Σο Τζανάσα ι Τροπόσκε σο κα Κρίνελ ο Ιεχωβά ι Τζενέν κο Μέλλον;

1. Σόσκε μπορίνασα τι βακεράς ότι τζουβντιάσα μπουτ σημαντικέ ντιβεσέντε;

ΤΖΟΥΒΝΤΙΑΣΑ μπουτ σημαντικέ ντιβεσέντε! Κάθε ντιβές, ντικχάσα αμαρέ γιακχίντζαρ τι νικιόν μπαγιά προφητείες ι Γραφιάκε. Για παράδειγμας, ντικχάσα ι «βασιλιάς κατά βορράς» ντα ι «βασιλιάς κατά νότος» τι τζαν κόντρα ο εκ κο γιαβέρ κον κα κερέλ κουμάντος ι ντουνιάς. (Δαν. 11:40) Ντικχάσα ο λατσσέ αμπέρια ι Ντεβλέσκε Βασιλειάκε τι μουτθάντιβεν πο μπουτ σαρέ κατά γιαβερά μπρεσά, ντα μπουτ τζενέ τραμπιντέ τι υπηρετίνεν ι Ιεχωβάς. (Ησ. 60:22· Ματθ. 24:14) Ντα λάσα μπερεκέτι πνευματικός χαμπέ «κο σωστός βακίτι».—Ματθ. 24:45-47.

2. Καλέ πραγμάσκε μπορίνασα τι αβάς σίγουροι, αλλά σο πρέπει τι αγαβάς;

² Καζόμ νακχέλα ο βακίτι, ο Ιεχωβά βοηθίνελα-αμέν τι αγαβάς ατζέ πο λατσσές ο σημαντικά πράγματα σο κα αβέν ανγκλ’ αμέντε. (Παρ. 4:18· Δαν. 2:28) Μπορίνασα τι αβάς σίγουροι ότι, κάνα κα αρχίνελ η μπαρί στεναχώρια, κα τζανάς σαρέ οντουλά σο χρειαζίντιβελα τι τζανάς για τι μπορίνας τι ατσσάς πιστοί ντα ενωμέ οντουλέ δύσκολε βακιτίστε. Πρέπει τι αγαβάς όμως, ότι ισί πράγματα σο κα αβέν κο μέλλον ντα να τζανάσα-λεν. Ανταλέ μαθημάστε, κι αρχή κα ντικχάς σόσκε αλλαντάμ μερικά πράγματα σο βακερντάμας ότι κα αβέν-πες. Σοράν, κα ντικχάς μερικά πράγματα σο τζανάσα για το μέλλον ντα ι τροπόσκε σο κα κρίνελ αμαρό Ντατ σο ισί κο ουρανός.

ΣΟ ΝΑ ΤΖΑΝΑΣΑ

3. Ανγκλέ, σο πακιάας ότι κα αβέλας-πες κάνα κα αρχίνελ η μπαρί στεναχώρια, ντα σόσκε βακεράας-λες ανταβά;

³ Ανγκλέ, βακεράας ότι, κάνα κα αρχίνελ η μπαρί στεναχώρια, καέκ τζενό να κα τθερέλ ι ευκαιρία τι αβέλ κατά μεριά ι Ιεχωβάσκι ντα τι σώντιβελ κατά Αρμαγεδδώνας. Βακεράας-λες ανταβά σόσκε πακιάας ότι ο κάθε πράγμας σο αβιλόας-πες κο Κατακλυσμός μανγκέλας τι σικαβέλ σο κα αβέλας-πες αμαρέ ντιβεσέντε. Για παράδειγμας, πριν τι αρχίνελ ο Κατακλυσμός, ο Ιεχωβά πφαντάς ι πόρτα κι κιβωτός ντα καέκ ναστί τσσουβέλας-πες αντρέ. Σκεφτίναας ότι κάτι ασακό-ντα κα αβέλας-πες κάνα κα αρχίνελας η μπαρί στεναχώρια. Ο Ιεχωβά κα πφάντελας ι πόρτα, σαρ τι βακεράας, ντα καέκ τζενό να κα τθερέλας ι ευκαιρία τι σώντιβελ.—Ματθ. 24:37-39.

4. Σόσκε ακανά να πακιάσα ότι σο-ντα αβιλό-πες κο Κατακλυσμός σικαβέλα σο κα αβέλ-πες αντιβές; Εξηγίνεν.

⁴ Ισί σωστός τι βακεράς ότι κάθε πράγμας σο αβιλό-πες κο Κατακλυσμός μανγκέλας τι σικαβέλ σο κα αβέλ-πες κο μέλλον; Η απάντηση ισί όχι. Σόσκε; Επειδή να βακερέλα-λες ανταβά η Γραφή.a Εκ τζενό όμως μπορεί τι σκεφτίνελ: Να βακερντάς ο Ιησούς ότι ο βακίτι σο κα “βουρτίνελας” κα μοιάζελας με το «ντιβεσά σο τζουβντιόλας ο Νώε»; Βα, αλλά να βακερντάς ότι σο-ντα αβιλό-πες αζομάν μανγκέλας τι σικαβέλ σο κα αβέλ-πες κο μέλλον. Ούτε βακερντάς ότι η πόρτα κατά κιβωτός σο πφαντάας ο Ιεχωβά μανγκέλας τι σικαβέλ κάτι αμαρέ ντιβεσένγκε. Σίγουρα όμως μπορίνασα τι σικλιάς κατά ιστορία του Νώε με το Κατακλυσμός.

5. (α) Σο κερντάς ο Νώε πριν τι αβέλ ο Κατακλυσμός; (Εβραίους 11:7· 1 Πέτρου 3:20) (β) Σαρ αμαρό έργος αντιβές μοιάζελα με το έργος σο κερντάας ο Νώε;

⁵ Κάνα ο Νώε ασουντάς ι προειδοποίηση ι Ιεχωβάσκι, κερντάς ι κιβωτός ντα αντικάς σικαντάς ότι τθερέλας πίστη. (Διαβάνεν Εβραίους 11:7· 1 Πέτρου 3:​20) Αντικάς-ντα ο τζενέ σο ασουνένα ο λατσσέ αμπέρια ι Ντεβλέσκε Βασιλειάκε πρέπει τι σικαβέν πουμαρί πίστη οντουλέντζαρ σο κερένα. (Πράξ. 3:17-20) Ο Πέτρος βακερντάς ότι ο Νώε ισινέ “εκ τζενό σο κερέλας λάφι για το δίκαια πράγματα ι Ντεβλέσκε”. (2 Πέτρ. 2:5) Όμως, σαρ ντικχλάμ κο γιαβέρ μάθημας, να τζανάσα άμα ο Νώε προσπαθίνελας τι κερέλ λάφι ι κάθε τζενέσαρ σο ισινέ κι πφουβ πριν τι αβέλ ο Κατακλυσμός. Αντιβές, προσπαθίνασα τι βακεράς ο λατσσέ αμπέρια τζενέντε σαρό κο ντουνιάς ντα κεράσα-λες ανταβά αντράλ αμαρέ γκίσταρ. Αλλά καζόμ-ντα τι προσπαθίνας, να αβέλα-πες τι βακεράς ο λατσσέ αμπέρια κο κάθε τζενό κι πφουβ πριν τι αβέλ ο τέλος. Σόσκε βακεράσα-λες ανταβά;

6, 7. Σόσκε μπορίνασα τι βακεράς ότι να κα μουτθαβάς ο λατσσέ αμπέρια σε κάθε τζενό κι πφουβ πριν τι αβέλ ο τέλος; Εξηγίνεν.

⁶ Ντεν προσοχή σο βακερντάς ο Ιησούς αμαρέ εργόσκε. Βακερντάας ότι ο λατσσέ αμπέρια κα μουτθάντιβενας «σαρί κι πφουβ για τι ασουνέν-λεν σαρέ ο τθεμά». (Ματθ. 24:14) Ανταγιά προφητεία νικιόλα μπαγιά αντιβές πο μπουτ σαρέ κατά γιαβερά μπρεσά. Ο αμπέρια ι Βασιλειάκε βακέρντιβενα 1.000 ντα πο μπουτ τσσιμπέντε, ντα αντράλ κατά ιστότοπος jw.org ο πο μπουτ τζενέ σαρό κο ντουνιάς μπορίνενα τι σικλιόν ο λατσσέ αμπέρια.

⁷ Αλλά ο Ιησούς βακερντάς επίσης πι μαθητέντε ότι “να κα ερεσαβένας τι τζαν σαρέ κο πόλεις”, δηλαδή να κα βακερένας ο λατσσέ αμπέρια σαριλέντε, πριν τι αβέλ βοβ. (Ματθ. 10:23· 25:31-33) Ο λάφια ι Ιησούσκε κα νικιόν μπαγιά εμ αμαρέ ντιβεσέντε. Εκατομμύρια τζενέ αντιβές τζουβντιόνα τθεμέντε σο ισί απαγορευμέ τι κεράς έργος. Επίσης, εκατοντάδες μαξίμια μπιάντιβενα κάθε λεπτός. Κεράσα ο πο λατσσό σο μπορίνασα για τι μουτθαβάς ο λατσσέ αμπέρια τζενέντε “σαρέ κατά τθεμά, κατά φυλές ντα κατά τσσιμπά”. (Αποκ. 14:6) Ισί μπαγιά όμως, ότι να κα μπορίνας τι μουτθαβάς ο λατσσέ αμπέρια σε κάθε τζενό κι πφουβ πριν τι αβέλ ο τέλος.

8. Καγιά ερώτηση μπέκιμ τι κεράς ι τροπόσκε σο κα κρίνελ ο Ιεχωβά ι τζενέν κο μέλλον; (Ντικχέν ο φωτογραφίες-ντα)

⁸ Όμως, ακανά μπορεί τι πουτσάς: Σο κα αβέλ-πες ι τζενέντζαρ σο μπέκιμ να τθερένας ι ευκαιρία τι ασουνέν ο λατσσέ αμπέρια πριν τι αβέλ η μπαρί στεναχώρια; Σαρ κα κρίνελ-λεν ο Ιεχωβά ντα λέσκο Τσσαβό, σο τσσουντάς-λες ο Ντεβέλ για τι κρίνελ; (Ιωάν. 5:19, 22, 27· Πράξ. 17:31) Ο εδάφιος ανταλέ μαθημάσκο βακερέλα ότι ο Ιεχωβά «να μανγκέλα τι καταστραφίντιβελ καέκ». Οκιά μπάνταρ, μανγκέλα «σαρέ τι μετανιώνεν». (2 Πέτρ. 3:9· 1 Τιμ. 2:4) Παρόλο σο τζανάσα ανταλά πράγματα ι Ιεχωβάσκε, βοβ να τθερέλα αμένγκε βακερντό ι απάντηση ανταλέ ερωτησιάτε. Ντα φυσικά, νανέ υποχρεωμέ τι βακερέλ αμένγκε σο κερντάς ή σο κα κερέλ.

9. Σο τθερέλα αμένγκε σικαντό ο Ιεχωβά κι Αγία Γραφή;

⁹ Πι Λαφίστε, ο Ιεχωβά τθερέλα αμένγκε σικαντό κάποια πράγματα σο κα κερέλ. Για παράδειγμας, η Γραφή βακερέλα αμένγκε ότι ο Ιεχωβά κα ανέλ πάλι κι ζωή τζενέν “σο νανέ δίκαιοι”, ντα να τθερένας ι ευκαιρία τι σικλιόν ο λατσσέ αμπέρια ντα τι αλλάνεν πουμαρί ζωή. (Πράξ. 24:15· Λουκ. 23:42, 43) Ανταβά μπέκιμ τι κερέλ-αμέν τι τθεράς γιαβερά-ντα σημαντικές ερωτήσεις.

10. Καλά γιαβερά ερωτήσεις μπορεί τι τθεράς;

¹⁰ Μήπως σαρέ οντουλά σο κα μερέν αντρέ κι μπαρί στεναχώρια κα καταστραφίντιβεν για πάντα χωρίς τι τθερέν ι ελπίδα τι τζουβντιόν; Η Γραφή σικαβέλα ότι οντουλά σο τζάνα κόντρα ι Ιεχωβάσαρ ντα κα καταστραφίνελ-λεν βοβ ντα λέσκο στρατός κο Αρμαγεδδώνας να κα αναστίντιβεν. (2 Θεσ. 1:6-10) Αλλά σο κα αβέλ-πες ι γιαβερέ τζενέντζαρ; Για παράδειγμας μερικοί μπορεί τι μερέν ιτιρί εκχέ νασφαλιμάσταρ, ιτιρί κατά πφουρίματα, από εκ ατύχημας ή επειδή κάποιος μουνταρντάς-λεν. (Εκκλ. 9:11· Ζαχ. 14:13) Κα μπορίνενας κάποιοι λένταρ τι αβέν αντρέ “οντουλέντε σο νανέ δίκαιοι” ντα τι αναστίντιβεν κο νεβό ντουνιάς; Να τζανάσα.

ΣΟ ΤΖΑΝΑΣΑ

11. Καλέ πραγμάσταρ κα κρίντιβεν ο τζενέ;

¹¹ Τζανάσα μπουτ πράγματα σο κα αβέν-πες ανγκλ’ αμέντε. Για παράδειγμας, τζανάσα ότι ο Ιησούς κα κρίνελ ι τζενέν κατά τρόπος σο συμπεριφερισάλε κο πφραλά κι Χριστόσκε. (Ματθ. 25:40) Οντουλά σο κα κρίντιβεν σαρ μπρακέ ισί ο τζενέ σο τθερένα σικαντό ότι τσσίντενα κατά χρισμέ ντα κατά Χριστός. Τζανάσα επίσης ότι μερικά κατά χρισμέ πφραλά ι Χριστόσκε κα συνεχίνεν τι αβέν κι πφουβ αφού κα αρχίνελ η μπαρί στεναχώρια. Ντα κα τζαν κο ουρανός χάνικ πριν τι αρχίνελ ο Αρμαγεδδώνας. Καζόμ ο πφραλά ι Χριστόσκε κα συνεχίνεν τι αβέν κι πφουβ, μάλλον ο λατσσέ τζενέ κα τθερέν ι ευκαιρία τι τσσίντεν εμ κατά χρισμέ εμ κατά έργος σο κερένα. (Ματθ. 25:31, 32· Αποκ. 12:17) Σόσκε σαρέ ανταλά ισί αζόμ σημαντικά;

12, 13. Σο μπορεί τι κερέν κάποιοι κάνα κα ντικχέν τι καταστραφίντιβελ η «Βαβυλώνα η Μπαρί»; (Ντικχέν ο φωτογραφίες-ντα)

¹² Ατζέ-ντα κάνα κα αρχίνελ η μπαρί στεναχώρια, μπέκιμ μερικοί σο κα ντικχέν τι καταστραφίντιβελ η «Βαβυλώνα η Μπαρί» κα ντεν-πες γκοντί ότι ο Μάρτυρες ι Ιεχωβάσκε κερένας λάφι μπουτ βακίτι ανταλέσκε. Μήπως μερικοί σο κα ντικχέν οντουλά σο κα αβέν-πες κα αρχίνεν τι πακιάν κο Ιεχωβά;—Αποκ. 17:5· Ιεζ. 33:33.

¹³ Άμα αβιλό-πες κάτι ασακό, ανταβά κα μοιάζελ οντουλέσαρ σο αβιλόας-πες κι Αίγυπτος, κο μπρεσά σο τζουβντιόλας ο Μωυσής. Ανέν τουμαρέ γκοντιάτε ότι «μπουτ τζενέ γιαβερέ τθεμένταρ» ακολουθιντέ ι Ισραηλιτέν κάνα νασλέ κατά Αίγυπτος. Μερικοί οντουλέ τζενένταρ μπέκιμ αρχισάλε τι τθερέν πίστη κάνα ντικχλέ ότι ο προειδοποιήσεις ι Μωυσίσκε για το Ντες Πληγές νικίστιλε μπαγιά. (Έξοδ. 12:38) Άμα αβιλό-πες κάτι ασακό σοράν κατά καταστροφή ι Μπαρέ Βαβυλωνάκι, μήπως κα αβέλας αμένγκε άδικος σο μερικά τζενέ κα αβέν αμέντζαρ χάνικ πριν τι αβέλ ο τέλος; Σίγουρα όχι! Μανγκάσα τι αβάς σαρ αμαρό Ντατ, «σο τζιτζίνελα ντα πφαμπόλα ι γιαβερένγκε, σο να χολιάνελα εύκολα, ντα ισί πφερντό αφοσιωμέ αγάπη ντα αλήθεια».b—Έξοδ. 34:6.

14, 15. Μήπως η αιώνια ζωή εκχέ τζενέσκι τθερέλα τι κερέλ με τη στιγμή σο μερέλα ή ι τθεμέσαρ σο τζουβντιόλα; Εξηγίνεν. (Ψαλμός 33:4, 5)

¹⁴ Εκ πφραλ ή εκ πφεν μπέκιμ τι τθερέλ εκχέ τζενές σο νανέ κι αλήθεια, ντα τι βακερέλ: «Μπέκιμ κα αβέλας πο λατσσές τι μερέλας μο τζενό πριν τι αρχίνελ η μπαρί στεναχώρια σόσκε αντικάς κα τθερέλας ι ελπίδα τι αναστίντιβελ». Σίγουρα ο λόγος σο βακερένα-λες ανταβά ισί λατσσό. Αλλά άμα εκ τζενό κα τζουβντιόλ για πάντα ή όχι, να τθερέλα τι κερέλ με τη στιγμή σο τυχίνελα τι μερέλ. Ο Ιεχωβά ισί ο τέλειος Κριτής. Λέσκε αποφάσεις ισί δίκαιες ντα σωστές. (Διαβάνεν Ψαλμός 33:4, 5) Μπορίνασα τι αβάς σίγουροι ότι «ο Κριτής σαρέ ι πφουβιάκο» κα κερέλ οντουβά σο ισί σωστός.—Γέν. 18:25.

¹⁵ Επίσης, ισί λογικός τι πακιάς ότι άμα εκ τζενό κα τζουβντιόλ για πάντα ή όχι, να τθερέλα τι κερέλ ι τθεμέσαρ σο τυχίνελα τι τζουβντιόλ. Να νακχέλα κατά γκοντί ι Ιεχωβάσκι τι κρίνελ εκατομμύρια τζενέν σαρ «μπουσνιά» σάντε επειδή τζουβντιόνα τθεμέντε σο να τθερένας ποτές ι ευκαιρία τι σικλιόν ο λατσσέ αμπέρια ι Βασιλειάκε. (Ματθ. 25:46) Ο δίκαιος Κριτής σαρέ ι πφουβιάκο πφαμπόλα οντουλέ τζενένγκε πο μπουτ αμένταρ. Να τζανάσα σαρ κα ανέλ ο Ιεχωβά ο πράγματα κι μπαρί στεναχώρια. Μπέκιμ μερικοί ανταλέ τζενένταρ τι τθερέν ι ευκαιρία τι σικλιόν ι Ιεχωβάσκε, τι πακιάν λέστε ντα τι τσσίντεν λέσταρ κάνα βοβ κα αγιάνελ πο νεαυτός ανγκλάλ σαρέ κο τθεμά.—Ιεζ. 38:16.

16. Σο σικλιλάμ ι Ιεχωβάσκε; (Ντικχέν ι φωτογραφία-ντα)

¹⁶ Καζόμ κεράας μελέτη κατά Αγία Γραφή, σικλιλάμ καζόμ σημαντική ισί ι τζενένγκι ζωή κο γιακχά κι Ιεχωβάσκε. Ντινάς ι ζωή πι Τσσαβέσκι για τι μπορίνας σαρέ τι τθεράς ι ευκαιρία τι τζουβντιάς για πάντα. (Ιωάν. 3:16) Σαρέ νιωσάλαμ καζόμ μπουτ πφαμπόλα αμένγκε ο Ιεχωβά. (Ησ. 49:15) Βοβ τζανέλα ι κάθε εκχές αμένταρ αμαρέ ναβέσαρ. Τζανέλα-αμέν αζόμ λατσσές σο, ατζέ-ντα τι μεράς, μπορίνελα τι αναστίνελ-αμέν επειδή ντέλα-πες γκοντί ι κάθε λεπτομέρεια αμένγκε ντα ο κάθε πράγμας σο τζουβντιλάμ! (Ματθ. 10:29-31) Σίγουρα, τθεράσα σημαντικούς λόγους τι πακιάς ότι αμαρό λατσσό Ντατ σο ισί κο ουρανός κα κρίνελ ι κάθε τζενές τέλειε τροπόσαρ επειδή ισί δίκαιος ντα τζιτζίνελα ι τζενένγκε.—Ιακ. 2:13.

17. Σο κα ντικχάς κο γιαβέρ μάθημας;

¹⁷ Ανταλά πράγματα σο σικλιλάμ πο λατσσές κερένα αμαρό έργος τι αβέλ πο σημαντικός από ποτές. Σόσκε βακεράσα-λες ανταβά; Ντα σο κα τσσίντελ-αμέν τι συνεχίνας τι μουτθαβάς ο λατσσέ αμπέρια χωρίς τι σταματίνας; Κα ντικχάς ο απαντήσεις ανταλέ ερωτησιέντε κο γιαβέρ μάθημας.