Μάνγκε, να Υπαρχίντιβελας Ντεβέλ

ΣΟ ΤΖΕΝΟ ΙΣΙΝΟΜΑΣ ΑΝΓΚΛΕ

Μπιάντιλομ εκχέ γκαβέστε κι Σαξονία, σο αζομάν ισινέ κι Λαοκρατική Δημοκρατία της Γερμανίας (ΛΔΓ). Αμαρέ φαμιλιάτε τθεράας μανγκιπέ ντα πφαμπάας ο εκ ι γιαβερέσκε. Μο ντατ ντα μι ντάι σικλιαρντέ-μαν τι αβάβ λατσσό τζενό. Αμαρό τθεμ ισινέ κομμουνιστικός, οτθάρ ο πο μπουτ τζενέ κι Σαξονία να τσσουβένας σημασία κι θρησκεία. Με Μάνγκε, να Υπαρχίντιβελας Ντεβέλ. Ντούι πράγματα επηρεαντέ μπουτ ο πρώτα 18 μπρεσά μι ζωγιάκε: η ιδέα ότι νανέ Ντεβέλ ντα ο κομμουνισμός.

Σόσκε μπεϊντίναβας ο κομμουνισμός; Σόσκε πακιάβας ότι καέκ τζενό δεν πρέπει τι αβέλ πο οπρέ κατά γιαβερά. Ατζέ, πακιάβας ότι ο χουλανιπέ έπρεπε τι ιλιάντιβελ δίκαια σαριλέντε ντα αντικάς μα τι αβέν χουλανέ ντα τσορορέ. Οτθάρ, κεράβας μπουτ μπουτί εκχέ οργανωσιάτε σο ισινέ τερνέ κομμουνιστές. Κάνα ισινόμας 14 μπρεσένγκο, ντινόμ μπουτ μι σαατίσταρ εκχέ προγραμμάστε για τι αρακχαβάς ι πφουβ. Γκίνταας ο χαρτιά σο φουρτίνενας ο τζενέ ντα λατσσαράας-λεν για τι χρησιμοποιήντιβεν πάλι. Ο τζενέ σο μπεσένας πασέ αμέντε κο Άουε ισαρντέ-μαν οντουλένγκε σο κεράβας ντα ντινέ-μαν βραβείος. Παρόλο σο ισινόμας μπουτ τερνό, γνωριντόμας τζενέν σο κερένας κουμάντος κο τθεμ. Πακιάβας ότι οντουλά σο τθεράβας μι γκοντιάτε τι κεράβ ισινέ λατσσέ ντα ότι ανγκλά-μάντε κα αβένας μπουτ σουκάρ ντιβεσά.

Αζομάν, σαρέ αλλαξάλε. Κο 1989, πελό ο τείχος του Βερολίνου ντα γιεκ λέσαρ πελό ο κομμουνισμός-ντα σο ισινέ μπουτέ τθεμέντε κι Ανατολική Ευρώπη. Αλλά αβιλέ-πες γιαβερά-ντα πράγματα σο πφανγκλέ μο γκι. Αγαντόμ ότι αβιλέας-πες μπουτ αδικίες μι τθεμέστε. Για παράδειγμας, ο κομμουνιστές ντικχένας οντουλέν σο να τσσίντενας λένταρ σαρ τι αβένας πο τελέ. Σαρ αβέλας-πες ανταβά; Να πακιάας αμέν ο κομμουνιστές ότι καέκ να ισινέ πο οπρέ κατά γιαβερά; Μήπως ο κομμουνισμός ισινέ εκ χουχαϊπέ; Τσσουντόμας μπουτ μι γκίστε.

Αρχισάλομ τι νταβ πο μπουτ μι σαατίσταρ κι μουσική ντα κι ζωγραφική. Αφού μπορίναβας τι τζάβας εκχέ μουσικέ σχολειόστε, ντα σοράν τι τζάβας κο πανεπιστήμιος, μανγκάβας τι αβάβ μουσικός ντα ζωγράφος σαρί μι ζωή. Ατζέ, μουκχλόμ παλάλ ο λατσσέ πράγματα σο σικλιαρντέας-μαν κάνα ισινόμας χουρντό. Οντουβά σο τθεράβας μι γκοντιάτε ισινέ σάντε τι νακχάβ λατσσές. Νικιάβας μπουτέ τζουβλίντζαρ κο ίδιος βακίτι. Παρόλο σο ισινόμας μουσικός, ζωγραφίναβας ντα τζουβντιάβας σαρ μανγκάβας, να λοκχιόλας μο γκι. Η μπαρί νταρ σο τθεράβας σικάντιβελας ατζέ-ντα κο πίνακες σο ζωγραφίναβας. Πουτσάβας-μαν: Σο κα κερντιόλας κο ντιβεσά σο κα αβένας; Ντα σόσκε τζουβντιάσα;

Κάνα αρακχλόμ ο απαντήσεις σο ρόνταβας, ατσσιλόμ πουταρντέ μόσαρ. Ανταβά αβιλό-πες εκ ντιβές κο σχολείος. Μπεσλόμ μερικέ μαθητέντζαρ ντα κεράας λάφι ι ντιβεσένγκε σο κα αβένας. Οτθέ λέντζαρ ισινέ η Μάντι-ντα,a εκ Μάρτυρας ι Ιεχωβάσκι. Βόι ντινάς-μαν λατσσί ορμήνια. Βακερντάς μάνγκε: «Αντρέας, άμα μανγκέσα απαντήσεις κο ερωτήσεις σο τθερέσα ι ζωγιάκε ντα οντουλένγκε σο κα αβέν-πες ανγκλ’ αμέντε, ρόντε λατσσές κι Γραφή».

Να πακιασάλομ ντιπ οντουλά σο βακερντάς, αλλά μανγκάβας τι σικλιάβ πο μπουτ. Η Μάντι σικαντάς μάνγκε ο κεφάλαιος ντούι ι Δανιηλίσκο. Σαστισάλομ οντουλέντζαρ σο διαβαντόμ οτθέ. Οντιά προφητεία βακερέλα μερικέ μπαρέ κυβερνησιένγκε σο κα κερένας κουμάντος ι ντουνιάς η εκ παλάλ κατά γιαβέρ, μέχρι αμαρέ ντιβεσέντε. Η Μάντι σικαντάς μάνγκε γιαβερά-ντα προφητείες σο κερένα λάφι ι ντιβεσένγκε σο κα αβέν. Αντικάς, αρακχλόμ απαντήσεις κο ερωτήσεις σο ρόνταβας. Αλλά κάσταρ αβένα ανταλά προφητείες, ντα κον μπορίνελα τι βακερέλ ντιπ σαρέ οντουλά σο κα αβέν-πες; Σικαβέλα ανταβά ότι υπαρχίντιβελα Ντεβέλ;

ΣΑΡ ΑΛΛΑΝΤΑΣ ΜΙ ΖΩΗ Η ΑΓΙΑ ΓΡΑΦΗ

Ο Χορστ ντα η Αγγέλικα ισινέ εκ αντρόγυνος, Μάρτυρες ι Ιεχωβάσκε, σο γνωριντόμ κατά Μάντι. Βον ντινέ-μαν τι αγαβάβ πο λατσσές ο Λάφι ι Ντεβλέσκο. Αγαντόμ σουγκό ότι σάντε ο Μάρτυρες ι Ιεχωβάσκε βακερένα ι Ντεβλέσκο ναβ ντα σικλιαρένα-λες κο γιαβερά-ντα. (Ψαλμός 83:18· Ματθαίος 6:9) Σικλιλόμ ότι ο Ιεχωβά Ντεβέλ ντινάς πο λάφι κο τζενέ ότι κα τζουβντιόν για πάντα κο Παράδεισος κι πφουβ. Ο εδάφιος Ψαλμός 37:9 βακερέλα: «Οντουλά σο τθερένα ελπίδα κο Ιεχωβά κα τθερέν πουμένγκε ι πφουβ». Μπεϊντιντόμ μπουτ σο ανταγιά σουκάρ ζωή μπορίνενα τι τθερέν-λα σαρέ οντουλά σο μαρένα-πες τι τζουβντιόν αντικάς σαρ βακερένα ι Ντεβλέσκε κανόνες αντρέ κι Γραφή.

Ισί μπαγιά ότι μαρντόμ-μαν μπουτ για τι τσσιναβάβ οντουλά σο ισινόμας σικλό τι κεράβ ντα για τι τζουβντιάβ σαρ βακερέλα η Γραφή. Επειδή αβιλόμας λατσσό μουσικός ντα ζωγράφος, ισινόμας μπαρικανό. Οτθάρ, ο πρώτος πράγμας σο έπρεπε τι σικλιάβ ισινέ τι αβάβ ταπεινός. Ατζέ, ισινέ πφαρό μάνγκε τι μουκχάβ ο μπίλατζανε πράγματα σο κεράβας. Κάνα εκ τζενό κερέλα ο πο λατσσό για τι ντελ καν κο λάφια κι Γραφιάκε, ο Ιεχωβά κερέλα υπομονή, τζιτζίνελα λέσκε ντα αγαβέλα οντουλέ τζενές. Καζόμ εκτιμίναβα-λες ανταβά!

Ο κομμουνισμός ντα η ιδέα ότι νανέ Ντεβέλ επηρεαντέ μπουτ ο πρώτα 18 μπρεσά μι ζωγιάκε. Αλλά από αζομάν η Γραφή αλλάνελα μι ζωή. Οντουλά σο σικλιλόμ κερντέ-μαν μα τι νταράβ κατά ντιβεσά σο κα αβέν ντα ντινέ-μαν εκ πφερντί ζωή. Κο 1993, μπολντιλόμ σαρ Μάρτυρας ι Ιεχωβάσκο, ντα κο 2000 παντρισάλομ ι Ταμπιτάσαρ, εκχέ πφενιάσαρ σο πφαμπόλα μπουτ ι Ντεβλέσκε πραγματένγκε. Ο ντούι-ντα γιεκ, ντάσα καζόμ πο μπουτ αβέλα-πες αμαρέ σαατίσταρ για τι βοηθίνας ι γιαβερέν τι σικλιόν ι Γραφιάκε. Μπουτ τζενέ σο αρακχάσα μπαριλέ σαρ μπαριλόμ με. Σικλιαρντέας-λεν ο κομμουνισμός ντα ότι να υπαρχίντιβελα Ντεβέλ. Αβέλα μο γκι κάνα σικαβάβα λένγκε σαρ τι σικλιόν ι Ιεχωβάσκε.

ΣΟ ΛΑΤΣΣΙΠΕ ΝΤΙΚΧΛΟΜ ΜΙ ΖΩΓΙΑΤΕ

Κάνα αρχισάλομ μελέτη ι Ιεχωβάσκε Μαρτυρέντζαρ, μο ντατ ντα μι ντάι νταρασάλε μπουτ. Σοράν, όμως, αγαντέ καζόμ λατσσιπέ κερέλας ανταβά μι ζωγιάτε. Πουτάρντιβελα μο γκι σο ακανά βον-ντα διαβάνενα ι Γραφή ντα αβένα κο συναθροίσεις σο κερένα ο Μάρτυρες ι Ιεχωβάσκε.

Η Ταμπίτα ντα με τθεράσα εκ λατσσό μπιαβ σόσκε κεράσα ο πο λατσσό για τι ντας καν κο λάφια σο βακερέλα η Γραφή ι παντριμέ τζενένγκε. Εκ οντουλέ λαφίνταρ ισί τι ατσσάς πιστοί ο εκ κο γιαβέρ. Αμέν κεράσα-λες ανταβά, οτθάρ αμαρό μπιαβ αβέλα πο ζουρανό.—Εβραίους 13:4.

Ακανά να τθεράβα νταρ μι ζωγιάτε ντα να τσσουβάβα μι γκίστε ι ντιβεσένγκε σο κα αβέν. Ισινόμ εκχέ φαμιλιάτε πφραλέντζαρ ντα πφενίντζαρ σαρό κατά ντουνιάς. Αντρέ οντουλέ φαμιλιάτε, σαρέ τθεράσα ειρήνη ντα ισινάμ γιεκ, ντα καέκ νανέ πο οπρέ κατά γιαβερά. Ανταβά πακιάβας σαρί μι ζωή ότι ισί λατσσό ντα ανταβά μανγκάβας τι ντικχάβ.