Ασταρέν Ζουρανί Τουμαρί Χριστιανική Ελπίδα

1. Σο ελπίδα ντινάς-αμέν ο Ιεχωβά;

Ο ΙΕΧΩΒΑ ντινάς-αμέν ι μπουτ σουκάρ ελπίδα τι τζουβντιάς για πάντα. Ισί τζενέ σο μπεκλεντίνενα τι τζουβντιόν για πάντα κο ουρανός σαρ πνευματικά πλάσματα σο ναστί μερένα. (1 Κορ. 15:​50, 53) Όμως, ο πο μπουτ μπεκλεντίνενα τι τζουβντιόν για πάντα κι πφουβ ντα τι τθερέν τέλεια υγεία ντα ευτυχία. (Αποκ. 21:3, 4) Είτε μπεκλεντίνασα τι τζουβντιάς για πάντα κο ουρανός είτε κι πφουβ, αμαρί ελπίδα τθερέλα μπαρί αξία αμένγκε.

2. Κατάρ αβέλα αμαρί ελπίδα ντα σόσκε βακεράσα-λες ανταβά;

² Ο λάφι «ελπίδα», σαρ βακέρντιβελα κι Αγία Γραφή, μανγκέλα τι βακερέλ «μπεκλεντίνασα τι αβέν-πες λατσσέ πράγματα». Η ελπίδα σο τθεράσα ι ντιβεσένγκε σο κα αβέν ισί σίγουρη σόσκε αβέλα κατά Ιεχωβά. (Ρωμ. 15:​13) Τζανάσα σο ντινάς πο λάφι τι κερέλ ντα τζανάσα ότι πάντα ασταρέλα πο λάφι. (Αριθ. 23:​19) Πακιάσα σαρέ αμαρέ γκίσαρ ότι ο Ιεχωβά εμ μανγκέλα εμ τθερέλα ι ζορ τι κερέλ σο-ντα βακερέλα. Άρα, αμαρί ελπίδα να νικαβάσα-λα αμαρέ γκοντιάταρ ούτε ισί απλώς κάτι σο μανγκάσα μπουτ τι αβέλ-πες. Αλλά αβέλα πραγματένταρ σο τζανάσα ότι ισί μπαγιά.

3. Σο κα ντικχάς ανταλέ μαθημάστε; (Ψαλμός 27:14)

³ Αμαρό Ντατ σο ισί κο ουρανός μανγκέλα-αμέν ντα μανγκέλα τι ντας λέσκε μπέσα. (Διαβάνεν Ψαλμός 27:​14) Άμα αμαρί ελπίδα κο Ιεχωβά ισί ζουρανί, κα μπορίνας τι νταϊντίνας ο προβλήματα ντα τι ντικχάς ανγκλάλ πφερντέ κουράγιος ντα χαρά. Ακανά κα ντικχάς σαρ αρακχαβέλα-αμέν αμαρί ελπίδα. Πρώτα κα βακεράς σαρ η ελπίδα μοιάζελα εμ εκχέ αγκυράσαρ αλλά εμ-ντα εκχέ περικεφαλαιάσαρ. Σοράν, κα ντικχάς σαρ τι κεράς πο ζουρανί αμαρί ελπίδα.

ΑΜΑΡΙ ΕΛΠΙΔΑ ΙΣΙ ΣΑΡ ΑΓΚΥΡΑ

4. Σαρ μοιάζελα η ελπίδα εκχέ αγκυράσαρ; (Εβραίους 6:19)

⁴ Κι επιστολή σο γραφιντάς ι Εβραιόνγκε, ο απόστολος Παύλος μοιασκιαρντάς αμαρί ελπίδα κι άγκυρα. (Διαβάνεν Εβραίους 6:​19) Ο Παύλος κερντάς μπουτ ταξίδια κι ντεριάβ, οτθάρ τζανέλας ότι ο άγκυρες ασταρένας ο καράβι για μα τι νασέλ πι ντρομέσταρ. Εκ φαρ, ισινέ εκχέ καραβίστε κάνα πφουντιντάς μπουτ ζουρανί μπαρμπάλ. Αζομάν, ντικχλάς ι τζενέν τι φουρτίνεν άγκυρες για μα τι τζαλ ο καράβι κο βράχια ιτιρί κατά μπαρμπάλ. (Πράξ. 27:​29, 39-41) Σαρ η άγκυρα κερέλα σταθερός ο καράβι, αντικάς αμαρί ελπίδα-ντα κερέλα-αμέν σταθερούς για μα τι λεν-αμέν ντουρ κατά Ιεχωβά ο προβλήματα σο ισί σαρ ζουρανέ μπαρμπαλιά. Αμαρί ζουρανί ελπίδα βοηθίνελα-αμέν τι νακχαβάς ασακέ προβλήματα σόσκε πακιάσα σαρέ αμαρέ γκίσαρ ότι ανγκλ’ αμέντε ισί ήρεμα βακίτια. Ντεν-τουμέν γκοντί, ο Ιησούς βακερντάς ότι ο τζενέ κα τζάνας αμέντζαρ κόντρα. (Ιωάν. 15:​20) Οτθάρ, άμα σκεφτίνασα λατσσές ο ευλογίες σο ντινάς πο λάφι ο Ιεχωβά τι ανέλ αμένγκε, κα βοηθίντιβας τι ατσσάς σταθεροί αμαρέ Χριστιανικέ ντρομέστε.

5. Σαρ η ελπίδα ατσσικιαρντάς ι Ιησούς σταθερός κάνα ο μεριπέ ισινέ ανγκλά-λέστε;

⁵ Ντεν-τουμέν γκοντί σαρ η ελπίδα ατσσικιαρντάς ι Ιησούς σταθερός ατζέ-ντα κάνα μπεκλεντίνελας τι μερέλ μπουτέ ντουκχέντζαρ. Κο ντιβές κι Πεντηκοστιάκο κο 33 Κ.Χ., ο απόστολος Πέτρος βακερντάς εκ προφητεία σο ισινέ κο βιβλίος Ψαλμοί. Ανταγιά προφητεία σικαβέλα μπουτ σουκάρ λαφίντζαρ ι ηρεμία ντα ι σιγουριά ι Ιησούσκι: «Κα μπεσάβ τθανέστε σο ισί ελπίδα· σόσκε να κα μουκχές-μαν κο Μεζάρι ντα να κα μουκχές οντουλές σο ισί αφοσιωμέ τούτε τι κερνιόλ. . . . Κα πφερές-μαν μπαρέ χαράσαρ οτθέ σο ισινάν τούι». (Πράξ. 2:​25-28· Ψαλμ. 16:​8-11) Αν-ντα ο Ιησούς τζανέλας ότι κα μερέλας, τθερέλας ι ζουρανί ελπίδα ότι ο Ντεβέλ κα τζουβντιαρέλας-λες ντα ότι κα τθερέλας ι χαρά τι αβέλ πάλι πασέ πι Νταντέσαρ κο ουρανός.​—Εβρ. 12:2, 3.

6. Καλά λάφια σο τθερένα τι κερέν ι ελπιδάσαρ βακερντάς εκ πφραλ;

⁶ Αμαρί Χριστιανική ελπίδα βοηθιντάς μπουτέ πφραλέν ντα πφενίν τι νταϊντίνεν. Ντικχέν ο παράδειγμας εκχέ πιστέ πφραλέσκο σο βακέρντιβελας Λέναρντ Τσιν ντα τζουβντιόλας κι Αγγλία. Κο Πρώτος Παγκόσμιος Πόλεμος, τσσουβντιλό φυλακή σόσκε να μανγκλάς τι τζαλ κο στρατός. Ντούι μάσεκ ισινέ ντιπ κορκορό ντα σοράν τσσουντέ-λες τι κερέλ μπουτί ζορίσαρ. Πο σοράν γραφιντάς: «Οντουλά σο τζουβντιλόμ ντινέ-μαν τι αγαβάβ καμπόρ σημαντική ισί η ελπίδα για τι νταϊντίνας. Τθεράσα ο παράδειγμας ι Ιησούσκο, ι αποστολένγκο ντα ι προφητένγκο, ντα ο υποσχέσεις σο τθερένα μπουτ μπαρί αξία ντα ισί αντρέ κι Γραφή. Σαρέ ανταλά ντένα-αμέν μπαρί ελπίδα ι ντιβεσένγκε σο αβένα ντα ζορ για τι νταϊντίνας». Η ελπίδα ισινέ άγκυρα ι Λεναρντίσκε ντα μπορίνελα τι αβέλ άγκυρα αμένγκε-ντα.

7. Σαρ μπαριόλα αμαρί ελπίδα κάνα νακχάσα προβλήματα; (Ρωμαίους 5:​3-5· Ιακώβου 1:12)

⁷ Κάθε φαρ σο νταϊντίνασα δοκιμασίες ντα ντικχάσα ο βας ντα ι ζαμ ι Ιεχωβάσκι, αμαρί ελπίδα αβέλα πο ζουρανί. (Διαβάνεν Ρωμαίους 5:​3-5· Ιακώβου 1:​12) Αντικάς, αμαρί ελπίδα ισί πο ζουρανί από ό,τι ισινέ κάνα ασουντάμ ο λατσσέ αμπέρια. Ο Μπενγκ μανγκέλα τι τασαβέν-αμέν ο προβλήματα, αλλά ο Ιεχωβά βοηθίνελα-αμέν τι ντας-λεν πέρα σαρέ.

ΑΜΑΡΙ ΕΛΠΙΔΑ ΙΣΙ ΣΑΡ ΠΕΡΙΚΕΦΑΛΑΙΑ

8. Σαρ μοιάζελα η ελπίδα κι περικεφαλαία; (1 Θεσσαλονικείς 5:8)

⁸ Η Γραφή μοιασκιαρέλα αμαρί ελπίδα κι περικεφαλαία-ντα. (Διαβάνεν 1 Θεσσαλονικείς 5:8) Η περικεφαλαία αρακχαβέλας ι στρατιωτίσκο σορό κατά ντουσμάνια σο μανγκένας τι τσαλαβέν-λες. Αμαρέ πνευματικέ τζενγκίστε, χρειαζίντιβελα τι αρακχαβάς αμαρί γκοντί κατά Μπενγκ. Ο Μπενγκ τσσουβέλα αμένγκε μπερεκέτι πειρασμοί ντα σκέψεις σο ισί λατσσαρντέ για τι χαλαβέν ο τρόπος σο σκεφτίνασα. Σαρ η περικεφαλαία αρακχαβέλας ι στρατιωτίσκο σορό, αντικάς αμαρί ελπίδα-ντα αρακχαβέλα αμαρί γκοντί για τι ατσσάς πιστοί κο Ιεχωβά.

9. Σο αβέλα-πες ι τζενένγκε σο να τθερένα ελπίδα;

⁹ Η ελπίδα σο τθεράσα τι τζουβντιάς για πάντα βοηθίνελα-αμέν τι κεράς πράγματα γκοντιάσαρ. Οκιά μπάνταρ, άμα αμαρί ελπίδα κα χασαρέλ πι ζορ ντα κα αρχίνας τι σκεφτίνας σάντε οντουλά σο μανγκάσα αμέν, κα μπορίναας τι μπιστράς ι αιώνια ζωή σο ισί ανγκλ’ αμέντε. Ντεν-τουμέν γκοντί σο αβιλό-πες μερικέ Χριστιανόνγκε κι πουρανί Κόρινθος. Τσσιναντέ τι πακιάν εκχέ μπουτ σημαντικέ λαφίστε σο ντινάς ο Ντεβέλ, τι τζουβντιαρέλ ι μουλέν. (1 Κορ. 15:​12) Ο Παύλος βακερντάς ότι ο τζενέ σο να τθερένα ελπίδα εκχέ γιαβερέ ζωγιάκε τζουβντιόνα σάντε ανταλέ ντιβεσέσκε. (1 Κορ. 15:​32) Αντιβές, μπουτ τζενέ σο να πακιάνα οντουλέντε σο βακερντάς ο Ντεβέλ τι κερέλ τζουβντιόνα σάντε ανταλέ ντιβεσέσκε ντα κερένα σο νακχέλα λένγκε βαστένταρ για τι νακχέν λατσσές. Αμέν όμως τθεράσα μπέσα οντουλένγκε σο βακερντάς ο Ντεβέλ ότι κα κερέλ. Αμαρί ελπίδα ισί σαρ περικεφαλαία σο αρακχαβέλα αμαρί γκοντί ντα βοηθίνελα-αμέν μα τι τραμπίνας τι τζουβντιάς σάντε αμένγκε ντα αντικάς τι κεράας ζιάνι κι φιλία σο τθεράσα ι Ιεχωβάσαρ.​—1 Κορ. 15:​33, 34.

10. Σαρ μπορίνελα η ελπίδα τι αρακχαβέλ-αμέν κατά λάθος σκέψεις;

¹⁰ Η περικεφαλαία αμαρέ ελπιδάκι μπορίνελα τι αρακχαβέλ-αμέν για μα τι αμντίνας ότι σινανέ μαράσα-αμέν τι κεράς ι Ιεχωβάσκο γκι. Για παράδειγμας, ισί τζενέ σο μπέκιμ σκεφτίνενα: “Με, σίγουρα, να κα αβάβ οντουλένταρ σο κα τζουβντιόν για πάντα. Να ισινόμ αζόμ λατσσό. Ποτές ναστί κα νταβ καν κι Ντεβλέσκε κανόνες”. Ντεν-τουμέν γκοντί ότι ο Ελιφάς, εκ κατά ψεύτικα αμαλά ι Ιωβίσκε, βακερντάς βοβ-ντα κάτι ασακό: «Σαρ αβέλα-πες ο τζενό σο μερέλα τι αβέλ πάκι;» Ατζέ, βακερντάς ότι ο Ντεβέλ «να ντέλα μπέσα πι αγγελόνγκε ντα ατζέ-ντα ο ουρανός νανέ πάκι λέσκε γιακχίντε». (Ιώβ 15:​14, 15) Σο μπαρό χουχαϊπέ! Ντεν-τουμέν γκοντί κον γκεράντιβελα παλάλ κατά σκέψεις ανταλά​—ο Μπενγκ. Βοβ τζανέλα ότι τουμαρί ελπίδα χάνικ χάνικ κα μερέλ άμα μουκχένα τουμαρό νεαυτός τι κερέλ ασακέ σκέψεις. Οτθάρ, νασκιαρέν ασακέ χουχαΐματα ντα τθερέν τουμαρέ γιακχά οντουλέντε σο βακερντάς ο Ιεχωβά ότι κα κερέλ. Πάντα τι αβέν σίγουροι ότι βοβ μανγκέλα τι τζουβντιόν για πάντα ντα ότι κα βοηθίνελ-τουμέν τι κερέν-λες ανταβά.​—1 Τιμ. 2:3, 4.

ΑΣΤΑΡΕΝ ΖΟΥΡΑΝΙ ΤΟΥΜΑΡΙ ΕΛΠΙΔΑ

11. Σόσκε πρέπει τι μπεκλεντίνας με υπομονή τι νικιόλ μπαγιά αμαρί ελπίδα;

¹¹ Νανέ πάντα εύκολος τι ασταράς ζουρανί αμαρί ελπίδα. Κα μπορίναας τι χασαράς αμαρί υπομονή καζόμ μπεκλεντίνασα ι Ντεβλέσκε. Αλλά επειδή ο Ιεχωβά υπαρχίντιβελας πάντα, ο βακίτι σο ντικχίντιβελα αμένγκε μπουτ λέσκε ισί χάνικ. (2 Πέτρ. 3:8, 9) Βοβ κα κερέλ τι νικιόλ μπαγιά λέσκο σκοπός ι πο λατσσέ τροπόσαρ, αλλά μπέκιμ μα τι κερέλ-λες κάνα μπεκλεντίνασα-λες αμέν. Σο κα βοηθίνελ-αμέν τι ασταράς ζουρανί αμαρί ελπίδα καζόμ μπεκλεντίνασα με υπομονή τι νικιόν μπαγιά οντουλά σο βακερντάς ο Ντεβέλ;​—Ιακ. 5:7, 8.

12. Σο σχέση τθερέλα η ελπίδα ι πιστιάσαρ, σαρ βακερένα ο εδάφια Εβραίους 11:1, 6;

¹² Κα ασταράς ζουρανί αμαρί ελπίδα άμα ατσσάσα πασέ κο Ιεχωβά, οντουλέστε σο κα κερέλ τι νικιόλ μπαγιά αμαρί ελπίδα. Η Γραφή βακερέλα ότι για τι τθεράς ελπίδα πρέπει τι τθεράς πίστη ότι ο Ιεχωβά υπαρχίντιβελα ντα ότι «ανέλα ευλογίες οντουλέντε σο ρόντενα σαρέ πουμαρέ γκίσαρ τι αρακχέν-λες». (Διαβάνεν Εβραίους 11:1, 6) Καζόμ πο πραγματικός ισί ο Ιεχωβά αμένγκε, αζόμ πο μπαρί κα αβέλ αμαρί μπέσα ότι κα κερέλ σο-ντα βακερντάς. Ακανά κα ντικχάς μερικούς τρόπους σο μπορίνασα τι μπαριαράς αμαρί φιλία ι Ιεχωβάσαρ ντα αντικάς τι ασταράς ζουρανί αμαρί ελπίδα.

13. Σαρ μπορίνασα τι τζας πο πασέ κο Ντεβέλ;

¹³ Προσευχίντιβεν κο Ιεχωβά ντα διαβάνεν λέσκο Λάφι. Ναστί ντικχάσα ι Ιεχωβάς αλλά μπορίνασα τι τζας πασέ λέστε. Μπορίνασα τι κεράς λέσαρ λάφι αντράλ κατά προσευχή ντα τι αβάς σίγουροι ότι κα ασουνέλ-αμέν. (Ιερ. 29:​11, 12) Μπορίνασα τι ασουνάς ι Ντεβλές κάνα διαβάνασα λέσκο Λάφι ντα σκεφτίνασα λατσσές οντουλά σο βακερέλα. Καζόμ διαβάνασα σαρ βοηθιντάς ο Ιεχωβά πι αφοσιωμέ υπηρετόν κο πουρανέ μπρεσά, αμαρί ελπίδα κα αβέλ ατζέ πο ζουρανί. Σαρέ οντουλά σο ισί κο Λάφι κι Ντεβλέσκο «γραφισάλε αμαρέ σικλιαριμάσκε, για τι τθεράς ελπίδα αντράλ κατά υπομονή σο κεράσα ντα αντράλ κατά παρηγοριά σο ντέλα η Γραφή».​—Ρωμ. 15:4.

14. Σόσκε πρέπει τι σκεφτίνας οντουλά σο κερντάς ο Ιεχωβά ι γιαβερένγκε;

¹⁴ Σκεφτίνεν σαρ ατσσικιαρντάς ο Ιεχωβά σο-ντα λάφι ντινάς. Ντεν-τουμέν γκοντί σο κερντάς ο Ντεβέλ ι Αβρααμίσκε ντα ι Σαρράκε. Ερεσλέας εκχέ ηλικιάτε σο ναστί κερένας τσσαβέν. Όμως, ο Ντεβέλ ντινάς-λεν πο λάφι ότι κα κερένας εκχέ τσσαβές. (Γέν. 18:​10) Σο κερντάς ο Αβραάμ; Η Γραφή βακερέλα: «Πακιάλας ότι κα αβέλας ντατ μπουτέ τθεμένγκο». (Ρωμ. 4:​18) Παρόλο σο κι τζενένγκε γιακχά να υπαρχίντιβελας ελπίδα, ο Αβραάμ ισινέ σίγουρος ότι ο Ιεχωβά κα κερέλας τι νικιόλ μπαγιά οντουβά σο βακερντάς. Οντουβά πιστός τζενό να τσσουντάς πι γκίστε. (Ρωμ. 4:​19-21) Ασακέ ιστορίες σικλιαρένα-αμέν ότι μπορίνασα πάντα τι αβάς σίγουροι ότι ο Ιεχωβά κα κερέλ τι νικιόν μπαγιά οντουλά σο βακερντάς, ατζέ-ντα άμα ανταβά ντικχίντιβελα ότι ναστί αβέλα-πες.

15. Σόσκε πρέπει τι σκεφτίνας οντουλά σο κερντάς ο Ντεβέλ αμένγκε;

¹⁵ Ντεν-τουμέν γκοντί οντουλά σο κερντάς ο Ιεχωβά τουμένγκε. Σκεφτίνεν σο λατσσιπέ ντικχλέν κατά λάφια ι Ντεβλέσκε σο νικίστιλε μπαγιά ντα ισί κι Αγία Γραφή. Για παράδειγμας, ο Ιησούς ντινάς πο λάφι ότι λέσκο Ντατ κα ντελ-τουμέν ο αναγκαία ι ζωγιάκε. (Ματθ. 6:​32, 33) Ο Ιησούς σικλιαρντάς-τουμέν ότι ο Ιεχωβά κα ντελ-τουμέν άγιος πνεύμας κάνα μανγκένα-λες Λέσταρ. (Λουκ. 11:​13) Ο Ιεχωβά ατσσικιαρντάς πο λάφι. Μπέκιμ αβένα τουμαρέ γκοντιάτε γιαβερά-ντα πράγματα σο ντινάς πο λάφι τι κερέλ τουμένγκε ντα κερντάς-λεν. Φιρειπείν, ντινάς πο λάφι τι συγχωρίνελ-τουμέν, τι λοκχιαρέλ τουμαρό γκι ντα τι παρβαρέλ-τουμέν πνευματικά. (Ματθ. 6:​14· 24:​45· 2 Κορ. 1:3) Άμα κα σκεφτίνεν οντουλά σο κερντάς ο Ντεβέλ τουμένγκε, κα μπαριαρέν τουμαρί ελπίδα οντουλένγκε σο κα κερέλ κο ντιβεσά σο κα αβέν.

ΧΑΙΡΙΝΕΝ ΕΠΕΙΔΗ ΤΘΕΡΕΝΑ Ι ΕΛΠΙΔΑ

16. Σόσκε ισί η ελπίδα αζόμ πααλίς δώρος;

¹⁶ Η ελπίδα τι τζουβντιάς για πάντα ισί εκ πααλίς δώρος κατά Ντεβέλ. Μπεκλεντίνασα μπουτ σουκάρ ντιβεσένγκε ντα ισινάμ σίγουροι ότι κα αβέν. Η ελπίδα ισί σαρ άγκυρα αμένγκε. Κερέλα-αμέν σταθερούς για τι νταϊντίνας ο δοκιμασίες, κάνα τζάνα αμέντζαρ κόντρα ή ατζέ-ντα κάνα ισινάμ ανγκλάλ κο μεριπέ. Ισί σαρ περικεφαλαία-ντα. Αρακχαβέλα αμαρί γκοντί για τι νασκιαράς ο γκεραλέ πράγματα ντα τι ατσσάς οντουλέντε σο ισί λατσσέ. Αμαρί ελπίδα σο αβέλα αντράλ κατά Γραφή ανέλα-αμέν πο πασέ κο Ντεβέλ ντα σικαβέλα ο μπαρό μανγκιπέ σο τθερέλα αμένγκε. Ντικχάσα μπουτ λατσσιπέ άμα ασταράσα αμαρί ελπίδα ζουρανί.

17. Σόσκε η ελπίδα ανέλα χαρά;

¹⁷ Κι επιστολή σο γραφιντάς ι Ρωμαιόνγκε, ο απόστολος Παύλος βακερντάς ακαβά: «Χαιρίνεν επειδή τθερένα ι ελπίδα». (Ρωμ. 12:​12) Ο Παύλος μπορίνελας τι χαιρίνελ σόσκε ισινέ σίγουρος ότι, άμα κα ατσσόλας πιστός, κα τζουβντιόλας για πάντα κο ουρανός. Μπορίνασα αμέν-ντα τι χαιρίνας σο τθεράσα ι ελπίδα, σόσκε ισινάμ σίγουροι ότι ο Ιεχωβά κα ατσσικιαρέλ σο-ντα λάφι ντινάς. Σαρ γραφιντάς ο ψαλμωδός: “Ευτυχισμέ ισί οντουβά . . . σο τθερέλα ελπίδα κο Ιεχωβά, . . . Οντουλέστε σο ατσσόλα πάντα πιστός”.​—Ψαλμ. 146:5, 6.