Σαρ τι Αρακχέν Ειρήνη Παρόλο σο Υπαρχίντιβενα Πόλεμοι
«Πριν τι κεράβ μελέτη κατά Αγία Γραφή», βακερέλα ο Γκάρι, σο ανγκλέ υπηρετίνελας κο στρατός, «ναστί αγαβάβας σόσκε υπαρχίντιβελα αζόμ κακία, αδικία ντα βάσανα κο ντουνιάς. Αλλά ακανά τθεράβα ειρήνη αντρέ μι γκοντιάτε. Τζανάβα ότι ο Ιεχωβά Ντεβέλ κα κερέλ σαρέ ι τζενέν τι νιωθίνεν αρακχαντέ».
Γιαβερά-ντα τζενέ νιωθίνενα αντικάς σαρ ο Γκάρι. Ντικχέν σαρ βοηθιντάς η Αγία Γραφή γιαβερέν-ντα.
Η ΑΓΙΑ ΓΡΑΦΗ ΒΑΚΕΡΕΛΑ: «Τούι, Ιεχωβά, ισινάν λατσσό ντα έτοιμος τι συγχωρίνες».—Ψαλμός 86:5.
ΣΑΡ ΒΟΗΘΙΝΕΛΑ ΑΝΤΑΒΑ: «Ανταβά εδάφιος κερέλα-μαν σίγουρος ότι ο Ιεχωβά τζιτζίνελα αμένγκε. Τζανάβα ότι μανγκέλα αντράλ πι γκίσταρ τι συγχωρίνελ-μαν σαρέ οντουλένγκε σο κερντόμ κο παρελθόν κάνα πολεμίναβας με-ντα».—Γουίλμαρ, Κολομβία.
Η ΑΓΙΑ ΓΡΑΦΗ ΒΑΚΕΡΕΛΑ: «Σόσκε με κεράβα νεβό ουρανός ντα νεβί πφουβ· ντα ο πουρανέ να κα αβέν κι γκοντί ούτε κο γκι».—Ησαΐας 65:17.
ΣΑΡ ΒΟΗΘΙΝΕΛΑ ΑΝΤΑΒΑ: «Οντουλά σο νακχλόμ κάνα ισινόμας στρατιώτης επηρεαντέ-μαν αζόμ μπουτ σο ακανά τθεράβα κατάθλιψη ντα μπαρό άγχος. Αλλά ανταβά εδάφιος κερέλα-μαν τι σκεφτίναβ ότι ατζεχάνικ ο Ιεχωβά κα τσσουβέλ τέλος σαρέ κο σκέψεις σο κερένα-μαν τι νταράβ». Κα σβήντιβεν μι γκοντιάταρ ντα μι γκίσταρ. Σο μπαρό δώρος!»—Ζαφίρα, Αμερική.
Η ΑΓΙΑ ΓΡΑΦΗ ΒΑΚΕΡΕΛΑ: «Λέσκε ντιβεσέντε ο δίκαιοι κα τζουβντιόν μπουτ λατσσές, ντα κα αβέλ μπερεκέτι ειρήνη μέχρι μα τι υπαρχίντιβελ ο τσσιμούτ».—Ψαλμός 72:7.
ΣΑΡ ΒΟΗΘΙΝΕΛΑ ΑΝΤΑΒΑ: «Σκεφτίναβα μπουτ φαρ ανταλά λάφια. Ατζεχάνικ ο πόλεμος ντα σαρέ ο μπέτι πράγματα κα σταματίνεν, ντα αμαρέ αγαπημέ τζενέ κα αβέν αρακχαντέ».—Αλεξάντρα, Ουκρανία.
Η ΑΓΙΑ ΓΡΑΦΗ ΒΑΚΕΡΕΛΑ: «Τιρέ μουλέ κα τζουβντιόν. . . . Τζανγκάντιβεν ντα ντεν βίκος χαράσαρ, τουμέν σο μπεσένα κι τσικ!»—Ησαΐας 26:19.
ΣΑΡ ΒΟΗΘΙΝΕΛΑ ΑΝΤΑΒΑ: «Σχεδόν σαρέ ο τζενέ μι φαμιλιάταρ μουλέ κάνα ο τζενέ από εκ γιαβέρ φυλή προσπαθιντέ τι μουνταρέν σαρέ οντουλέν σο ισινέ κατά φυλή Τούτσι. Αλλά ανταβά εδάφιος κερέλα-μαν τι αβάβ σίγουρη ότι κα ντικχάβ-λεν πάλι. Μπεσάβα σαρ σαρ τι ασουνάβ λένγκε φωνές κάνα κα αβέν πάλι κι ζωή!»—Μαρί, Ρουάντα.
Η ΑΓΙΑ ΓΡΑΦΗ ΒΑΚΕΡΕΛΑ: «Χάνικ ατζέ, ντα ο πφιρνέ να κα υπαρχίντιβεν . . . Ο τζενέ σο ισί κοβλέ γκίσκε όμως κα τθερέν πουμένγκε ι πφουβ ντα κα αβέν ευτυχισμέ επειδή κα τθερέν μπουτ ειρήνη».—Ψαλμός 37:10, 11.
ΣΑΡ ΒΟΗΘΙΝΕΛΑ ΑΝΤΑΒΑ: «Παρόλο σο ο πόλεμος σταματισάλο, συνεχίνενα τι υπαρχίντιβεν πφιρνέ τζενέ ντα τι αβέν-πες αδικίες. Ανταλά εδάφια ντινέ-μαν μπουτ ζορ. Ο Ιεχωβά ντικχέλα σαρέ ο πράγματα ντα αγαβέλα οντουλά σο νακχάβα. Ντέλα πο λάφι ότι ατζεχάνικ κα σταματίνεν ο βάσανα ντα κα μπιστάρντιβεν σαρέ».—Ντάλερ, Τατζικιστάν.
Σαρέ ανταλά λάφια ισί τζενένταρ σο ακανά ισί Μάρτυρες ι Ιεχωβάσκε ντα αρακχλέ ειρήνη αντράλ κατά Αγία Γραφή. Σικλιλέ ο τρόπος για μα τι σικαβέν μίσος κο τζενέ σο ισί γιαβερέ τθεμέσταρ ή από εκ γιαβέρ φυλή ή φάρα. Επίσης, σικλιλέ τι κερέν-λες ανταβά ατζέ-ντα κάνα τθερένα κάτι προσωπικός εκχέ τζενέσαρ. (Εφεσίους 4:31, 32) Ο Μάρτυρες ι Ιεχωβάσκε να συμμετεχίνενα κο πολιτικά πράγματα ντα να μανγκένα τι συμμετεχίνεν καεκχέ πραγμάστε σο υπαρχίντιβελα βία.—Ιωάννης 18:36.
Επίσης, ο Μάρτυρες ι Ιεχωβάσκε στηρίνενα ο εκ ι γιαβερές σαρ εκ αγαπημέ φαμιλί. (Ιωάννης 13:35) Για παράδειγμας, η Αλεξάντρα, σο ντικχλάμ λάκε λάφια πο τζανγκλέ, έπρεπε τι τζαλ εκχέ γιαβερέ τθεμέστε ιτιρί κατά πόλεμος γιεκ πι πφενιάσαρ. Βόι βακερέλα: «Κάνα νακχλάμ ο σύνορα, ντικχλάμ αμέσως Μάρτυρες ι Ιεχωβάσκε οντουλέ τθεμέσταρ τι μπεσέν αμένγκε για τι καλωσορίνεν-αμέν. Επειδή βοηθιντέ-αμέν σικλιλάμ τι τζουβντιάς εκχέ νεβέ τθεμέστε σαρ πρόσφυγες».
Καλίνασα-τουμέν αντράλ αμαρέ γκίσταρ τι αβέν αμαρέ συναθροισιέντε. Κο συναθροίσεις ανταλά σικλιάσα σαρ βοηθίνελα-αμέν η Γραφή τι τθεράς ειρήνη ακανά ντα σο βακερέλα ι ντιβεσένγκε σο κα αβέν ανγκλ’ αμέντε. Τζαν κο jw.org για τι αρακχέν κατέ αβέλα-πες εκ συνάθροιση πασέ τουμέντε ή μανγκέν από εκ Μάρτυρας ι Ιεχωβάσκο τι σικλιαρέλ-τουμέν ι Γραφιάκε αντράλ κατά βιβλίος Μπουτ Σουκάρ Ζωή για Πάντα!