Κάνα κα Κερέλ Κουμάντος η Βασιλεία ι Ντεβλέσκι κι Πφουβ;

ΚΑΛΑ ΠΡΑΓΜΑΤΑ ΒΑΚΕΡΝΤΑΣ Ο ΙΗΣΟΥΣ ΟΤΙ ΚΑ ΑΒΕΝΑΣ-ΠΕΣ;

Ο Ιησούς βακερντάς: «Κα τζαλ κόντρα τθεμ γιαβερέ τθεμέσαρ ντα βασιλεία γιαβερέ βασιλειάσαρ· ντα κα αβέν μπαρέ σεισμοί, ντα τθεμ τθεμέστε μποκχ ντα νασφαλίματα». (Λουκάς 21:​10, 11) Σαρέ ανταλά πράγματά ισί εκ σημάδι. Κάνα κα αβένας-πες κο ίδιος βακίτι σαρέ ανταλά πράγματα, κα αγαβάας ξεκάθαρα ότι «ερεσέλα η Βασιλεία ι Ντεβλέσκι». Αβιλέ-πες ασακέ πράγματα σαρό κο ντουνιάς κο ίδιος βακίτι; Ντικχέν ο πράγματα σο ισί πιο τελέ.

1. ΤΖΕΝΓΚΙΑ

Κο 1914, αρχισάλο εκ τζένγκι σο επηρεαντάς πιο μπουτ τζενέν ντα πιο μπουτ τθεμά σαρέ κατά γιαβερά τζένγκια σο αβιλέας-πες μέχρι αζομάν! Ο ιστορικοί μπουτ φαρ βακερένα ότι ο μπρες 1914 αλλαντάς ι τζενένγκι ιστορία, σόσκε αζομάν αρχισάλο ο πρώτος παγκόσμιος πόλεμος σο αβιλόας-πες ποτές. Οντουλέ τζενγκίστε χρησιμοποιηντέ τανκς, βόμβες, πολυβόλα, δηλητηριώδη αέρια ντα γιαβερά όπλα πιο μπουτ σαρέ κατά γιαβερά τζένγκια. Σοράν, κο δεύτερος παγκόσμιος πόλεμος, κερντέ ντα χρησιμοποιηντέ πρώτη φαρ ατομικά όπλα. Κατά 1914, ο τζενέ κερένα τζένγκια μπουτέ τθεμέντε, ντα ανταλέ τζενγκίντε μουλέ εκατομμύρια τζενέ.

2. ΣΕΙΣΜΟΙ

Κάθε μπρες αβένα περίπου 100 σεισμοί σο ισί μπουτ μπαρέ ντα κερένα «μπαρό ζιάνι», βακερέλα η Μπριτάνικα Ακαντέμικ (Britannica Academic). Ντα ο Οργανισμός Γεωλογικής Έρευνας των Ηνωμένων Πολιτειών βακερέλα ότι «σαρ σικαβένα ο στοιχεία σο γκιντίντιβενα μπουτ μπρεσά ακανά (περίπου κατά 1900), κάθε μπρες μπεκλεντίνασα τι αβέν-πες περίπου 16 μπαρέ σεισμοί». Μερικοί μπορεί τι βακερένα ότι να αβένα-πες πιο μπουτ σεισμοί, αλλά ότι ο τζενέ τθερένα πιο λατσσέ τρόπους για τι αρακχέν κάνα αβέλα-πες εκ σεισμός. Ισί μπαγιά όμως ότι, επειδή αβένα μπαρέ σεισμοί σαρό κο ντουνιάς, τθεράσα πιο μπουτ προβλήματα ντα μερένα πιο μπουτ τζενέ από ποτές.

3. ΜΠΟΚΧ

Ο τζένγκια, ο οικονομικά προβλήματα, ο ζιάνι σο αβέλα-πες κο χωράφια ντα γιαβερά πράγματα ανένα μποκχ σαρό κο ντουνιάς. Η «Ετήσια Έκθεση 2018» του Παγκόσμιου Προγράμματος Τροφίμων βακερέλα: «Σαρό κο ντουνιάς, 821 εκατομμύρια τζενέ μποκχάλιβενα, ο 124 εκατομμύρια λένταρ να τθερένα τι χαν τίποτα μπουτ ντιβεσά». Κατά μποκχ μερένα κάθε μπρες περίπου 3,1 εκατομμύρια χουρντέ, περίπου ο επκάς χουρντέ οντουλένταρ σο μουλέ σαρό κο ντουνιάς κο 2011.

4. ΝΑΣΦΑΛΙΜΑΤΑ (ΠΑΣΛΙΜΑΤΑ)

Εκ έντυπος κατά Παγκόσμιος Οργανισμός Υγείας βακερέλα: «Κατά μπρες 2001 τθεράας μπαρέ νασφαλίματα. Αβιλέ πάλι νασφαλίματα σο τθερένας ο τζενέ κο πουρανέ μπρεσά, σαρ ισί η χολέρα, η πανώλη ντα ο κίτρινος πυρετός, ντα αβιλέ νεβέ-ντα, σαρ ισί ο SARS, η πανδημική γρίπη, ο MERS, ο Έμπολα ντα ο Ζίκα». Ο πο νεβό νασφαλιπέ ισί ο Κορωνοϊός (COVID-19). Παρόλο σο ο επιστήμονες ντα ο γιατροί τζανένα μπουτ πράγματα, να αρακχλέ γιατρειά σαρέ ι νασφαλιματένγκε.

5. Ο ΛΑΤΣΣΕ ΑΜΠΕΡΙΑ ΒΑΚΕΡΝΤΙΒΕΝΑ ΣΑΡΟ ΚΟ ΝΤΟΥΝΙΑΣ

Ο Ιησούς βακερντάς ατζέκ εκ σημάδι: «Ανταλά λατσσέ αμπέρια ι Βασιλειάκε κα βακέρντιβεν σαρί κι πφουβ για τι ασουνέν-λεν σαρέ ο τθεμά, ντα αζομάν κα αβέλ ο τέλος». (Ματθαίος 24:​14) Παρόλο σο ο ντουνιάς τθερέλα μπαρέ προβλήματα, πιο μπουτ από οχτώ εκατομμύρια τζενέ σαρέ κατά τθεμά βακερένα ο λατσσέ αμπέρια ι Ντεβλέσκε Βασιλειάκε 240 τθεμέντε ντα 1.000 ντα πιο μπουτ τσσιμπέντε. Πρώτη φαρ αβέλα-πες κάτι ασακό.

ΣΟ ΜΑΝΓΚΕΛΑ ΤΙ ΒΑΚΕΡΕΛ Ο ΣΗΜΑΔΙ ΤΟΥΜΕΝΓΚΕ;

Ανταλά πράγματα σο βακερντάς ο Ιησούς ότι κα αβένας-πες αμαρέ ντιβεσέντε ισί ο σημάδι. Σόσκε ισί σημαντικά αμένγκε; Επειδή ο Ιησούς βακερντάς: «Κάνα κα ντικχέν τι αβέν-πες ανταλά, τι τζανέν ότι ερεσέλα η Βασιλεία ι Ντεβλέσκι».​—Λουκάς 21:31.

Ο λάφια ι Ιησούσκε ντα ο τρόπος σο γκινέλα η Γραφή ο μπρεσά βοηθίνενα-αμέν τι αγαβάς ότι ο Ντεβέλ αντάς πι Βασιλεία κο ουρανός κο μπρες 1914.a Αζομάν τσσουντάς πι Τσσαβές, ι Ιησού Χριστός, σαρ Βασιλιάς. (Ψαλμός 2:2, 4, 6-9) Ατζεχάνικ, η Βασιλεία ι Ντεβλέσκι κα κερέλ κουμάντος κι πφουβ, κα νασκιαρέλ σαρέ ο γιαβερά κυβερνήσεις ντα κα κερέλ ι πφουβ παράδεισος ι τζενένγκε για τι τζουβντιόν για πάντα.

Ατζεχάνικ, κα νικιόν μπαγιά ο λάφια σο σικλιαρντάς ο Ιησούς τι βακεράς κάνα προσευχίντιβασα: «Τι αβέλ τι Βασιλεία. Τι αβέλ οντουβά σο μανγκέσα, σαρ αβέλα-πες κο ουρανός, αντικάς τι αβέλ-πες οπράλ κι πφουβ-ντα». (Ματθαίος 6:​10) Αλλά σο κερέλα ανταγιά Βασιλεία κο ουρανός οτθάρ μπερί σο αρχισάλι τι κερέλ κουμάντος κο 1914; Καλά πράγματα μπεκλεντίνασα τι αβέν-πες κάνα κα κερέλ κουμάντος σαρέ ι τζενέν;