Σαρ τι Βοηθίντιβεν πο Μπουτ Κατά Διάβασμας ι Γραφιάκο

1. Σο σικαβέλα ότι ι Ιησούσκε ισινέ σημαντικές ο Γραφές;

ΑΝΕΝ τουμαρέ γκοντιάτε σαρ ισινέ τι ασουνέλ εκ τζενό ι Ιησούς τι σικλιαρέλ. Μπουτ φαρ βακερέλας εδάφια κατά Γραφές σο τζανέλας-λεν αβριάλ! Ο πρώτα λάφια σο ισί γραμμέ ντα βακερντάς-λεν σοράν πι μπολντιμάσταρ ντα μερικά κατά τελευταία λάφια σο βακερντάς πριν πι μεριμάσταρ, ισινέ κατά Γραφές.b (Δευτ. 8:3· Ψαλμ. 31:5· Λουκ. 4:4· 23:​46) Κο τριν επκάς μπρεσά σοράν πι μπολντιμάσταρ, ο Ιησούς διαβάνελας μπουτ φαρ ανγκλάλ κο τζενέ ο Γραφές, κερέλας λάφι λένταρ ντα εξηγίνελας-λεν.​—Ματθ. 5:​17, 18, 21, 22, 27, 28· Λουκ. 4:​16-20.

2. Καζόμ ο Ιησούς μπαριόλας, σο βοηθιντάς-λες τι σικλιόλ λατσσές ο Γραφές; (Ντικχέν ι φωτογραφία κι ανγκλαϊνί σελίδα)

² Μπουτ μπρεσά πριν τι αρχίνελ πο έργος, ο Ιησούς διαβάνελας ντα ασουνέλας ο Λάφι ι Ντεβλέσκο μπουτ φαρ. Κο κχερ, σίγουρα ασουνέλας ι Μαριά ντα ι Ιωσηφίς τι βακερέν λάφια κατά Γραφές αβριάλ κο συζητήσεις σο κερένας κάθε ντιβές σαρ φαμιλί.c (Δευτ. 6:6, 7) Μπορίνασα τι αβάς σίγουροι ότι ο Ιησούς τζάλας κι συναγωγή κάθε Σάββατος πι φαμιλιάσαρ. (Λουκ. 4:​16) Οτθέ, πρέπει τι ασουνέλας προσεκτικά κάνα διαβάντιβελας η Γραφή. Πο σοράν, ο Ιησούς σικλιλό τι διαβάνελ βοβ-ντα οντουλά άγια λάφια κατά Γραφές. Αντικάς, όχι σάντε σικλιλό λατσσές ο Γραφές, αλλά επίσης μανγκέλας-λεν ντα μουκχέλας-λεν τι επηρεάνεν οντουλά σο κερέλας. Για παράδειγμας, ντεν-τουμέν γκοντί σο αβιλό-πες κο ναός κάνα ο Ιησούς ισινέ 12 μπρεσένγκο. Ο δάσκαλοι σο τζανένας μπουτ λατσσές ο Μωσαϊκός Νόμος «σαστίνενας οντουλένταρ σο αγαβέλας ντα κατά απαντήσεις σο ντέλας».​—Λουκ. 2:​46, 47, 52.

3. Σο κα ντικχάς ανταλέ μαθημάστε;

³ Μπορίνασα αμέν-ντα τι σικλιάς ντα τι μανγκάς ο Λάφι ι Ντεβλέσκο άμα κα διαβάνας κάθε ντιβές ι Γραφή. Αλλά σαρ μπορίνασα τι βοηθίντιβας καζόμ πο μπουτ αβέλα-πες οντουλένταρ σο διαβάνασα; Μπορίνασα τι σικλιάς κατά λάφια σο βακερντάς ο Ιησούς τζενέντε σο τζανένας ο Νόμος, σαρ ισινέ ο γραμματείς, ο Φαρισαίοι ντα ο Σαδδουκαίοι. Οντουλά παπάζια διαβάνενας μπουτ φαρ ο Γραφές, αλλά να βοηθίντιβενας οντουλένταρ σο διαβάνενας. Ο Ιησούς σικαντάς τριν λόγους σο αβέλας-πες ανταβά. Λέσκε λάφια κα βοηθίνεν-αμέν τι αβάς πο λατσσέ ακαλέ τρινέ πραγματέντε: (1) τι αγαβάς οντουλά σο διαβάνασα, (2) τι αρακχάς θησαυρούς ντα (3) τι μουκχάς ο Λάφι ι Ντεβλέσκο τι αλλάνελ-αμέν.

ΤΙ ΔΙΑΒΑΝΕΝ ΓΙΑ ΤΙ ΑΓΑΒΕΝ

4. Σο σικλιαρένα-αμέν ο εδάφια Λουκάς 10:​25-29 για το διάβασμας ι Γραφιάκο;

⁴ Χρειαζίντιβελα τι αγαβάς σο μανγκένα τι βακερέν οντουλά σο διαβάνασα κο Λάφι κι Ντεβλέσκο. Αλλιώς, μπέκιμ αμαρό διάβασμας μα τι βοηθίνελ-αμέν μπουτ. Σκεφτίνεν για παράδειγμας ι συζήτηση ι Ιησούσκι “εκχέ τζενέσαρ σο τζανέλας ο Νόμος”. (Διαβάνεν Λουκάς 10:​25-29) Κάνα οντουβά τζενό πουτσλάς σο χρειαζίντιβελας τι κερέλ για τι τθερέλ ζωή για πάντα, ο Ιησούς γκερντάς λέσκι προσοχή κο Λάφι κι Ντεβλέσκο ντα πουτσλάς-λες: «Σο ισί γραμμέ κο Νόμος; Σο διαβάνεσα;» Βοβ μπορισάλο τι ντελ ι σωστή απάντηση κατά εδάφια σο βακερένα ότι πρέπει τι μανγκάς ι Ντεβλές ντα ι τζενές σο ισί πασέ αμέντε. (Λευιτ. 19:​18· Δευτ. 6:5) Τσσουβέν σημασία όμως σο βακερντάς σοράν: «Ντα κον ισί ο τζενό σο ισί πασέ μάντε;» Ανταλέ λαφίντζαρ, σικαντάς ότι να αγαβέλας μπαγιά σο μανγκένας τι βακερέν οντουλά σο διαβαντάς. Οτθάρ, να τζανέλας σαρ τι κερέλ πι ζωγιάτε σωστά ανταλά εδάφια.

5. Σαρ κα βοηθίντιβας άμα κα προσευχίντιβας ντα κα διαβάνας πφαρές;

⁵ Μπορίνασα τι αγαβάς πο λατσσές ο Λάφι ι Ντεβλέσκο άμα κα τθεράς εκ λατσσό πρόγραμμας για τι διαβάνας. Ντικχέν χάνικ λατσσέ συμβουλές. Τι προσευχίντιβεν πριν τι αρχίνεν τι διαβάνεν. Χρειαζίντιβασα ι Ιεχωβάσκι βοήθεια για τι αγαβάς ι Γραφή. Οτθάρ, μπορίνασα τι μανγκάς λέσκο άγιος πνεύμας για μα τι πφιρέλ αμαρί γκοντί. Σοράν, τι διαβάνεν πφαρές. Ανταβά κα βοηθίνελ-τουμέν τι αγαβέν οντουβά σο διαβάνενα. Μπέκιμ τι βοηθίνελ-τουμέν τι διαβάνεν ζουρανές ή τι ντικχέν τουμαρέ Γραφιάταρ καζόμ ασουνένα ι ηχογράφηση ι Γραφιάκι. Άμα κα ασουνέν ο λάφια κι ηχογράφηση ντα κα ντικχέν-λεν τουμαρέ γιακχίντζαρ, ανταβά κα βοηθίνελ-τουμέν τι αγαβέν, τι ντεν-τουμέν γκοντί ντα τι σικλιόν πο μπουτ πράγματα κατά Λάφι ι Ντεβλέσκο. (Ιησ. Ναυή 1:8) Κάνα κα μπιτισκιαρέν τουμαρό διάβασμας, προσευχίντιβεν πάλι για τι ευχαριστίνεν ι Ιεχωβάς σο ντινάς-τουμέν πο Λάφι σαρ δώρος ντα για τι μανγκέν λέσταρ τι βοηθίνελ-τουμέν τι κερέν οντουλά σο διαβαντέν.

6. Σόσκε μπορίνενα ο ερωτήσεις ντα ο χουρντέ σημειώσεις τι βοηθίνεν-τουμέν καζόμ διαβάνενα; (Ντικχέν ι φωτογραφία-ντα)

⁶ Ντικχέν ατζέκ ντούι πράγματα σο κα βοηθίνεν-τουμέν τι αγαβέν πο λατσσές ι Γραφή. Πουτσέν-τουμέν ι πραγματένγκε σο διαβάνενα εκχέ ιστοριάτε: “Καλέ τζενέσκι ιστορία βακερέλα; Κον κερέλα λάφι; Κάσκε κερέλα λάφι, ντα σόσκε; Κάι ντα κάνα αβένα-πες ανταλά;” Ασακέ ερωτήσεις κα βοηθίνεν-τουμέν τι σκεφτίνεν ντα τι αγαβέν ο σημαντικά σημεία ι ιστοριάκε. Επίσης, κερέν χουρντέ σημειώσεις καζόμ διαβάνενα. Κάνα γραφίνενα, κερντικιαρένα τουμαρό νεαυτός τι κερέλ τουμαρέ σκέψεις λάφια, ντα ανταβά βοηθίνελα-τουμέν τι τσσουβέν-λεν σε εκ σειράς. Επίσης, κάνα γραφίνενα ισί πο εύκολος τι ντεν-τουμέν γκοντί οντουλά σο διαβάνενα. Κα μπορίνενας τι γραφίνεν μερικές ερωτήσεις, οντουλά σο αρακχλέν τουμαρέ ροντιμάσταρ, ο σημαντικά σημεία ντα σαρ μπορίνενα τι χρησιμοποιήνεν οντουλά σο διαβαντέν ή απλώς τι γραφίνεν σαρ νιωθίνενα. Μπορεί τι αγαβέν ότι ανταλά σημειώσεις κα βοηθίνεν-τουμέν τι ντικχέν ι Ντεβλέσκο Λάφι σαρ εκ γράμμας σο γραφιντάς ο Ντεβέλ τουμένγκε.

7. Σο πρέπει τι κεράς καζόμ διαβάνασα, ντα σόσκε; (Ματθαίος 24:15)

⁷ Ο Ιησούς σικαντάς ότι για τι αγαβάς οντουλά σο διαβάνασα κο Λάφι κι Ντεβλέσκο χρειαζίντιβελα τι σκεφτίνας-λεν προσεκτικά. (Διαβάνεν Ματθαίος 24:​15) Σαρ μπορίνασα τι κεράς-λες ανταβά; Πρέπει τι σκεφτίνας προσεκτικά σο σχέση τθερέλα εκ πράγμας εκχέ γιαβερέσαρ ντα σο διαφορές τθερέλα κάτι εκχέ γιαβερέσταρ, ντα τι ντικχάς οντουβά σο να ντικχιόλα εύκολα. Επίσης, ο Ιησούς σικαντάς ότι χρειαζίντιβελα τι σκεφτίνας προσεκτικά εμ για τι αγαβάς καλά πράγματα κερένα ο προφητείες ι Γραφιάκε τι νικιόν μπαγιά εμ για τι βοηθίντιβας καζόμ πο μπουτ αβέλα-πες σαρέ οντουλένταρ σο διαβάνασα κι Γραφή.

8. Σαρ μπορίνασα τι σκεφτίνας προσεκτικά οντουλά σο διαβάνασα;

⁸ Ο Ιεχωβά βοηθίνελα πι υπηρετόν τι σκεφτίνεν προσεκτικά. Οτθάρ, προσευχίντιβεν λέστε ντα μανγκέν λέσταρ τι βοηθίνελ-τουμέν τι κερέν-λες ανταβά. (Παρ. 2:6) Σαρ μπορίνενα τι κερέν πράγματα σο συμφωνίνενα τουμαρέ προσευχιάσαρ; Κάνα διαβάνενα εκ μέρος ι Γραφιάκο, κερέν-λες ανταβά προσεκτικά ντα ντικχέν σο σχέση τθερέλα γιαβερέ πραγματέντζαρ σο τζανένα. Ρόντεν κο εργαλεία σο βοηθίνενα-αμέν τι αγαβάς ι Γραφή, σαρ ισί ο Οδηγός Έρευνας για τους Μάρτυρες του Ιεχωβά. Ανταλά εργαλεία κα βοηθίνεν-τουμέν τι αγαβέν σο μανγκέλα τι βακερέλ εκ ιστορία ι Γραφιάκι ντα τι ντικχέν σαρ μπορίνενα τι κερέν οντουλά σο σικλιλέν τουμαρέ ζωγιάτε. (Εβρ. 5:​14) Κάνα σκεφτίνενα προσεκτικά οντουλά σο διαβάνενα, κα αγαβέν ατζέ πο μπουτ ι Γραφή.

ΤΙ ΔΙΑΒΑΝΕΝ ΓΙΑ ΤΙ ΑΡΑΚΧΕΝ ΘΗΣΑΥΡΟΥΣ

9. Καγιά σημαντική αλήθεια ι Γραφιάκι να δεχτίνενας ο Σαδδουκαίοι;

⁹ Ο Σαδδουκαίοι τζανένας μπουτ λατσσές ο πρώτα παντς βιβλία κατά Εβραϊκές Γραφές, αλλά να δεχτίνενας σημαντικές αλήθειες σο ισινέ οντουλέ βιβλιόντε. Για παράδειγμας, ντικχέν σο βακερντάς ο Ιησούς κάνα ο Σαδδουκαίοι πουτσλέ-λες σο κα αβέλ-πες ι μουλέντζαρ. Πουτσλάς-λεν: «Να διαβαντέν κο βιβλίος κι Μωυσίσκο, κι ιστορία ι θαμνόσκι, ότι ο Ντεβέλ βακερντάς λέσκε: “Με ισινόμ ο Ντεβέλ ι Αβρααμίσκο ντα ο Ντεβέλ ι Ισαακίσκο ντα ο Ντεβέλ ι Ιακωβίσκο”;» (Μάρκ. 12:​18, 26) Παρόλο σο ο Σαδδουκαίοι σίγουρα διαβαντέας οντιά ιστορία μπουτ φαρ, η ερώτηση ι Ιησούσκι σικαντάς ότι να δεχτιντέας εκ σημαντική αλήθεια ι Γραφιάκι: ότι κα τζουβντιόν ο μουλέ.​—Μάρκ. 12:​27· Λουκ. 20:​38.d

10. Καλά πράγματα πρέπει τι αβάς τζανγκαντέ τι αρακχάς καζόμ διαβάνασα;

¹⁰ Σο μπορίνασα τι σικλιάς; Κάνα διαβάνασα χρειαζίντιβελα τι αβάς τζανγκαντέ για τι αρακχάς σαρέ οντουλά σο μπορίνελα τι σικλιαρέλ-αμέν εκ εδάφιος ή εκ ιστορία ι Γραφιάκι. Πρέπει τι αγαβάς, όχι σάντε ο βασικές αλήθειες αλλά εμ ο πο αχόρτ αλήθειες σο ισί γκεραντέ σαρ τι βακεράας.

11. Σαρ μπορίνενα τι αρακχέν θησαυρούς κι Γραφή σαρ σικαβένα ο εδάφια 2 Τιμόθεο 3:​16, 17;

¹¹ Σαρ μπορίνενα τι αρακχέν θησαυρούς κάνα διαβάνενα ι Γραφή; Σκεφτίνεν σο βακερένα ο εδάφια 2 Τιμόθεο 3:​16, 17. (Διαβάνεν) Ανταλά εδάφια βακερένα ότι «σαρί η Γραφή . . . ισί λατσσί» (1) για τι σικλιαρέλ-αμέν, (2) για τι ντελ-αμέν συμβουλές, (3) για τι τσσουβάς σε εκ σειράς ο πράγματα ντα (4) για τι διορθώνελ-αμέν. Μπορίνενα τι βοηθίντιβεν ανταλέ σταρέ τροπόντζαρ ατζέ-ντα κατά βιβλία ι Γραφιάκε σο να διαβάνενα αζόμ μπουτ φαρ. Ροντέν κι ιστορία για τι αγαβέν σο σικλιαρέλα-τουμέν ι Ιεχωβάσκε, λέσκε σκοπόσκε ντα για το αρχές λέσκε. Σκεφτίνεν σαρ κερέλα αμένγκε λατσσιπέ κάνα ντέλα-αμέν συμβουλές. Μπορίνενα τι κερέν-λες ανταβά άμα κα ντικχέν σαρ ανταλά εδάφια βοηθίνενα-τουμέν τι αρακχέν ντα τι νασκιαρέν ο μπέτι πράγματα σο ταρτίνενα-τουμέν ή ο γκεραλέ σκέψεις ντα τι ατσσόν πιστοί. Ντικχέν σαρ μπορίνενα τι χρησιμοποιήνεν ανταγιά ιστορία για τι τσσουβέν σε εκ σειράς ο πράγματα, ή γιαβέρτουλους τι διορθώνεν εκ λάθος άποψη, σο μπέκιμ βακερντάς εκ τζενό κο έργος. Ντα τι ρόντεν κο εδάφια ι διόρθωση σο κα σικλιαρέλ-τουμέν τι ντικχέν ο πράγματα σαρ ο Ιεχωβά. Άμα τθερένα τουμαρέ γκοντιάτε ανταλά σταρ λατσσίματα, κα αρακχέν θησαυρούς σο κα κερέν πο σουκάρ ο διάβασμας ι Γραφιάκο.

ΤΙ ΜΟΥΚΧΕΝ ΟΝΤΟΥΛΑ ΣΟ ΔΙΑΒΑΝΕΝΑ ΤΙ ΑΛΛΑΝΕΝ-ΤΟΥΜΕΝ

12. Σόσκε ο Ιησούς πουτσλάς ι Φαρισαιόν: «Να διαβαντέν;»

¹² Ο Ιησούς κερντάς επίσης ι ερώτηση: «Να διαβαντέν;» για τι σικαβέλ ότι ο Φαρισαίοι να ντικχένας ι Γραφή σωστέ τροπόσαρ. (Ματθ. 12:​1-7)e Αζομάν ο Φαρισαίοι βακερντέ ότι ο μαθητές ι Ιησούσκε να ντινέ καν κο νόμος κι Σαββατόσκο. Ο Ιησούς βακερντάς λένγκε ντούι παραδείγματα κατά Γραφή ντα εκ εδάφιος κατά Ωσηέ για τι σικαβέλ ότι ο Φαρισαίοι να αγαβένας σο μανγκέλας τι βακερέλ ο νόμος ι Σαββατόσκο, να τζιτζίνενας ι γιαβερένγκε ντα να συγχωρίνενας-λεν. Σόσκε οντουλά τζενέ να μουκχένας ο Λάφι ι Ντεβλέσκο τι αλλάνελ-λεν; Επειδή διαβάνενας-λες μπαρικανιμάσαρ ντα μανγκένας τι κρίνεν. Ανταβά να μουκχέλας-λεν τι αγαβέν οντουλά σο διαβάνενας.​—Ματθ. 23:​23· Ιωάν. 5:​39, 40.

13. Σαρ πρέπει τι διαβάνας ι Γραφή, ντα σόσκε;

¹³ Κατά λάφια ι Ιησούσκε σικλιάσα ότι κάνα διαβάνασα ι Γραφή δεν πρέπει τι αβάς σαρ ο Φαρισαίοι αλλά τι αβάς ταπεινοί ντα τι μανγκάς τι σικλιάς. Πρέπει τι αβάς “κοβλέ γκίσκε ντα τι μουκχάς ι Ντεβλές τι φυτίνελ πο λάφια αμαρέ γκίστε”. (Ιακ. 1:​21) Άμα κα αβάς κοβλέ γκίσκε, κα μουκχάς ι Ντεβλέσκο Λάφι τι ασταρέλ ρίζες αμαρέ γκίστε. Η Γραφή σικλιαρέλα-αμέν τι τζιτζίνας ι γιαβερένγκε, τι πφαμπάς λένγκε ντα τι μανγκάς-λεν. Σάντε άμα να κρίνασα ντα να ισινάμ μπαρικανέ η Γραφή κα αλλάνελ-αμέν.

14. Σαρ ντικχίντιβελα άμα μουκχάσα ι Γραφή τι αλλάνελ-αμέν; (Ντικχέν ο φωτογραφίες-ντα)

¹⁴ Ο τρόπος σο συμπεριφερίντιβασα κο γιαβερά μπορεί τι σικαβέλ άμα μουκχάσα ι Ντεβλέσκο Λάφι τι αλλάνελ-αμέν. Ο Φαρισαίοι να μουκχένας ι Ντεβλέσκο Λάφι τι ερεσέλ λένγκε γκίστε, οτθάρ “καταδικάνενας οντουλέν σο να φταίνενας”. (Ματθ. 12:7) Αντικάς-ντα, ο τρόπος σο ντικχάσα ι γιαβερέν ντα αμαρί συμπεριφορά λέντε σικαβένα άμα μουκχάσα ι Ντεβλέσκο Λάφι τι αλλάνελ-αμέν. Για παράδειγμας, ισινάμ σικλέ τι βακεράς ο λατσσέ πράγματα σο τθερένα ο γιαβερά; Ή μήπως σιγκιαράσα τι ντικχάς πρώτα ο μπέτι χούγια σο τθερένα ο γιαβερά; Τζιτζίνασα ι γιαβερένγκε ντα μανγκάσα τι συγχωρίνας-λεν; Ή μήπως κρίνασα-λεν ντα ατσσικιαράσα χολί λένγκε; Αμαρέ απαντήσεις ανταλέ ερωτησιέντε, μπορίνενα τι σικαβέν άμα μουκχάσα οντουλά σο διαβάνασα τι επηρεάνεν οντουλά σο σκεφτίνασα, σο νιωθίνασα ντα κεράσα.​—1 Τιμ. 4:​12, 15· Εβρ. 4:12.

ΔΙΑΒΑΣΜΑΣ ΣΟ ΚΕΡΕΛΑ-ΑΜΕΝ ΕΥΤΥΧΙΣΜΕ

15. Σαρ νιωθίνελας ο Ιησούς για το Γραφές;

¹⁵ Ο Ιησούς μανγκέλας ο Γραφές ντα ο αισθήματα λέσκε βακέρντιλεας κο λάφια κι εδαφιόσκε Ψαλμός 40:8: «Χαιρίναβα μπουτ, Ντέβλα μου, τι κεράβ οντουβά σο μανγκέσα, ντα το νόμος ισί ντιπ αντρέ μι γκίστε». Αντικάς τθερέλας ευτυχία ντα επιτυχία κι υπηρεσία κι Ιεχωβάσκι. Μπορίνασα αμέν-ντα τι τθεράς ευτυχία ντα επιτυχία άμα κεράσα ο πο λατσσό για τι τσσουβάς ι Ντεβλέσκο Λάφι αμαρέ γκίστε.​—Ψαλμ. 1:​1-3.

16. Σαρ κα βοηθίντιβεν ατζέ πο μπουτ κατά διάβασμας ι Ντεβλέσκε Λαφίσκο; (Ντικχέν ο πλαίσιος «Ο Λάφια ι Ιησούσκε κα Βοηθίνεν-τουμέν τι Αγαβέν Οντουλά σο Διαβάνενα»)

¹⁶ Οντουλά σο βακερντάς ντα σικαντάς ο Ιησούς, τσσίντενα-αμέν τι κεράς ατζέ πο λατσσές ο διάβασμας ι Γραφιάκο. Μπορίνασα τι αγαβάς πο λατσσές ο ιστορίες ι Γραφιάκε άμα προσευχίντιβασα, διαβάνασα πφαρές, κεράσα ερωτήσεις ντα ατσσικιαράσα χουρντέ σημειώσεις. Μπορίνασα τι ρόντας προσεκτικά οντουλά σο διαβάνασα αντράλ κατά εκδόσεις αμαρέ. Μπορίνασα τι σικλιάς τι χρησιμοποιήνας πο λατσσές ι Γραφή, ατζέ-ντα ιστορίες σο να τζανάσα αζόμ λατσσές, άμα ρόντασα τι αρακχάς θησαυρούς ανταλέ ιστοριέντε. Ντα μπορίνασα τι μουκχάς ο Λάφι ι Ντεβλέσκο τι αλλάνελ-αμέν άμα ατσσικιαράσα κοβλό αμαρό γκι καζόμ διαβάνασα. Άμα προσπαθίνασα τι κεράς ανταλά συμβουλές, κα βοηθίντιβας ατζέ πο μπουτ κατά διάβασμας ι Γραφιάκο ντα κα αβάς ατζέ πο πασέ κο Ιεχωβά.​—Ψαλμ. 119:​17, 18· Ιακ. 4:8.