«Τι Ατσσόν Ενωμέ»
Ο ΑΠΟΣΤΟΛΟΣ ΠΑΥΛΟΣ βακερντάς κο πφραλά σο ισινέ κι Έφεσος «τι αντιχίνεν ο εκ ι γιαβερές μανγκιμάσαρ. Ο άγιος πνεύμας ενωντάς-τουμέν. Οτθάρ, κερέν σο νακχέλα τουμαρέ βαστένταρ για τι τθερέν ειρήνη ο εκ ι γιαβερέσαρ ντα αντικάς τι ατσσόν ενωμέ».—Εφεσ. 4:2, 3.
Ισινάμ «ενωμέ» χάρη κο «άγιος πνεύμας». Ανταβά μανγκέλα τι βακερέλ ότι η ενότητα αβέλα αντράλ κατά ζορ ι Ντεβλέσκι. Όμως σαρ βακερντάς ο Παύλος χρειαζίντιβελα προσπάθεια για τι ατσσάς ενωμέ. Κον πρέπει τι κερέλ ανταγιά προσπάθεια; Ο κάθε Χριστιανός πρέπει τι κερέλ σο νακχέλα λέσκε βαστέσταρ για “τι ατσσάς ενωμέ”.
Για παράδειγμας, βακερέν ότι κάποιος κερέλα τουμένγκε δώρος εκ νεβί κούρσα. Κον κα τθερέλας ι ευθύνη τι φροντίνελ-λα; Σίγουρα τουμέν. Να μπορίνενα τι κατηγορίνεν ι τζενές σο κερντάς τουμένγκε δώρος ι κούρσα άμα κα χαλάντιβελ επειδή τουμέν να φροντίνενα-λα σωστά.
Αντικάς-ντα, παρόλο σο η ενότητα σο τθεράσα ισί δώρος κατά Ντεβέλ, ο κάθε εκ αμένταρ τθερέλα ι ευθύνη τι ατσσικιαρέλ-λα. Άμα να τθεράσα ειρήνη εκχέ πφραλέσαρ ή εκχέ πφενιάσαρ, πρέπει τι πουτσάς αμαρό νεαυτός: “Κεράβα με σο νακχέλα μι βαστέσταρ για τι ατσσικιαράβ ι ειρήνη αντρέ κι κχανγκιρί;”
«ΚΕΡΕΝ ΣΟ ΝΑΚΧΕΛΑ ΤΟΥΜΑΡΕ ΒΑΣΤΕΝΤΑΡ» ΓΙΑ ΤΙ ΑΤΣΣΟΝ ΕΝΩΜΕ
Σαρ βακερέλα ο Παύλος, μπάζιμα μπορεί τι χρειαζίντιβελ μπαρί προσπάθεια για τι ατσσάς ενωμέ. Ανταβά μπορεί τι αβέλ ατζέ πο δύσκολος άμα εκ πφραλ ή εκ πφεν πληγωντάς-αμέν. Μήπως χρειαζίντιβελα πάντα τι τζας τι κεράς λάφι ι πφραλέσαρ ή ι πφενιάσαρ για τι λύνας ο πρόβλημας; Νανέ πάντα ανάγκη. Σκεφτίνεν: “Άμα κα τζαβ για τι πουτράβ συζήτηση ανταλέσκε, κα αβέν ο πράγματα πο λατσσές ή χειρότερα;” Μπάζιμα ισί πο λατσσό απλά τι μπιστράς ο πρόβλημας ή τι συγχωρίνας ι τζενές.—Παρ. 19:11· Μάρκ. 11:25.
Πουτσέν τουμαρό νεαυτός: “Άμα κα πουτράβ συζήτηση ι τζενέσαρ σο πληγωντάς-μαν, ανταβά κα βοηθίνελ τι ατσσάς ενωμέ ή κα κερέλ χειρότερα ο πράγματα;”
Σαρ γραφιντάς ο Παύλος πρέπει “τι αντιχίνας ο εκ ι γιαβερές μανγκιμάσαρ”. (Εφεσ. 4:2) Εκ βιβλίος βακερέλα ότι ανταβά μπορεί τι μεταφράντιβελ γιαβέρτουλους «τι δεχτίνεν-λεν αντικάς σαρ ισί». Ανταβά μανγκέλα τι βακερέλ τι δεχτίνας ότι αμαρέ πφραλά ντα πφενιά ισί ατελείς, σαρ ισινάμ αμέν-ντα. Σίγουρα προσπαθίνασα “τι ιριάς ο νεβό χαρακτήρας”. (Εφεσ. 4:23, 24) Όμως καέκ αμένταρ να μπορίνελα τι κερέλ-λες ανταβά τέλειε τροπόσαρ. (Ρωμ. 3:23) Άμα κα δεχτίνας-λες ανταβά, κα αβέλ αμένγκε πο εύκολος τι αντιχίνας ο εκ ι γιαβερές, τι συγχωρίνας ντα αντικάς “τι ατσσάς ενωμέ”.
Κα “ατσσάς ενωμέ” αντρέ κι κχανγκιρί άμα κα συγχωρίνας ντα κα μπιστράς ο πράγματα σο κερντέ αμένγκε ο γιαβερά ντα πληγωντέ-αμέν. Ο πουρανό μπαλαμανό λάφι σο μεταφράντιβελα «ατσσόν ενωμέ» κο εδάφιος Εφεσίους 4:3 ισί ο λάφι σύνδεσμος. Ανταβά λάφι μπορεί τι μανγκέλα τι σικαβέλ ο σύνδεσμοι σο τθερέλα ο σώμας, σαρ βακερέλα κο Κολοσσαείς 2:19. Ο σύνδεσμοι ενώνενα μπουτ λατσσές ο κόκαλα ο εκ ι γιαβερέσαρ ντα αντικάς ο σώμας λειτουργίνελα σωστά. Άκ’ αντικάς η ειρήνη ντα η αγάπη αμαρέ πφραλένγκε, βοηθίνελα-αμέν τι ατσσάς πασέ λέντε παρόλο σο μπάζιμα μπορεί τι κερέν κάτι σο να μπεϊντίνασα.
Κάνα εκ τουμαρέ πφραλένταρ προσβαλίνελα-τουμέν, στεναχωρίνελα-τουμέν ή νευριάνελα-τουμέν, προσπαθίνεν τι αγαβέν λέσκο γκι ντα μα ντικχέν σάντε ο λάθη λέσκε. (Κολ. 3:12) Αφού καέκ τζενό νανέ τέλειος, μπορεί κάποια στιγμή τι κερντέν τουμέν-ντα εκχέ πφραλέστε ή πφενιάτε ο ίδιος. Άμα κα ντεν-τουμέν γκοντί ανταβά, κα μπορίνεν τι κερέν σο νακχέλα τουμαρέ βαστένταρ για τι «ατσσόν ενωμέ».