μανγκιπέ αμαρέ Νταντέσκε τσσίντελα-αμέν τι μοιάζας λέστε καζόμ πο λατσσές μπορίνασα.​—Εφεσ. 5:1.

7. Σόσκε χρειαζίντιβασα λατσσέ κανόνες; Βακερέν παραδείγματα.

⁷ Κάνα ντάσα καν κο κανόνες κι Ιεχωβάσκε σο σικαβένα σο ισί σωστός ντα σο ισί λάθος, ντικχάσα λατσσιπέ. Τουμέν, αγαβένα σόσκε; Ανέν τουμαρέ γκοντιάτε σο κα αβέλας-πες άμα η κάθε τράπεζα κα τσσουβέλας πιρέ κανόνες για τι σικαβέλ ι αξία ι λοβένγκι ή άμα κάθε εταιρία σο λατσσαρέλα κτίρια κα γκινέλας σαρ μανγκέλας βόι. Τίποτα να κα αβέλας εκχέ σειράστε. Ντα άμα ο γιατροί να κα ντένας καν κο ίδιοι κανόνες για τι σαστιαρέν ι νασφαλέν, κάποια τζενέ μπέκιμ κα μερένας. Σίγουρα, ο λατσσέ κανόνες ισί αρακχαϊπέ. Αντικάς, ο κανόνες ι Ντεβλέσκε σο σικαβένα σο ισί σωστός ντα σο ισί λάθος αρακχαβένα-αμέν.

8. Καλά ευλογίες κα τθερέν οντουλά σο μπεϊντίνενα τι κερέν ο σωστός;

⁸ Ο Ιεχωβά ευλογίνελα οντουλέν σο μαρένα-πες τι ντεν καν κο κανόνες λέσκε. Ντινάς πο λάφι: «Ο δίκαια τζενέ κα τθερέν πουμένγκε ι πφουβ ντα κα τζουβντιόν για πάντα λάτε». (Ψαλμ. 37:​29) Ανέν τουμαρέ γκοντιάτε ι ενότητα, ι ειρήνη ντα ι ευτυχία σο κα τθερέλ ο ντουνιάς κάνα σαρέ κα ντεν καν κο κανόνες κι Ιεχωβάσκε. Ο Ιεχωβά μανγκέλα τι τζουβντιόν τουμέν-ντα αντικάς. Σίγουρα, σαρέ αμέν τθεράσα σημαντικοί λόγοι τι μανγκάς ι δικαιοσύνη! Σαρ κα μπαριαράς αμαρό μανγκιπέ ανταλέ ιδιοτητάκε; Ακανά κα ντικχάς τριν πράγματα σο μπορίνασα τι κεράς.

ΣΑΡ ΤΙ ΜΑΝΓΚΑΣ ΠΟ ΜΠΟΥΤ Ι ΙΕΧΩΒΑΣΚΕ ΚΑΝΟΝΕΣ

9. Σαρ κα μανγκάς ι δικαιοσύνη;

⁹ Πρώτον: Τι μανγκάς Οντουλές σο τσσουβέλα ο κανόνες. Για τι μανγκάς ι δικαιοσύνη, πρέπει τι μπαριαράς αμαρό μανγκιπέ Οντουλέσκε σο τσσουβέλα ο κανόνες σο σικαβένα ο σωστός ντα ο λάθος. Καζόμ πο μπουτ μανγκάσα ι Ιεχωβάς, αζόμ πο μπουτ κα μανγκάς τι ντας καν κο δίκαιοι κανόνες λέσκε. Για παράδειγμας: Άμα ο Αδάμ ντα η Εύα μανγκένας ι Ιεχωβάς, να κα τζάνας κόντρα κο δίκαιος νόμος λέσκο.​—Γέν. 3:​1-6, 16-19.

10. Σαρ αγαντάς ο Αβραάμ πο λατσσές ι Ιεχωβάς;

¹⁰ Σίγουρα, να μανγκάσα τι κεράς οντουβά λάθος σο κερντέ ο Αδάμ ντα η Εύα. Να κα κεράς-λες ανταβά άμα να τσσιναβάσα τι σικλιάς ι Ιεχωβάσκε, τι εκτιμίνας λέσκε ιδιότητες ντα τι προσπαθίνας τι αγαβάς σαρ σκεφτίνελα. Καζόμ κεράσα-λεν ανταλά, αμαρό μανγκιπέ ι Ιεχωβάσκε σίγουρα κα μπαριόλ. Ντεν-τουμέν γκοντί ι Αβρααμίς. Βοβ μανγκέλας μπαγιά ι Ιεχωβάς. Ατζέ-ντα κάνα ισινέ πφαρό λέσκε τι αγαβέλ ο αποφάσεις ι Ιεχωβάσκε, να γκιλό λέσαρ κόντρα. Οκιά μπάνταρ, προσπαθιντάς τι σικλιόλ ι Ιεχωβάς πο λατσσές. Για παράδειγμας, κάνα σικλιλό ότι ο Ιεχωβά λιντάς ι απόφαση τι καταστραφίνελ ο Σόδομα ντα ο Γόμορρα, ο Αβραάμ κι αρχή νταρασάλο μήπως «ο Κριτής σαρέ ι πφουβιάκο» κα μουνταρέλας ι δίκαιε τζενέν γιεκ ι πφιρνέντζαρ. Ο Αβραάμ ναστί πακιάλας-λες ανταβά, οτθάρ ταπεινά πουτσλάς ι Ιεχωβάς παλάλ γιαβερέστε. Ο Ιεχωβά απαντίνελας λέσκε με υπομονή. Κο τέλος, ο Αβραάμ αγαντάς ότι ο Ιεχωβά ντικχέλα ι κάθε τζενέσκο γκι ντα ότι ποτές να τιμωρίνελα ι λατσσέν γιεκ ι γκεραλέντζαρ.​—Γέν. 18:​20-32.

11. Σαρ σικαντάς ο Αβραάμ ότι μανγκέλας ι Ιεχωβάς ντα ότι ντέλας Λέσκε μπέσα;

¹¹ Οντουλά σο σικλιλό ο Αβραάμ κάνα πουτσλάς ι Ιεχωβάς ι Σοδομένγκε ντα ι Γομορρένγκε ερεσλέ λέσκε γκίστε. Σίγουρα, αρχισάλο τι μανγκέλ ντα τι σεβάνελ πι Νταντές πο μπουτ. Μπρεσά πο σοράν, αβιλό-πες κάτι ντα ισινέ μπουτ πφαρό ι Αβρααμίσκε τι σικαβέλ ότι ντέλας μπέσα κο Ιεχωβά. Ο Ιεχωβά μανγκλάς λέσταρ τι θυσιάνελ πι αγαπημέ Τσσαβές, ι Ισαακίς. Αλλά ανταγιά φαρ, ο Αβραάμ τζανέλας πο λατσσές πι Ντεβλές, οτθάρ να πουτσλάς-λες τίποτα. Απλώς γκιλό τι κερέλ ανταβά σο βακερντάς λέσκε ο Ιεχωβά. Όμως, ανέν τουμαρέ γκοντιάτε καζόμ μπουτ ντουκχ τθερέλας πι γκίστε! Ντικχίντιβελα ότι ο Αβραάμ σκεφτιντάας μπουτ λατσσές οντουλά σο σικλιλόας ι Ιεχωβάσκε. Τζανέλας ότι ο Ιεχωβά ποτές να κα κερέλας κάτι χωρίς τι σικαβέλ δικαιοσύνη ή μανγκιπέ. Σαρ βακερντάς ο απόστολος Παύλος, ο Αβραάμ ντινάς-πες γκοντί ότι ο Ιεχωβά τθερέλας ι ζορ τι τζουβντιαρέλ λέσκε αγαπημέ τσσαβές. (Εβρ. 11:​17-19) Ντα ο Ιεχωβά ντινάας πο λάφι ότι ο Ισαάκ κα αβέλας ντατ εκχέ λαόσκο, αλλά αζομάν ο Ισαάκ να τθερέλας ατζέκ τσσαβέν. Ο Αβραάμ μανγκέλας ι Ιεχωβάς. Οτθάρ ισινέ σίγουρος ότι ανταβά σο κα κερέλας λέσκο Ντατ κα αβέλας δίκαιος. Ντινάς καν πακιαϊμάσαρ παρόλο σο ισινέ μπουτ δύσκολος λέσκε.​—Γέν. 22:​1-12.

12. Σαρ κα μοιάζας κο Αβραάμ; (Ψαλμός 73:28)

¹² Σαρ κα μοιάζας κο Αβραάμ; Σαρ βοβ, αντικάς αμέν-ντα χρειαζίντιβελα μα τι τσσιναβάς τι σικλιάς ι Ιεχωβάσκε. Καζόμ κεράσα-λες ανταβά, κα τζας πο πασέ λέστε ντα κα μανγκάς-λες ατζέ πο μπουτ. (Διαβάνεν Ψαλμός 73:​28) Αμαρί συνείδηση κα σικλιόλ τι σικαβέλ αμένγκε οντουλά σο τθερέλα πι γκοντιάτε ο Ντεβέλ. (Εβρ. 5:​14) Ντα αντικάς, άμα εκ τζενό κα μανγκέλ τι τσσουβέλ-αμέν τι κεράς κάτι μπέτι, να κα ασουνάς-λες. Κα τζουνγκάς ατζέ-ντα άμα κα νακχέλ αμαρέ γκοντιάταρ τι κεράς κάτι σο κα ανέλας ντουκχ αμαρέ Νταντέσκε ντα κα κερέλας ζιάνι κι φιλία σο τθεράσα λέσαρ. Καλέ γιαβερέ τροπόσαρ κα σικαβάς ότι μανγκάσα ι δικαιοσύνη;

13. Σαρ μπορίνασα τι τθεράς δικαιοσύνη; (Παροιμίες 15:9)

¹³ Δεύτερον: Τι μπαριαράς αμαρό μανγκιπέ ι δικαιοσυνιάκε κάθε ντιβές σο νακχέλα. Άμα μανγκάσα αμαρό σώμας τι αβέλ ζουρανό, πρέπει τι μαράς-αμέν ντα τι κεράς γυμναστική κάθε ντιβές. Αντικάς-ντα, άμα μανγκάσα τι μπαριαράς αμαρό μανγκιπέ για το δίκαιοι κανόνες ι Ιεχωβάσκε, πρέπει τι μαράς-αμέν. Ανταβά αβέλα-πες τι κεράς-λες κάθε ντιβές. Ο Ιεχωβά ποτές να μανγκέλα αμένταρ πο μπουτ οντουλένταρ σο μπορίνασα τι κεράς. (Ψαλμ. 103:​14) Βακερέλα αμένγκε ότι «μανγκέλα οντουλές σο μαρέλα-πες τι τθερέλ δικαιοσύνη». (Διαβάνεν Παροιμίες 15:9) Άμα τσσουντάμ εκ στόχος κι υπηρεσία κι Ιεχωβάσκι, να τσσιναβάσα τι κεράς ο πο λατσσό για τι ερεσάς-λες. Ανταβά χρειαζίντιβελα κάνα μαράσα-αμέν τι τθεράς δικαιοσύνη. Ο Ιεχωβά κα βοηθίνελ-αμέν με υπομονή τι τζας ανγκλάλ, τι αβάς πο λατσσέ καζόμ νακχέλα ο βακίτι.​—Ψαλμ. 84:5, 7.

14. Σο ισί ο θώρακας ι δικαιοσυνιάκο, ντα σόσκε χρειαζίντιβασα-λες;

¹⁴ Ο Ιεχωβά ανέλα αμαρέ γκοντιάτε μανγκιμάσαρ ότι η δικαιοσύνη νανέ πφαριπέ. (1 Ιωάν. 5:3) Οκιά μπάνταρ, ισί αρακχαϊπέ σο χρειαζίντιβασα-λες κάθε ντιβές. Ντεν-τουμέν γκοντί ι πνευματική πανοπλία σο βακερντάς ο απόστολος Παύλος. (Εφεσ. 6:​14-18) Καβά κομμάτι ντέλας αρακχαϊπέ κι στρατιωτίσκι καρδιά; Ο θώρακας ι δικαιοσυνιάκο, σο μανγκέλα τι σικαβέλ ο δίκαιοι κανόνες ι Ιεχωβάσκε. Σαρ ο θώρακας αρακχαβέλα ι καρδιά, αντικάς-ντα ο δίκαιοι κανόνες ι Ιεχωβάσκε μπορίνενα τι αρακχαβέν τουμαρό γκι, οντουβά σο ισινέν αντράλ. Οτθάρ, τι αβέν σίγουροι ότι αντρέ τουμαρέ πανοπλιάτε ισί ο θώρακας ι δικαιοσυνιάκο!​—Παρ. 4:23.

15. Σαρ μπορίνενα τουμέν τι ιρίν ο θώρακας ι δικαιοσυνιάκο;

¹⁵ Σαρ μπορίνενα τουμέν τι ιρίν ο θώρακας ι δικαιοσυνιάκο; Άμα τθερένα τουμαρέ γκοντιάτε ο κανόνες ι Ντεβλέσκε κάνα τραμπίνενα σο κα κερέν κάθε ντιβές. Κάνα αποφασίνενα καλέ πραγματένγκε κα κερέν λάφι, σο γκιλιά κα ασουνέν, σο κα ντικχέν ή σο κα διαβάνεν, πουτσέν πρώτα τουμαρό νεαυτός: “Σο χαμπέ κα νταβ μι γκίστε; Μπεϊντίνελα ο Ιεχωβά ανταβά πράγμας; Ή κερέλα τι ντικχίντιβεν σουκάρ ο πράγματα σο ισί άδικα κι Ιεχωβάσκε γιακχά, σαρ ισί ο λουμνιπέ, η βία, η μπίτσαλι γιακχ ντα ο μπαρικανιπέ;” (Φιλιπ. 4:8) Άμα αμαρέ αποφάσεις ισί λατσσέ κι Ιεχωβάσκε γιακχά, μουκχάσα ο δίκαιοι κανόνες λέσκε τι αρακχαβέν αμαρό γκι.

16, 17. Σαρ κερέλα-αμέν ο εδάφιος Ησαΐας 48:​18 τι αβάς σίγουροι ότι μπορίνασα τι ντας καν κο κανόνες κι Ιεχωβάσκε για πάντα;

¹⁶ Νταρασάλεν ποτές ότι κα τσσιναβέν τι ντεν καν κο δίκαιοι κανόνες κι Ιεχωβάσκε καζόμ νακχένα ο ντιβεσά ή ο μπρεσά; Ντικχέν εκ παράδειγμας σο βακερέλα ο Ιεχωβά ντα ισί κο εδάφιος Ησαΐας 48:​18. (Διαβάνεν) Ο Ιεχωβά ντέλα πο λάφι ότι αμαρί δικαιοσύνη μπορίνελα τι αβέλ «σαρ ο κύματα ι ντεριαβάκε». Βακερέν ότι ισινέν κι ντεριάβ ντα ντικχένα ο κύματα τι αβέν ο εκ παλάλ κατά γιαβέρ χωρίς τι ατσσόν. Κα νταρένας ότι εκ ντιβές ανταλά κύματα κα τσσινάντιβεν; Νάα! Τζανένα ότι ο κύματα αβένα ο εκ παλάλ κατά γιαβέρ χιλιάδες μπρεσά ντα σίγουρα να κα τσσιναβέν τι αβέν.

¹⁷ Τουμαρί δικαιοσύνη μπορίνελα τι αβέλ ντιπ σαρ ο κύματα ι ντεριαβάκε! Σαρ; Κάνα μανγκένα τι λεν εκ απόφαση, ρόντεν πρώτα σο κα μανγκέλας ο Ιεχωβά τι κερέν. Σοράν, κερέν-λες. Καζόμ-ντα δύσκολη τι αβέλ η απόφαση, τουμαρό λατσσό Ντατ κα αβέλ πάντα οτθέ για τι βοηθίνελ-τουμέν τι ατσσόν ζουρανέ ντα τι ντεν καν κάθε ντιβές κο δίκαιοι κανόνες Λέσκε.​—Ησ. 40:​29-31.

18. Σόσκε δεν πρέπει τι τσσουβάς αμαρέ κανόνες για τι κρίνας ι γιαβερέν;

¹⁸ Τρίτον: Τι μουκχάς ι Ιεχωβάς τι κρίνελ. Καζόμ μαράσα-αμέν τι ντας καν κο δίκαιοι κανόνες κι Ιεχωβάσκε, δεν πρέπει τι κρίνας ι γιαβερέν ούτε τι αμντίνας-αμέν πο οπρέ λένταρ. Αντίς τι πακιάς ότι ο γιαβερά ισί πο τελέ ντα τι τσσουβάς αμαρέ κανόνες για τι κρίνας-λεν, πρέπει τι ντας-αμέν γκοντί ότι ο Ιεχωβά ισί «ο Κριτής σαρέ ι πφουβιάκο». (Γέν. 18:​25) Ο Ιεχωβά να ντινάς ανταγιά μπουτί αμέντε. Ο Ιησούς ντέλα ακαγιά εντολή: «Μα κρίνεν για μα τι κρίντιβεν».​—Ματθ. 7:1.b

19. Σαρ σικαντάς ο Ιωσήφ ότι μουκχέλας ι Ιεχωβάς τι κρίνελ;

¹⁹ Κα ντικχάς πάλι ο παράδειγμας ι δίκαιε Ιωσηφίσκο. Βοβ να κρίνελας ι γιαβερέν, ατζέ-ντα οντουλέν σο κερντέ λέσκε ζιάνι. Λέσκε πφραλά μπικιντέ-λες για τι αβέλ δούλος ντα βακερντέ πουμαρέ νταντέσκε ότι μουλόας. Μπρεσά πο σοράν, ο Ιωσήφ ντικχλάς πάλι πι φαμιλί. Αζομάν ισινέας μπαρό κο τθεμ, ντα κα μπορίνελας τι κρίνελ πι πφραλέν χωρίς τι τζιτζίνελ ντα τι κερέλ λένγκε σο κερντέας λέσκε. Λέσκε πφραλά νταρένας μα τι κερέλ-λες ανταβά, παρόλο σο μετανιωσάλεας μπαγιά οντουλένγκε σο κερντέας. Αλλά ο Ιωσήφ βακερντάς λένγκε: «Μα νταρέν. Μήπως ισινόμ με κι θέση κι Ντεβλέσκι;» (Γέν. 37:​18-20, 27, 28, 31-35· 50:​15-21) Ο Ιωσήφ μουκχλάς με ταπεινότητα ι Ιεχωβάς τι κρίνελ.

20, 21. Σαρ να κα αβάς δίκαιοι αμαρέ γιακχίντε;

²⁰ Σαρ ο Ιωσήφ, αντικάς αμέν-ντα μουκχάσα ι Ιεχωβάς τι κρίνελ. Για παράδειγμας, να πακιάσα ότι τζανάσα σο τσσίντελα αμαρέ πφραλέν τι κερέν οντουλά σο κερένα. Αμέν ναστί ντικχάσα αντρέ κι τζενένγκο γκι. Σάντε «ο Ιεχωβά ρόντελα αντρέ κο γκι». (Παρ. 16:2) Βοβ μανγκέλα σαρέ ι τζενέν, κατάρ-ντα τι αβέν ή σο-ντα κουλτούρα τθερένα. Βακερέλα αμένγκε-ντα τι “κεράς τθαν αμαρέ γκίστε”. (2 Κορ. 6:​13) Ρόντασα τι σικαβάς μανγκιπέ σαρέ οντουλένγκε σο ισί αντρέ αμαρέ πνευματικέ φαμιλιάτε ντα μα τι κρίνας-λεν.

²¹ Ανταβά μανγκέλα τι βακερέλ ότι δεν πρέπει τι κρίνας οντουλέν-ντα σο νανέ αντρέ κι κχανγκιρί. (1 Τιμ. 2:3, 4) Κα κρίνενας ποτές εκχές τουμαρέ τζενένταρ ντα κα βακερένας: “Βοβ σίγουρα να κα σικλιόλ ι αλήθεια”; Νάα. Άμα κα κεράας-λες ανταβά, κα νακχαβάας ο όρια ντα κα σικαβάας ότι αμντίνασα-αμέν πο οπρέ κατά γιαβερά. Ο Ιεχωβά ατζέκ ατζέκ ντέλα «σαρέ κο τζενέ κάθε τθανέστε» ι ευκαιρία τι μετανιώνεν. (Πράξ. 17:​30) Πάντα τι ντεν-τουμέν γκοντί ότι, κον ισί δίκαιος πιρέ γιακχίντε ισί άδικος κι Ιεχωβάσκε γιακχά.

22. Σόσκε να κα τσσιναβέν τι μανγκέν ι δικαιοσύνη σο-ντα τι αβέλ-πες;

²² Μακάρι αμαρό μανγκιπέ για το δίκαιοι κανόνες ι Ιεχωβάσκε τι ανέλ χαρά ντα τι τσσίντελ ι γιαβερέν τι αβέν πο πασέ αμέντζαρ ντα αμαρέ Ντεβλέσαρ. Μα τι τσσιναβάς ποτές τι “μανγκάς αζόμ μπουτ ι δικαιοσύνη σαρ τι αβάας μποκχαλέ ντα τι μεράας πανίσκε”. (Ματθ. 5:6) Αβέν σίγουροι ότι ο Ιεχωβά ντικχέλα καζόμ μαρένα-τουμέν ντα πάντα αβέλα λέσκο γκι σο τζάνα ανγκλάλ. Καζόμ ανταβά ντουνιάς αβέλα πο άδικος, λεν ζορ κάνα ανένα τουμαρέ γκοντιάτε ότι «ο Ιεχωβά μανγκέλα ι δίκαιε τζενέν»!​—Ψαλμ. 146:8.