Σαρ τι Βοηθίνεν Γιαβερέν τι Κερέν Οντουλά σο Βακερντάς ο Χριστός

1. Σο βακερντάς ο Ιησούς πι μαθητένγκε τι κερέν σαρ βακερένα ο εδάφια Ματθαίος 28:​18-20;

ΚΑΝΑ ο Ιησούς ιστίντιλο κατά μουλέ, σικαντάς-πες πι μαθητένγκε σο γκιντισάλεας κι Γαλιλαία. Τθερέλας κάτι σημαντικός τι βακερέλ λένγκε. Σο; Λέσκε λάφια αρακχάσα-λεν κο εδάφια Ματθαίος 28:​18-20.​—Διαβάνεν.

2. Καλά ερωτήσεις κα ντικχάς;

² Η εντολή ι Ιησούσκι τι κεράς μαθητέν ισί σαρέ ι Ντεβλέσκε υπηρετόνγκε-ντα αντιβές. Οντουλέσκε, κα ντικχάς τριν ερωτήσεις σο τθερένα τι κερέν ανταλέσαρ σο βακερντάς αμένγκε ο Ιησούς. Πρώτον, σο γιαβέρ πρέπει τι κεράς κάνα σικλιαράσα ι νεβέ μαθητέν οντουλά σο μανγκέλα ο Ντεβέλ; Δεύτερον, σαρ μπορίνενα σαρέ ο πφραλά κι κχανγκιρί τι βοηθίνεν ι τζενέν σο κερένα μελέτη; Τρίτον, σαρ κα βοηθίνας ι πφραλέν σο ισί αδρανείς, δηλαδή οντουλέν σο τσσιναντέ τι τζαν κο έργος, τι αρχίνεν πάλι τι κερέν μαθητέν;

ΣΙΚΛΙΑΡΕΝ-ΛΕΝ ΤΙ ΚΕΡΕΝ ΟΝΤΟΥΛΑ ΣΟ ΒΑΚΕΡΝΤΑΣ Ο ΧΡΙΣΤΟΣ

3. Σο ακριβώς βακερντάς ο Ιησούς τι κεράς;

³ Ο λάφια ι Ιησούσκε ισί ξεκάθαρα. Πρέπει τι σικλιαράς ι τζενέν οντουλά σο βακερντάς. Όμως, πρέπει τι τθεράς αμαρέ γκοντιάτε κάτι σημαντικός. Ο Ιησούς να βακερντάς: “Σικλιαρέν-λεν σαρέ οντουλά σο βακερντόμ τουμένγκε”. Βακερντάς: «Σικλιαρέν-λεν τι κερέν σαρέ οντουλά σο βακερντόμ τουμένγκε». Για τι ντας καν κο λάφια κι Ιησούσκε, πρέπει εμ τι σικλιαράς ι τζενές σο τι κερέλ εμ τι σικαβάς λέσκε σαρ τι κερέλ-λες. (Πράξ. 8:​31) Σόσκε;

4. Σο μανγκέλα τι βακερέλ τι κεράς εκ εντολή; Βακερέν εκ παράδειγμας.

⁴ Τι «κεράς» εκ εντολή μανγκέλα τι βακερέλ τι ντας-λα καν. Ο παράδειγμας σο ισί πιο τελέ κα βοηθίνελ-αμέν τι αγαβάς σαρ τι σικλιαράς εκχέ τζενές τι κερέλ οντουλά σο βακερντάς ο Χριστός. Σαρ σικλιαρέλα εκ δάσκαλος οδήγησης πι μαθητέν τι ντεν καν κο νόμοι σο ισί κο ντρομ; Πρώτα, ο δάσκαλος σικλιαρέλα πι μαθητέν καλά ισί οντουλά νόμοι. Όμως, για τι σικλιαρέλ-λεν σαρ τι ντεν καν οντουλά νόμοι, πρέπει τι κερέλ κάτι γιαβέρ-ντα. Πρέπει τι τζαλ γιεκ πι μαθητέντζαρ ντα τι βοηθίνελ-λεν καζόμ οδηγίνενα ντα προσπαθίνενα τι κερέν οντουλά σο σικλιλέ. Σο σικλιάσα ανταλέ παραδειγμάσταρ;

5. (α) Σο πρέπει τι σικλιαράς ι τζενέν σο κεράσα-λεν μελέτη σαρ βακερένα ο εδάφια Ιωάννης 14:​15 ντα 1 Ιωάννη 2:​3; (β) Βακερέν παραδείγματα σο σικαβένα σαρ μπορίνασα τι βοηθίνας ι τζενέν σο κεράσα-λεν μελέτη τι κερέν οντουλά σο σικλιόνα.

⁵ Κάνα κεράσα μελέτη ι τζενέν, σικλιαράσα-λεν σο μανγκέλα αμένταρ ο Ντεβέλ. Αλλά να ερεσέλα σάντε ανταβά. Πρέπει τι σικλιαράς-λεν τι κερέν πουμαρέ ζωγιάτε οντουλά σο σικλιόνα. (Διαβάνεν Ιωάννης 14:​15· 1 Ιωάννη 2:3) Οντουλέντζαρ σο κεράσα, μπορίνασα τι σικαβάς λένγκε σαρ τι κερέν ο αλήθειες ι Γραφιάκε κάνα ισί κο σχολείος, κι μπουτί ή κάνα κερένα πράγματα για τι νακχέν λατσσές. Μπορίνασα τι βακεράς λένγκε κάτι σο αβιλό-πες αμένγκε για τι σικαβάς λένγκε σαρ αρακχαντέ-αμέν ο λάφια ι Γραφιάκε ή σαρ βοηθιντέ-αμέν τι λας εκ λατσσί απόφαση. Κάνα ισινάμ λέντζαρ, μπορίνασα τι κεράς προσευχή κο Ιεχωβά ντα τι μανγκάς λέσταρ τι σικαβέλ λένγκε πι άγιε πνευμάσαρ σο τι κερέν.​—Ιωάν. 16:13.

6. Σο γιαβέρ πρέπει τι κεράς κάνα σικλιαράσα γιαβερέν τι κερέν οντουλά σο βακερντάς ο Ιησούς;

⁶ Σο γιαβέρ πρέπει τι κεράς κάνα σικλιαράσα γιαβερέν τι κερέν οντουλά σο βακερντάς ο Ιησούς; Πρέπει τι βοηθίνας ι τζενέν σο κεράσα-λεν μελέτη τι μανγκέν τι κερέν μαθητέν. Μερικοί οντουλέ τζενένταρ σο κερένα μελέτη μπορεί τι νταρένα τι νικιόν κο έργος. Οτθάρ, πρέπει τι κεράς υπομονή καζόμ βοηθίνασα-λεν τι αγαβέν πιο λατσσές ο αλήθειες ι Γραφιάκε, τι τσσουβέν-λεν πουμαρέ γκίστε ντα σοράν τι μανγκέν τι κερέν έργος. Σαρ κα βοηθίνας ι τζενέν σο κεράσα-λεν μελέτη τι μανγκέν τι βακερέν ο λατσσέ αμπέρια κο γιαβερά;

7. Σαρ κα βοηθίνας ι τζενές σο κεράσα-λες μελέτη τι μανγκέλ τι βακερέλ ο λατσσέ αμπέρια;

⁷ Κα μπορίναας τι πουτσάς ι τζενές σο κεράσα-λες μελέτη: «Σαρ αβιλί πιο λατσσί τι ζωή επειδή κερέσα οντουλά σο σικλιόσα κατά Γραφή; Πακιάσα ότι γιαβερά-ντα τθερένα ανάγκη τι σικλιόν-λεν; Σαρ μπορίνεσα τι βοηθίνες-λεν;» (Παρ. 3:​27· Ματθ. 9:​37, 38) Σικαβέν ι τζενέσκε ο φυλλάδια σο ισί κο Εργαλεία για τι Σικλιαράς ντα μουκχέν-λες τι τραμπίνελ οντουλά σο πακιάλα ότι κα μανγκένας τι διαβάνεν λέσκε τζενέ, λέσκε αμαλά ή ο τζενέ σο κερέλα λέντζαρ μπουτί. Ντεν κο τζενό σο κερένα-λες μελέτη μερικέ οντουλέ φυλλαδιόνταρ. Κερέν λέσαρ πρόβες για τι ντικχέλ σαρ τι ντελ εκ φυλλάδιος εκχέ λατσσέ τροπόσαρ. Ντα κάνα ο τζενό κα αβέλ μπίμπολντο ευαγγελιζόμενος, κα αβέλ λατσσό τι νικιάς λέσαρ κο έργος για τι βοηθίνας-λες.​—Εκκλ. 4:9, 10· Λουκ. 6:40.

ΣΑΡ ΒΟΗΘΙΝΕΛΑ Η ΚΧΑΝΓΚΙΡΙ Ι ΤΖΕΝΕΝ ΣΟ ΚΕΡΕΝΑ ΜΕΛΕΤΗ

8. Σόσκε ο τζενέ σο κεράσα-λεν μελέτη πρέπει τι μπαριαρέν πουμαρί αγάπη ι Ντεβλέσκε ντα ι τζενένγκε; (Ντικχέν ο πλαίσιος-ντα «Σαρ τι Βοηθίνας ι Τζενέν τι Μανγκέν πιο Μπουτ ι Ντεβλές»)

⁸ Ντεν-τουμέν γκοντί ότι ο Ιησούς βακερντάς αμένγκε τι σικλιαράς ι γιαβερέν «τι κερέν σαρέ οντουλά» σο βακερντάς. Αντρέ ανταλέ πραγματέντε ισί ο ντούι πιο μπαρέ εντολές​—τι μανγκάς ι Ντεβλές ντα ι τζενέν. Ανταλά ντούι εντολές ισί μπουτ σημαντικές κο έργος σο κεράσα για τι βακεράς ντα τι σικλιαράς ο λατσσέ αμπέρια. (Ματθ. 22:​37-39) Σόσκε; Οντουβά σο τσσίντελα-αμέν πιο μπουτ τι κεράς έργος ισί ότι μανγκάσα ι Ντεβλές ντα ι τζενέν. Αγαβάσα ότι μερικά τζενέ σο κερένα μελέτη νταρένα σάντε σο νακχέλα λένγκε γκοντιάταρ ότι πρέπει τι νικιόν κο έργος. Αλλά μπορίνασα τι βακεράς λένγκε ότι ο Ιεχωβά κα βοηθίνελ-λεν σιγά σιγά τι νασκιαρέν ι νταρ σο τθερένα κατά τζενέ. (Ψαλμ. 18:​1-3· Παρ. 29:​25) Ο πλαίσιος σο ισί ανταλέ μαθημάστε βακερέλα σο μπορίνασα τι κεράς για τι βοηθίνας ι τζενέν σο κεράσα-λεν μελέτη τι μπαριαρέν πουμαρί αγάπη ι Ντεβλέσκε. Αλλά σαρ κα βοηθίνελ η κχανγκιρί ι τζενέν σο κερένα μελέτη τι σικαβέν πιο μπουτ αγάπη;

9. Σαρ σικλιόλα σημαντικά πράγματα εκ τζενό σο σικλιόλα τι οδηγίνελ;

⁹ Ανέν πάλι τουμαρέ γκοντιάτε ο παράδειγμας ι τζενέσαρ σο σικλιόλα τι οδηγίνελ. Σαρ σικλιόλα καζόμ οδηγίνελα ντα τθερέλα πασέ πέστε πι δασκαλός; Ασουνέλα πι δασκαλός ντα ντικχέλα γιαβερέ τζενέν σο οδηγίνενα προσεκτικά. Για παράδειγμας, ο δάσκαλος μπορεί τι σικαβέλ λέσκε εκχέ οδηγός σο μουκχέλα λατσσιμάσαρ εκχέ γιαβερές τι νακχέλ. Ή μπορεί τι σικαβέλ λέσκε εκχέ οδηγός σο γκίντελα πο φώτα για μα τι κοριαρέλ ι γιαβερέν. Ασακέ παραδείγματα σικλιαρένα-λες σημαντικά πράγματα σο μπορίνελα τι κερέλ κάνα οδηγίνελα.

10. Σο κα βοηθίνελ εκχέ τζενές σο κερέλα μελέτη τι αβέλ μαθητής ι Χριστόσκο;

¹⁰ Αντικάς εκ τζενό-ντα σο κερέλα μελέτη ντα τσσουβέλα-πες κο ντρομ σο γκερέλα κι ζωή σικλιόλα όχι σάντε οντουλέσταρ σο κερέλα-λες μελέτη αλλά κατά λατσσέ παραδείγματα γιαβερένγκε-ντα σο υπηρετίνενα ι Ιεχωβάς. Άρα, καβά πράγμας κα βοηθίνελ-λες μπουτ τι αβέλ μαθητής ι Χριστόσκο; Αμαρέ συναθροίσεις. Σόσκε; Οντουλά σο κα ασουνέλ κο συναθροίσεις κα βοηθίνεν-λες τι σικλιόλ πιο μπουτ πράγματα, τι κερέλ πι πίστη πιο ζουρανί ντα τι μπαριαρέλ πι αγάπη ι Ντεβλέσκε. (Πράξ. 15:​30-32) Επίσης, κο συναθροίσεις ο πφραλ σο κερέλα-λες μελέτη μπορίνελα τι γκερέλ-λες τι κερέλ λάφι πφραλέντζαρ ντα πφενίντζαρ σο μοιάζενα λέσαρ μπουτέ πραγματέντε. Καλά παραδείγματα πφραλένγκε ντα πφενίνγκε σο σικαβένα αγάπη κα ντικχέλ αντρέ κι κχανγκιρί ο τζενό σο κερέλα μελέτη; Ντικχέν ο παραδείγματα σο ισί πιο τελέ.

11. Καλά παραδείγματα μπορεί τι ντικχέλ αντρέ κι κχανγκιρί εκ τζενό σο κερέλα μελέτη, ντα σαρ κα βοηθίντιβελ ανταλένταρ;

¹¹ Εκ τζουβέλ σο κερέλα μελέτη ντα μπαριαρέλα κορκορί πι τσσαβέν ντικχέλα εκχέ πφενιά σο μπαριαρέλα βόι-ντα κορκορί πι τσσαβέν. Βοηθίντιβελα μπουτ σο ντικχέλα καζόμ μπουτ μαρέλα-πες η πφεν για τι αβέλ κι Αίθουσα Βασιλείας πι χουρντέ μαξιμίντζαρ. Εκ μουρς σο κερέλα μελέτη ντα μαρέλα-πες τι τσσιναβέλ ι τσιγάρα γνωρίνελα εκχέ πφραλές σο πίλας τσιγάρα αλλά τσσιναντάς-λα. Ο πφραλ βακερέλα λέσκε ότι καζόμ πιο μπουτ μπαριόλας λέσκι αγάπη ι Ιεχωβάσκε αζόμ πιο μπουτ μανγκέλας τι ντελ καν Λέσκε λαφίντε. (2 Κορ. 7:1· Φιλιπ. 4:​13) Αφού ο πφραλ πουτρέλα ι τζενέσκε σαρ τσσιναντάς ι τσιγάρα, βακερέλα λέσκε: «Μπορίνεσα τούι-ντα τι τσσιναβές-λα». Ο τζενό σο κερέλα μελέτη λέλα ζορ ντα πακιάλα ότι μπορίνελα τι τσσιναβέλ ι τσιγάρα. Εκ τερνί σο κερέλα μελέτη ντικχέλα εκχέ τερνέ πφενιά τι αβέλ μπουτ χαρούμενη σο ισί Μάρτυρας ι Ιεχωβάσκι. Κάνα ντικχέλα καζόμ χαρούμενη ισί η τερνί πφεν, μανγκέλα τι σικλιόλ πιο λατσσές σόσκε η πφεν ισί πάντα χαρούμενη.

12. Σόσκε βακεράσα ότι ο κάθε εκ αντρέ κι κχανγκιρί μπορίνελα τι βοηθίνελ ι τζενέν σο κερένα μελέτη;

¹² Κάνα ο τζενέ σο κερένα μελέτη γνωρίνενα μπερεκέτι πιστέ πφραλέν ντα πφενίν, σικλιόνα λένγκε παραδειγμάσταρ σαρ τι κερέν ι εντολή ι Χριστόσκι τι μανγκάς ι Ντεβλές ντα ι τζενέν. (Ιωάν. 13:​35· 1 Τιμ. 4:​12) Επίσης, σαρ ντικχλάμ, εκ τζενό σο κερέλα μελέτη σικλιόλα πφραλένταρ ντα πφενίνταρ σο τθερένας ο ίδιες δυσκολίες σο τθερέλα βοβ-ντα. Ασακέ παραδείγματα σικλιαρένα-λες ότι μπορίνελα τι κερέλ ο αλλαγές σο πρέπει τι κερέλ για τι αβέλ μαθητής ι Χριστόσκο. (Δευτ. 30:​11) Ο κάθε εκ αντρέ κι κχανγκιρί μπορίνελα τι βοηθίνελ μπουτέ τροπόντζαρ ι τζενέν σο κερένα μελέτη. (Ματθ. 5:​16) Τουμέν, σο κερένα για τι ντεν ζορ ι τζενέν σο αβένα κο συναθροίσεις;

ΒΟΗΘΙΝΕΝ ΟΝΤΟΥΛΕΝ ΣΟ ΙΣΙ ΑΔΡΑΝΕΙΣ ΤΙ ΚΕΡΕΝ ΠΑΛΙ ΕΡΓΟΣ

13, 14. Σο κερντάς ο Ιησούς κάνα λέσκε μαθητές χασαρντέας πουμαρί ζορ;

¹³ Μανγκάσα τι βοηθίνας ι πφραλέν ντα ι πφενίν σο ισί αδρανείς τι κερέν πάλι μαθητέν, σαρ μανγκλάς αμένταρ ο Χριστός. Οντουλά σο κερντάς ο Ιησούς πι αποστολόνγκε κάνα χασαρντέας πουμαρί ζορ σικαβένα σο τι κεράς αμέν-ντα αντιβές.

¹⁴ Χάνικ πριν τι μερέλ ο Ιησούς, σαρέ ο απόστολοι «μουκχλέ-λες ντα νασλέ». (Μάρκ. 14:​50· Ιωάν. 16:​32) Σο κερντάς ο Ιησούς κάνα λέσκε απόστολοι χασαρντέας πουμαρί ζορ; Κάνα ο Ιησούς ιστίντιλο κατά μουλέ, βακερντάς μερικέ μαθητένγκε: «Μα νταρέν! Τζαν, βακερέν . . . μι πφραλένγκε [ότι ιστίντιλομ κατά μουλέ]». (Ματθ. 28:​10α) Ο Ιησούς να μουκχλάς πι μαθητέν. Παρόλο σο βον μουκχλέας-λες, βοβ βακερντάς ότι ισινέ λέσκε “πφραλά”. Σαρ ο Ιεχωβά, αντικάς ο Ιησούς-ντα σικαβέλας έλεος ντα συγχωρίνελας.​—2 Βασ. 13:23.

15. Σαρ ντικχάσα οντουλέν σο τσσιναντέ τι νικιόν κο έργος;

¹⁵ Αντικάς αμέν-ντα, πφαμπάσα μπουτ οντουλένγκε σο τσσιναντέ τι νικιόν κο έργος. Ισί αμαρέ πφραλά ντα πφενιά, ντα μανγκάσα-λεν! Ατζέκ ατζέκ ανάσα αμαρέ γκοντιάτε ο πράγματα σο κερντέ μανγκιμάσαρ οντουλά πφραλά ντα πφενιά, μερικοί λένταρ μπουτ μπρεσά. (Εβρ. 6:​10) Σικλιντίνασα λένγκε μπουτ! (Λουκ. 15:​4-7) Σαρ ο Ιησούς, σαρ κα σικαβάς ότι πφαμπάσα λένγκε;

16. Σαρ κα σικαβάς ότι πφαμπάσα αμαρέ πφραλένγκε ντα πφενίνγκε σο ισί αδρανείς;

¹⁶ Καλίνεν-λεν αντράλ τουμαρέ γκίσταρ κο συναθροίσεις. Εκ πράγμας σο κερντάς ο Ιησούς για τι ντελ ζορ πι αποστολόν ισινέ ότι βακερντάς λένγκε τι γκιντίντιβεν εκχέ τθανέστε για τι κερέλ λέντζαρ λάφι. (Ματθ. 28:​10β· 1 Κορ. 15:6) Αντικάς αμέν-ντα αντιβές, μπορίνασα τι βακεράς οντουλένγκε σο ισί αδρανείς τι αβέν κο συναθροίσεις άμα να αβένα. Τζανάσα ότι μπορεί τι χρειαζίντιβελ τι καλίνας-λεν μπουτ φαρ μέχρι τι αβέν. Σίγουρα, αβιλό ι Ιησούσκο γκι κάνα λέσκε μαθητές γκιντισάλε οτθέ σο βακερντάας λένγκε.​—Ντικχέν Ματθαίος 28:​16 ντα Λουκάς 15:6.

17. Σο πρέπει τι κεράς κάνα εκ αδρανής αβέλα κι συνάθροιση;

¹⁷ Καλωσορίνεν-λεν αντράλ τουμαρέ γκίσταρ. Ο Ιησούς κερντάς πι μαθητέν τι νιωθίνεν λατσσές κάνα γκιλό λέντε. Γκιλό πρώτα βοβ τι κερέλ λέντζαρ λάφι. (Ματθ. 28:​18) Σο κα κεράς αμέν κάνα εκ αδρανής κα αβέλ κι Αίθουσα Βασιλείας; Πρέπει τι τζας πρώτα αμέν τι καλωσορίνας-λες αντράλ αμαρέ γκίσταρ. Κι αρχή, μπορεί τι νταράσα ότι να κα τζανάς σο τι βακεράς. Αλλά χωρίς τι ανάς-λες σε δύσκολη θέση, μπορίνασα σάντε τι βακεράς λέσκε καζόμ χαρούμενοι ισινάμ σο ντικχάσα-λες.

18. Σαρ κα ντας ζορ οντουλέν σο ισί αδρανείς;

¹⁸ Ντεν-λεν ζορ. Ο μαθητές ι Ιησούσκε μάλλον πακιάνας ότι ναστί κα κερένας έργος σαρό κο ντουνιάς. Για τι ντελ-λεν ζορ, ο Ιησούς βακερντάς λένγκε: «Με ισινόμ τουμέντζαρ σαρέ ο ντιβεσά». (Ματθ. 28:​20) Βοηθιντάς-λεν ανταβά; Βα. Χάνικ βακίτι πιο σοράν, αρχισάλε «τι σικλιαρέν ντα τι βακερέν ο λατσσέ αμπέρια». (Πράξ. 5:​42) Ο αδρανείς-ντα μανγκένα ζορ. Μπορεί τι νταρένα τι νικιόν πάλι κο έργος. Μπορίνασα τι βακεράς λένγκε ότι να κα κερέν έργος κορκορέ. Κάνα ισί έτοιμοι, μπορίνασα τι τζας λέντζαρ κο έργος. Σίγουρα, κα εκτιμίνεν αμαρί βοήθεια καζόμ κα αρχίνεν τι βακερέν πάλι ο λατσσέ αμπέρια. Άμα σικαβάσα οντουλένγκε σο ισί αδρανείς ότι ντικχάσα-λεν σαρ αμαρέ πφραλά ντα πφενιά, μπορεί τι αρχίνεν τι κερέν πράγματα σο κα ντεν χαρά σαρί κι κχανγκιρί.

ΜΑΝΓΚΑΣΑ ΤΙ ΤΕΛΕΙΩΝΑΣ Ο ΕΡΓΟΣ ΣΟ ΝΤΙΝΑΣ-ΑΜΕΝ Ο ΙΗΣΟΥΣ

19. Σο μανγκάσα αντράλ αμαρέ γκίσταρ, ντα σόσκε;

¹⁹ Μέχρι κάνα κα κεράς μαθητέν; Μέχρι κο τέλος ανταλέ ντουνιάσκο. (Ματθ. 28:​20· ντικχέν Γλωσσάριο, «Τελική περίοδος του συστήματος πραγμάτων») Κα νταϊντίνας τι κεράς έργος μέχρι αζομάν; Μανγκάσα τι νταϊντίνας! Ντάσα χαράσαρ αμαρέ σαατίσταρ, αμαρέ ζοριάταρ ντα αμαρέ λοβένταρ για τι αρακχάς οντουλέν σο “λένγκο γκι μανγκέλα τι σικλιόλ ι αλήθεια σο ντέλα ζωή για πάντα”. (Πράξ. 13:​48) Κάνα κεράσα-λες ανταβά, κεράσα οντουβά σο κερέλας ο Ιησούς. Βοβ βακερντάς: «Μο χαμπέ ισί τι κεράβ ο θέλημας οντουλέσκο σο μπουτσσαντάς-μαν ντα τι τελειώναβ λέσκο έργος». (Ιωάν. 4:​34· 17:4) Αμέν-ντα μανγκάσα-λες ανταβά αντράλ αμαρέ γκίσταρ. Μανγκάσα τι τελειώνας ο έργος σο ντινάς-αμέν ο Ιησούς. (Ιωάν. 20:​21) Ντα μανγκάσα γιαβερά-ντα, εμ οντουλά σο ισί αδρανείς, τι νταϊντίνεν αμέντζαρ ανταλέ εργόστε.​—Ματθ. 24:13.

20. Σόσκε μπορίνασα τι κεράς ο έργος σο ο Ιησούς βακερντάς αμένγκε τι κεράς σαρ βακερέλα ο εδάφιος Φιλιππησίους 4:13;

²⁰ Τζανάσα ότι νανέ εύκολος τι κεράς οντουβά σο βακερντάς αμένγκε ο Ιησούς. Όμως, να κεράσα κορκορέ ανταβά έργος. Ο Ιησούς ντινάς πο λάφι ότι κα αβέλ αμέντζαρ. Καζόμ κεράσα μαθητέν, ισινάμ «συνεργάτες ι Ντεβλέσκε» ντα κεράσα έργος «γιεκ ι Χριστόσαρ». (1 Κορ. 3:9· 2 Κορ. 2:​17) Οτθάρ, μπορίνασα τι κεράς-λες. Σο προνόμιος ντα σο μπαρί χαρά ισί τι κεράς ανταβά έργος ντα τι βοηθίνας γιαβερέν-ντα τι κερέν-λες!​—Διαβάνεν Φιλιππησίους 4:13.