“Άμα Τθερένα Συνέχεια Τουμαρέ Γκοντιάτε ο Πνεύμας, ο Αποτέλεσμας κα Αβέλ Ζωή ντα Ειρήνη”

1, 2. Σόσκε ο χρισμέ Χριστιανοί ενδιαφερίντιβενα για το κεφάλαιος 8 κατά επιστολή Ρωμαίους;

ΜΠΟΡΕΙ τι διαβαντέν ο εδάφια Ρωμαίους 8:​15-17 κο ντιβεσά πριν τι αβέλ-πες η Ανάμνηση για το μεριπέ ι Ιησούσκο. Ανταλά εδάφια σικαβένα σαρ τζανένα ο χρισμέ Χριστιανοί ότι τθερένα ι ελπίδα τι τζουβντιόν για πάντα κο ουρανός. Ο Ρωμαίους 8:1 βακερέλα ότι ο χρισμέ «ισί γιεκ ι Χριστόσαρ». Όμως μήπως ο κεφάλαιος 8 κατά επιστολή Ρωμαίους ισί σάντε για το χρισμέ; Ή μπορίνελα τι βοηθίνελ οντουλέν-ντα σο τθερένα ι ελπίδα τι τζουβντιόν για πάντα κι πφουβ;

² Ο κεφάλαιος 8 κατά επιστολή Ρωμαίους γραφισάλο πιο μπουτ για το χρισμέ. Βον λένα «ο πνεύμας» ντα «μπεκλεντίνενα ι υιοθεσία, τι ελευθερώντιβεν πουμαρέ σωμάσταρ». (Ρωμαίους 8:​23) Κο μέλλον, κα αβέν τσσαβέ ι Ντεβλέσκε κο ουρανός. Ο Ιεχωβά συγχωριντάς λένγκε αμαρτίες επειδή ντινάς ο λύτρος. Βον βακέρντιλε δίκαιοι για τι μπορίνεν τι αβέν λέσκε τσσαβέ.​—Ρωμαίους 3:​23-26· 4:​25· 8:30.

3. Σόσκε πρέπει οντουλά-ντα σο τθερένα ι ελπίδα τι τζουβντιόν για πάντα κι πφουβ τι διαβάνεν ο κεφάλαιος 8 κατά επιστολή Ρωμαίους;

³ Όμως, πιο τζανγκλέ κο βιβλίος Ρωμαίους, ο Παύλος γραφιντάς εκχέ τζενέσκε σο να ισινέ χρισμέ αλλά ισινέ δίκαιος κι Ιεχωβάσκε γιακχά. Ανταβά ισινέ ο Αβραάμ σο τζουβντιλό μπουτ μπρεσά πριν τι ντελ ο Ιησούς πι ζωή σαρ λύτρος. (Διαβάνεν Ρωμαίους 4:​20-22) Αντιβές-ντα, ο πιστοί Χριστιανοί σο τθερένα ι ελπίδα τι τζουβντιόν για πάντα κι πφουβ μπορίνενα τι βακέρντιβεν δίκαιοι κι Ιεχωβάσκε γιακχά. Βον-ντα μπορίνενα τι βοηθίντιβεν κατά συμβουλές σο ισί κο κεφάλαιος 8 κατά επιστολή Ρωμαίους.

4. Όταν διαβάνασα ο εδάφιος Ρωμαίους 8:​21, σο πρέπει τι πουτσάς αμαρό νεαυτός;

⁴ Κο εδάφιος Ρωμαίους 8:​21, αρακχάσα ι εγγύηση σο ντινάς ο Ιεχωβά ότι λέσκο νεβό ντουνιάς κα αβέλ ντα ότι ο τζενέ κα ελευθερώντιβεν κατά αμαρτία ντα κατά μεριπέ. Ανταβά εδάφιος βακερέλα ότι κα τθερέν «ι ελευθερία σο τθερένα με δόξα ο τσσαβέ ι Ντεβλέσκε». Τουμέν ντικχένα τουμαρό νεαυτός κο νεβό ντουνιάς; Για τι ντικχάς σο πρέπει τι κεράς για τι τζουβντιάς οτθέ.

ΣΑΡ “ΤΘΕΡΕΛΑ ΚΑΠΟΙΟΣ ΣΥΝΕΧΕΙΑ ΠΙ ΓΚΟΝΤΙΑΤΕ Ο ΣΩΜΑΣ”

5. Σο εξηγίνελα ο Παύλος κο εδάφια Ρωμαίους 8:​4-13;

⁵ Διαβάνεν Ρωμαίους 8:​4-13. Κο κεφάλαιος 8 κατά επιστολή Ρωμαίους, ο Παύλος βακερέλα ότι ο τζενέ μπορίνενα τι τζουβντιόν με ντούι διαφορετικούς τρόπους, είτε «σαρ μανγκέλα ο σώμας» είτε «σαρ μανγκέλα ο πνεύμας». Μερικοί πακιάνα ότι ο Παύλος κερέλας λάφι οντουλένγκε σο να ισινέ Χριστιανοί ντα οντουλένγκε σο ισινέ. Όμως, ατθέ ο Παύλος γραφίνελας σε Χριστιανούς σο ισινέ «καλεσμέ για τι αβέν άγιοι». (Ρωμαίους 1:7) Άρα, εμ οντουλά σο τζουβντιόνας «σαρ μανγκέλα ο σώμας» εμ οντουλά σο τζουβντιόνας «σαρ μανγκέλα ο πνεύμας» ισινέ Χριστιανοί. Αλλά σαρ ισινέ διαφορετικοί ο εκ κατά γιαβέρ;

6, 7. (α) Σαρ χρησιμοποιήνελα η Γραφή ι λέξη «σώμας»; (β) Σαρ χρησιμοποιηντάς ο Παύλος ι λέξη «σώμας» κο εδάφια Ρωμαίους 8:​4-13;

⁶ Όταν η Γραφή χρησιμοποιήνελα ι λέξη «σώμας», μπορεί τι σικαβέλα διαφορετικά πράγματα. Μερικές φορές μανγκέλα τι σικαβέλ αμαρό πραγματικός σώμας. (Ρωμαίους 2:​28· 1 Κορινθίους 15:​39, 50) Μπορεί επίσης τι σικαβέλ ότι κάποιοι ισί τζενέ ι γιαβερέντζαρ. Για παράδειγμας, η Γραφή βακερέλα ότι ο Ιησούς “κο σώμας αστάρντιβελας κατά Δαβίδ”, ντα ο Παύλος βακερντάς κο Ιουδαίοι ότι ισινέ λέσκε “τζενέ κο σώμας”.​—Ρωμαίους 1:3· 9:3.

⁷ Άρα, σο μανγκέλας τι βακερέλ ο Παύλος όταν κερντάς λάφι οντουλένγκε σο τζουβντιόνα «σαρ μανγκέλα ο σώμας» κο εδάφια Ρωμαίους 8:​4-13; Για τι αρακχάς ι απάντηση, μπορίνασα τι ντικχάς ο εδάφιος Ρωμαίους 7:5. Οτθέ, ο Παύλος γραφιντάς: «Όταν τζουβντιάας σαρ μανγκέλας αμαρό νεαυτός, ο αμαρτωλά πράγματα σο κεράας ντα σικάντιβενας κο Νόμος κερένας κουμάντος αμαρέ σώματα». Ατθέ, ο Παύλος εξηγιντάς ότι οντουλά σο τζουβντιόνα «σαρ μανγκέλα ο σώμας» ισί ο τζενέ σο σκεφτίνενα συνέχεια ντα κερένα ο αμαρτωλά πράγματα σο μανγκένα.

8. Σόσκε έπρεπε ο Παύλος τι προειδοποιήνελ ι χρισμέ Χριστιανόν κι Ρώμη για μα τι τζουβντιόν «σαρ μανγκέλα ο σώμας»;

⁸ Σόσκε προειδοποιηντάς ο Παύλος ι χρισμέ Χριστιανόν μα τι τζουβντιόν «σαρ μανγκέλα ο σώμας»; Ντα σόσκε σαρέ ο Χριστιανοί αντιβές χρειαζίντιβενα ανταγιά προειδοποίηση; Επειδή ατζέ-ντα ο πιστοί υπηρέτες ι Ντεβλέσκε μπορεί τι αρχίνεν τι τσσουβέν κι πρώτη θέση ο πράγματα σο μανγκέλα λένγκο νεαυτός. Για παράδειγμας, ο Παύλος γραφιντάς ότι μερικά πφραλά κι Ρώμη ισινέ δούλοι «πουμαρέ περέσκε». Ανταλέσαρ μπορεί τι μανγκέλας τι βακερέλ ότι ο σεξ, ο χαμπέ ή γιαβερά πράγματα σο μπεϊντίνενας ισινέ ο πιο σημαντικά πράγματα λένγκε ζωγιάτε. (Ρωμαίους 16:​17, 18· Φιλιππησίους 3:​18, 19· Ιούδα 4, 8, 12) Ντα για χάνικ καιρός, κι εκκλησία σο ισινέ κι Κόρινθος εκ πφραλ σοβέλας πι “νταντέσκε ρομνιάσαρ”. (1 Κορινθίους 5:1) Μπορίνασα τι αγαβάς σόσκε οντουλά πρώτοι Χριστιανοί χρειαζίντιβενας ι προειδοποίηση ι Παυλόσκι για μα τι τζουβντιόν «σαρ μανγκέλα ο σώμας».​—Ρωμαίους 8:​5, 6.

9. Καλέ πραγμάσκε να κερέλα λάφι ο εδάφιος Ρωμαίους 8:6;

⁹ Ανταγιά προειδοποίηση ισί αμαρέ ντιβεσένγκε-ντα. Ατζέ-ντα εκ Χριστιανός σο υπηρετίνελα ι Ιεχωβάς μπουτ μπρεσά κα μπορίνελας τι αρχίνελ τι τζουβντιόλ «σαρ μανγκέλα ο σώμας». Μήπως, όμως, ο Παύλος βακερντάς ότι δεν πρέπει ποτές τι σκεφτίνας πράγματα σαρ ο χαμπέ, η μπουτί, η διασκέδαση ή η αγάπη σο τθερέλα πέσκε εκ αντρόγυνος; Σίγουρα όχι. Ανταλά ισί φυσιολογικά πράγματα κι ζωή. Ο Ιησούς-ντα απολαμβάνελας ο χαμπέ ντα ντέλας ι γιαβερέν τι χαν. Επίσης, αγαβέλας ότι τθερέλας ανάγκη τι ξεκουράντιβελ. Ντα ο Παύλος γραφιντάς ότι εκ αντρόγυνος ισί σημαντικός τι σοβέλ ο εκ ι γιαβερέσαρ.

10. Σο μανγκέλα τι βακερέλ ι φράση «τθερέλα συνέχεια πι γκοντιάτε»;

¹⁰ Σο μανγκέλας τι βακερέλ ο Παύλος με τη φράση «τθερέλα συνέχεια πι γκοντιάτε»; Η μπαλαμανί λέξη σο χρησιμοποιηντάς ο Παύλος μανγκέλα τι βακερέλ ότι κάποιος τθερέλα σαρέ πο σκέψεις ντα πο σχέδια εκχέ πραγμάστε. Εκ μορφωμέ τζενό εξηγιντάς ότι ανταγιά φράση βακέρντιβελα οντουλένγκε σο «ενδιαφερίντιβενα μπουτ για κάτι, κερένα λάφι συνέχεια ανταλέσκε» ντα σκεφτίνενα πιο μπουτ ο πράγματα σο μανγκέλα λένγκο νεαυτός. Βον μουκχένα ανταλά πράγματα τι κερέν κουμάντος λένγκι ζωή.

11. Καλά ισί μερικά πράγματα σο δεν πρέπει τι αβέν ο πιο σημαντικά αμαρέ ζωγιάτε;

¹¹ Ο Χριστιανοί κι Ρώμη έπρεπε τι σκεφτίνεν ντα τι αγαβέν σο τθερένας πουμαρέ γκοντιάτε. Μήπως τθερένας συνέχεια ο «πράγματα σο μανγκέλα ο σώμας»; Αντιβές, αμέν-ντα πρέπει τι σκεφτίνας σο ισί ο πιο σημαντικός αμένγκε. Καλέ πραγμάσκε μπεϊντίνασα τι κεράς λάφι; Σο πράγματα μανγκάσα τι κεράς; Μερικοί μπορεί τι αγαβέν ότι σκεφτίνενα συνέχεια σαρ κα δοκιμάνεν διαφορετικά μολιά, σαρ κα στολίνεν πουμαρό κχερ, σαρ κα κινέν νεβέ σέα, σαρ κα κερέν πιο μπουτ λοβέ ή κατέ κα τζαν διακοπές. Ανταλά πράγματα νανέ λάθος. Μπορεί τι αβέν φυσιολογικά πράγματα κι ζωή. Για παράδειγμας, ο Ιησούς ντινάς μολ εκχέ μπιαβέστε ντα ο Παύλος βακερντάς κο Τιμόθεος τι πιλ “χάνικ μολ” πι νασφαλιμάσκε. (1 Τιμόθεο 5:​23· Ιωάννης 2:​3-11) Όμως η μολ να ισινέ ο πιο σημαντικός πράγμας λένγκε ζωγιάτε. Σο κα βακεράς αμένγκε; Καβά ισί ο πιο σημαντικός πράγμας αμαρέ ζωγιάτε;

12, 13. Σόσκε πρέπει τι προσοχίνας σο σκεφτίνασα πιο μπουτ;

¹² Ο Παύλος προειδοποιηντάς: «Άμα κάποιος τθερέλα συνέχεια πι γκοντιάτε ο σώμας, ο αποτέλεσμας κα αβέλ ο μεριπέ». (Ρωμαίους 8:6) Σο μανγκέλας τι βακερέλ ανταλέσαρ; Άμα τζουβντιάσα «σαρ μανγκέλα ο σώμας», κα μπορίναας τι χασαράς αμαρί σχέση ι Ιεχωβάσαρ ακανά ντα αμαρί ζωή κο μέλλον. Αλλά ανταβά νανέ ανάγκη τι αβέλ-πες. Εκ τζενό μπορίνελα τι αλλάνελ. Ντένα-τουμέν γκοντί οντουλέ τζενές κι Κόρινθος σο χαλάς αποκοπή; Βοβ αλλαξάλο ντα σταματιντάς τι ακολουθίνελ ο μπέτι πράγματα σο μανγκέλας λέσκο νεαυτός. Αντικάς μπορίνελας πάλι τι υπηρετίνελ ι Ιεχωβάς με εκ σωστός τρόπος.​—2 Κορινθίους 2:​6-8.

¹³ Οντουβά τζενό ισινέ εκ μπουτ μπέτι παράδειγμας τζενέσκο σο τζουβντιόλας «σαρ μανγκέλα ο σώμας», παρ’ όλα αυτά βοβ-ντα αλλαξάλο. Άρα αγαβάσα ότι, άμα εκ Χριστιανός αντιβές αρχισάλο τι ακολουθίνελ ο αμαρτωλά πράγματα σο μανγκέλα λέσκο νεαυτός αντίς τι ακολουθίνελ ι Ιεχωβάσκε νόμοι, μπορίνελα βοβ-ντα τι αλλάνελ. Όταν ντάσα-αμέν γκοντί ι προειδοποίηση του Παύλου, μανγκάσα τι κεράς σαρέ ο αλλαγές σο πρέπει τι κεράς.

ΣΑΡ “ΤΘΕΡΕΛΑ ΚΑΠΟΙΟΣ ΣΥΝΕΧΕΙΑ ΠΙ ΓΚΟΝΤΙΑΤΕ Ο ΠΝΕΥΜΑΣ”

14, 15. (α) Σο βακερντάς ο Παύλος ότι πρέπει τι τθεράς συνέχεια αμαρέ γκοντιάτε; (β) Σο να μανγκέλα τι βακερέλ η φράση «τθερέλα συνέχεια πι γκοντιάτε ο πνεύμας»;

¹⁴ Αφού ο Παύλος βακερντάς ο κίνδυνοι σο υπαρχίντιβενα όταν τθερέλα κάποιος «συνέχεια πι γκοντιάτε ο σώμας», εξηγιντάς: «Άμα κάποιος τθερέλα συνέχεια πι γκοντιάτε ο πνεύμας, ο αποτέλεσμας κα αβέλ ζωή ντα ειρήνη». Σο σουκάρ ευλογίες μπορίνασα τι τθεράς!

¹⁵ Όμως, άμα κάποιος «τθερέλα συνέχεια πι γκοντιάτε ο πνεύμας», ανταβά να μανγκέλα τι βακερέλ ότι νανέ φυσιολογικός. Να μανγκέλα τι βακερέλ ότι σκεφτίνελα ντα κερέλα λάφι σάντε ι Ιεχωβάσκε ή ι Γραφιάκε. Για παράδειγμας, ο υπηρέτες ι Ντεβλέσκε κο πρώτος αιώνας τζουβντιόνας εκ φυσιολογική ζωή. Απολαμβάνενας ο χαμπέ ντα ι μολ, παντρίνενας, τθερένας φαμιλί ντα κερένας μπουτί.​—Μάρκος 6:3· 1 Θεσσαλονικείς 2:9.

16. Καβά ισινέ ο πιο σημαντικός πράγμας κι ζωή κι Παυλόσκι;

¹⁶ Αλλά ο Παύλος ντα γιαβερά Χριστιανοί αζομάν να μουκχλέ ανταλά φυσιολογικά πράγματα τι αβέν ο πιο σημαντικά πράγματα λένγκε ζωγιάτε. Για παράδειγμας, τζανάσα ότι ο Παύλος κερέλας τσαντίρια. Όμως λέσκι μπουτί να ισινέ ο πιο σημαντικός πράγμας λέσκε ζωγιάτε. Ο πιο σημαντικός λέσκε ισινέ τι υπηρετίνελ ι Ντεβλές. Ο Παύλος τθερέλας συνέχεια πι γκοντιάτε σαρ τι βακερέλ ο λατσσέ αμπέρια ντα τι σικλιαρέλ ι γιαβερέν. (Διαβάνεν Πράξεις 18:​2-4· 20:​20, 21, 34, 35) Ο πφραλά ντα ο πφενιά κι Ρώμη έπρεπε τι μοιάζεν κο Παύλος, ντα ο ίδιος πρέπει τι κεράς αμέν-ντα.​—Ρωμαίους 15:​15, 16.

17. Σαρ βοηθίντιβασα όταν τθεράσα αμαρέ «γκοντιάτε ο πνεύμας»;

¹⁷ Σαρ κα αβέλ αμαρί ζωή άμα ο πρώτος πράγμας σο τσσουβάσα αμαρέ ζωγιάτε ισί τι υπηρετίνας ι Ιεχωβάς; Ο εδάφιος Ρωμαίους 8:6 βακερέλα: «Άμα κάποιος τθερέλα συνέχεια πι γκοντιάτε ο πνεύμας, ο αποτέλεσμας κα αβέλ ζωή ντα ειρήνη». Αμέν πρέπει τι μουκχάς αμαρί γκοντί τι οδηγίντιβελ κατά Ιεχωβάσκο πνεύμας ντα τι σικλιάς τι σκεφτίνας σαρ σκεφτίνελα βοβ. Ντα ο Ιεχωβά ντέλα πο λάφι ότι κα ντελ-αμέν εκ ευτυχισμέ ντα λατσσί ζωή ακανά ντα ζωή για πάντα κο μέλλον.

18. Σαρ μπορίνασα τι τθεράς ειρήνη όταν τθεράσα συνέχεια αμαρέ «γκοντιάτε ο πνεύμας»;

¹⁸ Σο μανγκέλας τι βακερέλ ο Παύλος όταν βακερντάς ότι, άμα τθεράσα συνέχεια αμαρέ «γκοντιάτε ο πνεύμας», κα τθεράς ειρήνη; Σαρέ μανγκένα τι τθερέν ειρήνη, ειδικά πουμαρέ γκοντιάτε, αλλά χάνικ τζενέ αρακχένα-λα. Ο Ιεχωβά βοηθίνελα-αμέν τι τθεράς ειρήνη αμαρέ γκοντιάτε. Επίσης, μπορίνασα τι τθεράς ειρήνη αμαρέ φαμιλιάσαρ ντα ι πφραλέντζαρ σο ισί κι εκκλησία. Αφού ισινάμ ατελείς, μπάζιμα κα τθεράς προβλήματα αμαρέ πφραλέντζαρ ντα αμαρέ πφενίντζαρ. Όταν αβέλα-πες ανταβά, ακολουθίνασα ι Ιησούσκι συμβουλή: «Κερ ειρήνη τι πφραλέσαρ». (Ματθαίος 5:​24) Τι ντες-τουτ γκοντί ότι εμ τούι, εμ το πφραλ ή τι πφεν υπηρετίνενα ι Ιεχωβάς, “ι Ντεβλές σο ντέλα ειρήνη”.​—Ρωμαίους 15:​33· 16:20.

19. Καγιά ξεχωριστή ειρήνη μπορίνασα τι τθεράς;

¹⁹ Άμα τθεράσα συνέχεια αμαρέ «γκοντιάτε ο πνεύμας», κα τθεράς ειρήνη ι Ντε-βλέσαρ-ντα. Ο προφήτης Ησαΐας γραφιντάς: «Τούι [Ιεχωβά] κα αρακχαβές οντουλέν σο στηρίντιβενα σαρέ πουμαρέ γκίσαρ τούτε· κα ντες-λεν ειρήνη σο ατσσόλα για πάντα, επειδή τθερένα εμπιστοσύνη τούτε».​—Ησαΐας 26:3· διαβάνεν Ρωμαίους 5:1.

20. Σόσκε εκτιμίνενα ι συμβουλή σο ισί κο κεφάλαιος 8 κατά επιστολή Ρωμαίους;

²⁰ Είτε τθεράσα ι ελπίδα τι τζουβντιάς για πάντα κο ουρανός είτε κι πφουβ, σαρέ μπορίνασα τι βοηθίντιβας κατά σοφά λάφια σο ισί κο κεφάλαιος 8 κατά επιστολή Ρωμαίους. Εκτιμίνασα μπουτ ι βοήθεια σο ντέλα-αμέν η Γραφή για τι τσσουβάς πρώτα αμαρέ ζωγιάτε αμαρί υπηρεσία κο Ιεχωβά, ντα όχι ο πράγματα σο μανγκέλα αμαρό νεαυτός. Τζανάσα ότι, άμα τθεράσα αμαρέ «γκοντιάτε συνέχεια ο πνεύμας», κα τθεράς ι μπουτ σουκάρ ευλογία σο γραφιντάς ο Παύλος: «Ο δώρος σο ντέλα ο Ντεβέλ ισί τι τζουβντιάς για πάντα αντράλ κατά Ιησούς Χριστός, σο ισί αμαρό Κύριος».​—Ρωμαίους 6:23.