Προβλήματα σο Ντένα-αμέν Ελπίδα

«Κο τελευταία ντιβεσά ο πράγματα κα αβέν δύσκολα ντα επικίνδυνα».​—2 ΤΙΜΟΘΕΟ 3:1.

Α ΣΟΥΝΤΕΝ ή ντικχλέν τουμαρέ γιακχίντζαρ τι αβέν-πες αζόμ μπέτι πράγματα σαρ ισί ακαλά;

● Εκ πφαρό νασφαλιπέ μουνταρέλα μπουτέ τζενέν.

● Εκ μπαρί μποκχ μουνταρέλα ατζέ πο μπουτ τζενέν.

● Εκ σεισμός μουνταρέλα χιλιάδες τζενέν ντα ατζέ πο μπουτέν μουκχέλα-λεν μπι-κχερέσκε.

Κο γιαβερά σελίδες, κα διαβάνεν πο μπουτ ανταλέ πραγματένγκε σο κα τσσουβέν-τουμέν σε σκέψεις. Ντα κα ντικχέν ότι η Αγία Γραφή βακερντάας ότι κα αβένας-πες ασακέ πράγματα κο βακίτι σο βακέρντιβελα «τελευταία ντιβεσά».a

Όμως, ο θέματα ανταλέ περιοδικόσκε να μανγκένα τι κερέν-τουμέν τι πακιάν ότι τζουβντιάσα εκχέ ντουνιάστε σο ισί πφερντό προβλήματα. Ανταβά μπέκιμ τι ντικχένα-λες τουμαρέ γιακχίντζαρ. Οκιά μπάνταρ, γραφισάλε για τι ντεν-τουμέν ελπίδα. Κα σικαβέν ότι ο σιοβ προφητείες σο ντικχάσα τι νικιόν μπαγιά μανγκένα τι βακερέν ότι ατζεχάνικ ο «τελευταία ντιβεσά» κα ερεσέν κο τέλος. Ντα ανταλέ θεματέντε κα ντικχέν σο βακερένα μπουτ τζενέ ντα λατσσέ λόγους για τι πακιάς ότι ο πράγματα κα αβέν μπουτ πο λατσσές ανγκλ’ αμέντε.

[Υποσημείωση]

Προφητεία 1. Σεισμοί

«Κα αβέν μπαρέ σεισμοί».​—ΛΟΥΚΑΣ 21:11.

● Νικαβένα τελάλ κατά ντουβάρια σο πελέ κι Αϊτή εκχέ χουρντιά 16 μασεκένγκι, σο βακερένα λάκε Γουίνι. Μερικά τζενέ σο γκιλέ τι γκίντεν ι καμεράσαρ ι καταστροφή σο αβιλί-πες για τι τσσουβέν-λα κο ειδήσεις, ασουντέ-λα τι ροβέλ. Η Γουίνι σώντιβελα κατά σεισμός, αλλά να σώντιβελα λάκο ντατ ντα λάκι ντάι.

ΣΟ ΣΙΚΑΒΕΝΑ Ο ΣΤΟΙΧΕΙΑ; Κάνα αβιλό-πες εκ σεισμός 7 ρίχτερ κι Αϊτή κο Ιανουάριος 2010, μουλέ πο μπουτ από 300.000 τζενέ. Ντα 1,3 εκατομμύρια τζενέ ατσσιλέ μπι-κχερέσκε αντρέ εκχέ ντιβεσέστε. Παρόλο σο ο σεισμός κι Αϊτή ισινέ μπουτ μπαρό, να αβιλόας σάντε ανταβά σεισμός. Αβιλέ πο μπουτ από 18 μπαρέ σεισμοί σαρί κι πφουβ κατά Απρίλιος 2009 μέχρι κο Απρίλιος 2010.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Να αβένα πο μπουτ σεισμοί ακανά. Αλλά χάρη κι τεχνολογία σο τθεράσα αμαρέ ντιβεσέντε ισί πο εύκολος τι σικλιάς ανταλέ σεισμόνγκε.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Σκεφτίνεν ακαβά: Η Γραφή να βακερέλα καζόμ σεισμοί κα αβένας-πες κο τελευταία ντιβεσά. Βακερέλα όμως ότι «μπαρέ σεισμοί» κα αβένας «τθεμ τθεμέστε», ντα ανταβά κα αβέλας εκ κατά μπουτ σημαντικά πράγματα σο κα σικαβέλας ότι ισινάμ κο βακίτι κι τελευταίε ντιβεσένγκο.—Μάρκος 13:8· Λουκάς 21:11.

ΣΟ ΠΑΚΙΑΝΑ ΤΟΥΜΕΝ; Ντικχάσα τι αβέν μπαρέ σεισμοί ντιπ σαρ βακερντάας η Γραφή;

Σάντε ο σεισμοί μπέκιμ να σικαβένα σίγουρα ότι τζουβντιάσα κο τελευταία ντιβεσά. Όμως, να νικιόλα μπαγιά σάντε ανταγιά προφητεία. Ντικχέν ατζέκ εκ τανί.

[Πρόταση σο ξεχωρίνελα κι σελίδα 4]

«Αμέν [ο γεωφυσικοί] βακεράσα ότι ανταλά ισί μπαρέ σεισμοί. Ο ντουνιάς ντικχέλα-λεν σαρ εκ μπέτι πράγμας σο ανέλα λένγκε νταρ».—ΚΕΝ ΧΑΝΤΝΑΤ, ΟΡΓΑΝΙΣΜΟΣ ΓΕΩΛΟΓΙΚΗΣ ΕΡΕΥΝΑΣ ΚΟ ΗΠΑ.

[Φωτογραφία κι σελίδα 4]

© William Daniels/Panos Pictures

Προφητεία 2. Μποκχ

«Κα υπαρχίντιβελ μποκχ».​—ΜΑΡΚΟΣ 13:8.

● Εκ μουρς τζάλα κο γκαβ Κουαρατατζί κο Νίγηρα. Λέσκε ξαδέλφια ντα λέσκε πφραλά αβιλέ βον-ντα εκχέ τθεμέσταρ σο ισινέ πο ντουρ για τι τθερέν τι χαν. Αλλά βοβ ζαντίνελα κορκορό τελέ. Σόσκε; «Επειδή ναστί ανέλα χαμπέ [πι φαμιλιάκε], ντα να νταϊντίνελα τι ντικχέλ-λεν κο γιακχά», βακερέλα ο Σίντι, ο αρχηγός ι γκαβέσκο.

ΣΟ ΣΙΚΑΒΕΝΑ Ο ΣΤΟΙΧΕΙΑ; Σαρό κο ντουνιάς, σχεδόν 1 κο 7 τζενέ να τθερένα μπουτ χαμπέ κάθε ντιβές. Ντα ο πράγματα ισί ατζέ πο μπέτι κι υποσαχάρια Αφρική, σο 1 κο 3 τζενέ να τθερένα ιτς τι χαν. Για τι αγαβάς σο μανγκέλα τι βακερέλ ανταβά, τι ανάς αμαρέ γκοντιάτε εκ φαμιλί σο ισί ο ντατ, η ντάι ντα ο τσσαβό. Άμα ο χαμπέ ερεσέλα σάντε ι ντουένγκε, κον κα ατσσόλ μποκχαλό; Ο ντατ, η ντάι ή ο χουρντό; Ανταβά τθερέλα τι τραμπίνελ κάθε ντιβές εκ ασακί φαμιλί.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Η πφουβ νικαβέλα μπουτ χαμπέ σαριλένγκε. Αλλά πρέπει τι ιλιάντιβεν πο λατσσές οντουλά σο νικαβέλα.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Ισί μπαγιά ότι ο γεωργοί νικαβένα ντα μπικινένα πο μπουτ χαμπέ αντιβές από κάθε γιαβέρ φαρ. Ο πο λατσσό κα αβέλας ο κυβερνήσεις τι τζανέν σο τι κερέν ανταλά χαμπίματα σο νικαβέλα η πφουβ για τι νασκιαρέν ι μποκχ. Όμως, σο-ντα τι κερντέ σαρέ ανταλά μπρεσά, να νασκιαρντέ ο πρόβλημας.

ΣΟ ΠΑΚΙΑΝΑ ΤΟΥΜΕΝ; Νικιόλα μπαγιά ο εδάφιος Μάρκος 13:8; Παρόλο σο η τεχνολογία γκιλί ανγκλάλ, νανέ μπαγιά ότι υπαρχίντιβενα τζενέ σαρί κι πφουβ σο να τθερένα τι χαν;

Ο σεισμοί ντα η μποκχ μπουτ φαρ ανένα γιαβερά-ντα προβλήματα κατά σημάδι ι τελευταίε ντιβεσένγκο. Ντικχέν ο γιαβέρ θέμας.

[Πρόταση σο ξεχωρίνελα κι σελίδα 5]

«Κατά τριν χουρντέ ο εκ τανό ντα πο μπουτ σο μερένα κατά πνευμονία, κατά διάρροια ντα γιαβερέ νασφαλιματένταρ κα μπορίνενας τι τζουβντιόν άμα κα τθερένας τι χαν».​—ΑΝ Μ. ΒΕΝΕΜΑΝ, ΠΡΩΗΝ ΔΙΕΥΘΥΝΤΡΙΑ ΤΟΥ ΤΑΜΕΙΟΥ ΤΟΥ ΟΗΕ ΓΙΑ ΤΑ ΠΑΙΔΙΑ.

[Φωτογραφία κι σελίδα 5]

© Paul Lowe/Panos Pictures

Προφητεία 3. Νασφαλίματα

«Ο τζενέ κα . . . τσσίντεν μπουτ κατά μπαρέ νασφαλίματα».​—ΛΟΥΚΑΣ 21:11, Σύγχρονη Αγγλική Μετάφραση.

● Ο Μπονζάλι, σο λέσκι μπουτί ισί τι φροντίνελ νασφαλέ τζενέν εκχέ τθεμέστε κι Αφρική ιτιρί κατά τζένγκι σο αβέλας-πες οτθέ, μαρέλα-πες για τι φροντίνελ ι τζενέν σο κερένας μπουτί σε εκ ορυχείος κι πόλη σο μπεσέλας επειδή μερένας κατά νασφαλιπέ Μάρμπουργκ.a Μανγκέλα βοήθεια πι αφεντικόνταρ σο ισί εκχέ πο μπαρέ τθεμέστε, αλλά να λέλα καέκ απάντηση. Τελικά, σταρ μασεκά πο σοράν, γκιλέ τι βοηθίνεν-λες, αλλά ο Μπονζάλι ισί μουλό. Κολλισάλο ο νασφαλιπέ Μάρμπουργκ κατά τζενέ σο μαρέλας-πες για τι σώνελ-λεν.

ΣΟ ΣΙΚΑΒΕΝΑ Ο ΣΤΟΙΧΕΙΑ; Ο νασφαλίματα κο αναπνευστικός σύστημας (σαρ η πνευμονία), η διάρροια, ο AIDS, η φυματίωση ντα η ελονοσία ισί κατά πο επικίνδυνα νασφαλίματα σο μουνταρένα μπουτέ τζενέν. Ακανά τελευταία, αντρέ εκχέ μπρεσέστε, ανταλά παντς νασφαλίματα μουνταρντέ περίπου 10,7 εκατομμύρια τζενέν. Γιαβερέ λαφίντζαρ, μουνταρένας σχεδόν εκχέ τζενές κάθε τριν δευτερόλεπτα, σαρό ο μπρες.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Καζόμ νακχένα ο μπρεσά ο τζενέ οπράλ κι πφουβ αβένα πο μπουτ, άρα ισί λογικός τι αβέν πο μπουτ νασφαλίματα. Αφού υπαρχίντιβενα πο μπουτ τζενέ, νασφάλιβενα-ντα πο μπουτ.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Ο τζενέ οπράλ σαρί κι πφουβ αβιλέ πο μπουτ. Όμως, αβιλί πο λατσσί-ντα η ικανότητα σο τθερένα τι αρακχέν, τι κερέν κουμάντος ντα τι ντεν θεραπείες κο νασφαλέ τζενέ. Άρα, να κα αβέλας λογικός καζόμ τζάλα ο νασφαλίματα τι αβέν πο χάνικ κο τζενέ οπράλ κι πφουβ; Αλλά ανταβά να ντικχάσα τι αβέλ-πες.

ΣΟ ΠΑΚΙΑΝΑ ΤΟΥΜΕΝ; Τσσίντενα μπουτ ο τζενέ ιτιρί κατά μπαρέ νασφαλίματα σαρ βακερέλας η Γραφή;

Ο σεισμοί, η μποκχ ντα ο νασφαλίματα ανένα μπαρί νταρ εκατομμύρια τζενέντε. Εκατομμύρια γιαβερά τσσίντενα μπουτ κο βαστά κι γιαβερέ τζενένγκε​—μπουτ τζενέ μάλιστα κερένα μπαρό ζιάνι τζενένγκε σο έπρεπε τι αρακχαβέν-λεν. Ντικχέν σο βακερέλα η προφητεία ι Γραφιάκι ότι κα αβέλας-πες.

[Υποσημείωση]

[Πρόταση σο ξεχωρίνελα κι σελίδα 6]

«Ισί μπουτ μπέτι πράγμας ντα ανέλα μπαρί ντουκχ τι χαλ-τουτ εκ λιοντάρι ή εκ γιαβέρ ζώος, αλλά επίσης ανέλα μπαρί ντουκχ κάνα χάλα-τουτ εκ μπουτ μπέτι νασφαλιπέ ή κάνα ντικχέσα-λες τι κερέλ-λες ανταβά κο γιαβερά τζενέ».​—ΕΠΙΔΗΜΙΟΛΟΓΟΣ ΜΑΪΚΛ ΟΣΤΕΡΧΟΛΜ.

[Φωτογραφία κι σελίδα 6]

© William Daniels/Panos Pictures

Προφητεία 4. Να κα Σικάντιβελ ιτς Αγάπη

“Ο τζενέ να κα . . . σικαβέν ιτς αγάπη πουμαρέ τζενέντε”.​—2 ΤΙΜΟΘΕΟ 3:​1-3, Η Καινή Διαθήκη, Ι. Θ. Κολιτσάρα

● Η Κρις κερέλα μπουτί σε εκ κέντρος κι Βόρεια Ουαλία ντα βοηθίνελα οντουλέν σο νακχένα βία τζενένταρ σο ισί αντρέ λένγκε φαμιλιάτε. «Ντάβα-μαν γκοντί εκχέ τζουβλιά σο κάνα αβιλί ισινέ αζόμ ντινί σο δυσκολίντιβαβας τι αγαβάβ-λα κατά τελευταία φαρ σο ντικχλόμας-λα», βακερέλα η Κρις. «Γιαβερά-ντα τζουβλιά νακχλέ κάτι ασακό ντα νιωθίνενας αζόμ μπέτι, σο ναστί βάντενας ούτε πουμαρέ γιακχά κατά πάτωμας».

ΣΟ ΣΙΚΑΒΕΝΑ Ο ΣΤΟΙΧΕΙΑ; Εκχέ τθανέστε κι Αφρική, περίπου 1 κο 3 τζουβλιά βιαντέ-λα σεξουαλικά κάνα ισινέ χουρντί. Εκ έρευνα κο ίδιος τθεμ σικαντάς ότι ο πο μπουτ μουρσά αμντίνενας ότι μπορίνενας τι νταπέν πουμαρέ ρομνίν. Όμως, να χάνα νταπ σάντε ο τζουβλιά αντρέ πουμαρέ φαμιλιάτε. Για παράδειγμας, κο Καναδάς, σχεδόν 3 κατά 10 μουρσά χάνα νταπ πουμαρέ ρομνίνταρ ή κερένα λένγκε γιαβερά μπέτι πράγματα.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Πάντα υπαρχίντιβελας βία αντρέ κι φαμιλί. Απλώς αμαρέ ντιβεσέντε ντένα πο μπουτ σημασία ανταλέ θεμάστε.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Κο τελευταία μπρεσά μπουτ τζενέ μαρένα-πες μα τι σικαβέν βία αντρέ κι φαμιλί. Όμως σικαβέλα ανταβά ότι υπαρχίντιβελα πο χάνικ βία; Όχι να αβιλό-πες ανταβά. Ο τζενέ αντιβές να σικαβένα ιτς αγάπη.

ΣΟ ΠΑΚΙΑΝΑ ΤΟΥΜΕΝ; Νικιόνα μπαγιά ο εδάφια 2 Τιμόθεο 3:1-3; Υπαρχίντιβενα τζενέ σο να κα σικαβέν ιτς αγάπη πουμαρέ τζενέντε ντα αμντίνενα ότι ανταβά ισί φυσιολογικός;

Η πέμπτη προφητεία σο ντικχένα τι νικιόλ μπαγιά τθερέλα τι κερέλ αμαρέ κχερέσαρ—ι πφουβιάσαρ. Ντικχέν σο βακερέλα η Γραφή ανταλέσκε.

[Πρόταση σο ξεχωρίνελα κι σελίδα 7]

«Η βία αντρέ κι φαμιλί ισί εκ κατά πο χάνικ εγκλήματα σο κερένα καταγγελία ο τζενέ. Συνήθως, εκχέ τζουβλιά νταπέλα-λα 35 φαρ ο ρομ λάκο πριν βόι τελικά τι τζαλ κι αστυνομία».—ΕΚ ΕΚΠΡΟΣΩΠΟΣ ΣΟ ΝΤΕΛΑ ΒΟΗΘΕΙΑ ΚΑΝΑ ΥΠΑΡΧΙΝΤΙΒΕΛΑ ΚΑΚΟΠΟΙΗΣΗ ΑΝΤΡΕ ΚΙ ΦΑΜΙΛΙ ΚΙ ΟΥΑΛΙΑ.

Προφητεία 5. Καταστροφή ι Πφουβιάκι

“[Ο Ντεβέλ κα] καταστραφίνελ οντουλέν σο καταστραφίνενα ι πφουβ”.​—ΑΠΟΚΑΛΥΨΗ 11:18.

● Ο κύριος Πίρι γκίντελα μολ κατά φοινικόδεντρα κο Κπορ κι Νιγηρία. Η μπουτί λέσκι τσσινάντιλι ιτιρί κατά μπαρί πετρελαιοκηλίδα σο υπαρχίντιβελας κο Δέλτα του Νίγηρα. «Η πετρελαιοκηλίδα μουνταρέλα αμαρέ ματσσέν, χαλαβέλα αμαρό δέρμας ντα μελιαρέλα αμαρέ λενιά», βακερέλα. «Να υπαρχίντιβελα πλέον τρόπος για τι νικαβάβ ο μαντρό μι φαμιλιάκε».

ΣΟ ΣΙΚΑΒΕΝΑ Ο ΣΤΟΙΧΕΙΑ; Σαρ βακερένα μερικά τζενέ σο ασχολίντιβενα ανταλέ θεμάσαρ, κάθε μπρες τζάνα κο ντεριαβά 6,5 εκατομμύρια τόνοι σκουπίδια. Ο τζενέ υπολογιντέ ότι ο επκάς ισί πλαστικά σο κα τζαν ακατάρ ντα οκουτάρ για εκατοντάδες μπρεσά μέχρι τι λιώνεν. Ο τζενέ, όχι σάντε μελιαρένα ι πφουβ, αλλά χρησιμοποιήνενα μπουτ μπέτι τροπόσαρ-ντα οντουλά σο νικαβέλα. Ο επιστήμονες βακερένα ότι η πφουβ χρειαζίντιβελα εκ μπρες ντα παντς μασεκά για τι νικαβέλ πάλι οντουλά σο χρησιμοποιηντέ ο τζενέ αντρέ εκχέ μπρεσέστε. «Άμα συνεχιντέ αντικάς ο πράγματα ντα ο τζενέ αβένα πο μπουτ ντα χρησιμοποιήνενα λάθος τροπόσαρ οντουλά σο νικαβέλα η πφουβ, κο 2035 κα χρειαζίντιβας ντούι πλανήτες σαρ ι Πφουβ», βακερέλα η εφημερίδα Sydney Morning Herald κι Αυστραλία.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Ο τζενέ σκεφτίνενα λατσσέ τρόπους για τι λύνεν ο προβλήματα. Μπορίνασα τι αλλάνας ο πράγματα ντα τι σώνας ι πφουβ.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Μπουτ τζενέ ντα οργανισμοί, κερένα μπαρέ προσπάθειες ντα βοηθίνενα ι τζενέν τι προσοχίνεν πο μπουτ ι πφουβ. Όμως, ντικχάσα ότι ο τζενέ συνεχίνενα τι μελιαρέν ατζέ πο μπουτ ι πφουβ.

ΣΟ ΠΑΚΙΑΝΑ ΤΟΥΜΕΝ; Άρα τθεράσα ανάγκη ι βοήθεια ι Ντεβλέσκι για τι σώνελ αμαρί πφουβ κατά καταστροφή, σαρ ντινάας πο λάφι;

Εκτός κατά παντς προφητείες σο μόλις ντικχλάμ, η Γραφή κερντάς λάφι λατσσέ πραγματένγκε-ντα σο κα αβένας κο τελευταία ντιβεσά. Ντικχέν για παράδειγμας, ι έκτη προφητεία.

[Πρόταση σο ξεχωρίνελα κι σελίδα 8]

«Αισθάντιβαβα ότι, οτθέ σο τθεράβας εκ τθαν σο μοιάζελας σαρ παράδεισος, ακανά τθεράβα εκ τθαν σο ισί πφερντό σκουπίδια».—ΕΡΙΝ ΤΑΜΠΕΡ, ΜΠΕΣΕΛΑ ΚΟ ΚΟΛΠΟΣ ΚΟ ΜΕΞΙΚΟΣ, ΚΟ ΗΠΑ, Η ΜΠΕΤΙ ΠΡΑΓΜΑΤΕΝΓΚΕ ΣΟ ΑΝΕΛΑ Η ΠΕΤΡΕΛΑΙΟΚΗΛΙΔΑ ΤΟΥ 2010.

[Πλαίσιος κι σελίδα 8]

Φταίνελα ο Ντεβέλ;

Αφού ανταλά μπέτι πράγματα σο ντικχάσα αντιβές βακέρντιλε αντρέ κι Αγία Γραφή, μήπως φταίνελα ο Ντεβέλ ανταλένγκε; Μήπως βοβ ανέλα αμαρέ προβλήματα; Μπορίνενα τι αρακχέν λατσσέ απαντήσεις ανταλέ ερωτησιέντε κο βιβλίος Σο Μπορίνελα τι Σικλιαρέλ-αμέν η Αγία Γραφή;, κο κεφάλαιος 11, σο νικαβένα ο Μάρτυρες ι Ιεχωβάσκε.

[Φωτογραφία κι σελίδα 8]

U.S. Coast Guard photo

Προφητεία 6. Εκ Έργος για τι Μουτθάντιβεν ο Λατσσέ Αμπέρια Σαρί κι Πφουβ

«Ανταλά λατσσέ αμπέρια ι Βασιλειάκε κα μουτθάντιβεν σαρί κι πφουβ».​—ΜΑΤΘΑΙΟΣ 24:14.

● Η Βαϊατία τζουβντιόλα εκχέ νησίστε σο ισί ντουρ κο Ειρηνικός Αρχιπέλαγος Τουαμότου. Παρόλο σο ο Τουαμότου τθερέλα περίπου 80 πο χουρντέ νησιά, αντρέ σε 802.900 ντα πο μπουτ τετραγωνικά χιλιόμετρα, οτθέ μπεσένα σάντε 16.000 τζενέ περίπου. Όμως, ο Μάρτυρες ι Ιεχωβάσκε τθερένα γκιλό κι Βαϊατία ντα κο τζενέ σο μπεσένα οτθέ πασέ. Σόσκε; Επειδή μανγκένα τι βακερέν ο λατσσέ αμπέρια ι Ντεβλέσκε Βασιλειάκε σαρέ κο τζενέ​—κατέ-ντα τι τζουβντιόν.

ΣΟ ΣΙΚΑΒΕΝΑ Ο ΣΤΟΙΧΕΙΑ; Ο λατσσέ αμπέρια ι Βασιλειάκε μουτθάντιβενα σαρό κο ντουνιάς. Για παράδειγμας, κο 2010, ο Μάρτυρες ι Ιεχωβάσκε αφιερωντέ πο μπουτ από 1,6 δισεκατομμύρια σαάτια για τι μουτθαβέν ανταλά λατσσέ αμπέρια σε 236 τθεμά. Ανταβά μανγκέλα τι βακερέλ ότι κάθε Μάρτυρας κερέλας έργος περίπου 30 λεπτά αντρέ κο ντιβές. Ο ντες μπρεσά σο νακχλέ, ο Μάρτυρες ι Ιεχωβάσκε νικαντέ ντα ντινέ πο μπουτ από 20 δισεκατομμύρια έντυπα σο βασίντιβενα κι Γραφή.

ΚΑΛΕ ΠΡΑΓΜΑΣΑΡ ΝΑ ΣΥΜΦΩΝΙΝΕΝΑ ΜΠΟΥΤ ΤΖΕΝΕ; Ο λατσσέ αμπέρια ι Γραφιάκε τθερένα χιλιάδες μπρεσά σο μουτθάντιβενα.

ΙΣΙ ΑΝΤΙΚΑΣ ΣΑΡ ΒΑΚΕΡΕΝΑ; Ισί μπαγιά, ότι μπουτ τζενέ τθερένα βακερντό ο λατσσέ αμπέρια σο τθερέλα η Γραφή. Αλλά ο πο μπουτ βακερντέ ανταλά λατσσέ αμπέρια για χάνικ βακίτι ντα χάνικ τθεμέντε. Οκιά μπάνταρ, ο Μάρτυρες ι Ιεχωβάσκε κερένα εκ οργανωμέ έργος σαρό κο ντουνιάς ντα κερένα λάφι εκατοντάδες εκατομμύρια τζενέντζαρ. Ο Μάρτυρες να τσσιναντέ τι κερέν έργος παρόλο σο γκιλέ λέντζαρ μπουτ μπαρί κόντρα κάποιες μπουτ ζουρανέ οργανώσεις σαρέ ανταλά μπρεσά.a (Μάρκος 13:13) Επίσης, κερένα ανταβά έργος χωρίς τι λεν λοβέ. Οκιά μπάνταρ, ντένα πουμαρέ σαατίσταρ χωρίς τι ποκίντιβεν ντα ντένα πουμαρέ έντυπα δωρεάν. Ο έργος σο κερένα αβέλα-πες σάντε με συνεισφορές σο ντένα ο τζενέ άμα μανγκένα.

ΣΟ ΠΑΚΙΑΝΑ ΤΟΥΜΕΝ; Μουτθάντιβενα ο «λατσσέ αμπέρια ι Βασιλειάκε» σαρό κο ντουνιάς; Σικαβέλα ανταγιά προφητεία σο νικιόλα μπαγιά ότι κάτι πο λατσσό κα αβέλ ανγκλ’ αμέντε;

[Υποσημείωση]

[Πρόταση σο ξεχωρίνελα κι σελίδα 9]

«Καζόμ μανγκέλα ο Ιεχωβά, αμέν κα συνεχίνας τι μουτθαβάς ο λατσσέ αμπέρια ι Βασιλειάκε αντράλ αμαρέ γκίσταρ, ντα κα χρησιμοποιήνας σο-ντα εργαλεία τθεράσα για τι πλησιάνας ι τζενέν».​—ΒΙΒΛΙΟ ΕΤΟΥΣ ΤΩΝ ΜΑΡΤΥΡΩΝ ΤΟΥ ΙΕΧΩΒΑ 2010.

Πο Λατσσέ Ντιβεσα Ακριβώς Ανγκλ’ Αμέντε!

«Χάνικ ατζέ, ντα ο πφιρνέ να κα υπαρχίντιβεν . . . Ο τζενέ σο ισί κοβλέ γκίσκε όμως κα τθερέν πουμένγκε ι πφουβ ντα κα αβέν ευτυχισμέ επειδή κα τθερέν μπουτ ειρήνη».​—ΨΑΛΜΟΣ 37:10, 11.

Κ Α ΜΑΝΓΚΕΝΑΣ ι προφητεία σο ντικχλάμ πο οπρέ τι αβέλ μπαγιά; Σίγουρα, κα μανγκένας. Υπαρχίντιβενα λατσσέ λόγοι σο πακιάσα ότι ανταβά κα αβέλ-πες σουγκό.

Ο θέματα σο ντικχλάμ πο πριν ισινέ σάντε χάνικ κατά προφητείες ι Γραφιάκε σο σικαβένα ότι τζουβντιάσα «κο τελευταία ντιβεσά». (2 Τιμόθεο 3:1-5) Ο Ντεβέλ ντινάς πο άγιος πνεύμας κο τζενέ σο γραφιντέ ι Γραφή για τι βακερέν-λεν σαρέ ανταλά, ντα αντικάς τι μπορίνας αμέν τι τθεράς ελπίδα. (Ρωμαίους 15:4) Επειδή νικιόνα μπαγιά ανταλά προφητείες, ανταβά μανγκέλα τι βακερέλ ότι αμαρέ προβλήματα κα τελειώνεν μπουτ σουγκό.

Σο κα αβέλ σοράν κατά τελευταία ντιβεσά; Η Βασιλεία ι Ντεβλέσκι κα κερέλ κουμάντος σαρέ ι τζενέν. (Ματθαίος 6:9, 10) Ντικχέν σαρ κα αβέν ο πράγματα αζομάν κι πφουβ, αντικάς σαρ βακερέλα η Γραφή:

● Να κα υπαρχίντιβελ μποκχ. «Κα υπαρχίντιβελ μπουτ γκιβ κι πφουβ, ντιπ οπράλ κο βεσά κα αβέλ γκιβ μπερεκέτι».​—Ψαλμός 72:16.

● Να κα υπαρχίντιβεν ο νασφαλίματα. «Ούτε εκ τζενό να κα βακερέλ: “Ισινόμ νασφαλό”».​—Ησαΐας 33:24.

● Η πφουβ κα αβέλ πάλι νεβί. «Η έρημος ντα η πφουβ σο ισί ντιπ σουκί κα πφερντιόν χαρά ντα η σουκί πεδιάδα κα χαιρίνελ ντα κα νικαβέλ μπουμπούκια σαρ ο σαφράνι».​—Ησαΐας 35:1.

Ανταλά ισί χάνικ κατά προφητείες σο ντένα-αμέν ζορ ντα μπουτ σουγκό κα αβέν μπαγιά. Μα σακιντίνεν τι μανγκέν κατά Μάρτυρες ι Ιεχωβάσκε τι εξηγίνεν τουμένγκε σόσκε ισί αζόμ σίγουροι ότι ακριβώς ανγκλ’ αμέντε κα αβέν πο λατσσέ ντιβεσά.