“Τι Μαρέν-τουμέν για τι Ερεσέν κο Σημείος τι Αβέν Ώριμοι”

1. Σο μπεκλεντίνελα ο Ιεχωβά αμένταρ;

ΕΚ ΚΑΤΑ πο ευτυχισμέ στιγμές σο τζουβντιόλα εκ ζευγάρι ισί κάνα μπιάντιβελα λένγκο μαξίμι. Όμως, παρόλο σο μανγκένα αζόμ μπουτ πουμαρέ ρουπανέ μαξιμίς, να μανγκένα τι ατσσόλ πάντα χουρντό. Κα ανησυχίνενας μπουτ άμα λένγκο μαξίμι να κα μπαριόλας. Αντικάς εμ ο Ιεχωβά χαιρίνελα μπουτ κάνα κεράσα ο πρώτα βήματα για τι ακολουθίνας ι Ιησούς, αλλά να μανγκέλα τι ατσσάς πνευματικά χουρντέ. (1 Κορ. 3:1) Οκιά μπάνταρ, μανγκέλα αμένταρ τι “αβάς ντιπ μπαρέ” σαρ Χριστιανοί.—1 Κορ. 14:20.

2. Σο κα ντικχάς ανταλέ μαθημάστε;

² Σο μανγκέλα τι βακερέλ τι αβέλ κάποιος ντιπ μπαρό σαρ Χριστιανός; Σαρ μπαριαράσα αμαρί ωριμότητα; Σαρ βοηθίνελα-αμέν ο πνευματικός χαμπέ τι μπαριάς πνευματικά; Σόσκε δεν πρέπει τι ντας μπουτ μπέσα αμαρέ νεαυτόστε; Ανταλέ μαθημάστε, κα ντικχάς ο απαντήσεις ανταλέ ερωτησιέντε.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΤΙ ΑΒΕΛ ΚΑΠΟΙΟΣ ΩΡΙΜΟΣ ΧΡΙΣΤΙΑΝΟΣ;

3. Σο μανγκέλα τι βακερέλ ότι κάποιος αβιλό ντιπ μπαρό σαρ Χριστιανός;

³ Κι Αγία Γραφή, ο λάφι σο μεταφράντιβελα «ντιπ μπαρέ» ισί ο πουρανό μπαλαμανό λάφι τέλειοι. Ανταβά λάφι μανγκέλα επίσης τι βακερέλ «ώριμοι» ντα «σαστέ».a (1 Κορ. 2:6) Οτθάρ, σαρ εκ μαξίμι μπαριόλα μέχρι τι αβέλ εκ μπαρό τζενό, αντικάς αμέν-ντα αβάσα ντιπ μπαρέ σαρ Χριστιανοί, δηλαδή ώριμοι, κάνα τσσιναβάσα τι αβάς πνευματικά μαξίμια ντα αβάσα πνευματικά μουρσά ντα τζουβλιά. Βέβαια, ατζέ-ντα άμα πετυχιντάμ ανταβά στόχος, ποτές δεν πρέπει τι τσσιναβάς τι κεράς πνευματική πρόοδος. (1 Τιμ. 4:15) Σαρέ αμέν, ατζέ-ντα οντουλά σο ισί τερνέ, μπορίνασα τι αβάς ώριμοι Χριστιανοί. Αλλά σο σικαβέλα ότι εκ Χριστιανός αβιλό ώριμος;

4. Σαρ κα βακερένας ότι ισί εκ ώριμος Χριστιανός;

⁴ Ώριμος Χριστιανός ισί κάποιος σο κερέλα σαρέ οντουλά σο μανγκέλα ο Ντεβέλ λέσταρ. Να τραμπίνελα τι κερέλ σάντε οντουλά σο μανγκέλα βοβ. Βέβαια, επειδή ισί ατελής, κερέλα λάθη. Όμως, σικαβέλα κάθε ντιβές πι ζωγιάσαρ ότι σκεφτίνελα ντα κερέλα οντουλά σο μανγκέλα ο Ντεβέλ. Τθερέλα ιριαντό ο νεβό χαρακτήρας ντα προσπαθίνελα συνέχεια τι σκεφτίνελ ατζέ πο μπουτ σαρ σκεφτίνελα ο Ιεχωβά. (Εφεσ. 4:22-24) Τθερέλα σικλιαρντό πο νεαυτός τι λελ γκοντιαβέρ αποφάσεις σο βασίντιβενα κο νόμοι ντα κο αρχές κι Ιεχωβάσκε. Οτθάρ, να χρειαζίντιβελα εκ μπαρό κατάλογος με νόμους σο κα βακερέν λέσκε σαρ κα συμπεριφερίντιβελ. Κάνα λέλα εκ απόφαση, μαρέλα-πες για τι κερέλ οντουβά σο αποφασιντάς.—1 Κορ. 9:26, 27.

5. Καλά κινδύνους τθερέλα εκ Χριστιανός σο νανέ ώριμος; (Εφεσίους 4:14, 15)

⁵ Κατά γιαβέρ μπάντα, ο Χριστιανός σο νανέ ώριμος τζάλα εύκολα ακατάρ ντα οκουτάρ «κατά ψέματα οντουλένγκε σο κερένα σχέδια για τι χουχαβέν ι γιαβερέν». Μπέκιμ τι πακιάλ οντουλέν σο βακερένα ψεύτικες ιστορίες ντα αμπέρια κι τηλεόραση ή κο Ίντερνετ. Ή μπέκιμ τι χουχάντιβελ κατά αποστάτες.b (Διαβάνεν Εφεσίους 4:14, 15) Επίσης, μπορεί τι ζηλίνελ ι γιαβερέν, τι κερέλ καβγκάδες ι γιαβερέντζαρ ή τι προσβαλίντιβελ εύκολα. Ντα μπέκιμ τι περέλ μπουτ φαρ κο πειρασμός.—1 Κορ. 3:3.

6. Σικαβέν εκχέ παραδειγμάσαρ σαρ εκ τζενό μπαριόλα μέχρι τι αβέλ ώριμος Χριστιανός. (Ντικχέν ι φωτογραφία-ντα)

⁶ Σαρ ντικχλάμ πο οπρέ, η Γραφή βακερέλα ότι, σαρ εκ τζενό μπαριόλα μέχρι τι αβέλ ώριμος Χριστιανός, αντικάς-ντα εκ μαξίμι μπαριόλα μέχρι τι αβέλ εκ μπαρό τζενό. Εκ χουρντό τσσαβό να τζανέλα μπουτ πράγματα, οτθάρ χρειαζίντιβελα ο αρακχαϊπέ εκχέ πο μπαρέ τζενέσκο. Για παράδειγμας, εκ ντάι μανγκέλα πι χουρντέ τσσαγιάταρ τι ασταρέλ λάκο βας καζόμ κα νακχέν ο ντρομ. Καζόμ η χουρντί μπαριόλα, λάκι ντάι μπέκιμ τι μουκχέλ-λα κορκορί τι νακχέλ ο ντρομ, αλλά πάλι βακερέλα λάκε τι ντικχέλ κατά ντούι-ντα μπάντες μήπως νακχένα αυτοκίνητα. Κάνα η τσσάι αβέλα μπαρί τζουβέλ, τζανέλα σαρ τι αρακχαβέλ-πες ασακέ πραγματένταρ. Σαρ ο χουρντέ τσσαβέ χρειαζίντιβενα βοήθεια κατά μπαρέ τζενέ για τι νασέν κατά κίνδυνος, αντικάς-ντα ο τζενέ σο νανέ ώριμοι Χριστιανοί χρειαζίντιβενα βοήθεια κατά ώριμοι Χριστιανοί για τι νασέν κατά πνευματικοί κίνδυνοι ντα τι λεν γκοντιαβέρ αποφάσεις. Οκιά μπάνταρ, κάνα ο ώριμοι Χριστιανοί πρέπει τι λεν εκ απόφαση, σκεφτίνενα λατσσές ο αρχές κι Γραφιάκε για τι αγαβέν σαρ ντικχέλα ο Ιεχωβά ι κατάσταση. Σοράν, κερένα ο σωστός.

7. Χρειαζίντιβενα ο ώριμοι Χριστιανοί ι βοήθεια ι γιαβερένγκι;

⁷ Μήπως ανταβά μανγκέλα τι βακερέλ ότι εκ ώριμος Χριστιανός να κα χρειαζίντιβελ ποτές βοήθεια καεκχέσταρ; Νάα. Εμ ο ώριμα τζενέ χρειαζίντιβενα βοήθεια μερικές φορές. Αλλά εκ τζενό σο νανέ ώριμος μπέκιμ μπεσέλα κατά γιαβερά τι βακερέν λέσκε σο τι κερέλ ή τι λεν εκ απόφαση σο κανονικά έπρεπε τι λελ-λα βοβ. Κατά γιαβέρ μπάντα, εκ ώριμος Χριστιανός ωφελίντιβελα κατά σοφία ντα κατά πράγματα σο τζανένα ο γιαβερά, αλλά αγαβέλα-ντα ότι ο Ιεχωβά μπεκλεντίνελα λέσταρ τι «βάντελ πο φορτίος».—Γαλ. 6:5.

8. Καλέ πραγματέντε να μοιάζενα ο ώριμα τζενέ;

⁸ Σαρ ο κάθε τζενό τθερέλα διαφορετική εμφάνιση, αντικάς-ντα ο ώριμοι Χριστιανοί τθερένα διαφορετικές ιδιότητες. Για παράδειγμας, μερικοί μπορεί τι τθερέν μπουτ σοφία, ενώ γιαβερά τι σικαβέν μπουτ θάρρος. Μερικοί μπορεί τι ντεν αντράλ πουμαρέ γκίσταρ, ενώ γιαβερά τι αγαβέν εύκολα ι ντουκχ ι γιαβερένγκι. Επίσης, κάνα ντούι ώριμοι Χριστιανοί νακχένα ι ίδια κατάσταση, μπορεί τι λεν διαφορετικές αποφάσεις, αλλά ο ντούι-ντα αποφάσεις τι συμφωνίνεν ι Γραφιάσαρ. Ανταβά αβέλα-πες μπουτ φαρ κο πράγματα σο τθερένα τι κερέν με τη συνείδηση. Οτθάρ, ο ώριμοι Χριστιανοί να κρίνενα ο εκ ι γιαβερές άμα λένγκε αποφάσεις ισί διαφορετικές. Οκιά μπάνταρ, ατσσόνα ενωμέ.—Ρωμ. 14:10· 1 Κορ. 1:10.

ΣΑΡ ΜΠΑΡΙΑΡΑΣΑ ΑΜΑΡΙ ΩΡΙΜΟΤΗΤΑ;

9. Μήπως η ωριμότητα εκχέ τζενέσκι μπαριόλα απλώς επειδή νακχένα ο μπρεσά; Εξηγίνεν.

⁹ Εκ μαξίμι μπαριόλα καζόμ νακχένα ο μπρεσά, αλλά καεκχέ τζενέσκι ωριμότητα να μπαριόλα απλώς επειδή νακχένα ο μπρεσά. Για παράδειγμας, ο πφραλά ντα ο πφενιά κι Κόρινθος δεχτιντέ ο λατσσέ αμπέρια, μπολντιλέ, λιντέ άγιος πνεύμας ντα σικλιλέ μπουτ πράγματα κατά απόστολος Παύλος. (Πράξ. 18:8-11) Όμως, μερικά μπρεσά σοράν λένγκε μπολντιμάσταρ, μπουτ λένταρ να ισινέ ατζέκ ώριμοι. (1 Κορ. 3:2) Σο μπορίνασα τι κεράς για μα τι παθίνας-λες ανταβά αμέν-ντα;

10. Σο πρέπει τι κεράς για τι ερεσάς κο σημείος τι αβάς ώριμοι; (Ιούδα 20)

¹⁰ Για τι ερεσάς κο σημείος τι αβάς ώριμοι, χρειαζίντιβελα πρώτα τι μανγκάς-λες ανταβά. Οντουλά σο “να τζανένα μπουτ πράγματα ντα μπεϊντίνενα τι τζουβντιόν αντικάς”, να κα κερέν πρόοδος. Κα ατσσόν πνευματικά μαξίμια. (Παρ. 1:22) Να μανγκάσα τι αβάς σαρ ο τζενέ σο, ενώ ισί μπαρέ κι ηλικία, ο αποφάσεις λένγκε ζωγιάτε λένα-λεν ατζέ λένγκο ντατ ντα λένγκι ντάι. Οκιά μπάνταρ, μανγκάσα τι τθεράς αμέν ο ίδιοι ι ευθύνη για τι μπαριάς πνευματικά. (Διαβάνεν Ιούδα 20) Άμα προσπαθίνενα ατζέ τι ερεσέν κο σημείος τι αβέν ώριμοι, τι προσευχίντιβεν «τι κερέλ-τουμέν [ο Ιεχωβά] εμ τι μανγκέν εμ τι τθερέν ι ζορ τι κερέν πράγματα».—Φιλιπ. 2:13.

11. Σο ντέλα-αμέν ο Ιεχωβά για τι βοηθίνελ-αμέν τι αβάς ώριμοι; (Εφεσίους 4:11-13)

¹¹ Ο Ιεχωβά να μουκχέλα-αμέν κορκορέ τι μπαριαράς αμαρί ωριμότητα. Ντέλα-αμέν βοήθεια μπουτέ τροπόντζαρ. Οντουλά σο υπηρετίνενα σαρ τσομπάνια ντα δάσκαλοι κι Χριστιανική κχανγκιρί βοηθίνενα-αμέν τι αβάς «ντιπ μπαρέ» πνευματικά, δηλαδή ώριμοι, «μέχρι αμαρί συμπεριφορά τι αβέλ σαρ η συμπεριφορά εκχέ τζενέσκι σο ισί μπαγιά κο μπάριπε, σαρ ο Χριστός». (Διαβάνεν Εφεσίους 4:11-13) Ο Ιεχωβά ντέλα-αμέν επίσης πο άγιος πνεύμας για τι βοηθίνελ-αμέν τι τθεράς «ι γκοντί ι Χριστόσκι». (1 Κορ. 2:14-16) Επίσης, ντινάς-αμέν ο σταρ Ευαγγέλια κι Γραφή για τι σικαβέλ αμένγκε σαρ σκεφτίνελας, σαρ κερέλας λάφι ντα σαρ συμπεριφερίντιβελας ο Ιησούς κάνα ισινέ κι πφουβ. Άμα τουμαρό τρόπος σο σκεφτίνενα ντα συμπεριφερίντιβενα ισί σαρ ι Ιησούσκο, αζομάν κα πετυχίνεν ο στόχος τι αβέν ώριμοι Χριστιανοί.

Η ΣΗΜΑΣΙΑ ΣΟ ΤΘΕΡΕΛΑ Ο ΠΝΕΥΜΑΤΙΚΟΣ ΧΑΜΠΕ

12. Καλά ισί ο «πρώτα πράγματα σο σικλιλάμ ι Χριστόσκε»;

¹² Για τι κεράς πρόοδος ντα τι αβάς ώριμοι, πρέπει επίσης μα τι ατσσάς «κο πρώτα πράγματα σο σικλιλάμ ι Χριστόσκε». Μερικά ανταλένταρ ισί η μετάνοια, η πίστη, ο μπολντιπέ ντα η ανάσταση. (Εβρ. 6:1, 2) Ανταλά ισί ο βασικά πράγματα σο πακιάνα ο αληθινοί Χριστιανοί. Άκ’ σόσκε ο απόστολος Πέτρος, κάνα κερντάς λάφι κο τζενέ κι Πεντηκοστή, βακερντάς ανταλέ πραγματένγκε. (Πράξ. 2:32-35, 38) Πρέπει τι δεχτίνας ανταλά βασικά πράγματα για τι αβάς μαθητές ι Χριστόσκε. Για παράδειγμας, ο Παύλος προειδοποιηντάς ότι κον να πακιάλα κι ανάσταση, ναστί βακερέλα ότι ισί αληθινός Χριστιανός. (1 Κορ. 15:12-14) Αλλά για τι αβάς ώριμοι, πρέπει τι μανγκάς τι σικλιάς πο μπουτ οντουλέ βασικέ πραγματένταρ.

13. Σο πρέπει τι κεράς για τι ωφελίντιβας κατά πνευματικός χαμπέ σο βακέρντιβελα κο εδάφιος Εβραίους 5:14; (Ντικχέν ι φωτογραφία-ντα)

¹³ Ο πρώτα πράγματα τθερένα τι κερέν με το νόμοι ι Ιεχωβάσκε. Ο πνευματικός χαμπέ όμως, τθερέλα τι κερέλ με το αρχές-ντα ι Ιεχωβάσκε, σο βοηθίνενα-αμέν τι αγαβάς ο τρόπος σο σκεφτίνελα. Για τι ωφελίντιβας ανταλέ πνευματικέ χαμπέσταρ, πρέπει τι σικλιαράς-αμέν κατά Γραφή, τι σκεφτίνας λατσσές οντουλά σο διαβάνασα ντα τι κεράς-λεν προσεκτικά. Άμα κα κεράς-λες ανταβά, κα σικλιαράς αμαρό νεαυτός τι λελ αποφάσεις σο κερένα ι Ιεχωβάσκο γκι.c—Διαβάνεν Εβραίους 5:14.

14. Σαρ βοηθιντάς ο Παύλος ι πφραλέν κι Κόρινθος τι αβέν ώριμοι;

¹⁴ Μπουτ φαρ, ο Χριστιανοί σο νανέ ώριμοι δυσκολίντιβενα τι λεν ι σωστή απόφαση κάνα πρέπει τι σκεφτίνεν ο αρχές ι Γραφιάκε ντα τι κερέν-λεν. Άμα να υπαρχίντιβελα εκ νόμος ι Γραφιάκο, μερικοί μπέκιμ αμντίνενα ότι μπορίνενα τι κερέν σο μανγκένα. Γιαβερά τζενέ, οτθέ σο να υπαρχίντιβελα ανάγκη για κανόνας, μπέκιμ ρόντενα εκ κανόνας. Για παράδειγμας, ο Χριστιανοί κι Κόρινθος μάλλον μανγκλέ κατά Παύλος εκ κανόνας σο κα σικαβέλας λένγκε άμα κα μπορίνενας τι χαν χαμπέ σο ντιντιλόας σαρ θυσία κο είδωλα. Αντίς τι βακερέλ λένγκε σο τι κερέν, ο Παύλος βακερντάς ότι ο κάθε τζενό τθερέλας “ο δικαίωμας τι τραμπίνελ” σο κα κερέλ, ανάλογα με τη συνείδηση λέσκι. Βακερντάς λένγκε μερικές αρχές σο κα βοηθίνενας-λεν τι λεν εκ απόφαση σο να κα ενοχλίνελας λένγκι συνείδηση ντα να κα κερέλας ι γιαβερέν τι χασαρέν πουμαρί πίστη. (1 Κορ. 8:4, 7-9) Ο Παύλος βοηθιντάς ι πφραλέν κι Κόρινθος τι τσσουβέν πουμαρί γκοντί τι κχελέλ, αντίς τι βασίντιβεν γιαβερέ τζενέντε ή τι ρόντεν πάντα εκ κανόνας. Ανταλέ τροπόσαρ, βοηθιντάς-λεν τι μπαριόν πνευματικά ντα τι αβέν ώριμοι.

15. Σαρ βοηθιντάς ο Παύλος ι Εβραίε Χριστιανόν τι κερέν πνευματική πρόοδος;

¹⁵ Λάσα εκ μπαρό μάθημας οντουλένταρ σο γραφιντάς ο Παύλος κο Εβραίοι Χριστιανοί. Μερικοί να συνεχίνενας τι μπαριόν πνευματικά, αλλά “αβιλέας πάλι τζενέ σο χρειαζίντιβενας τθουτ, ντα όχι χαμπέ”. (Εβρ. 5:12) Να σικλιόνας ντα να δεχτίνενας ο νεβέ πράγματα σο σικλιαρέλας-λεν ο Ιεχωβά αντράλ κατά κχανγκιρί. (Παρ. 4:18) Για παράδειγμας, μπουτ πιστοί Ιουδαίοι συνεχίνενας τι βακερέν ι γιαβερένγκε ότι έπρεπε τι κερέν ο Μωσαϊκός Νόμος, παρόλο σο σχεδόν 30 μπρεσά πο τζανγκλέ, η θυσία ι Ιησούσκι τσσουντάας εκ τέλος κο Νόμος ανταβά. (Ρωμ. 10:4· Τίτο 1:10) Σίγουρα, 30 μπρεσά ισινέ μπουτ ντα ερεσένας-λεν για τι μπορίνεν ο Ιουδαίοι Χριστιανοί τι αλλάνεν ο τρόπος σο σκεφτίνενας! Κάθε τζενό σο τθερέλα διαβαντό ι επιστολή ι Παυλόσκι κο Εβραίοι μπορίνελα τι βακερέλ με σιγουριά ότι ανταβά βιβλίος τθερέλα αχόρτ πνευματικές αλήθειες. Ανταγιά επιστολή βοηθιντάς-λεν τι αγαβέν ότι ο νεβό τρόπος σο έπρεπε τι ντεν λατρεία ι Ιεχωβάς σαρ Χριστιανοί ισινέ μπουτ πο λατσσό. Ντινάς-λεν επίσης ο θάρρος τι συνεχίνεν τι κερέν έργος παρόλο σο τζάνας λέντζαρ κόντρα ο Ιουδαίοι.—Εβρ. 10:19-23.

ΜΑ ΝΤΕΝ ΜΠΟΥΤ ΜΠΕΣΑ ΤΟΥΜΑΡΕ ΝΕΑΥΤΟΣΤΕ

16. Αφού ερεσλάμ κο σημείος τι αβάς ώριμοι, σο γιαβέρ πρέπει τι κεράς;

¹⁶ Πρέπει τι κεράς μπουτ μπαρέ προσπάθειες, όχι σάντε για τι ερεσάς κο σημείος τι αβάς ώριμοι, αλλά εμ για τι ατσσάς ώριμοι. Για τι πετυχίνας-λες ανταβά, δεν πρέπει τι ντας μπουτ μπέσα αμαρέ νεαυτόστε. (1 Κορ. 10:12) Πρέπει “τι δοκιμάνας” αμαρό νεαυτός για τι αβάς σίγουροι ότι συνεχίνασα τι κεράς πρόοδος.—2 Κορ. 13:5.

17. Σαρ σικαβέλα η επιστολή κο Κολοσσαείς καζόμ σημαντικός ισί τι ατσσάς ώριμοι;

¹⁷ Κι επιστολή κο Κολοσσαείς, ο Παύλος σικαβέλα πάλι καζόμ σημαντικός ισί τι ατσσάς ώριμοι. Παρόλο σο ο πφραλά κο Κολοσσές αβιλέας ντιπ μπαρέ σαρ Χριστιανοί, δηλαδή ώριμοι, ο Παύλος προειδοποιηντάς-λεν μα τι χουχάντιβεν κατά τρόπος σο σκεφτίνελα ο ντουνιάς. (Κολ. 2:6-10) Ο Επαφράς ισινέ εκ τζενό σο τζανέλας λατσσές ι πφραλέν κι κχανγκιρί κο Κολοσσές ντα κερέλας συνέχεια προσευχή «για τι μπορίνεν τελικά τι ατσσόν σταθεροί σαρ ώριμα τζενέ». (Κολ. 4:12) Σο σικλιάσα ανταλέσταρ; Εμ ο Παύλος εμ ο Επαφράς αγαβένας ότι, για τι ατσσόλ κάποιος ώριμος, πρέπει βοβ τι κερέλ προσπάθεια ντα τι μανγκέλ ι βοήθεια ι Ντεβλέσκι. Ο ντούι-ντα μανγκένας τι ατσσόν ο πφραλά κο Κολοσσές ώριμοι, ή γιαβέρτουλους ντιπ μπαρέ σαρ Χριστιανοί, παρόλο σο τθερένας δοκιμασίες.

18. Σο κα μπορίνελας τι παθίνελ εκ ώριμος Χριστιανός; (Ντικχέν ι φωτογραφία-ντα)

¹⁸ Ο Παύλος προειδοποιηντάς ι Εβραίε πφραλέν ότι εκ ώριμος Χριστιανός κα μπορίνελας τι χασαρέλ ντιπ ι ευλογία ι Ντεβλέσκι. Άμα εκ Χριστιανός να μανγκέλα τι ντελ καν ι Ιεχωβάς, κα μπορίνελας τι νασέλ αζόμ ντουρ Λέσταρ σο κα ερεσέλας κο σημείος μα τι μπορίνελ τι μετανιώνελ ντα τι λελ ι συγχώρηση ι Ντεβλέσκι. Πάλι λατσσές σο ο Εβραίοι να ισινέ κι κατάσταση ανταγιά. (Εβρ. 6:4-9) Σο αβέλα-πες όμως ι τζενέντζαρ σο ισί αδρανείς ή χάνα αποκοπή αλλά πο σοράν μετανιώνενα; Άμα μετανιώνενα ταπεινά, σικαβένα ότι νανέ σαρ ο τζενέ σο κα μπορίνενας τι χασαρέν ντιπ ι ευλογία ι Ντεβλέσκι, σαρ γραφιντάς ο Παύλος. Σίγουρα, κάνα κα βουρτίνεν κο Ιεχωβά, χρειαζίντιβενα ι βοήθεια σο ντέλα Βοβ. (Ιεζ. 34:15, 16) Ο πρεσβύτεροι μπέκιμ τι τσσουβέν εκχέ ώριμε πφραλές ή πφενιά τι βοηθίνελ-λεν τι αρακχέν πάλι πουμαρί πνευματική ζορ.

19. Καβά στόχος πρέπει τι τθεράς;

¹⁹ Άμα μαρένα-τουμέν για τι ερεσέν κο σημείος τι αβέν ώριμοι, μπορίνενα τι πετυχίνεν τουμαρό στόχος! Συνεχίνεν τι χαν πνευματικός χαμπέ ντα συνεχίνεν ατζέ πο μπουτ τι σκεφτίνεν ι τροπόσαρ σο σκεφτίνελα ο Ιεχωβά. Ντα άμα ήδη ισινέν ώριμοι, ατσσόν σταθεροί καζόμ ισινέν ντιπ μπαρέ σαρ Χριστιανοί.