«Τι Πακιάς κο Ιησούς»—Κα Σώντιβας άμα κα Πακιάς κο Ιησούς;

Σο βακερέλα η Αγία Γραφή

Ο Χριστιανοί πακιάνα ότι ο Ιησούς μουλό αμαρέ αμαρτιένγκε. (1 Πέτρου 3:18) Όμως, για τι σώντιβελ εκ τζενό να ερεσέλα σάντε τι πακιάλ ότι ο Ιησούς ισί Οντουβά σο σώνελα. Ο δαίμονες-ντα τζανένα ότι ο Ιησούς ισί «ο Τσσαβό ι Ντεβλέσκο», αλλά ατζεχάνικ κα καταστραφίντιβεν, να κα σώντιβεν.—Λουκάς 4:41· Ιούδα 6.

• Σο πρέπει τι κεράβ για τι σώντιβαβ;

• Καγιά ισί η αλήθεια για την «Προσευχή ι Αμαρτωλέ Τζενέσκι»;

• Κατάρ αστάρντιβελα η «Προσευχή ι Αμαρτωλέ Τζενέσκι»;

Σο πρέπει τι κεράβ για τι σώντιβαβ;

• Τι πακιάν ότι ο Ιησούς ντινάς πι ζωή αμαρέ αμαρτιένγκε. (Πράξεις 16:30, 31· 1 Ιωάννη 2:2) Ανταβά μανγκέλα τι βακερέλ τι πακιάν ότι ο Ιησούς αβιλό κι πφουβ σαρ τζενό ντα ότι σαρέ οντουλά σο βακερέλα η Αγία Γραφή λέσκε ισί μπαγιά.

• Τι σικλιόν σο βακερέλα μπαγιά η Αγία Γραφή. (2 Τιμόθεο 3:15) Η Γραφή βακερέλα ότι ο απόστολος Παύλος ντα ο Σίλας βακερντέ σε εκ φύλακας: «Τι πακιάς κο Κύριος Ιησούς ντα κα σώντιβες». Σοράν όμως, αρχισάλε τι σικλιαρέν-λες «ο λάφι ι Ιεχωβάσκο»a. (Πράξεις 16:31, 32) Ανταβά σικαβέλα ότι ο φύλακας να κα μπορίνελας τι πακιάλ μπαγιά κο Ιησούς άμα να τζανέλας ο βασικά πράγματα σο σικλιαρέλα ο Λάφι ι Ντεβλέσκο. Έπρεπε τι σικλιόλ ντιπ ι αλήθεια σο βασίντιβελα κι Γραφή.—1 Τιμόθεο 2:3, 4.

• Τι μετανιώνεν. (Πράξεις 3:19) Πρέπει επίσης τι μετανιώνεν, δηλαδή τι νιωθίνεν ντουκχ αντρέ τουμαρέ γκίστε, ι λάθος τροπόσκε σο μπορεί τι τζουβντιόνας ντα ι μπέτι συμπεριφοράκε σο μπορεί τι τθερένας. Κα σικαβέν ότι μετανιωσάλεν άμα κα τσσιναβέν τι κερέν σο-ντα προσβαλίνελα ι Ντεβλές ντα άμα κα κερέν “πράγματα σο σικαβένα ότι μετανιωσάλεν”.—Πράξεις 26:20.

• Τι μπολντιόν. (Ματθαίος 28:19) Ο Ιησούς βακερντάς ότι οντουλά σο κα αβένας λέσκε μαθητές κα μπολντιόνας. Ο φύλακας σο βακερντάμ πιο τζανγκλέ μπολντιλό. (Πράξεις 16:33) Αντικάς, αφού ο απόστολος Πέτρος σικλιαρντάς μπουτέ τζενέν ι αλήθεια ι Ιησούσκε, «οντουλά σο μανγκλέ γκίσαρ λέσκε λάφια μπολντιλέ».—Πράξεις 2:40, 41.

• Τι ντεν καν κι Ιησούσκε οδηγίες. (Εβραίους 5:9) Οντουλά σο “κερένα σαρέ οντουλά σο” βακερντάς ο Ιησούς σικαβένα σαρέ πουμαρέ ζωγιάσαρ ότι ακολουθίνενα-λες. (Ματθαίος 28:20) “Κερένα ο λάφια ι Ντεβλέσκε ντα να ασουνένα-λεν σάντε”.—Ιακώβου 1:22.

• Τι νταϊντίνεν μέχρι κο τέλος. (Μάρκος 13:13) Ι Ιησούσκε μαθητές «τθερένα ανάγκη ι υπομονή» για τι σώντιβεν. (Εβραίους 10:36) Φιρειπείν, ο απόστολος Παύλος ντέλας καν πιστά κο λάφια κι Ιησούσκε ντα ατσσιλό αφοσιωμέ κο Ντεβέλ. Μάλιστα, ατσσιλό σταθερός κατά ντιβές σο αβιλό Χριστιανός μέχρι πι μεριμάστε.—1 Κορινθίους 9:27.

Καγιά ισί η αλήθεια για την «Προσευχή ι Αμαρτωλέ Τζενέσκι»;

Μερικές θρησκείες τθερένα συγκεκριμέ προσευχές σαρ ισί η «Προσευχή ι Αμαρτωλέ Τζενέσκι», η «Προσευχή για τι Σώντιβας» ή η «Προσευχή σο Μετανιώνελα εκ Τζενό». Ο πιο μπουτ φαρ, οντουλά σο κερένα ασακέ προσευχές αγαβένα ότι ισί αμαρτωλοί ντα σικαβένα πουμαρί πίστη ότι ο Ιησούς μουλό λένγκε αμαρτιένγκε. Μανγκένα επίσης κατά Ιησούς τι τζαλ αντρέ λένγκε γκίστε ντα λένγκε ζωγιάτε. Αλλά η Γραφή ούτε τθερέλα αντρέ ούτε βακερέλα ότι ισί λατσσό τι κεράς ασακέ συγκεκριμέ προσευχές.

Μερικά τζενέ πακιάνα ότι αφού κα κερέν εκ ασακί προσευχή, σίγουρα κα σώντιβεν για πάντα. Αλλά άμα κεράσα σάντε προσευχή, ανταβά να μανγκέλα τι βακερέλ ότι κα σώντιβας. Αφού ισινάμ ατελείς, συνεχίνασα τι κεράς λάθη. (1 Ιωάννη 1:8) Άκ’ σόσκε ο Ιησούς σικλιαρντάς πι μαθητέν τι προσευχίντιβεν συνέχεια για τι συγχωρίντιβεν λένγκε αμαρτίες. (Λουκάς 11:2, 4) Επίσης, μερικοί Χριστιανοί, ενώ τθερένας ι ευκαιρία τι σώντιβεν για πάντα, χασαρντέ-λα επειδή τσσιντιντέ-πες σιγά σιγά ντουρ κατά Ντεβέλ ή μουκχλέ-λες.—Εβραίους 6:4-6· 2 Πέτρου 2:20, 21.

Κατάρ αστάρντιβελα η «Προσευχή ι Αμαρτωλέ Τζενέσκι»;

Ο ιστορικοί να συμφωνίνενα οπράλ ανταλέστε. Κάποιοι βακερένα ότι ο τζενέ κερντέ ανταγιά προσευχή από αζομάν σο αρχισάλε ο Προτεστάντες. Γιαβερά πακιάνα ότι ο τζενέ αρχισάλε τι κερέν ι «Προσευχή ι Αμαρτωλέ Τζενέσκι» από αζομάν σο αρχισάλε τι νικιόν θρησκείες κο 18ο ντα κο 19ο αιώνας. Σαρ-ντα τι αβέν ο πράγματα, ανταγιά προσευχή να βασίντιβελα κι Γραφή—κι πραγματικότητα τζάλα κόντρα οντουλέντζαρ σο σικλιαρέλα η Γραφή.