ΜΑΘΗΜΑΣ 57
Σο κα Αβέλ-πες άμα κα Κερές εκ Μπαρί Αμαρτία;
Παρόλο σο μανγκέσα μπουτ ι Ιεχωβάς ντα μαρέσα-τουτ μα τι κερές κάτι σο κα πληγώνελας-λες, μπάζιμα κα κερές λάθη. Όμως, μερικές αμαρτίες ισί πο μπαρέ γιαβερένταρ. (1 Κορινθίους 6:9, 10) Άμα κερντάν εκ μπαρί αμαρτία, τι ντες-τουτ γκοντί ότι ο Ιεχωβά συνεχίνελα τι μανγκέλ-τουτ. Μανγκέλα τι συγχωρίνελ-τουτ ντα τι βοηθίνελ-τουτ.
1. Σο πρέπει τι κεράς για τι συγχωρίνελ-αμέν ο Ιεχωβά;
Οντουλά σο μανγκένα ι Ιεχωβάς πφανγκιόλα σαρό λένγκο γκι κάνα αγαβένα ότι κερντέ εκ μπαρί αμαρτία. Όμως ο Ιεχωβά λοκχιαρέλα λένγκο γκι αντράλ κατά υπόσχεση σο ντινάς πι λαόστε: «Παρόλο σο ισί λολέ τουμαρέ αμαρτίες, κα αβέν παρνέ σαρ ο βιβ». (Ησαΐας 1:18) Άμα μετανιωσάλαμ μπαγιά, ο Ιεχωβά κα συγχωρίνελ σο-ντα κερντάμ. Σαρ μετανιώνασα; Επειδή στεναχωρισάλαμ μπουτ, τσσιναβάσα τι κεράς ο κακός ντα μανγκάσα σαρέ αμαρέ γκίσαρ κατά Ιεχωβά τι συγχωρίνελ-αμέν. Σοράν, μαράσα-αμέν τι αλλάνας ο λάθος τρόπος σο σκεφτίναας ή ο χούγια σο γκερντέ-αμέν κι αμαρτία, ντα προσπαθίνασα τι τζουβντιάς αντικάς σαρ βακερένα ο πάκι κανόνες ι Ιεχωβάσκε.—Διαβάνεν Ησαΐας 55:6, 7.
2. Σαρ χρησιμοποιήνελα ο Ιεχωβά ι πρεσβυτερόν για τι βοηθίνεν-αμέν άμα κα κεράς εκ αμαρτία;
Άμα κα κεράς εκ μπαρί αμαρτία, ο Ιεχωβά βακερέλα αμένγκε “τι βακεράς κο πρεσβύτεροι κι κχανγκιριάκε τι αβέν τι ντικχέν-αμέν”. (Διαβάνεν Ιακώβου 5:14, 15) Ανταλά διορισμέ μουρσά μανγκένα ι Ιεχωβάς ντα λέσκε μπρακέν. Τζανένα σαρ τι βοηθίνεν-αμέν τι κεράς πάλι ζουρανί αμαρί φιλία ι Ιεχωβάσαρ.—Γαλάτες 6:1.
Σαρ βοηθίνενα-αμέν ο πρεσβύτεροι άμα κα κεράς εκ μπαρί αμαρτία; Ντούι ή τριν πρεσβύτεροι κα χρησιμοποιήνεν εδάφια κατά Αγία Γραφή για τι διορθώνεν-αμέν. Επίσης, κα ντεν-αμέν λατσσέ συμβουλές ντα ζορ για τι βοηθίνεν-αμέν μα τι αμαρτίνας πάλι. Άμα εκ τζενό σο κερντάς εκ μπαρί αμαρτία να μετανιώνελα, ο πρεσβύτεροι κα ατσσικιαρέν-λες ντουρ κατά κχανγκιρί για μα τι επηρεάντιβεν ο γιαβερά-ντα.
ΧΑΝΤΖΟΥΒ ΠΟ ΑΧΟΡΤ
Τι μπαριαρές τι εκτίμηση ντα τι αγαβές πο λατσσές ο τρόπος σο βοηθίνελα-αμέν ο Ιεχωβά άμα κα κεράς εκ μπαρί αμαρτία.
3. Κάνα μουτθαβάσα οντουβά σο κερντάμ αβάσα πάλι αμαλά ι Ιεχωβάσαρ
Κάθε φαρ σο κεράσα εκ αμαρτία ντουκχαβάσα ι Ιεχωβάσκο γκι, οτθάρ πρέπει τι μουτθαβάς-λα λέσκε. Διαβάνεν Ψαλμός 32:1-5 ντα σοράν συζητίνεν ι ερώτηση:
Σόσκε κερέλα αμένγκε λατσσιπέ κάνα μουτθαβάσα αμαρέ αμαρτίες κο Ιεχωβά ντα να προσπαθίνασα τι γκεραβάς-λεν;
Επίσης, κάνα μανγκάσα βοήθεια κατά πρεσβύτεροι, αφού πρώτα μουτθαντάμ αμαρέ αμαρτίες κο Ιεχωβά, νιωθίνασα πο λατσσές. Ντικχέν ο ΒΙΝΤΕΟΣ ντα σοράν συζητίνεν ι ερώτηση:
Σαρ ντικχλάμ κο βίντεος, σαρ βοηθιντέ ο πρεσβύτεροι τον Κάνον τι βουρτίνελ κο Ιεχωβά;
Χρειαζίντιβελα τι βακεράς ι αλήθεια ντα μα τι γκεραβάς-αμέν κατά πρεσβύτεροι. Βον μανγκένα τι βοηθίνεν-αμέν. Διαβάνεν Ιακώβου 5:16 ντα σοράν συζητίνεν ι ερώτηση:
Σόσκε ισί πο εύκολος ι πρεσβυτερόνγκε τι βοηθίνεν-αμέν άμα βακεράσα λένγκε ι αλήθεια;
Μούτθαβ τι αμαρτία, βάκερ ι αλήθεια κο πρεσβύτεροι ντα δέχτινε ι βοήθεια ι Ιεχωβάσκι σο μανγκέλα-τουτ μπουτ
4. Ο Ιεχωβά τζιτζίνελα οντουλένγκε σο κερντέ εκ αμαρτία
Άμα εκ τζενό σο κερντάς εκ μπαρί αμαρτία να μανγκέλα τι ακολουθίνελ ο κανόνες ι Ιεχωβάσκε, πρέπει τι ατσσόλ ντουρ κατά κχανγκιρί ντα μα τι κεράς λέσαρ παρέα. Διαβάνεν 1 Κορινθίους 5:6, 11 ντα σοράν συζητίνεν ι ερώτηση:
Αντικάς σαρ η μαγιά κερέλα ο χουμέρ τι φουσκώνελ, σαρ κα επηρεάντιβελας η κχανγκιρί κατά παρέα εκχέ τζενέσαρ σο κερντάς εκ αμαρτία ντα να μετανιώνελα;
Σαρ ο Ιεχωβά σο τζιτζίνελα ι ατελείς τζενένγκε σο κερντέ εκ αμαρτία, αντικάς ο πρεσβύτεροι-ντα πλησιάνενα ντα βοηθίνενα ι τζενέν σο η κχανγκιρί ατσσικιαρέλα-λεν ντουρ. Μπουτ λένταρ βουρτισάλε κι κχανγκιρί επειδή ανταγιά διόρθωση, παρόλο σο αντάς λένγκε ντουκχ, βοηθιντάς-λεν τι αγαβέν πουμαρό λάθος.—Ψαλμός 141:5.
Σαρ ο τρόπος σο συμπεριφερίντιβελα ο Ιεχωβα οντουλέντε σο κερντέ εκ αμαρτία σικαβέλα ότι ισί λογικός, τζιτζίνελα ντα πφαμπόλα λένγκε;
5. Ο Ιεχωβά συγχωρίνελα-αμέν κάνα μετανιώνασα
Ο Ιησούς βακερντάς εκ παράδειγμας σο βοηθίνελα-αμέν τι αγαβάς σαρ νιωθίνελα ο Ιεχωβά κάνα εκ τζενό μετανιώνελα. Διαβάνεν Λουκάς 15:1-7 ντα σοράν συζητίνεν ι ερώτηση:
Σο σικλιαρέλα-τουτ ανταβά ι Ιεχωβάσκε;
Διαβάνεν Ιεζεκιήλ 33:11 ντα σοράν συζητίνεν ι ερώτηση:
Σο πρέπει τι κερέλ εκ τζενό για τι σικαβέλ ότι μετανιωσάλο;
Σαρ εκ τσομπάνης, αντικάς ο Ιεχωβά-ντα πφαμπόλα μπουτ πι μπρακένγκε
ΜΕΡΙΚΑ ΤΖΕΝΕ ΒΑΚΕΡΕΝΑ: «Νταράβα ότι, άμα κα βακεράβ κο πρεσβύτεροι μι αμαρτία, κα ατσσικιαρέν-μαν ντουρ κατά κχανγκιρί».
Σο κα βακερέας εκχέ τζενέσκε σο νιωθίνελα αντικάς;
ΧΑΝΙΚ ΛΑΦΙΝΤΖΑΡ
Άμα κερντάμ εκ μπαρί αμαρτία αλλά πφανγκιλό μπαγιά αμαρό γκι ντα αποφασιντάμ τι τσσιναβάς τι κεράς ο κακός, ο Ιεχωβά κα συγχωρίνελ-αμέν.
Σο Σικλιλάν;
Σόσκε ντικχάσα λατσσιπέ κάνα μουτθαβάσα αμαρέ αμαρτίες κο Ιεχωβά;
Σο πρέπει τι κεράς για τι συγχωρίντιβεν αμαρέ αμαρτίες;
Άμα κερντάμ εκ μπαρί αμαρτία, σόσκε πρέπει τι μανγκάς βοήθεια κατά πρεσβύτεροι;
ΡΟΝΤΕ
Σίκλιουβ σαρ εκ μουρς ντικχλάς καζόμ τζιτζισάλο λέσκε ο Ιεχωβά σαρ σικαβέλα ο εδάφιος Ησαΐας 1:18.
Σαρ προσπαθίνενα ο πρεσβύτεροι τι βοηθίνεν οντουλέν σο κερντέ εκ σοβαρή αμαρτία;
«Πρεσβύτεροι, Βοηθίνεν Οντουλέν σο Κερένα εκ Σοβαρή Αμαρτία» (Η Σκοπιά, Αύγουστος 2024)
Σκέφτινε σαρ σικαβέλα ο Ιεχωβά ντα η κχανγκιρί ότι πφαμπόλα ντα τζιτζίνελα οντουλένγκε σο κερντέ εκ αμαρτία ντα να μετανιώνενα.
Κι ιστορία «Έπρεπε τι Βουρτίναβ κο Ιεχωβά», σίκλιουβ σόσκε εκ τζενό σο νασλόας ντουρ κατά αλήθεια νιωσάλο ότι ο Ιεχωβά ταρτιντάς-λες πάλι πασέ πέστε.