Τζανένας-λες;

Ισινέ μπαγιά “τσορνέ” ο τζενέ σο μπικινένας ζώα κο ναός κι Ιερουσαλήμ, σαρ βακερντάς ο Ιησούς;

ΚΟ ΕΥΑΓΓΕΛΙΟΣ σο γραφιντάς ο Ματθαίος διαβάνασα: «Ο Ιησούς γκιλό κο ναός ντα παλντιντάς σαρέ οντουλέν σο μπικινένας ντα κινένας οτθέ, ντα περαντάς ο τραπέζια οντουλένγκε σο ντένας ντα λένας λοβέ για τι νικαβέν κιάρι ντα ο πάγκους οντουλένγκε σο μπικινένας περιστέρια. Ντα βακερντάς λένγκε: “Ισί γραμμέ: «Μο κχερ κα βακέρντιβελ κχερ για προσευχή», αλλά τουμέν κερντέν-λες σπηλιά τσορνένγκι”».​—Ματθαίος 21:​12, 13.

Πουρανέ βιβλία σο τθερένας ο Ιουδαίοι σικαβένα ότι οντουλά σο κερένας εμπόριος κο ναός μπικινένας ο ζώα μπουτ πααλίς ντα ανταβά ισινέ άδικος. Για παράδειγμας, ο περιστέρια έπρεπε τι αβέν αζόμ φτηνά για τι μπορίνεν τι κινέν-λεν ατζέ-ντα ο τσορορέ ντα τι ντεν-λεν σαρ θυσία. Όμως, οντουλέ βιβλιόνταρ σικλιάσα ότι, κο πρώτος αιώνας, χρειαζίντιβελας τι ντελ κάποιος εκ χρυσός δηνάριος για τι κινέλ ντούι περιστέρια. Εκ τζενό έπρεπε τι κερέλ μπουτί περίπου 25 ντιβεσά για τι νικαβέλ οντουλά λοβέ. Ο περιστέρια μπικινένας-λεν αζόμ πααλίς σο ο τσορορέ να μπορίνενας τι κινέν-λεν. (Λευιτικό 1:​14· 5:7· 12:​6-8) Εκ παπάζι, ο Συμεών μπεν Γαμαλιήλ, χολιασάλο αζόμ μπουτ οντουλέσκε σο αβέλας-πες σο βακερντάς κο Ιουδαίοι τι κερέν πιο χάνικ θυσίες οντουλένταρ σο ισινέ υποχρεωμέ τι κερέν. Μπουτ σουγκό, η τιμή σο μπικίντιβενας ο ντούι περιστέρια γουλίστιλι εκατό φαρ πιο τελέ.

Σαρ αγαβάσα, οντουλά σο κερένας εμπόριος κο ναός ισινέ μπίτσαλε γιακχίνγκε ντα χουχαβένας οντουλέν σο αβένας τι κινέν λένταρ. Άρα, ο Ιησούς τθερέλας δίκιος όταν βακερντάς λένγκε ότι ισινέ “τσορνέ”.