Μπορίνασα τι Συνεχίνας τι Σικλιάς Κατά Βασικές Αλήθειες ι Γραφιάκε;

1. Σαρ αλλαντέ αμαρί ζωή ο βασικές αλήθειες σο σικλιλάμ κατά Αγία Γραφή;

Ο ΒΑΣΙΚΕΣ αλήθειες κατά Αγία Γραφή αλλαντέ αμαρί ζωή. Για παράδειγμας, κάνα σικλιλάμ ότι ι Ντεβλέσκο ναβ ισί Ιεχωβά αρχισάλαμ τι αβάς λέσκε αμαλά. (Ησ. 42:8) Κάνα σικλιλάμ σο αβέλα-πες εκχέ τζενέσαρ σο μουλό, αγαντάμ ότι αμαρέ αγαπημέ τζενέ σο μουλέ να βασανίντιβενα. Οτθάρ, τσσιναντάμ τι ανησυχίνας λένγκε. (Εκκλ. 9:10) Ντα κάνα σικλιλάμ ι υπόσχεση σο ντέλα ο Ντεβέλ ότι κα κερέλ ι πφουβ παράδεισος, τσσιναντάμ τι ανησυχίνας για το μέλλον. Ισινάμ σίγουροι ότι αμαρί ζωή να κα ατσσικιαρέλ σάντε χάνικ, δηλαδή 70 ή 80 μπρεσά, αλλά ότι κα τζουβντιάς για πάντα.​—Ψαλμ. 37:29· 90:10.

2. Σαρ σικαβένα ο εδάφια 2 Πέτρου 1:12, 13 ότι ατζέ-ντα Χριστιανοί σο ισί μπρεσά κι αλήθεια μπορίνενα τι βοηθίντιβεν κατά βασικές αλήθειες ι Γραφιάκε;

² Ποτές δεν πρέπει τι μπιστράς καζόμ σημαντικές ισί ο βασικές αλήθειες σο σικλιλάμ κατά Αγία Γραφή. Κο δεύτερος γράμμας σο γραφιντάς ο απόστολος Πέτρος, κερέλας λάφι κο Χριστιανοί σο “ισινέ μπουτ σταθεροί κι αλήθεια”. (Διαβάνεν 2 Πέτρου 1:12, 13) Όμως αζομάν υπαρχίντιβενας πφιρνέ τζενέ αντρέ κι κχανγκιρί σο μανγκένας τι λεν ι πφραλέν ντουρ κατά αλήθεια. (2 Πέτρ. 2:1-3) Ο Πέτρος μανγκέλας τι βοηθίνελ ι πφραλέν ντα ι πφενίν τι αρακχαβέν πουμαρό νεαυτός κατά ψεύτικα λάφια σο σικλιαρένας ανταλά τζενέ. Για τι κερέλ-λες ανταβά, αντάς λένγκε γκοντιάτε κάποιες κατά βασικές αλήθειες σο τζανένας. Ανταλά αλήθειες κα βοηθίνενας-λεν τι ατσσόν πιστοί κο Ιεχωβά.

3. Σόσκε σαρέ ο Χριστιανοί χρειαζίντιβελα τι σκεφτίνας λατσσές ο βασικές αλήθειες σο σικλιλάμας κι αρχή; Βακερέν εκ παράδειγμας.

³ Ατζέ-ντα άμα υπηρετίνασα ι Ιεχωβάς για μπουτ μπρεσά, μπορίνασα τι συνεχίνας τι σικλιάς νεβέ πράγματα αντράλ κατά βασικές αλήθειες ι Γραφιάκε. Σκεφτίνεν ακαβά παράδειγμας: Εκ μάγειρας σο κερέλα μπρεσά ανταγιά μπουτί ντα εκ γιαβέρ μάγειρας σο αρχισάλο ακανά τι κερέλ ανταγιά μπουτί, μπορεί τι χρησιμοποιήνενα ο ίδια υλικά κάνα κερένα εκ χαμπέ. Όμως, ο μάγειρας σο κερέλα μπρεσά ανταγιά μπουτί, σικλιλό σαρ τι χρησιμοποιήνελ γιαβερέ-ντα τροπόντζαρ ανταλά υλικά για τι κερέλ εκ νόστιμος ντα διαφορετικός χαμπέ. Ο ίδιος πράγμας αβέλα-πες ι τζενέντζαρ σο ισί μπρεσά κι αλήθεια ντα οντουλέντζαρ σο αρχίνενα τι κερέν ακανά μελέτη. Μπορεί τι διαβάνεν ο ίδια εδάφια αλλά τι σικλιόν κάτι διαφορετικός αντράλ ανταλένταρ. Σόσκε; Κάποια πράγματα αμαρέ ζωγιάτε ντα οντουλά σο κεράας κι υπηρεσία κι Ιεχωβάσκι μπορεί τι αλλαξάλε από αζομάν σο μπολντιλάμ. Κάνα σκεφτίνασα σαρ ο βασικές αλήθειες ι Γραφιάκε σο σικλιλάμας πο τζανγκλέ βοηθίνενα-αμέν ακανά σο αλλαξάλε μερικά πράγματα αμαρέ ζωγιάτε, κα ντικχάς σαρ ανταλά αλήθειες βοηθίνενα-αμέν νεβέ τροπόντζαρ. Ελάν τι ντικχάς σαρ μπορίνενα ο Χριστιανοί σο υπηρετίνενα μπρεσά ι Ιεχωβάς τι σικλιόν πράγματα από τριν βασικές αλήθειες ι Γραφιάκε.

Ο ΙΕΧΩΒΑ ΚΕΡΝΤΑΣ-ΛΕΝ ΣΑΡΕ

4. Σαρ βοηθίντιβασα σο τζανάσα ότι ο Ιεχωβά κερντάς-λεν σαρέ;

⁴ Αγαβάσα ότι Οντουβά σο κερντάς ι πφουβ ντα σαρέ οντουλά σο ισί λάτε ισί γκοντιαβέρ ντα μπουτ ζουρανό. Η Γραφή βακερέλα: «Οντουβά σο λατσσαρντάς σαρέ ο πράγματα ισί ο Ντεβέλ». (Εβρ. 3:4) Αλλά υπαρχίντιβενα μπουτ γιαβερά πράγματα σο μπορίνασα τι σικλιάς αντράλ κατά αλήθεια ανταγιά. Επειδή ο Ιεχωβά κερντάς-αμέν, τζανέλα σαρέ ο πράγματα αμένγκε. Επίσης, πφαμπόλα αμένγκε ντα τζανέλα καβά ισί ο πο λατσσό αμένγκε. Άρα, επειδή τζανάσα ότι ο Ιεχωβά κερντάς-λεν σαρέ, ανταβά αλλαντάς αμαρί ζωή με μπουτ σουκάρ ντα διαφορετικούς τρόπους. Επίσης, ανταγιά αλήθεια βοηθίνελα-αμέν τι αγαβάς ο σκοπός αμαρέ ζωγιάκο ντα αντικάς ισινάμ πφερντέ χαρά.

5. Καγιά αλήθεια μπορίνελα τι βοηθίνελ-αμέν τι αβάς ταπεινοί; (Ησαΐας 45:9-12)

⁵ Η αλήθεια ότι ο Ιεχωβά κερντάς-λεν σαρέ μπορίνελα τι σικλιαρέλ-αμέν τι αβάς ταπεινοί. Κάνα ο Ιώβ αρχισάλο τι ντελ μπουτ σημασία πι νεαυτόστε ντα οντουλέντε σο βακερένας ο γιαβερά τζενέ, ο Ιεχωβά αντάς λέσκε γκοντιάτε ότι Βοβ ισινέ Οντουβά σο κερντάς-λεν σαρέ. (Ιώβ 38:1-4) Ανταβά βοηθιντάς τον Ιώβ τι αγαβέλ ότι σο-ντα κερέλα ο Ιεχωβά ισί πάντα σωστός. Οπράλ ανταλέστε, ο προφήτης Ησαΐας γραφιντάς πο σοράν: «Κα βακερέλ ο πηλός κο τζενό σο λατσσαρντάς-λες: “Σο λατσσαρέσα;”»​—Διαβάνεν Ησαΐας 45:9-12.

6. Κάνα ισί ατζέ πο σημαντικός τι σκεφτίνας καζόμ γκοντιαβέρ ντα ζουρανό ισί Οντουβά σο κερντάς-λεν σαρέ; (Ντικχέν ο φωτογραφίες-ντα)

⁶ Κάνα εκ τζενό υπηρετίνελα ι Ιεχωβάς για μπουτ μπρεσά, μπορεί τι αρχίνελ τι ντελ μπουτ μπέσα κο τρόπος σο σκεφτίνελα βοβ αντίς τι στηρίντιβελ κο Ιεχωβά ντα Λέσκε Λαφίστε για τι οδηγίνεν-λες. (Ιώβ 37:23, 24) Αλλά σο κα αβέλας-πες άμα εκ τζενό κα σκεφτίνελας καζόμ γκοντιαβέρ ντα καζόμ ζουρανό ισί ο Ιεχωβά, Οντουβά σο κερντάς-λεν σαρέ; (Ησ. 40:22· 55:8, 9) Ανταγιά μπαρί αλήθεια κα βοηθίνελ-λες τι αγαβέλ ότι ο σκέψεις ι Ιεχωβάσκε ισί μπουτ πο σωστές κατά σκέψεις λέσκε ντα ανταβά κα κερέλας-λες τι αβέλ ταπεινός.

7. Σο κερντάς η Ρακέλα για τι δεχτίνελ εκ αλλαγή σο αβιλί κι οργάνωση κι Ιεχωβάσκι;

⁷ Η Ρακέλα, σο τζουβντιόλα κι Σλοβενία, βακερέλα ότι κάνα αβιλί εκ αλλαγή κι οργάνωση κι Ιεχωβάσκι σκεφτίνελας ότι ο Ιεχωβά ισί Οντουβά σο κερντάς-λεν σαρέ. Ανταβά βοηθιντάς-λα τι δεχτίνελ ανταγιά αλλαγή. Η ίδια βακερέλα: «Μπουτ φαρ να ισινέ μάνγκε εύκολος τι δεχτίναβ ο αποφάσεις σο λένας ο πφραλά σο τθερένα ι ευθύνη τι οδηγίνεν-αμέν. Για παράδειγμας, παρόλο σο ντικχλόμ ο Αμπέρι Κατά Κυβερνών Σώμας #8 2023 σο βακερέλας ότι ο πφραλά μπορίνενα τι μουκχέν μούσι, κάνα ντικχλόμ για πρώτη φαρ εκχέ πφραλές με μούσι τι κερέλ εκ ομιλία, συνεχίνελας τι αβέλ μάνγκε μπουτ παράξενος. Οτθάρ, κερντόμ προσευχή κο Ιεχωβά τι δεχτίναβ ανταγιά αλλαγή». Η Ρακέλα αγαντάς ότι επειδή ο Ιεχωβά ισί Οντουβά σο κερντάς-λεν σαρέ, πάντα κα τζανέλ ο πο λατσσό τρόπος για τι οδηγίνελ πι οργάνωση. Άμα ισί τουμένγκε δύσκολος τι δεχτίνεν εκ αλλαγή κο τρόπος σο αγαβάσα ακανά εκ πράγμας κατά Γραφή ή εκ νεβί οδηγία, μπεσέν ντα σκεφτίνεν λατσσές καζόμ γκοντιαβέρ ντα ζουρανό ισί Οντουβά σο κερντάς-τουμέν.​—Ρωμ. 11:33-36.

ΣΟΣΚΕ Ο ΙΕΧΩΒΑ ΜΟΥΚΧΕΛΑ ΤΙ ΥΠΑΡΧΙΝΤΙΒΕΝ Ο ΒΑΣΑΝΑ

8. Σαρ βοηθίνελα-αμέν σο τζανάσα σόσκε ο Ιεχωβά μουκχέλα τι υπαρχίντιβεν ο βάσανα;

⁸ Σόσκε ο Ντεβέλ μουκχέλα τι υπαρχίντιβεν ο βάσανα; Μερικά τζενέ σο να μπορισάλε τι λεν απάντηση κι ερώτηση ανταγιά χολιασάλε ι Ντεβλέσκε ή αρχισάλε τι πακιάν ότι να υπαρχίντιβελα! (Παρ. 19:3) Όμως τουμέν σικλιλέν ότι ο τζενέ νακχένα βάσανα ντα μερένα ιτιρί κατά αμαρτία ντα κατά ατέλεια ντα όχι επειδή ο Ιεχωβά κερντάς κάτι λάθος. Επίσης, σικλιλέν ότι ι Ιεχωβάσκι υπομονή ντινάς ι ευκαιρία μπουτέ τζενέντε τι σικλιόν λέσκε ντα τι αγαβέν σαρ ο Ιεχωβά κα σταματίνελ ο βάσανα για πάντα. (2 Πέτρ. 3:9, 15) Ανταλά αλήθειες λοκχιαρένα αμαρό γκι ντα γκερένα-αμέν πο πασέ λέστε.

9. Κάνα χρειαζίντιβελα ατζέ πο μπουτ τι σκεφτίνας ο λόγους σο ο Ιεχωβά μουκχέλα τι υπαρχίντιβεν ο βάσανα;

⁹ Καζόμ μπεκλεντίνασα ο Ιεχωβά τι σταματίνελ ο βάσανα, χρειαζίντιβελα τι κεράς υπομονή. Όμως, κάνα μερέλα κάποιος σο μανγκάσα-λες μπουτ ή κάνα αμέν ή αμαρί φαμιλί νακχέλα δυσκολίες ή κάνα αδικίνενα-αμέν, μπορεί τι σκεφτίνασα σόσκε ο Ιεχωβά αργίνελα αζόμ μπουτ τι σταματίνελ ο βάσανα. (Αββακ. 1:2, 3) Κάνα νιωθίνασα αντικάς, ισί λατσσό τι σκεφτίνας ο λόγους σο ο Ιεχωβά μουκχέλα τι υπαρχίντιβεν ο βάσανα.a (Ψαλμ. 34:19) Επίσης, μπορίνασα τι σκεφτίνας ο ντιβές σο ο Ιεχωβά κα σταματίνελ ο βάσανα για πάντα.

10. Σο βοηθίνελα την Αν τι νταϊντίνελ ο μεριπέ πι νταγιάκο;

¹⁰ Επειδή τζανάσα σόσκε ο Ιεχωβά μουκχέλα τι υπαρχίντιβεν ο βάσανα, ανταβά μπορίνελα τι βοηθίνελ-αμέν τι νταϊντίνας ο προβλήματα. Η Αν σο τζουβντιόλα κο νησίς Μαγιότ, σο ισί κο Ινδικός Ωκεανός, βακερέλα: «Κάνα μουλίας μι ντάι πριν από χάνικ μπρεσά, πφανγκιλόας μπουτ μο γκι. Όμως μπουτ φαρ ανάβας μι γκοντιάτε ότι να φταίνελα ο Ιεχωβά για το βάσανα σο τθεράσα. Βοβ μπεσέλα σαρ σαρ τι νασκιαρέλ ο βάσανα ντα τι ανέλ πάλι κι ζωή αμαρέ αγαπημέ τζενέν σο μουλέ. Κάνα σκεφτίναβα ανταλά αλήθειες ηρεμίναβα ντα αρακχάβα πάλι μι ζορ».

11. Σο βοηθίνελα-αμέν τι συνεχίνας τι κεράς ο έργος, ντα σόσκε;

¹¹ Τζανάσα σόσκε ο Ιεχωβά μουκχέλα ο βάσανα. Ντα ανταβά τσσίντελα-αμέν τι συνεχίνας τι βακεράς ο λατσσέ αμπέρια. Αφού ο Πέτρος εξηγιντάς ότι ο Ιεχωβά κερέλα υπομονή επειδή μανγκέλα τι μετανιώνεν ο τζενέ ντα τι σώντιβεν, γραφιντάς: «Σκεφτίνεν σο τζενέ πρέπει τι αβέν τουμέν. Πρέπει τι αβέν τζενέ σο τθερένα άγια συμπεριφορά ντα τι κερέν πράγματα σο σικαβένα αφοσίωση κο Ντεβέλ». (2 Πέτρ. 3:11) Εκ κατά πράγματα σο “κεράσα ντα σικαβένα αφοσίωση κο Ντεβέλ” ισί αμαρό έργος. Σαρ αμαρό Ντατ, μανγκάσα ι τζενέν. Μανγκάσα τι τζουβντιόν κο δίκαιος ντα νεβό ντουνιάς ι Ντεβλέσκο. Ο Ιεχωβά κερέλα υπομονή ντα ντέλα κο τζενέ σο ισί κο τομέας τουμαρό ι ευκαιρία τι αρχίνεν τι υπηρετίνεν-λες. Σο μπαρό προνόμιος τθερένα τι συνεργαζίντιβεν ι Ντεβλέσαρ για τι βοηθίνεν καζόμ πο μπουτ τζενέν αβέλα-πες τι σικλιόν λέσκε πριν τι αβέλ ο τέλος ανταλέ ντουνιάσκο!​—1 Κορ. 3:9.

ΤΖΟΥΒΝΤΙΑΣΑ «ΚΟ ΤΕΛΕΥΤΑΙΑ ΝΤΙΒΕΣΑ»

12. Σο λατσσιπέ ντικχάσα επειδή τζανάσα ότι τζουβντιάσα «κο τελευταία ντιβεσά»;

¹² Η Γραφή σικαβέλα μπουτ λατσσές σαρ κα αβένας ο τζενέ «κο τελευταία ντιβεσά». (2 Τιμ. 3:1-5) Κάνα ντικχάσα σαρ ισί ο τζενέ ανταλέ ντουνιάστε μπορίνασα τι αγαβάς μπουτ λατσσές ότι οντουβά σο βακερέλα η Γραφή ισί μπαγιά. Καζόμ η συμπεριφορά ι τζενένγκι αβέλα ατζέ πο μπέτι, αβάσα πο σίγουροι ότι μπορίνασα τι ντας μπέσα οντουλέντε σο βακερέλα ο Λάφι ι Ντεβλέσκο.​—2 Τιμ. 3:13-15.

13. Σαρ μπορίνελα τι βοηθίνελ-αμέν ο παράδειγμας σο βακερντάς ο Ιησούς κο Λουκάς 12:15-21;

¹³ Επειδή τζανάσα ότι τζουβντιάσα κο τελευταία ντιβεσά μπορίνασα τι χρησιμοποιήνας αμαρό χρόνος ι πο λατσσέ τροπόσαρ. Μπορίνασα τι σικλιάς σόσκε ισί σημαντικός τι κεράς-λες ανταβά άμα κα ντικχάς ο παράδειγμας σο βακερντάς ο Ιησούς κο Λουκάς 12:15-21. (Διαβάνεν) Σόσκε βακέρντιβελα ότι “να τσσινέλας ι γκοντί” οντουλέ χουλανέ τζενέσκι; Όχι επειδή ισινέ χουλανό, αλλά επειδή να τσσουβέλας πρώτα πι ζωγιάτε ο πο σημαντικά πράγματα. Βοβ “γκίντελας πέσκε θησαυρούς αλλά να ισινέ χουλανό κο γιακχά κι Ντεβλέσκε”. Οντουβά τζενό να τθερέλας μπουτ μπρεσά ανγκλά-πέστε για τι τζουβντιόλ. Οτθάρ, ισινέ μπουτ σημαντικός τι χρησιμοποιήνελ πο χρόνος γκοντιάσαρ. Ο Ντεβέλ βακερντάς λέσκε: «Ακαγιά ιράτ κα μερές». Αντιβές, καζόμ ερεσάσα κο τέλος ανταλέ ντουνιάσκο, ισί λατσσό τι πουτσάς-αμέν: “Τθεράβα στόχους σο σικαβένα ότι μο γιακχά ισί κο πο σημαντικά πράγματα; Σο στόχους βοηθίναβα μι τσσαβέν τι τσσουβέν; Χρησιμοποιήναβα πο μπουτ μι ζορ, μο χρόνος ντα μο πράγματα για τι γκίνταβ θησαυρούς μάνγκε ή για τι γκίνταβ θησαυρούς κο ουρανός;”

14. Σαρ σικαβέλα ο παράδειγμας της Μίκα, σόσκε ισί σημαντικός τι ντας-αμέν γκοντί ότι τζουβντιάσα κο τελευταία ντιβεσά;

¹⁴ Ο τρόπος σο ντικχάσα αμαρί ζωή μπορίνελα τι αλλάνελ μπουτ άμα κα τθεράς συνέχεια αμαρέ γκοντιάτε ότι τζουβντιάσα κο τελευταία ντιβεσά. Ανταβά αβιλό-πες εκχέ πφενιάσαρ-ντα σο βακέρντιβελα Μίκα. Βόι βακερέλα: «Μπεϊντίναβας μπουτ τι ασχολίντιβαβ με το ζώα ντα τι σικλιάβ λένγκε. Οτθάρ, κάνα τελειωντόμ ο σχολείος μανγκάβας ανταγιά τι αβέλ μι μπουτί. Τθεράβας επίσης στόχος τι αρχίναβ τακτικός σκαπανικός ντα τι υπηρετίναβ οτθέ σο η ανάγκη ισινέ πο μπαρί. Μερικά πφραλά ντα πφενιά μι κχανγκιριάταρ βακερντέ μάνγκε τι σκεφτίναβ μπουτ προσεκτικά άμα κα μπορίναβας εμ τι τζαβ κο πανεπιστήμιος για τι σικλιάβ ανταγιά μπουτί αλλά εμ τι κεράβ σκαπανικός ή τι υπηρετίναβ οτθέ σο η ανάγκη ισινέ πο μπαρί. Αντέ μι γκοντιάτε ότι ανταβά ντουνιάς κα τελειώνελ μπουτ σουγκό. Επίσης βακερντέ μάνγκε ότι κο νεβό ντουνιάς κα τθεράβ καζόμ χρόνος μανγκάβα για τι σικλιάβ για το ζώα. Οτθάρ αποφασιντόμ μα τι τζαβ κο πανεπιστήμιος σο κα λέλας μπουτ χρόνος για τι τελειώναβ-λες. Οκιά μπάνταρ, γκιλόμ σε εκ σχολή σο κα τελειώνα βας-λα μπουτ πο σουγκό ντα κα σικλιαρέλας-μαν τι κεράβ εκ πο απλή μπουτί. Ανταγιά μπουτί βοηθιντάς-μαν τι νικαβάβ ο λοβέ σο χρειαζίντιβαβα αλλά τι τθεράβ χρόνος-ντα για τι κεράβ ο σκαπανικός. Επίσης πο σοράν μπορισάλομ τι τζαβ κο Εκουαδόρ, σο τθερέλας μπαρί ανάγκη». Η Μίκα υπηρετίνελα γιεκ πι ρομέσαρ σο ισί επίσκοπος περιοχής κο τθεμ ανταβά.

15. Σόσκε να χρειαζίντιβελα τι παρατίνας ι τζενέν σο να σικαντέ ατζέ ενδιαφέρον για το λατσσέ αμπέρια; Βακερέν εκ παράδειγμας. (Ντικχέν ο φωτογραφίες-ντα)

¹⁵ Δεν πρέπει τι χασαράς αμαρί ζορ κάνα ο τζενέ να μανγκένα κι αρχή τι ασουνέν ο λατσσέ αμπέρια. Βον μπορεί τι αλλάνεν. Σκεφτίνεν τον Ιάκωβο σο ισινέ μιλαδέλφι ι Ιησούσκο. Ντικχλάς ι Ιησούς τι μπαριόλ, τι αβέλ ο Μεσσίας ντα τι σικλιαρέλ με τρόπος σο να σικλιαρντάας καέκ γιαβέρ τζενό. Όμως, για μπουτ μπρεσά, ο Ιάκωβος να ακολουθίνελας ι Ιησούς. Αβιλό μαθητής λέσκο σάντε κάνα αναστισάλο ο Ιησούς. Ο Ιάκωβος αβιλό εκ μπουτ πιστός Χριστιανός!b (Ιωάν. 7:5· Γαλ. 2:9) Ισί μπουτ σημαντικός μα τι παρατίνας αμαρέ τζενέν σο να σικαντέ ατζέ ενδιαφέρον για την αλήθεια ντα τι συνεχίνας τι κεράς έργος οντουλέντε σο να δεχτιντέ ανγκλέ τι ασουνέν για την αλήθεια. Ντεν-τουμέν γκοντί ότι τζουβντιάσα κο τελευταία ντιβεσά. Οτθάρ, αμαρό έργος ισί μπουτ σημαντικός. Οντουβά σο κα βακεράς λένγκε αντιβές, μπορεί τι επηρεάνελ-λεν πο σοράν. Μπέκιμ ατζέ-ντα κάνα κα αρχίνελ η μπαρί στεναχώρια.c

ΣΥΝΕΧΙΝΕΝ ΤΙ ΕΚΤΙΜΙΝΕΝ Ο ΒΑΣΙΚΕΣ ΑΛΗΘΕΙΕΣ Ι ΓΡΑΦΙΑΚΕ

16. Σαρ βοηθίντιβενα κατά βασικές αλήθειες ι Γραφιάκε; (Ντικχέν ο πλαίσιος-ντα «Χρησιμοποιήνεν-λεν για τι Βοηθίνεν ι Γιαβερέν»)

¹⁶ Μερικά πράγματα κατά πνευματικός χαμπέ σο λάσα ετοιμάντιβενα τζενένγκε σο να ασουντέ ποτές ο βασικές αλήθειες ι Γραφιάκε. Για παράδειγμας, η δημόσια ομιλία σο αβέλα-πες εκ φαρ κι εβδομάδα, μερικά θέματα ντα βίντεα κο jw.org ντα κάποια αμαρέ περιοδικόνταρ ισί κερντέ πο μπουτ για το τζενέ σο νανέ Μάρτυρες ι Ιεχωβάσκε. Αλλά μπορίνασα τι βοηθίντιβας αμέν-ντα ανταλένταρ. Μπαριαρένα αμαρί αγάπη ι Ιεχωβάσκε, κερένα πο ζουρανί αμαρί πίστη κο Λάφι κι Ντεβλέσκο ντα βοηθίνενα-αμέν τι σικλιαράς ατζέ πο λατσσές ο βασικές αλήθειες κο τζενέ.​—Ψαλμ. 19:7.

17. Κάνα ισί λατσσό τι ντεν-τουμέν γκοντί ο βασικές αλήθειες ι Γραφιάκε;

¹⁷ Σαρ Μάρτυρες ι Ιεχωβάσκε, μπεϊντίνασα μπουτ κάνα αγαβάσα εκχέ νεβέ τροπόσαρ εκ κατά βασικές αλήθειες ι Γραφιάκε. Όμως, σικαβάσα μπαρί εκτίμηση-ντα για το σημαντικές αλήθειες σο σικλιλάμ κι αρχή ντα βοηθιντέ-αμέν τι αρχίνας τι τζας πασέ κο Ιεχωβά. Σαρ σικλιλάμ, ανταλά αλήθειες βοηθίνενα-αμέν ατζέ-ντα ακανά. Κάνα λάσα εκ οδηγία κατά οργάνωση αμαρί αλλά σκεφτίνασα ότι αμέν τζανάσα εκ πο λατσσό τρόπος για τι αβέν-πες ο πράγματα, πρέπει τι αβάς ταπεινοί ντα τι σκεφτίνας ότι ο Ιεχωβά, αμαρό γκοντιαβέρ ντα ζουρανό Ντεβέλ σο κερντάς-λεν σαρέ, ισί Οντουβά σο οδηγίνελα πι οργάνωση. Κάνα αμέν ή εκ τζενό σο μανγκάσα-λες μπουτ νακχέλα εκ δοκιμασία, μπορίνασα τι κεράς υπομονή ντα τι σκεφτίνας σόσκε ο Ιεχωβά μουκχέλα ο βάσανα. Ντα καζόμ σκεφτίνασα σαρ κα χρησιμοποιήνας αμαρό χρόνος ντα οντουλά σο τθεράσα, μπορίνασα τι ανάς αμαρέ γκοντιάτε καζόμ πασέ ισί ο τέλος ανταλέ ντουνιάσκο. Μακάρι ο βασικές αλήθειες ι Γραφιάκε τι βοηθίνεν-αμέν τι αβάς πο γκοντιαβέρ ντα τι συνεχίνας τι υπηρετίνας ι Ιεχωβάς πιστά.