Τι Ατσσόν Τζανγκαντέ ντα Γκοντιαβέρ Κάνα Δοκιμάντιβελα Τουμαρί Αφοσίωση

1. Σο μανγκέλα τι βακερέλ τι ατσσάς τζανγκαντέ ντα γκοντιαβέρ; (2 Τιμόθεο 4:5)

ΚΑΝΑ αβέλα-πες κάτι σο πφανγκέλα αμαρό γκι, αμαρί αφοσίωση κο Ιεχωβά ντα κι οργάνωση λέσκι κα μπορίνελας τι δοκιμάντιβελ. Σαρ μπορίνασα τι ντας-λεν πέρα ασακέ δυσκολιέντζαρ; Χρειαζίντιβελα τι ατσσάς τζανγκαντέ ντα γκοντιαβέρ, για τι ατσσάς σταθεροί κι πίστη. (Διαβάνεν 2 Τιμόθεο 4:5) Ατσσάσα τζανγκαντέ ντα γκοντιαβέρ κάνα ισινάμ ήρεμοι, σκεφτίνασα καθαρά ντα προσπαθίνασα τι ντικχάς ο πράγματα αντικάς σαρ ντικχέλα-λεν ο Ιεχωβά. Κάνα κεράσα-λες ανταβά, αμαρέ σκέψεις να κα επηρεάντιβεν οντουλένταρ σο νιωθίνασα.

2. Σο κα ντικχάς ανταλέ μαθημάστε;

² Κο γιαβέρ μάθημας, ντικχλάμ τριν δυσκολίες σο να αβένα κατά κχανγκιρί ντα μπέκιμ τι νακχάς. Ανταλέ μαθημάστε, κα ντικχάς τριν δυσκολίες σο μπορεί τι νακχάς αντράλ κατά κχανγκιρί ντα σο μπορίνενα τι δοκιμάνεν αμαρί αφοσίωση κο Ιεχωβά. Ανταλά ισί (1) κάνα νιωθίνασα ότι αδικιντάς-αμέν εκ πφραλ, (2) κάνα λάσα διόρθωση ντα (3) κάνα δυσκολίντιβασα τι κεράς ο αλλαγές σο βακερέλα η οργάνωση. Σαρ μπορίνασα τι ατσσάς τζανγκαντέ ντα γκοντιαβέρ ντα τι αβάς αφοσιωμέ κο Ιεχωβά ντα κι οργάνωση λέσκι κάνα νακχάσα ασακέ δυσκολίες;

ΚΑΝΑ ΝΙΩΘΙΝΑΣΑ ΟΤΙ ΑΔΙΚΙΝΤΑΣ-ΑΜΕΝ ΕΚ ΠΦΡΑΛ

3. Σο μπορεί τι κεράς άμα νιωθίνασα ότι εκ πφραλ αδικιντάς-αμέν;

³ Νιωσάλεν ποτές ότι αδικιντάς-τουμέν εκ πφραλ ή εκ πφεν σο τθερέλα ευθύνη, σαρ για παράδειγμας εκ πρεσβύτερος; Μπέκιμ τουμαρό πφραλ να μανγκέλας τι πφανγκέλ τουμαρό γκι. (Ρωμ. 3:​23· Ιακ. 3:2) Όμως, οντουλά σο κερντάς πφανγκλέ τουμαρό γκι. Μπορεί τι χασαρντέν τουμαρί λίντρα-ντα επειδή σκεφτίνενα ανταβά πράγμας. Μπορεί ατζέ-ντα τι σκεφτιντέν: “Άμα εκ πφραλ συμπεριφερίντιβελα αντικάς, ισί μπαγιά ανταγιά ι Ντεβλέσκι οργάνωση;” Ακριβώς αντικάς μανγκέλα ο Μπενγκ τι σκεφτίνας. (2 Κορ. 2:​11) Άμα σκεφτίνασα ανταλέ τροπόσαρ κα τσσιναβάς τι υπηρετίνας ι Ιεχωβάς ντα κα νασάς κατά οργάνωση λέσκι. Οτθάρ, άμα νιωθίνασα ότι εκ πφραλ ή εκ πφεν αμαρί αδικιντάς-αμέν, σαρ μπορίνασα τι ατσσάς τζανγκαντέ ντα γκοντιαβέρ ντα μα τι σκεφτίνας ασακέ μπέτι τροπόσαρ;

4. Σαρ ατσσιλό τζανγκαντό ντα γκοντιαβέρ ο Ιωσήφ κάνα αδικισάλο, ντα σο μπορίνασα τι σικλιάς αμέν λέσκε παραδειγμάσταρ; (Γένεση 50:​19-21)

⁴ Μα πφερντιόν κερκιπέ. Κάνα ο Ιωσήφ ισινέ τερνό, ο πο μπαρέ πφραλά λέσκε συμπεριφερισάλε λέσκε άδικα. Μισίνενας-λες, ντα μερικοί λένταρ μανγκένας ατζέ-ντα τι μουνταρέν-λες. (Γέν. 37:4, 18-22) Τελικά, μπικιντέ-λες σαρ δούλος. Οτθάρ, ο Ιωσήφ νακχλάς μπαρέ δοκιμασίες, σο ατσσικιαρντέ περίπου 13 μπρεσά. Ο Ιωσήφ κα μπορίνελας μα τι αβέλ σίγουρος άμα ο Ιεχωβά μανγκέλας-λες μπαγιά. Κα μπορίνελας ατζέ-ντα τι σκεφτίνελ άμα ο Ιεχωβά μουκχλάας-λες αζομάν σο μανγκέλας βοήθεια. Αλλά ο Ιωσήφ να πφερντιλό κερκιπέ. Οκιά μπάνταρ, ατσσιλό τζανγκαντό ντα γκοντιαβέρ ντα ήρεμος. Κάνα ντιντιλί-λες η ευκαιρία τι λελ εκδίκηση πι πφραλένταρ, να κερντάς-λες ανταβά. Αλλά σικαντάς λένγκε μανγκιπέ ντα συγχωριντάς-λεν. (Γέν. 45:4, 5) Ο Ιωσήφ συμπεριφερισάλο αντικάς σόσκε σκεφτιντάς καθαρά. Βοβ να σκεφτίνελας σάντε πο προβλήματα, αλλά τθερέλας πι γκοντιάτε οντουβά σο μανγκέλα ο Ιεχωβά. (Διαβάνεν Γένεση 50:​19-21) Σο σικλιάσα αμέν; Άμα κα αδικίντιβεν, μα πφερντιόν κερκιπέ ι Ιεχωβάσκε ντα μα τι νακχέλ τουμαρέ γκοντιάταρ ότι μουκχλάς-τουμέν. Οκιά μπάνταρ, τι σκεφτίνεν σαρ βοηθίνελα-τουμέν τι νταϊντίνεν ι δοκιμασία. Ντα κάνα ο γιαβερά αδικίνενα-τουμέν, τι προσπαθίνεν τι ιτσσαρέν λένγκε ατέλειες ι μανγκιμάσαρ.​—1 Πέτρ. 4:8.

5. Σαρ ατσσιλό ο Μικέας τζανγκαντό ντα γκοντιαβέρ κάνα νιωσάλο ότι αδικισάλο;

⁵ Ντικχέν ι εμπειρία εκχέ πρεσβυτερόσκι κατά Νότια Αμερική, σο βακερένα λέσκε Μικέα.b Εκ φαρ, νιωσάλο ότι συμπεριφερισάλε λέσκε μπέτι τροπόσαρ μερικά πφραλά σο τθερένας ευθύνη κι οργάνωση κι Ιεχωβάσκι. Βοβ βακερέλα: «Να νιωσάλομας ατζέκ φαρ ασακί στενοχώρια. Τθεράβας ανησυχία. Χασαρντόμας μι λίντρα ντα ροβάβας επειδή νιωθίναβας ότι ναστί κεράβας τίποτα». Όμως, ο Μικέας ατσσιλό τζανγκαντό ντα γκοντιαβέρ ντα μαρντάς-πες τι κερέλ κουμάντος πο αισθήματα. Προσευχίντιβελας συνέχεια κο Ιεχωβά ντα μανγκέλας λέσταρ τι ντελ-λες άγιος πνεύμας ντα ζορ για τι νταϊντίνελ. Ντα ροντιντάς κο έντυπα σο τθεράσα για τι αρακχέλ πράγματα σο κα βοηθίνενας-λες. Σο σικλιάσα αμέν; Άμα νιωθίνενα ότι αδικιντάς-τουμέν εκ πφραλ ή εκ πφεν, ατσσόν ήρεμοι ντα προσπαθίνεν τι κερέν κουμάντος σο-ντα μπέτι αισθήματα μπέκιμ τι τθερένα. Μπέκιμ να τζανένα καλά πράγματα κερντέ ανταλέ τζενές τι κερέλ λάφι ή τι συμπεριφερίντιβελ αντικάς. Οτθάρ, κερέν λάφι κο Ιεχωβά αντράλ κατά προσευχή ντα μανγκέν λέσταρ τι βοηθίνελ-τουμέν τι ντικχέν ο πράγματα σαρ ντικχέλα-λεν ο γιαβέρ τζενό. Ανταβά μπέκιμ τι βοηθίνελ-τουμέν τι σκεφτίνεν ότι τουμαρό πφραλ ή τουμαρί πφεν να τθερέλας σκοπός τι κερέλ τουμένγκε κακός ντα αντικάς τι συγχωρίνεν-λες ή λα. (Παρ. 19:​11) Τι ντεν-τουμέν γκοντί ότι ο Ιεχωβά τζανέλα σαρ ισί ο πράγματα τουμαρέ ζωγιάτε ντα κα ντελ-τουμέν ι ζορ σο χρειαζίντιβενα για τι νταϊντίνεν.​—2 Χρον. 16:9· Εκκλ. 5:8.

ΚΑΝΑ ΛΑΣΑ ΔΙΟΡΘΩΣΗ

6. Σόσκε ισί σημαντικός τι αγαβάς ότι ο Ιεχωβά διορθώνελα-αμέν επειδή μανγκέλα-αμέν; (Εβραίους 12:5, 6, 11)

⁶ Κάνα ο Ιεχωβά διορθώνελα-αμέν, ανταβά μπορεί τι κερέλ-αμέν τι νιωθίνας μπουτ στεναχωριμέ. Αλλά άμα σκεφτίνασα σάντε ι ντουκχ, μπέκιμ τι αρχίνας τι σκεφτίνας ότι η διόρθωση νανέ αζόμ σημαντική ντα τι πακιάς ότι ντιντιλί χωρίς λόγος ή ότι ισί μπουτ σκληρή. Ανταβά κα μπορίνελας τι κερέλ-αμέν μα τι αγαβάς κάτι μπουτ σημαντικός​—ότι οντουβά σο διορθώνελα-αμέν ισί ο Ιεχωβά επειδή μανγκέλα-αμέν. (Διαβάνεν Εβραίους 12:5, 6, 11) Ντα άμα κα μουκχάς κο αισθήματα αμαρέ τι κερέν-αμέν κουμάντος, ντάσα κο Μπενγκ ι ευκαιρία τι κερέλ κουμάντος αμαρέ αισθήματα. Βοβ μανγκέλα μα τι δεχτίνας ι διόρθωση, ντα ατζέ χειρότερα, τι τσσιναβάς τι υπηρετίνας ι Ιεχωβάς ντα τι νασάς κατά κχανγκιρί. Άμα λιντέν διόρθωση, σαρ μπορίνενα τι ατσσόν τζανγκαντέ ντα γκοντιαβέρ;

7. (α) Σαρ σικαβέλα η φωτογραφία, σαρ χρησιμοποιήντιλο ο Πέτρος κατά Ιεχωβά αφού λιντάς διόρθωση; (β) Σο σικλιόνα κατά παράδειγμας ι Πετρόσκο;

⁷ Δεχτίνεν ι διόρθωση ντα κερέν ο αλλαγές σο χρειαζίντιβενα. Ο Ιησούς μπουτ φαρ διορθωντάς ι Πετρός ανγκλάλ κο γιαβερά απόστολοι. (Μάρκ. 8:​33· Λουκ. 22:​31-34) Ανταβά ντικχίντιβελα ότι κερντάς ι Πετρός τι λατζάλ! Όμως ο Πέτρος ατσσιλό αφοσιωμέ κο Ιησούς. Δεχτιντάς ι διόρθωση ντα σικλιλό πι λαθίνταρ. Οτθάρ, ο Ιεχωβά ευλογιντάς ι αφοσίωση ι Πετρόσκι ντα ντινάς-λες μπαρέ ευθύνες αντρέ κι κχανγκιρί. (Ιωάν. 21:​15-17· Πράξ. 10:​24-33· 1 Πέτρ. 1:1) Σο μπορίνασα τι σικλιάς κατά παράδειγμας ι Πετρόσκο; Κεράσα λατσσιπέ αμένγκε ντα ι γιαβερένγκε κάνα να ντικχάσα σάντε ι λατζ σο νιωθίνασα αλλά δεχτίνασα ι διόρθωση ντα κεράσα ο αλλαγές σο χρειαζίντιβενα. Κάνα κεράσα-λες ανταβά, αβάσα ατζέ πο χρήσιμοι ι Ιεχωβάσκε ντα αμαρέ πφραλένγκε.

8, 9. Σαρ νιωθίνελας κι αρχή ο Μπερνάρντο κάνα λιντάς διόρθωση, αλλά σο βοηθιντάς-λες τι διορθώνελ πο τρόπος σκέψης;

⁸ Ντικχέν σο αβιλό-πες κο Μπερνάρντο, εκχέ πφραλέστε κι Μοζαμβίκη. Λιντέ λέσταρ ο προνόμιος ι πρεσβυτερόσκο. Σαρ νιωσάλο κι αρχή; Βοβ βακερέλα: «Ισινόμας πφερντό χολί επειδή να μπεϊντιντόμ ι διόρθωση σο λιντόμ». Οντουβά σο χάλας-λες ανάγκη ισινέ σαρ κα ντικχένας-λες ο γιαβερά κι κχανγκιρί. Βακερέλα: «Έπρεπε τι νακχέν μερικά μασεκά για τι ντικχάβ ο πράγματα σωστέ τροπόσαρ ντα τι νταβ πάλι μπέσα κο Ιεχωβά ντα κι οργάνωση λέσκι». Σο βοηθιντάς τον Μπερνάρντο τι ντικχέλ ο πράγματα σωστά;

⁹ Ο Μπερνάρντο διορθωντάς πο τρόπος σκέψης. Βοβ βακερέλα: «Κάνα υπηρετίναβας σαρ πρεσβύτερος, βακεράβας ο εδάφιος Εβραίους 12:7 για τι βοηθίναβ γιαβερέν τι ντικχέν ι διόρθωση ι Ιεχωβάσκι σωστέ τροπόσαρ. Ακανά νακχλό μι γκοντιάταρ: “Κον χρειαζίντιβελα τι κερέλ ανταβά εδάφιος;” Σαρέ ο υπηρέτες ι Ιεχωβάσκε, αντρέ ανταλέντε με-ντα». Σοράν, ο Μπερνάρντο κερντάς πο μπουτ πράγματα για τι ντελ πάλι μπέσα κο Ιεχωβά ντα κι οργάνωση λέσκι. Διαβάνελας ι Γραφή πο μπουτ ντα ντέλας πο μπουτ πι σαατίσταρ για τι σκεφτίνελ λατσσές οντουλά σο διαβάνελας. Παρόλο σο ατζέκ στεναχωρίντιβελας σαρ μπέκιμ τι ντικχένα-λες ο πφραλά ντα ο πφενιά, νικιόλας λέντζαρ κο έργος ντα τζάλας κο συναθροίσεις. Πο σοράν αβιλό πάλι πρεσβύτερος. Άμα, σαρ ο Μπερνάρντο, λιντέν τουμέν-ντα διόρθωση, προσπαθίνεν μα τι ντικχέν σάντε ι λατζ, δεχτίνεν ι συμβουλή ντα κερέν ο αλλαγές σο χρειαζίντιβελα.c (Παρ. 8:​33· 22:4) Άμα κα κερέν-λες ανταβά, τι αβέν σίγουροι ότι ο Ιεχωβά κα ευλογίνελ-τουμέν σο ατσσιλέν αφοσιωμέ λέστε ντα κι οργάνωση λέσκι.

ΚΑΝΑ ΔΥΣΚΟΛΙΝΤΙΒΑΣΑ ΤΙ ΚΕΡΑΣ Ο ΑΛΛΑΓΕΣ ΣΟ ΒΑΚΕΡΕΛΑ Η ΟΡΓΑΝΩΣΗ

10. Καγιά αλλαγή μπέκιμ τι δοκιμαντάς ι αφοσίωση μερικέ Ισραηλιτένγκι;

¹⁰ Ο αλλαγές σο κερέλα η οργάνωση μπορίνενα τι δοκιμάνεν αμαρί αφοσίωση. Άμα να προσοχίνασα, κα μπορίναας ατζέ-ντα τι τσσιναβάς τι υπηρετίνας ι Ιεχωβάς. Για παράδειγμας, σκεφτίνεν σαρ ο πράγματα αλλαξάλε ι Ισραηλιτένγκε. Πριν ο Ιεχωβά τι ντελ-λεν ο Νόμος, ι φαμιλιάκε σορέ χρειαζίντιβελας τι κερέν ο πράγματα σο κερένας ο ιερείς. Κερένας θυσιαστήρια ντα ντένας κο Ιεχωβά θυσίες πουμαρέ φαμιλιάκε. (Γέν. 8:​20, 21· 12:7· 26:​25· 35:1, 6, 7· Ιώβ 1:5) Κάνα όμως ντιντιλό-λεν ο Νόμος, ι φαμιλιάκε σορέ ναστί κερένας ανταλά πράγματα. Ο Ιεχωβά τσσουντάς ιερείς κατά φαμιλί του Ααρών τι κερέν θυσίες. Σοράν κατά αλλαγή ανταγιά σο αβιλί-πες, άμα εκ Ισραηλίτης σο να αστάρντιβελας κατά Ααρών κα αρχίνελας τι συμπεριφερίντιβελ σαρ ιερέας, κα μπορίνενας τι μουνταρέν-λες.d (Λευιτ. 17:​3-6, 8, 9) Ισινέ άραγε ανταγιά αλλαγή εκ κατά λόγους σο ο Κορέ, ο Δαθάν, ο Αβιρών ντα ο 250 αρχηγοί να ισινέ σίγουροι για την εξουσία σο τθερέλας ο Μωυσής ντα ο Ααρών; (Αριθ. 16:​1-3) Ναστί βακεράσα με σιγουριά. Σαρ-ντα τι αβένας ο πράγματα, ο Κορέ ντα οντουλά σο τσσιντιντέ λέσταρ να ατσσιλέ αφοσιωμέ κο Ιεχωβά. Άμα κάποιες αλλαγές σο αβένα-πες κατά οργάνωση δοκιμάνενα τουμαρί αφοσίωση, σο μπορίνενα τι κερέν;

11. Σο σικλιάσα κατά Κααθίτες Λευίτες;

¹¹ Κερέν σο-ντα αλλαγή αβέλα κι οργάνωση. Καζόμ πφιρένας κι έρημος, ο Κααθίτες τθερένας τι κερέν εκ ξεχωριστή μπουτί. Κάθε φαρ σο ο στρατόπεδος ι Ισραηλιτένγκο νασέλας κατά εκ τθαν κο γιαβέρ, μερικοί Κααθίτες γκερένας ι κιβωτός της διαθήκης ανγκλάλ σαρό κατά λαός. (Αριθ. 3:​29, 31· 10:​33· Ιησ. Ναυή 3:​2-4) Σο μπαρό προνόμιος! Όμως, ο πράγματα αλλαξάλε λένγκε κάνα ο Ισραηλίτες γκιλέ τι μπεσέν κο Υποσχεμέ Τθεμ. Να χρειαζίντιβελας ακανά τι ακχαρέν μπουτ φαρ ι Κιβωτός. Οτθάρ, ο βακίτι σο ισινέ βασιλιάς ο Σολομών, μερικοί Κααθίτες διορισάλεας τι γκιλιαβέν ύμνοι, κάποιοι αρακχαβένας ο μπαρέ πόρτες ντα κάποιοι γιαβερά αρακχαβένας ο αποθήκες. (1 Χρον. 6:​31-33· 26:1, 24) Να γραφίντιλο ότι ο Κααθίτες κερντέ παράπονα ή μανγκλέ πο μπαρί θέση επειδή τθερένας ανταβά ειδικός διορισμός ανγκλέ. Σο σικλιάσα αμέν; Κερέν αντράλ τουμαρέ γκίσταρ ο αλλαγές σο αβένα κι οργάνωση κι Ιεχωβάσκι, εμ οντουλά σο επηρεάνενα τουμαρό διορισμός. Τι αρακχέν χαρά σο-ντα διορισμός τι ντιντιόλα-τουμέν. Ντεν-τουμέν γκοντί ότι τουμαρό διορισμός να σικαβέλα καζόμ σημαντικοί ισινέν ι Ιεχωβάσκε. Ι Ιεχωβάσκε ισί πο σημαντικός τι ντας καν κάθε διορισμόσταρ.​—1 Σαμ. 15:22.

12. Σαρ νιωθίνελας η Ζαΐνα κάνα νασλί κατά Μπέθελ επειδή διορισάλι τι κερέλ έργος;

¹² Σκεφτίνεν ο παράδειγμας ι Ζαϊνάκο, εκχέ πφενιάκο σο λιντάς εκ γιαβέρ διορισμός ντα χασαρντάς εκ προνόμιος σο μανγκέλας μπουτ. Διορισάλι τι κερέλ έργος αφού υπηρετιντάας κο Μπέθελ πο μπουτ από 23 μπρεσά. Βόι βακερέλα: «Η αλλαγή μι διορισμόσκι ισινέ μάνγκε μπαρό σοκ. Νιωθίναβας άχρηστη ντα σκεφτίναβας συνέχεια: “Σο λάθος κερντόμ;”» Δυστυχώς, μερικά πφραλά ντα πφενιά κι κχανγκιρί κερένας-λα τι ντουκχάλ ατζέ πο μπουτ κάνα βακερένας λάκε: «Αν ισινάνας μπουτ λατσσί, η οργάνωση κα ατσσικιαρέλας-τουτ». Για κάποιο βακίτι, η Ζαΐνα νιωθίνελας αζόμ πφανγκέ γκίσκι σο κάθε ιράτ ροβέλας. Αλλά βακερέλα: «Ποτές να μουκχλόμ μι νεαυτόστε μα τι αβέλ σίγουρος ι Ιεχωβάσκε οργανωσιάκε ή λέσκε μανγκιμάσκε». Σαρ μπορισάλι η Ζαΐνα τι ατσσόλ τζανγκαντί ντα γκοντιαβέρ;

13. Σο κερντάς η Ζαΐνα για τι νασκιαρέλ ο μπέτι αισθήματα σο τθερέλας;

¹³ Η Ζαΐνα μπορισάλι τι νασκιαρέλ ο μπέτι αισθήματα σο τθερέλας. Σαρ; Διαβαντάς κο έντυπα αμαρέ, θέματα σο τθερένας τι κερέν ι προβλημάσαρ σο νακχέλας. Ο θέμας «Μπορείτε να Αντιμετωπίσετε την Αποθάρρυνση!» κι Σκοπιά 1 Φεβρουαρίου 2001 βοηθιντάς-λα μπουτ. Οντουβά θέμας εξηγίνελας σαρ ο Μάρκος σο γραφιντάς εκ βιβλίος ι Γραφιάκο μπέκιμ τι τθερέλας βοβ-ντα ασακέ αισθήματα μερικές φορές σο αλλαντάς διορισμός. Η Ζαΐνα ντέλα-πες γκοντί: «Ο παράδειγμας ι Μαρκόσκο ισινέ ο φάρμακος σο βοηθιντάς-μαν τι αρακχάβ πάλι μι ζορ». Επίσης, η Ζαΐνα ατσσιλί πασέ πι αμαλέντε, να μανγκλάς τι ατσσόλ κορκορί ντα να σκεφτίνελας σάντε πι ντουκχ. Ντικχλάς ότι ο πνεύμας ι Ιεχωβάσκο κερέλα μπουτί αντράλ κατά οργάνωση λέσκι ντα ότι ο πφραλά σο τθερένας ευθύνες πφαμπόνας μπουτ λάκε. Κάτι γιαβέρ σο αγαντάς ισί ότι η οργάνωση ι Ντεβλέσκι πρέπει τι κερέλ ο πο λατσσό για τι αβέλ ο έργος ι Ιεχωβάσκο.

14. Καγιά αλλαγή σο αβιλί-πες κι οργάνωση ισινέ μπουτ δύσκολη ι πφραλέσκε Βλάντο, ντα σο βοηθιντάς-λες;

¹⁴ Ο Βλάντο, εκ πρεσβύτερος κατά Σλοβενία σο ισί 73 μπρεσένγκο, ζορισάλο κάνα λέσκι κχανγκιρί αβιλί γιεκ εκχέ γιαβεράσαρ ντα η Αίθουσα Βασιλείας σο τζάλας πφαντιλί. Ο Βλάντο βακερέλα: «Να αγαβάβας σόσκε κα πφαντιόλας εκ αζόμ σουκάρ Αίθουσα Βασιλείας. Ισινόμας πφανγκέ γκίσκο επειδή ακανά σουγκό λατσσαρντάμας-λα. Ισινόμ ξυλουργός ντα κερντόμας μερικά κατά νεβέ έπιπλα. Ντα ανταγιά απόφαση σο λιντάς η οργάνωση ισινέ μπουτ δύσκολη αμένγκε ι πφουρένγκε σόσκε έπρεπε τι κεράς μπουτ αλλαγές». Σο βοηθιντάς-λες τι ντελ καν οντουλέ οδηγιάτε; Βοβ βακερέλα: «Κάνα κεράσα ο αλλαγές σο βακερέλα η οργάνωση ι Ιεχωβάσκι ανταβά ανέλα πάντα ευλογίες. Ανταβά προετοιμάνελα-αμέν ατζέ πο μπαρέ αλλαγένγκε σο κα αβέν-πες ανγκλ’ αμέντε». Μήπως δυσκολίνενα τουμέν-ντα ο αλλαγές σαρ ισί τι αβέν γιεκ ο κχανγκιριά ή τι αλλάνεν εκ διορισμός; Τι αβέν σίγουροι ότι ο Ιεχωβά αγαβέλα σαρ νιωθίνενα. Άμα υποστηρίνενα ασακέ αλλαγές ντα ατσσόνα αφοσιωμέ κο Ιεχωβά ντα κι οργάνωση σο βοβ χρησιμοποιήνελα, ισί σίγουρος ότι κα ευλογίντιβεν.​—Ψαλμ. 18:25.

ΑΤΣΣΟΝ ΤΖΑΝΓΚΑΝΤΕ ΝΤΑ ΓΚΟΝΤΙΑΒΕΡ ΣΑΡΕ ΚΟ ΠΡΑΓΜΑΤΑ

15. Σαρ μπορίνασα τι ατσσάς τζανγκαντέ ντα γκοντιαβέρ κάνα νακχάσα δυσκολίες αντράλ κατά κχανγκιρί;

¹⁵ Καζόμ ερεσάσα κο τέλος ανταλέ ντουνιάσκο, μπεκλεντίνασα ότι κα τθεράς δυσκολίες αντράλ κατά κχανγκιρί. Ανταλά δυσκολίες κα μπορίνενας τι δοκιμάνεν αμαρί αφοσίωση κο Ιεχωβά. Οτθάρ, πρέπει τι ατσσάς τζανγκαντέ ντα γκοντιαβέρ. Άμα νιωθίνενα ότι αδικιντάς-τουμέν εκ πφραλ κι κχανγκιρί, μα μουκχέν-τουμέν τι πφερντιόν κερκιπέ. Άμα κα λεν διόρθωση, μα ντικχέν σάντε ι λατζ σο μπέκιμ τι νιωθίνενα, δεχτίνεν ι συμβουλή ντα κερέν ο αλλαγές σο χρειαζίντιβελα. Κάνα η οργάνωση ι Ιεχωβάσκι κερέλα αλλαγές σο επηρεάνενα-τουμέν, τι δεχτίνεν-λεν αντράλ τουμαρέ γκίσταρ ντα τι ντεν καν κο οδηγίες.

16. Σαρ μπορίνενα μα τι τσσιναβέν τι ντεν μπέσα κο Ιεχωβά ντα κι οργάνωση λέσκι;

¹⁶ Μα τσσιναβέν τι ντεν μπέσα κο Ιεχωβά ντα κι οργάνωση λέσκι κάνα δοκιμάντιβελα τουμαρί αφοσίωση. Αλλά για τι κερέν-λες ανταβά, χρειαζίντιβελα τι ατσσόν τζανγκαντέ ντα γκοντιαβέρ, δηλαδή τι αβέν ήρεμοι, τι σκεφτίνεν καθαρά ντα τι ντικχέν ο πράγματα αντικάς σαρ ντικχέλα-λεν ο Ιεχωβά. Τι αβέν αποφασισμέ τι σικλιαρέν-τουμέν τζενένταρ κατά Γραφή σο νακχαντέ προβλήματα σαρ τουμαρέ, ντα τι σκεφτίνεν λατσσές λένγκο παράδειγμας. Τι προσευχίντιβεν κο Ιεχωβά τι βοηθίνελ-τουμέν. Ντα ποτές μα τσσίντεν-τουμέν ντουρ κατά κχανγκιρί. Αζομάν, σο-ντα τι αβέλ-πες, ο Μπενγκ ναστί κα τσσιναβέλ-τουμέν τι υπηρετίνεν ι Ιεχωβάς ούτε κα μπορίνελ τι κερέλ-τουμέν τι νασέν κατά οργάνωση Λέσκι.​—Ιακ. 4:7.