Σαρ Μπορίνεσα τι Τθερές Ευτυχισμέ Φαμιλί;​—Μέρος 1

Ο νεβέ ζευγάρια τθερένα ι ελπίδα ότι κα ατσσικιαρέλ για πάντα η χαρά σο νιωσάλε κο ντιβές σο αβιλό λένγκο μπιαβ. Ντα μπαγιά αβέλα-πες τι ατσσόλ. Ο Χριστιανοί σο ισί παντριμέ μπουτ μπρεσά ντα σο τθερένα κερντό μπουτ μπαρί προσπάθεια τι ντεν καν κο συμβουλές κι Γραφιάκε τζανένα ότι μπορίνελα τι αβέλ-πες ανταβά.

1. Καλά συμβουλές ντέλα η Γραφή κο ρομ;

Ο Ιεχωβά τραμπιντάς ι μουρσές τι αβέλ ο σορό ι φαμιλιάκο. (Διαβάνεν Εφεσίους 5:23) Ο Ιεχωβά μπεκλεντίνελα λέσταρ τι λελ αποφάσεις σο βοηθίνενα λέσκι φαμιλί. Η Γραφή βακερέλα κο μουρσά σο ισί παντριμέ: «Τι μανγκέν τουμαρέ ρομνίν». (Εφεσίους 5:​25) Σο μανγκέλα τι βακερέλ ανταβά; Ο μουρς σο μανγκέλα πι ρομνιά συμπεριφερίντιβελα λάκε λατσσιμάσαρ εμ κο κχερ εμ ανγκλάλ κο γιαβερά. Αρακχαβέλα-λα για μα τι παθίνελ κάτι κακός ντα κερέλα ο πο λατσσό για τι ντελ-λα σαρέ οντουλά σο τθερέλα ανάγκη. (1 Τιμόθεο 5:8) Ο πο σημαντικός ισί ότι βοηθίνελα-λα για τι αβέλ λατσσί αμαλίν ι Ιεχωβάσκι. (Ματθαίος 4:4) Για παράδειγμας, κερέλα προσευχή ντα διαβάνελα ι Γραφή γιεκ πι ρομνιάσαρ. Κάνα εκ μουρς αρακχαβέλα με αγάπη πι ρομνιά, ατσσόλα αμάλ ι Ιεχωβάσκο.​—Διαβάνεν 1 Πέτρου 3:7.

2. Καλά συμβουλές ντέλα η Γραφή κι ρομνί;

Ο Λάφι ι Ντεβλέσκο βακερέλα ότι η ρομνί «πρέπει τι τθερέλ μπαρό σεβασμός πι ρομέσκε». (Εφεσίους 5:​33) Σαρ μπορίνελα τι κερέλ-λες ανταβά; Μπορίνελα τι σκεφτίνελ ο λατσσέ ιδιότητες πι ρομέσκε ντα ο προσπάθειες σο κερέλα για τι αρακχαβέλ λα ντα πουμαρέ τσσαβέν. Μπορίνελα επίσης τι σικαβέλ σεβασμός κάνα υποστηρίνελα λέσκε αποφάσεις ντα κάνα κερέλα λέσαρ λάφι σουκάρ εμ κάνα ισί βοβ ανγκλάλ εμ κάνα νανέ, ατζέ-ντα άμα να ντέλα λατρεία ι Ιεχωβάς.

3. Σαρ μπορίνελα εκ αντρόγυνος τι κερέλ πο ζουρανό πο μπιαβ;

Η Γραφή βακερέλα ι παντριμέ τζενένγκε: «Ο ντούι κα αβέν εκ σώμας». (Ματθαίος 19:5) Ανταβά μανγκέλα τι βακερέλ ότι πρέπει τι νασκιαρέν σο-ντα κα μπορίνελας τι κερέλ-λεν τι νασέν ντουρ ο εκ κατά γιαβέρ. Μπορίνενα τι κερέν-λες ανταβά κάνα νακχένα μπουτ σαάτι γιεκ ντα κάνα κερένα λάφι ξεκάθαρα ντα με αγάπη οντουλένγκε σο σκεφτίνενα ντα νιωθίνενα. Να μουκχένα καεκχέ πραγμάστε ντα καεκχέ τζενέστε​—εκτός κατά Ιεχωβά—​τι τθερέλ πο σημαντική θέση λένγκε ζωγιάτε από ό,τι λένγκο ρομ ή λένγκι ρομνί. Προσοχίνενα μπουτ μα τι αβέν αζόμ πασέ εκχέ γιαβερέ τζενέσαρ ντα τι κερέν κάτι μπέτι.

ΧΑΝΤΖΟΥΒ ΠΟ ΑΧΟΡΤ

4. Μουρσάλεν​—τι μανγκέν ντα τι φροντίνεν λατσσές τουμαρέ ρομνιά

ΒΙΝΤΕΟΣ: Μουρσάλεν, τι Μανγκέν Τουμαρέ Ρομνίν Σαρ Μανγκένα Τουμαρό Νεαυτός (9:53)

• Καλέ τροπόντζαρ σικαβέλα ο ρομ ότι μανγκέλα ντα φροντίνελα πι ρομνιά;

Διαβάνεν Κολοσσαείς 3:​12 ντα σοράν συζητίνεν ι ερώτηση:

• Σαρ μπορίνελα τι σικαβέλ εκ ρομ ανταλά ιδιότητες πι μπιαβέστε;

5. Τζουβλιάλεν​—τι μανγκέν ντα τι σεβάνεν τουμαρέ ρομές

Η Γραφή βακερέλα ότι η ρομνί πρέπει τι σεβάνελ πι ρομές είτε βοβ υπηρετίνελα ι Ιεχωβάς είτε όχι. Διαβάνεν 1 Πέτρου 3:​1, 2 ντα σοράν συζητίνεν ο ερωτήσεις:

• Άμα το ρομ νανέ κι αλήθεια, σίγουρα μανγκέσα τι αρχίνελ τι υπηρετίνελ βοβ-ντα ι Ιεχωβάς. Σο πακιάσα ότι μπορίνελα τι ανέλ πο λατσσέ αποτελέσματα​—τι βακερές λέσκε συνέχεια ι Ντεβλέσκε ή τι συμπεριφερίντιβες λέσκε σουκάρ ντα τι σικαβές λέσκε σεβασμός; Σόσκε βακερέσα-λες ανταβά;

Ο αντρόγυνα μπορίνενα τι λεν λατσσέ αποφάσεις γιεκ. Μπάζιμα όμως, η ρομνί μπέκιμ μα τι συμφωνίνελ πι ρομέσαρ. Κάνα αβέλα-πες κάτι ασακό, μπορίνελα τι βακερέλ οντουλά σο σκεφτίνελα ήρεμα ντα με σεβασμός, αλλά πρέπει τι αγαβέλ ότι ο Ιεχωβά ντινάς κο μουρς ι ευθύνη τι αποφασίνελ καβά ισί ο πο λατσσό ι φαμιλιάκε. Βόι πρέπει τι κερέλ ο πο λατσσό σο μπορίνελα για τι στηρίνελ λέσκι απόφαση. Ανταλέ τροπόσαρ, βοηθίνελα τι υπαρχίντιβελ χαρά αντρέ κο κχερ. Διαβάνεν 1 Πέτρου 3:​3-5 ντα σοράν συζητίνεν ι ερώτηση:

• Σαρ νιωθίνελα ο Ιεχωβά κάνα εκ τζουβέλ σικαβέλα σεβασμός πι ρομέσκε;

6. Μπορίνεσα τι νακχαβές ο προβλήματα τι μπιαβέστε

ΒΙΝΤΕΟΣ: Σαρ τι Κερέν Τουμαρό Μπιαβ πο Ζουρανό (5:44)

• Σαρ ντικχλάμ κο βίντεος, καλά πράγματα σικαβένας ότι ο αντρόγυνος νασέλας ντουρ ο εκ κατά γιαβέρ;

• Σο κερντέ για τι ζουράνιβελ λένγκο μπιαβ;

Διαβάνεν 1 Κορινθίους 10:​24 ντα Κολοσσαείς 3:​13. Αφού κα διαβάνεν ο κάθε εδάφιος, συζητίνεν ι ερώτηση:

• Σαρ κα αβέλ ο μπιαβ πο ζουρανό άμα κερντάμ ανταγιά συμβουλή;

Η Γραφή βακερέλα ότι πρέπει τι σεβάνας ο εκ ι γιαβερές. Κάνα σεβάνασα εκχέ τζενές, συμπεριφερίντιβασα λέσκε σουκάρ τροπόσαρ. Διαβάνεν Ρωμαίους 12:​10 ντα σοράν συζητίνεν ο ερωτήσεις:

• Πρέπει ο μουρς τι μπεκλεντίνελ τι σικαβέλ λέσκε πρώτα η ρομνί σεβασμός, ντα η ρομνί-ντα τι μπεκλεντίνελ ο ίδιος, ή όχι; Σόσκε βακερέσα-λες ανταβά;

ΧΑΝΙΚ ΛΑΦΙΝΤΖΑΡ

Ο αντρόγυνα μπορίνενα τι αβέν ευτυχισμέ άμα μανγκένα ντα σεβάνενα ο εκ ι γιαβερές ντα άμα κερένα ο αρχές ι Γραφιάκε.

Σο Σικλιλάν;

• Σαρ μπορίνελα τι βοηθίνελ ο ρομ τι αβέλ ευτυχισμέ ο μπιαβ;

• Σαρ μπορίνελα τι βοηθίνελ η ρομνί τι αβέλ ευτυχισμέ ο μπιαβ;

• Άμα ισινάν παντριμέ, καγιά αρχή ι Γραφιάκι κα μπορίνελας τι κερέλ πο ζουρανό τιρό μπιαβ;

ΡΟΝΤΕ

Σίκλιουβ μερικά πράγματα σο μπορίνεσα τι κερές ντα σαρ κα βοηθίνεν-τουτ τι τθερές ευτυχισμέ φαμιλί.

Μπορίνενα τι Τθερέν Ευτυχισμέ Φαμιλί (Βιβλιάριος)

Τσσουβ σημασία σε εκ μουσικός βίντεος σο σικαβέλα σαρ ευλογίντιβενα ο αντρόγυνα σο κερένα ο συμβουλές ι Ντεβλέσκε πουμαρέ μπιαβέστε.

Αληθινή Αγάπη (4:26)

Σίκλιουβ σο μανγκέλα τι βακερέλ τι σεβάνελ η ρομνί ο δικαίωμας σο τθερέλα ο ρομ τι αβέλ ο σορό ι φαμιλιάκο.

«Ρομνιάλεν, Σόσκε Πρέπει τι Σεβάνεν ο Δικαίωμας σο Τθερέλα ο Ρομ τι Αβέλ ο Σορό ι Φαμιλιάκο;» (Η Σκοπιά 15 Μαΐου 2010)

Σαρ νακχαντάς εκ αντρόγυνος ο μπαρέ προβλήματα σο τθερέλας ντα ο διαζύγιος σο λιντάας;

Κερντάμ Πάλι Ζουρανό Αμαρό Μπιαβ ι Ντεβλέσκε Βοηθειάσαρ (5:14)