Εκ Λαός Κατά Βορράς Αβέλα τι Κερέλ Τζένγκι!

1. Σαρ σικλιαρέλας-πες ο πφραλ Ρώσσελ ντα οντουλά σο ισινέ λέσαρ, ντα σόσκε ισινέ λατσσό ανταβά τρόπος;

ΝΑΚΧΛΕ σελ ντα πιο μπουτ μπρεσά οτθάρ μπερί σο ο πφραλ Κάρολος Τ. Ρώσσελ ντα χάνικ γιαβερά τζενέ σο ισινέ λέσαρ αρχισάλε τι γκιντίντιβεν γιεκ για τι ρόντεν κο Λάφι κι Ντεβλέσκο. Μανγκένας τι σικλιόν σο βακερέλα μπαγιά η Αγία Γραφή ι Ιεχωβά Ντεβλέσκε, ι Ιησού Χριστόσκε, ι μουλένγκε ντα για το λύτρος. Ο τρόπος σο σικλιαρένας-πες ισινέ απλός. Εκ τζενό πουτσέλας ντα σοράν σαρέ ντικχένας κάθε εδάφιος σο τθερέλας τι κερέλ οντουλέ θεμάσαρ. Σοράν, γραφίνενας σο αρακχένας. Ο Ιεχωβά κερντάς οντουλέ Χριστιανόν τι αγαβέν μπουτ σημαντικές αλήθειες κατά Γραφή σο ατζέκ ατζέκ τθερένα μπαρί αξία.

2. Κάνα ντικχάσα εκ προφητεία κατά Γραφή, σο μπορεί τι κερέλ-αμέν τι αγαβάς λάθος πράγματα;

² Αλλά μπουτ σουγκό ο σπουδαστές ι Γραφιάκε αγαντέ ότι γιαβέρ ισί τι σικλιόλ εκ τζενό σο σικλιαρέλα η Γραφή ντα γιαβέρ τι αγαβέλ σο μανγκέλα τι βακερέλ μπαγιά εκ προφητεία. Σόσκε; Εκ λόγος ισί ότι μπουτ φαρ αγαβάσα πιο λατσσές ο προφητείες ι Γραφιάκε κο βακίτι σο νικιόνα μπαγιά ή κάνα κα νακχέλ οντουβά βακίτι. Τθεράσα όμως εκ γιαβέρ-ντα λόγος. Για τι αγαβάς λατσσές εκ προφητεία, πρέπει τι ντικχάς-λα σαρί. Άμα κα ντικχάς σάντε χάνικ λάφια κατά προφητεία ντα να κα ντικχάς σαρέ ο λάφια, μπορεί τι αγαβάς λάθος πράγματα. Σαρ ντικχίντιβελα, ανταβά αβιλό-πες εκχέ προφητειάσαρ κατά βιβλίος Ιωήλ. Κα ντικχάς πάλι οντιά προφητεία ντα κα σικλιάς σόσκε πρέπει τι αβέλ-πες εκ αλλαγή κο τρόπος σο αγαβάσα-λα.

3, 4. Σο πακιάας μπουτ μπρεσά ι προφητειάκε σο ισί κο εδάφια Ιωήλ 2:​7-9;

³ Διαβάνεν Ιωήλ 2:​7-9. Ο Ιωήλ βακερέλα ότι γκραστά, δηλαδή ακρίδες κα κερέν καταστροφή ι Ισραηλιτένγκο τθεμ. Οντουλά λιμαμέ έντομα, σο τθερένα ντανά ντα τσενιές σαρ ι λιονταρίσκε, κα χαν σο-ντα αρακχένα ανγκλά-πουμέντε. (Ιωήλ 1:4, 6) Μπουτ μπρεσά βακεράας ότι ανταγιά προφητεία σικαβέλας ότι ι Ιεχωβάσκο λαός κα κερέλας ο έργος σαρ οντουλά γκραστά σο ισί σαρέ γιεκ ντα ναστί τσσιναβέλα-λεν καέκ. Βακεράας ότι οντουβά έργος κερέλα καταστροφή ο «τθεμ», ή γιαβέρτουλους ι τζενέν σο κερένα-λεν κουμάντος ο παπάζια.b

⁴ Ανταβά ντικχίντιβελα σωστός άμα κα διαβάναας σάντε ο εδάφια Ιωήλ 2:​7-9. Αλλά κάνα ντικχάσα σαρί ι προφητεία, αγαβάσα-λα πιο λατσσές. Ντικχέν σταρ πράγματα οπράλ ανταλέστε.

ΣΤΑΡ ΠΡΑΓΜΑΤΑ ΓΙΑ ΤΙ ΑΓΑΒΑΣ ΠΙΟ ΛΑΤΣΣΕΣ Ι ΠΡΟΦΗΤΕΙΑ

5, 6. Καγιά ερώτηση αβέλα αμένγκε κάνα ντικχάσα ο εδάφιος (α) Ιωήλ 2:​20; (β) Ιωήλ 2:25;

⁵ Πρώτα, ντικχέν ι υπόσχεση σο ντέλα ο Ιεχωβά: «Κα νασκιαράβ ντουρ τουμένταρ οντουλές σο ισί κατά βορράς [ι γκραστέν]». (Ιωήλ 2:​20) Άμα ανταλά γκραστά ισί ο Μάρτυρες ι Ιεχωβάσκε σο ντένα καν κι εντολή κι Ιησούσκι τι βακερέν ο λατσσέ αμπέρια ντα τι κερέν μαθητέν, σόσκε ντέλα πο λάφι ο Ιεχωβά τι νασκιαρέλ-λεν ντουρ; (Ιεζ. 33:​7-9· Ματθ. 28:​19, 20) Αγαβάσα μπουτ λατσσές ότι ο Ιεχωβά να νασκιαρέλα πι πιστέ υπηρετόν αλλά κάτι ή εκχές σο τζάλα κόντρα λέσκε λαόσαρ.

⁶ Ο δεύτερος πράγμας ισί κο εδάφιος Ιωήλ 2:​25. Οτθέ ο Ιεχωβά βακερέλα: «Κα νταβ-τουμέν παλάλ οντουλά σο χασαρντέν κο μπρεσά σο χάνας τουμαρέ τθανά ο γκραστά σο ιριάνα σαρέ γιεκ, ο γκραστά σο ισί μπι-πακένγκε, ο λιμαμέ γκραστά ντα ο γκραστά σο να τσαλιόνα, μο μπαρό στρατός σο μπουτσσαντόμ τουμένγκε». Ντικχέν ότι ο Ιεχωβά βακερέλα ότι “κα ντελ παλάλ” κο τζενέ οντουλά σο καταστραφιντέ ο γκραστά. Άμα ανταλά γκραστά ισί ο τζενέ σο κερένα λάφι ι Βασιλειάκε, ανταβά κα σικαβέλας ότι λένγκε λάφια ανένα καταστροφή. Όμως, ανταλά λάφια σώνενα ι τζενέν ντα κερένα μερικέ πφιρνέν τι μετανιώνεν. (Ιεζ. 33:8, 19) Ανταβά κα αβέλας μπουτ λατσσό λένγκε!

7. Σο μανγκένα τι βακερέν ο λάφια «σοράν ανταλέσταρ» κο εδάφια Ιωήλ 2:​28, 29;

⁷ Διαβάνεν Ιωήλ 2:​28, 29. Ντικχέν ο τρίτος πράγμας: καλέ σειράσαρ αβένα-πες ο πράγματα κι προφητεία. Ο Ιεχωβά βακερέλα: «Σοράν ανταλέσταρ, κα μπουτσσαβάβ μο πνεύμας», δηλαδή κάνα ο γκραστά κα κερέν σαρί πουμαρί μπουτί. Άμα ο γκραστά ισί οντουλά σο κερένα λάφι ι Ντεβλέσκε Βασιλειάκε, σόσκε τι μπουτσσαβέλ λένγκε ο Ιεχωβά πο πνεύμας σοράν λένγκε εργόσταρ; Ο τζενέ τζάνα λέντζαρ κόντρα ή ατζέ-ντα να μουκχένα-λεν τι κερέν έργος, οντουλέσκε άμα να κα τθερένας ο μπουτ ζουρανό άγιος πνεύμας ι Ντεβλέσκο, ναστί κα κερένας ο έργος αζόμ μπρεσά.

8. Κας μανγκένα τι σικαβέν ο γκραστά σο ισί κο εδάφια Αποκάλυψη 9:​1-11; (Ντικχέν ι φωτογραφία κι ανγκλαϊνί σελίδα)

⁸ Διαβάνεν Αποκάλυψη 9:​1-11. Ακανά κα ντικχάς ο τέταρτος πράγμας. Ανγκλέ βακεράας ότι η καταστροφή σο ανένας ο γκραστά κο βιβλίος Ιωήλ μανγκέλας τι σικαβέλ ο έργος. Ανταβά βακεράας-λες σόσκε κι Αποκάλυψη αρακχάσα εκ γιαβέρ προφητεία σο μοιάζελα οντουλάσαρ σο ισί κο βιβλίος Ιωήλ. Η προφητεία κι Αποκάλυψη βακερέλα μπουτέ γκραστένγκε σο τθερένα τζενένγκε μουγιά ντα οπράλ λένγκε σορέντε “ντικχίντιβελα ότι τθερένα χρυσά στέμματα”. (Αποκ. 9:7) Τσσιντικιαρένα μπουτ πράγματα “ι τζενέν [ι Ντεβλέσκε ντουσμανίν] σο να τθερένα ι Ντεβλέσκι σφραγίδα πουμαρέ τσικατέντε”. Κερένα-λες ανταβά παντς μάσεκ, περίπου καζόμ τζουβντιόλα εκ ασακό γκρας. (Αποκ. 9:4, 5) Ανταλά εδάφια κερένα λάφι ι Ιεχωβάσκε υπηρετόνγκε σο ισί χρισμέ. Βον βακερένα μπίνταρανες σο κα κερέλ ο Ντεβέλ ανταλέ πφιρνέ ντουνιάς, ντα ανταβά να μπεϊντίνενα-λες ιτς οντουλά σο τσσίντενα ανταλέ ντουνιάσταρ.

9. Καλά μπαρέ διαφορές τθερένα ο γκραστά σο ντικχλάς ο Ιωήλ οντουλένταρ σο ντικχλάς ο Ιωάννης;

⁹ Σίγουρα κάποια πράγματα κι προφητεία σο ισί κι Αποκάλυψη μοιάζενα ι προφητειάσαρ σο γραφιντάς ο Ιωήλ. Αλλά τθερένα μπαρέ διαφορές-ντα. Σκεφτίνεν: Κο βιβλίος Ιωήλ, ο γκραστά χάνα σαρέ ο φυτά. (Ιωήλ 1:4, 6, 7) Κι φαντασία κι Ιωαννίσκι, βακέρντιβελα κο γκραστά «μα τι κερέν ζιάνι κο φυτά κι πφουβιάκε». (Αποκ. 9:4) Ο γκραστά σο ντικχλάς ο Ιωήλ αβιλέ κατά βορράς. (Ιωήλ 2:​20) Οντουλά σο ντικχλάς ο Ιωάννης νικίστιλε κατά άβυσσος. (Αποκ. 9:2, 3) Ο γκραστά σο ντικχλάς ο Ιωήλ παλντίντιβενα ντουρ. Κι Αποκάλυψη, να παλντίντιβενα ντουρ αλλά μουκχένα-λεν τι κερέν σαρί πουμαρί μπουτί. Τίποτα κι Γραφή να σικαβέλα ότι να κερντέ οντουβά σο μανγκέλα ο Ιεχωβά.​—Ντικχέν ο πλαίσιος «Προφητείες σο Κερένα Λάφι Γκραστένγκε​—Μοιάζενα Αλλά Ισί Διαφορετικές».

10. Σόσκε βακεράσα ότι ο γκραστά σο ντικχλάς ο Ιωήλ να μανγκένα τι σικαβέν ο ίδιος πράγμας οντουλέντζαρ σο ισί κι Αποκάλυψη;

¹⁰ Ο μπαρέ διαφορές σο τθερένα ανταλά ντούι προφητείες ντένα-αμέν τι αγαβάς ότι να τθερένα σχέση η εκ ι γιαβεράσαρ. Μανγκέλα τι βακερέλ ανταβά ότι ο γκραστά σο ντικχλάς ο Ιωήλ νανέ ίδια οντουλέντζαρ σο ισί κι Αποκάλυψη; Βα. Μπάζιμα κι Γραφή, εκ λάφι σο ισί γραμμέ εκχέ εδαφιόστε τθερέλα γιαβέρ σημασία κάνα αρακχάσα-λες εκχέ γιαβερέ εδαφιόστε. Για παράδειγμας, κο εδάφιος Αποκάλυψη 5:5, ο Ιησούς βακέρντιβελα «ο Λιοντάρι κατά φάρα του Ιούδα», αλλά κο εδάφιος 1 Πέτρου 5:8, ο Μπενγκ βακέρντιβελα «μποκχαλό λιοντάρι». Ο σταρ πράγματα σο ντικχλάμ σικαβένα αμένγκε ότι πρέπει τι αλλάνας ο τρόπος σο αγαβάσα ι προφητεία σο γραφιντάς ο Ιωήλ. Σαρ πρέπει τι αγαβάς-λα;

ΣΟ ΜΑΝΓΚΕΛΑ ΤΙ ΒΑΚΕΡΕΛ;

11. Καλά πράγματα κατά εδάφια Ιωήλ 1:6 ντα 2:1, 8, 11 ντένα-αμέν τι αγαβάς κον ισί ο γκραστά;

¹¹ Άμα κα ντικχάς γιαβερά-ντα εδάφια κατά προφητεία σο γραφιντάς ο Ιωήλ, αγαβάσα ότι ο προφήτης κερέλας λάφι τζενένγκε σο κα αβένας τζενγκίσκε. (Ιωήλ 1:6· 2:1, 8, 11) Ο Ιεχωβά βακερντάς ότι κα τσσουβέλας “πι μπαρέ στρατός” (ι στρατός σο τθερέλας η Βαβυλώνα) για τι τιμωρίνελ ι Ισραηλιτέν σο να ντινέ καν. (Ιωήλ 2:​25) Ο στρατός βακέρντιβελα σωστά “οντουβά σο ισί κατά βορράς” σόσκε ο Βαβυλώνιοι κα τσσουβένας-πες κο Ισραήλ κατά βορράς. (Ιωήλ 2:​20) Οντουβά στρατός ισί σαρ μπουτ γκραστά σο τζάνα σαρέ γιεκ ντα ισί λατσσές οργανωμέ. Ο Ιωήλ βακερέλα: «Ο κάθε εκ [κατά στρατιώτες] τσσίντελα πι ντρομέστε. . . . Τζάνα ούρια αντρέ κι πόλη, τθάβντενα οπράλ κο βουτσσέ ντουβάρια. Νικλίνα κο κχερά, τσσουβένα-πες κατά παράθυρα σαρ ο τσορ». (Ιωήλ 2:8, 9) Μπορίνενα τι ανέν-λες ανταβά τουμαρέ γκοντιάτε; Κάι-ντα τι ντικχέν, ισί στρατιώτες. Ο τζενέ να τθερένα κάι τι γκεραβέν-πες. Καέκ ναστί νασέλα κατά Βαβυλωνιόνγκο σπαθίς!

12. Σαρ νικίστιλι μπαγιά η προφητεία ι γκραστένγκι σο γραφιντάς ο Ιωήλ;

¹² Σαρ γκραστά, ο Βαβυλώνιοι (ή γιαβέρτουλους ο Χαλδαίοι) τσσουντέ-πες κι Ιερουσαλήμ κο 607 Π.Κ.Χ. Η Γραφή βακερέλα: «Ι Χαλδαιόνγκο βασιλιάς, σο μουνταρντάς λένγκε τερνέν σπαθίσαρ . . . , να τζιτζισάλο τερνέσκε ή τσσαγιάκε, πφουρέσκε ή μπίζουρανε τζενέσκε. Ο Ντεβέλ ντινάς-λεν σαρέ λέσκε βαστέστε. Τσσουντάς γιακ κο κχερ κι αληθινέ Ντεβλέσκο, περαντάς ο βουτσσέ ντουβάρια κι Ιερουσαλήμ, πφαμπαρντάς σαρέ λάκε πύργοι ντα καταστραφιντάς σο-ντα τθερέλας αξία». (2 Χρον. 36:​17, 19) Κάνα ο Βαβυλώνιοι τσσουντέ-πες κο τθεμ ντα κατα-στραφιντέ-λες, ο τζενέ βακερένας: «Ισί τσουτσό τθεμ, να τθερέλα τζενέν ντα ζώα, ντα ντιντιλό κο Χαλδαίοι».​—Ιερ. 32:43.

13. Σο μανγκένα τι βακερέν ο εδάφια Ιερεμίας 16:​16, 18;

¹³ Περίπου 200 μπρεσά σοράν κατά προφητεία σο γραφιντάς ο Ιωήλ, ο Ιεχωβά τσσουντάς ι Ιερεμιάς τι βακερέλ κάτι γιαβέρ-ντα σο τθερέλας τι κερέλ οντουλέντζαρ σο κα αβένας τζενγκίσκε. Βακερντάς ότι οντουλά σο κα αβένας κα ρόντενας μπουτ λατσσές τι αρακχέν ι Ισραηλιτέν σο κερένας μπέτι πράγματα ντα κα ασταρένας-λεν σαριλέν. «“Με ανάβα μπουτέ τζενέν σο ασταρένα ματσσέν”, βακερέλα ο Ιεχωβά “ντα βον κα ασταρέν-λεν σαρ ματσσέ. Σοράν κα ανάβ μπουτέ τζενέν σο κουλαντίνενα ζώα, ντα βον κα κουλαντίνεν-λεν σαρέ κο μπαρέ ντα κο χουρντέ βεσά ντα κο γούρνες κι βεσένγκε. . . . Κα νταβ-λεν παλάλ σαρί ι τιμωρία σο αξίνενα πουμαρέ λαθίσκε ντα πουμαρέ αμαρτιάκε”». Ούτε ο ντεριαβά ούτε ο βεσά ναστί κα γκεραβένας οντουλέ Ισραηλιτέν κατά Βαβυλώνιοι.​—Ιερ. 16:​16, 18.

Ο ΠΡΑΓΜΑΤΑ ΚΑ ΑΒΕΝ ΣΑΡ ΙΣΙΝΕ

14. Κάνα νικίστιλε μπαγιά ο εδάφια Ιωήλ 2:​28, 29;

¹⁴ Αλλά ο Ιωήλ βακερέλα λατσσέ αμπέρια, ο πράγματα κα αβέν σαρ ισινέ. Η πφουβ κα νικαβέλ πάλι μπουτ πράγματα. (Ιωήλ 2:​23-26) Ντα σοράν κα αβέλ εκ βακίτι σο μπουτ τζενέ κα σικλιόν ι Ντεβλέσκε. «Κα μπουτσσαβάβ μο πνεύμας σαβέ τι μανγκές τζενένγκε», βακερέλα ο Ιεχωβά, «ντα τουμαρέ τσσαβέ ντα τουμαρέ τσσαγιά κα βακερέν προφητείες . . . Ατζέ-ντα κο δούλοι ντα κο δούλες σο τθεράβα κα μπουτσσαβάβ μο πνεύμας». (Ιωήλ 2:​28, 29) Ανταβά να αβιλό-πες κάνα ο Ισραηλίτες βουρτισάλε πουμαρέ τθεμέστε. Αβιλό-πες μπουτ μπρεσά πιο σοράν, κι Πεντηκοστή κο μπρες 33 Κ.Χ. Σαρ τζανάσα-λες ανταβά;

15. Σαρ βακερένα ο εδάφια Πράξεις 2:​16, 17, καγιά αλλαγή κερντάς ο Πέτρος κάνα βακερντάς ο εδάφιος Ιωήλ 2:​28, ντα σο σικαβέλα ανταβά;

¹⁵ Ι Ντεβλέσκε πνευμάσαρ, ο απόστολος Πέτρος βακερντάς ότι ο εδάφια Ιωήλ 2:​28, 29 νικίστιλε μπαγιά κάνα αβιλό-πες εκ μπουτ μπαρό πράγμας κι Πεντηκοστή. Περίπου εννιά ο σαάτι ντισάρα, ο Ντεβέλ μπουτσσαντάς πο πνεύμας, ντα οντουλά σο λιντέ-λες αρχισάλε τι κερέν λάφι «ι Ντεβλέσκε μπαρέ πραγματένγκε». (Πράξ. 2:​11) Ι Ντεβλέσκε πνευμάσαρ, ο Πέτρος κερντάς εκ χουρντί αλλαγή κάνα κερντάς λάφι αντράλ κατά προφητεία σο γραφιντάς ο Ιωήλ. Ντικχλέν καγιά ισινέ ανταγιά; (Διαβάνεν Πράξεις 2:​16, 17) Ο Πέτρος να βακερντάς ο λάφια «σοράν ανταλέσταρ» σαρ βακερέλα κο βιβλίος Ιωήλ, αλλά βακερντάς «κο τελευταία ντιβεσά». Ατθέ ο Πέτρος κερέλας λάφι ι ντιβεσένγκε χάνικ πριν τι καταστραφίντιβελ η Ιερουσαλήμ ντα λάκο ναός. Αζομάν ο Ντεβέλ κα μπουτσσαβέλας πο πνεύμας «σαβέ τι μανγκές τζενένγκε». Ανταβά σικαβέλα ότι νακχλέας μπουτ μπρεσά μέχρι τι νικιόλ μπαγιά η προφητεία σο γραφιντάς ο Ιωήλ.

16. Σο κερντάς ι Ντεβλέσκο πνεύμας κο έργος σοράν κατά Πεντηκοστή, ντα σο αβέλα-πες αντιβές;

¹⁶ Σοράν κατά Πεντηκοστή, σο μπουτσσαντάς ο Ντεβέλ πο πνεύμας, ο έργος μπαριλό μπουτ. Κάνα ο απόστολος Παύλος γραφιντάς πι επιστολή κο Κολοσσαείς, πασέ κο 61 Κ.Χ., βακερντάς ότι ο λατσσέ αμπέρια βακέρντιβενας «σαρί κι δημιουργία σο ισί τελάλ κατά ουρανός». (Κολ. 1:​23) Κο ντιβεσά κι Παυλόσκε, ο λάφι “σαρί η δημιουργία” μανγκέλας τι σικαβέλ σαρέ ο τθανά σο τζανένας ο τζενέ αζομάν. Ι Ιεχωβάσκε μπουτ ζουρανέ πνευμάσαρ, ο έργος μπαριλό ατζέ πιο μπουτ αμαρέ ντιβεσέντε, ερεσλό «σαρί κι πφουβ»!​—Πράξ. 13:​47· ντικχέν ο πλαίσιος «Κα Μπουτσσαβάβ μο Πνεύμας».

ΣΟ ΑΛΛΑΞΑΛΟ;

17. Σαρ αγαβάσα ακανά ι προφητεία κο βιβλίος Ιωήλ σο κερέλα λάφι ι γκραστένγκε;

¹⁷ Σο αλλαξάλο; Ακανά αγαβάσα ατζέ πιο λατσσές ι προφητεία σο ισί κο εδάφια Ιωήλ 2:​7-9. Χάνικ λαφίντζαρ, ανταλά εδάφια να βακερένα ι εργόσκε σο κεράσα αντράλ αμαρέ γκίσταρ αλλά οντουλένγκε σο κερντάς ι Βαβυλωνιόνγκο στρατός σο τσσουντάς-πες κι Ιερουσαλήμ κο 607 Π.Κ.Χ.

18. Σο να αλλαξάλο ι Ιεχωβάσκε λαόσκε;

¹⁸ Σο να αλλαξάλο; Ι Ιεχωβάσκο λαός να τσσιναβέλα τι βακερέλ ο λατσσέ αμπέρια κάι-ντα τι αβέλ, ντα κερέλα σο νακχέλα λέσκε βαστέσταρ για τι κερέλ-λες ανταβά. (Ματθ. 24:​14) Σο-ντα όρια κα τσσουβέλ η κυβέρνηση, ναστί κα τσσιναβέλ-αμέν τι βακεράς ο λατσσέ αμπέρια. Ο Ιεχωβά βοηθίνελα-αμέν, οτθάρ κεράσα πιο μπουτ μπουτί σαρέ κατά μπρεσά σο νακχλέ για τι βακεράς μπίνταρανες ο λατσσέ αμπέρια ι Βασιλειάκε! Μανγκάσα ταπεινά κατά Ιεχωβά τι ντελ-αμέν τι αγαβάς ο προφητείες ι Γραφιάκε σόσκε ισινάμ σίγουροι ότι, κάνα κα αβέλ ο βακίτι, βοβ κα γκερέλ-αμέν «σαρί κι αλήθεια»!​—Ιωάν. 16:13.