Τι Σικαβέν Συμπόνια σαρ Σικαβέλα ο Ιεχωβά

1. Σο βακερντάς ο Ιεχωβά πι νεαυτόσκε κο Μωυσής; Σόσκε ισί σημαντικός ανταβά;

ΠΡΙΝ από μπουτ μπρεσά, ο Ντεβέλ βακερντάς κο Μωυσής πο ναβ ντα μερικές ιδιότητες σο τθερέλα. Ο Ιεχωβά κα μπορίνελας τι κερέλ λάφι για τη δύναμη ή για τη σοφία σο τθερέλα, αλλά πρώτα βακερντάς ότι σικαβέλα έλεος ντα τζιτζίνελα ι γιαβερένγκε. (Διαβάνεν Έξοδος 34:​5-7) Ο Μωυσής τθερέλας ανάγκη τι τζανέλ αν ο Ιεχωβά κα στηρίνελας-λες. Οτθάρ, ο Ιεχωβά βακερντάς λέσκε ότι τθερέλα ιδιότητες σο σικαβένα ότι μανγκέλα μπαγιά τι βοηθίνελ πι υπηρετόν. (Έξοδος 33:​13) Σαρ νιωθίνενα σο τζανένα ότι ο Ιεχωβά πφαμπόλα αζόμ μπουτ αμένγκε; Ανταλέ μαθημάστε κα κεράς λάφι για τη συμπόνια. Συμπόνια ισί τι τζιτζίνας ι γιαβερένγκε ντα τι μανγκάς τι βοηθίνας-λεν επειδή αγαβάσα λένγκι ντουκχ.

2, 3. (α) Σόσκε ισί λογικός ο τζενέ τι σικαβέν συμπόνια; (β) Σόσκε ισί σημαντικός τι σικλιόν σο βακερέλα η Γραφή για τη συμπόνια;

² Ο Ιεχωβά σικαβέλα συμπόνια ντα ο τζενέ κερντιλέ τι μοιάζεν λέστε. Άρα, ισί λογικός ο τζενέ τι πφαμπόν ι γιαβερένγκε. Ατζέ-ντα οντουλά σο να τζανένα ι Ιεχωβάσκε μπουτ φαρ σικαβένα συμπόνια. (Γένεση 1:​27) Κι Αγία Γραφή αρακχάσα μπουτ ιστορίες τζενένγκε σο σικαντέ συμπόνια. Για παράδειγμας, όταν ο Σολομών έπρεπε τι αγαβέλ καγιά ισινέ η ντάι εκχέ χουρντέσκι, ντινάς εντολή τι τσσινέν ι χουρντές κο μασκάρ. Η πραγματική ντάι τζιτζισάλι μπουτ πι χουρντέσκε, οτθάρ μολιντάς ι βασιλιάς τι ντελ-λες κι γιαβέρ τζουβέλ. (1 Βασιλέων 3:​23-27) Εκ γιαβέρ παράδειγμας ισί η τσσάι ι Φαραώσκι. Όταν αρακχλάς ι Μωυσής σο ισινέ χουρντό μαξίμι, αγαντάς ότι ισινέ Εβραίος ντα ότι κα μουνταρένας-λες. Αλλά «τζιτζισάλι λέσκε» ντα αποφασιντάς τι μπαριαρέλ-λες σαρ τι αβέλας λάκο τσσαβό.​—Έξοδος 2:5, 6.

³ Σόσκε πρέπει τι σικλιάς πιο μπουτ πράγματα για τη συμπόνια; Επειδή ο Ιεχωβά μανγκέλα τι μοιάζας λέστε. (Εφεσίους 5:1) Παρόλο σο κερντιλάμ για τι τζιτζίνας ι γιαβερένγκε, τθεράσα αντρ’ αμέντε εγωισμός επειδή ισινάμ ατελείς. Μερικές φορές μπορεί μα τι αβέλ εύκολος τι αποφασίνας άμα κα βοηθίνας ι γιαβερέν ή άμα κα ντικχάς αμαρό νεαυτός. Σο κα βοηθίνελ-αμέν τι σικαβάς πιο μπουτ ενδιαφέρον ι γιαβερένγκε; Πρώτον, κα ντικχάς σαρ ο Ιεχωβά ντα γιαβερά σικαντέ συμπόνια. Δεύτερον, κα ντικχάς σαρ μπορίνασα τι σικαβάς συμπόνια σαρ σικαβέλα ο Ντεβέλ ντα σόσκε ισί λατσσό αμένγκε τι κεράς-λες ανταβά.

Ο ΙΕΧΩΒΑ ΝΤΕΛΑ-ΑΜΕΝ Ο ΤΕΛΕΙΟΣ ΠΑΡΑΔΕΙΓΜΑΣ ΓΙΑ ΤΙ ΣΙΚΑΒΑΣ ΣΥΜΠΟΝΙΑ

4. (α) Σόσκε ο Ιεχωβά μπουτσσαντάς αγγελόν κο Σόδομα; (β) Σο μπορίνασα τι σικλιάς οντουλένταρ σο αβιλέ-πες κι φαμιλί του Λωτ;

⁴ Κι Γραφή υπαρχίντιβενα μπουτ παραδείγματα για τη συμπόνια σο σικαβέλα ο Ιεχωβά. Για παράδειγμας, σκεφτίνεν σο κερντάς ο Ντεβέλ για τον Λωτ. Ο Λωτ ισινέ εκ δίκαιος τζενό σο “στεναχωρίντιβελας μπουτ” οντουλέ τζενένταρ σο κερένας μπέτι πράγματα κο Σόδομα ντα κο Γόμορρα. Οντουλά τζενέ να σεβάνενας ι Ντεβλές, ντα ο Ιεχωβά αποφασιντάς ότι αξίνενας τι μερέν. (2 Πέτρου 2:7, 8) Ο Ιεχωβά μπουτσσαντάς αγγελόν κο Λωτ για τι βακερέν λέσκε ότι ο Σόδομα ντα ο Γόμορρα κα καταστραφίντιβενας ντα ότι έπρεπε τι νασέλ σουγκό οτθάρ. Η Γραφή βακερέλα: «Καζόμ [ο Λωτ] αργίνελας, επειδή ο Ιεχωβά τζιτζισάλο λέσκε, ο [άγγελοι] ασταρντέ λέσκο βας ντα ο βας λέσκε ρομνιάκο ντα ο βαστά λέσκε ντουέ τσσαΐνγκε ντα νικαντέ-λες αβριάλ κατά πόλη ντα μουκχλέ-λες οτθέ». (Γένεση 19:​16) Μπορίνασα τι αβάς σίγουροι ότι ο Ιεχωβά αγαβέλα σο-ντα δυσκολίες νακχάσα ακριβώς σαρ αγαβέλας σο νακχέλας ο Λωτ.​—Ησαΐας 63:​7-9· Ιακώβου 5:​11· 2 Πέτρου 2:9.

5. Σαρ σικλιαρέλα-αμέν ο Λάφι ι Ντεβλέσκο τι σικαβάς συμπόνια;

⁵ Επίσης, ο Ιεχωβά σικλιαρντάς πι λαός τι σικαβέλ συμπόνια. Σκεφτίνεν εκ νόμος σο ντινάς κο Ισραηλίτες. Άμα κάποιος μανγκέλας λοβέ εκχέ τζενέσκε, οντουβά σο ντινάς ο δανεικά μπορίνελας τι λελ λέσταρ εκ κατά σέα σο ιρίλας σαρ εγγύηση ότι κα λέλας παλάλ πο λοβέ. (Διαβάνεν Έξοδος 22:​26, 27) Όμως, οντουβά σο ντέλας ο δανεικά έπρεπε τι βουρτίνελ ο σέα οντουλέ τζενέστε πριν τι περέλ ο κχαμ για μα τι σιλάλιβελας αρατί. Κάποιος σο να σικαβέλας συμπόνια μπορεί μα τι βουρτίνελας ο σέα, αλλά ο Ιεχωβά σικλιαρντάς πι λαός τι σικαβέλ συμπόνια. Σο σικλιαρέλα-αμέν ανταβά νόμος; Πάντα τι ντεν σημασία κο ανάγκες σο τθερέλα εκ πφραλ. Όταν μπορίνασα τι βοηθίνας εκχέ πφραλές ή εκχέ πφενιά σο νακχέλα δυσκολίες, μανγκάσα τι κεράς-λες ανταβά.​—Κολοσσαείς 3:​12· Ιακώβου 2:​15, 16· διαβάνεν 1 Ιωάννη 3:17.

6. Σο μπορίνασα τι σικλιάς κατά συμπόνια σο σικαβέλας ο Ιεχωβά κο αμαρτωλοί Ισραηλίτες;

⁶ Ο Ιεχωβά σικαβέλας συμπόνια ι Ισραηλιτένγκε ατζέ-ντα όταν κερένας αμαρτίες. Η Γραφή βακερέλα: «Ο Ιεχωβά, ο Ντεβέλ λένγκε παππούνγκο, συνεχίνελας τι μπουτσσαβέλ τζενέν για τι προειδοποιήνελ-λεν, ντα προειδοποιήνελας-λεν παλάλ γιαβερέστε, επειδή τζιτζίνελας πι λαόσκε». (2 Χρονικών 36:​15) Αμέν-ντα πρέπει τι σικαβάς συμπόνια οντουλένγκε σο να τζανένα ατζέ ι Ιεχωβάσκε, αλλά μπορεί πιο σοράν τι μετανιώνεν ντα τι αβέν λέσκε αμαλά. Ο Ιεχωβά να μανγκέλα τι καταστραφίντιβελ καέκ αζομάν σο κα κρίντιβεν ο τζενέ. (2 Πέτρου 3:9) Άρα, καζόμ ισί ατζέ καιρός, μανγκάσα τι προειδοποιήνας ντα τι βοηθίνας καζόμ πιο μπουτ τζενέν μπορίνασα τι δεχτίνεν ι συμπόνια ι Ντεβλέσκι.

7, 8. Σόσκε εκ φαμιλί πακιαντάς ότι ο Ιεχωβά σικαντάς λένγκε συμπόνια;

⁷ Αμαρέ ντιβεσέντε, μπουτ υπηρέτες ι Ιεχωβάσκε νιωσάλε λέσκι συμπόνια. Για παράδειγμας, κι δεκαετία του 1990 κι Βοσνία, τζενέ από διαφορετικούς λαούς μουνταρένας ο εκ ι γιαβερές. Εκχέ φαμιλιάτε ισινέ εκ τσσαβό 12 μπρεσένγκο σο κα ντας-λες ο ναβ Μιλάν. Ο Μιλάν, πι πφραλέσαρ, πι νταντέσαρ, πι νταγιάσαρ ντα γιαβερέ Μαρτυρέντζαρ τζάνας ι λεωφορειόσαρ κατά Βοσνία κι Σερβία. Τζάνας εκχέ συνελευσιάτε σο κα μπολντιόλας λέσκο ντατ ντα λέσκι ντάι. Κο σύνορα όμως, μερικοί στρατιώτες ντικχλέ ότι οντιά φαμιλί ισινέ εκχέ γιαβερέ λαόσταρ ντα γουλιαρντέ-λεν ζορίσαρ κατά λεωφορείος. Όμως, μουκχλέ ι γιαβερέ πφραλέν τι συνεχίνεν πουμαρό ταξίδι. Για ντούι ντιβές, ο στρατιώτες να μουκχένας τι νασέλ οντιά φαμιλί. Τελικά, ο αξιωματικός κερντάς λάφι κο αρχηγός για τι πουτσέλ-λες σο τι κερέλ-λεν. Η φαμιλί ασουντάς ι αρχηγός τι βακερέλ: «Νικαβέν-λεν αβρί ντα μουνταρέν-λεν!»

⁸ Ενώ ο στρατιώτες κερένας λάφι, ντούι τζενέ γκιλέ πασέ κι φαμιλί. Βακερντέ λένγκε ότι ισινέ βον-ντα Μάρτυρες ντα ότι ο πφραλά κο λεωφορείος βακερντέας λένγκε σο αβιλό-πες. Ο ντούι Μάρτυρες βακερντέ κο Μιλάν ντα λέσκε πφραλέσκε τι τσσουβέν-πες λένγκε αυτοκινητόστε για τι νακχέν ο σύνορα επειδή ο στρατιώτες να ελεγχίνενας ι χουρντένγκε χαρτιά. Σοράν, ο πφραλά βακερντέ κο ντατ ντα κι ντάι τι νασέν κατά παλαϊνί πλευρά για τι νακχέν ο σύνορα πφιριντός ντα τι αρακχέν-λεν κι γιαβέρ μπάντα. Ο Μιλάν νταρέλας αζόμ μπουτ σο να τζανέλας άμα έπρεπε τι ασάλ ή τι ροβέλ. Λέσκο ντατ ντα λέσκι ντάι πουτσλέ ι πφραλέν: «Αμντίνενα ότι κα μουκχέν-αμέν τι νασάς αζόμ εύκολα;» Όμως, όταν νασένας, παρόλο σο ο στρατιώτες τθερένας πουμαρέ γιακχά οπρά-λέντε ισινέ σαρ μα τι ντικχένας-λεν. Ο Μιλάν ντα λέσκο πφραλ αρακχλέ πουμαρέ νταντές ντα πουμαρέ νταγιά κι γιαβέρ μπάντα κατά σύνορα ντα γκιλέ κι συνέλευση. Ισινέ σίγουροι ότι ο Ιεχωβά απαντιντάας λένγκε προσευχιέντε! Σαρ τζανάσα κατά Γραφή, ο Ιεχωβά να αρακχαβέλα πι υπηρετόν πάντα ανταλέ τροπόσαρ. (Πράξεις 7:​58-60) Όμως, ο Μιλάν βακερντάς οντουλένγκε σο αβιλέ-πες λέσκε φαμιλιάκε: «Νιωθίναβας ότι ο άγγελοι κοριαρντέας ι στρατιωτέν ντα ότι ο Ιεχωβά σωντάς-αμέν».​—Ψαλμός 97:10.

9. Σαρ νιωσάλο ο Ιησούς ι τζενένγκε σο τζάνας παλά-λέστε; (Ντικχ ι φωτογραφία σο ισί κι αρχή)

⁹ Ο Ιησούς μουκχλάς εκ μπουτ λατσσό παράδειγμας επειδή σικαβέλας συμπόνια. Βοβ τζιτζίνελας ι τζενένγκε επειδή ντικχλάς ότι «ισινέ ντινέ ντα τρουγιμέ σαρ μπρακέ σο να τθερένα τσομπανής». Οτθάρ, σο κερντάς λένγκε; «Αρχισάλο τι σικλιαρέλ-λεν μπουτ πράγματα». (Ματθαίος 9:​36· διαβάνεν Μάρκος 6:​34) Οκιά μπάνταρ, ο Φαρισαίοι να τζιτζίνενας ι τζενένγκε ντα να μανγκένας τι βοηθίνεν-λεν. (Ματθαίος 12:​9-14· 23:4· Ιωάννης 7:​49) Μανγκένα τουμέν-ντα αντράλ τουμαρέ γκίσταρ, σαρ ο Ιησούς, τι βοηθίνεν ι τζενέν ντα τι σικλιαρέν-λεν ι Ιεχωβάσκε;

10, 11. Ισί πάντα σωστός τι σικαβάς συμπόνια; Εξηγίνεν.

¹⁰ Ανταβά να μανγκέλα τι βακερέλ ότι ισί πάντα σωστός τι σικαβάς συμπόνια. Για παράδειγμας, ο βασιλιάς Σαούλ μπορεί τι πακιάλας ότι σικαντάς συμπόνια όταν να μουνταρντάς τον βασιλιά Αγάγ, σο ισινέ βασιλιάς κο Αμαλήκ ντα ντουσμάνι ι Ντεβλέσκε λαόσκο. Ο Σαούλ επίσης να μουνταρντάς σαρέ ο ζώα σο τθερένας ο Αμαληκίτες. Όμως, ο Ιεχωβά βακερντάας κο Σαούλ τι μουνταρέλ σαρέ ι Αμαληκιτέν ντα σαρέ λένγκε ζώα. Επειδή ο Σαούλ να ντινάς καν, ο Ιεχωβά αποφασιντάς μα τι συνεχίνελ τι αβέλ βασιλιάς. (1 Σαμουήλ 15:3, 9, 15) Ο Ιεχωβά ισί ο δίκαιος Κριτής. Μπορίνελα τι διαβάνελ ο γκιά ι τζενένγκε ντα τζανέλα κάνα δεν πρέπει τι σικαβέλ συμπόνια. (Θρήνοι 2:​17· Ιεζεκιήλ 5:​11) Ατζεχάνικ, κα κρίνελ σαρέ οντουλέν σο να μανγκένα τι ντεν-λες καν. (2 Θεσσαλονικείς 1:​6-10) Αζομάν ο Ιεχωβά να κα σικαβέλ συμπόνια ι πφιρνένγκε. Αλλά όταν κα καταστραφίνελ-λεν κα σικαβέλ συμπόνια οντουλένγκε σο ισί δίκαιοι ντα κα σώνελ-λεν.

¹¹ Σίγουρα, να κα αποφασίνας αμέν άμα ο τζενέ πρέπει τι τζουβντιόν ή τι μερέν. Αλλά χρειαζίντιβελα τι κεράς ακανά σο νακχέλα αμαρέ βαστέσταρ για τι βοηθίνας ι τζενέν. Σο μπορίνασα τι κεράς για τι σικαβάς συμπόνια κο γιαβερά; Κα ντικχάς πιο τελέ.

ΣΑΡ ΜΠΟΡΙΝΑΣΑ ΤΙ ΣΙΚΑΒΑΣ ΣΥΜΠΟΝΙΑ

12. Σαρ μπορίνενα τι σικαβέν συμπόνια με το τρόπος σο συμπεριφερίντιβενα κο γιαβερά;

¹² Τι βοηθίνεν ι γιαβερέν κο πράγματα σο αβένα-πες κάθε ντιβές. Ο Ιεχωβά μανγκέλα κατά Χριστιανοί τι σικαβέν συμπόνια ι γιαβερέ τζενένγκε ντα ι πφραλένγκε. (Ιωάννης 13:​34, 35· 1 Πέτρου 3:8) Εκ πράγμας σο μανγκέλα τι βακερέλ η συμπόνια ισί ότι «νακχάσα δυσκολίες μαζί». Ο τζενό σο σικαβέλα συμπόνια προσπαθίνελα τι βοηθίνελ οντουλέν σο νακχένα δυσκολίες. Οτθάρ πρέπει τι αρακχάς ευκαιρίες τι βοηθίνας ι γιαβερέν, ίσως τι βακεράς λένγκε τι βοηθίνας-λεν σε εκ σημαντική μπουτί σο τθερένα τι κερέν κο κχερ ή τι κεράς λένγκε κάτι γιαβέρ.​—Ματθαίος 7:12.

13. Σο κερέλα ο λαός ι Ντεβλέσκο όταν αβένα-πες καταστροφές;

¹³ Τι βοηθίνεν όταν αβένα-πες καταστροφές. Όταν ντικχάσα τζενέν τι νακχέν δυσκολίες επειδή αβιλί-πες εκ καταστροφή, μανγκάσα τι σικαβάς λένγκε συμπόνια. Ο λαός ι Ιεχωβάσκο βοηθίνελα ι γιαβερέν όταν αβένα καταστροφές. (1 Πέτρου 2:​17) Για παράδειγμας, εκ πφεν κατά Ιαπωνία μπεσέλας σε εκ περιοχή σο καταστραφισάλι κατά σεισμός ντα κατά τσουνάμι κο 2011. Βακερντάς ότι λιντάς «μπαρί δύναμη ντα παρηγοριά» όταν ντικχλάς τι αβέν μπουτ πφραλά κατά Ιαπωνία ντα γιαβερέ τθεμένταρ για τι κερέν ο κχερά ντα ο Αίθουσες Βασιλείας σο καταστραφισάλεας. Επίσης βακερντάς: «Ανταβά βοηθιντάς-μαν τι αγαβάβ ότι ο Ιεχωβά πφαμπόλα αμένγκε. Ντα ο Μάρτυρες πφαμπόνα ο εκ ι γιαβερέσκε. Μπουτ πφραλά ντα πφενιά σαρό κο ντουνιάς προσευχίντιβενα αμένγκε».

14. Σαρ μπορίνενα τι βοηθίνεν ι νασφαλέν ντα ι πφουρέν;

¹⁴ Τι βοηθίνεν ι νασφαλέν ντα ι πφουρέν. Όταν ντικχάσα γιαβερέν τι νακχέν μπουτ επειδή ισί νασφαλέ ντα πφουρέ, τζιτζίνασα λένγκε. Μπεσάσα σαρ σαρ τι τελειώνεν ανταλά προβλήματα, οτθάρ προσευχίντιβασα τι αβέλ η Βασιλεία ι Ντεβλέσκι. Όμως μέχρι τι αβέλ-πες ανταβά, κεράσα σο νακχέλα αμαρέ βαστέσταρ για τι βοηθίνας ι νασφαλέν ντα ι πφουρέν. Εκ συγγραφέας γραφιντάς ότι εκ ντιβές λέσκι ντάι σο ισινέ πφουρί ντα τθερέλας Αλτσχάιμερ, κερντάς λέσι πο σέα. Ενώ προσπαθίνελας τι καθαρίνελ-πες, μπασλό ο κουδούνι. Ισινέ ντούι Μάρτυρες του Ιεχωβά σο τζάνας λάκε συχνά. Ο πφενιά πουτσλέ άμα μπορίνενας τι βοηθίνεν-λα. Η τζουβέλ βακερντάς: «Λατζάβα, αλλά κα μανγκάβας τι βοηθίνεν-μαν». Ο πφενιά βοηθιντέ-λα τι καθαρίνελ-πες. Σοράν, κερντέ λάκε τσάι ντα μπεσλέ τι κερέν λάφι. Ο τσσαβό οντουλέ τζουβλιάκο εκτιμιντάς οντουβά σο κερντέ ντα βακερντάς ότι ο Μάρτυρες «κερένα πουμαρέ ζωγιάτε οντουλά σο σικλιαρένα ι γιαβερέν». Κερέλα-τουμέν η συμπόνια σο νιωθίνενα ι νασφαλένγκε ντα ι πφουρένγκε τι κερέν τουμέν-ντα ο πιο λατσσό σο μπορίνενα για τι βοηθίνεν-λεν;​—Φιλιππησίους 2:3, 4.

15. Σαρ βοηθίνελα ι γιαβερέν ο έργος ι Ντεβλέσκο;

¹⁵ Τι βοηθίνεν ι τζενέν τι σικλιόν ι Ιεχωβάσκε. Ο πιο λατσσό τρόπος για τι βοηθίνας ι τζενέν ισί τι σικλιαράς-λεν ι Ντεβλέσκε ντα λέσκε Βασιλειάκε. Εκ γιαβέρ τρόπος ισί τι βοηθίνας-λεν τι αγαβέν σόσκε ισί λατσσό λένγκε τι ντεν καν κο κανόνες κι Ιεχωβάσκε. (Ησαΐας 48:​17, 18) Ο έργος ισί εκ μπουτ λατσσό τρόπος τι δοξάνεν ι Ιεχωβάς ντα τι σικαβέν συμπόνια ι γιαβερένγκε. Κα μπορίνενας τι κερέν πιο μπουτ πράγματα κο έργος κι Ντεβλέσκο;​—1 Τιμόθεο 2:3, 4.

Η ΣΥΜΠΟΝΙΑ ΚΕΡΕΛΑ ΛΑΤΣΣΙΠΕ ΤΟΥΜΕΝΓΚΕ-ΝΤΑ!

16. Σαρ βοηθίντιβασα κάνα σικαβάσα συμπόνια;

¹⁶ Ο επιστήμονες σο ασχολίντιβενα με το ψυχολογικά προβλήματα βακερένα ότι, όταν σικαβάσα συμπόνια, αμαρί υγεία ντα ο σχέσεις σο τθεράσα ι γιαβερέντζαρ αβένα πιο λατσσέ. Όταν τουμέν βοηθίνενα οντουλέν σο νακχένα δυσκολίες, κα αβέν πιο χαρούμενοι, τουμαρί ελπίδα κα μπαριόλ, να κα νιωθίνεν κορκορέ ντα κα σκεφτίνεν πιο χάνικ πράγματα σο στεναχωρίνενα-τουμέν. Όταν σικαβένα συμπόνια, κερένα λατσσιπέ τουμένγκε. (Εφεσίους 4:​31, 32) Όταν η αγάπη κερέλα-αμέν τι βοηθίνας ι γιαβερέν, τθεράσα λατσσί συνείδηση επειδή τζανάσα ότι κεράσα οντουβά σο μανγκέλα αμένταρ ο Ιεχωβά. Η συμπόνια κα βοηθίνελ-αμέν τι αβάς πιο λατσσέ νταντά ντα νταγιά, πιο λατσσέ αντρόγυνα ντα πιο λατσσέ αμαλά. Επίσης, οντουλά σο σικαβένα συμπόνια ι γιαβερένγκε μπουτ φαρ τθερένα βοήθεια όταν χρειαζίντιβενα-λα.​—Διαβάνεν Ματθαίος 5:7· Λουκάς 6:38.

17. Σόσκε μανγκένα τι σικαβέν συμπόνια;

¹⁷ Παρόλο σο κεράσα λατσσιπέ αμένγκε όταν σικαβάσα συμπόνια, ο πιο σημαντικός λόγος σο κεράσα-λες ανταβά ισί ότι μανγκάσα τι μοιάζας κο Ιεχωβά ντα τι δοξάνας-λες. Λέσταρ αβέλα η αγάπη ντα η συμπόνια. (Παροιμίες 14:​31) Βοβ ντέλα-αμέν ο τέλειος παράδειγμας. Οτθάρ, τι κεράς σο νακχέλα αμαρέ βαστέσταρ για τι σικαβάς συμπόνια ντα αντικάς τι μοιάζας κο Ντεβέλ. Άμα κερντάμ-λες ανταβά, κα αβάς πιο πασέ αμαρέ πφραλέντε ντα πφενίντε ντα κα τθεράς πιο λατσσέ σχέσεις ι γιαβερέ τζενέντζαρ.​—Γαλάτες 6:​10· 1 Ιωάννη 4:16.