Σαρ Βοηθίνελα ο Μανγκιπέ τι Κεράς Κουμάντος ι Νταρ

1. Καλά ισί μερικά πράγματα σο μπέκιμ ανένα αμένγκε νταρ;

ΣΚΕΦΤΙΝΕΝ σο αβιλό-πες ακαλέ πφραλένγκε. Ο Νέστορ ντα λέσκι ρομνί, η Μαρία, μανγκένας τι υπηρετίνεν οτθέ σο η ανάγκη ισινέ πο μπαρί.b Για τι κερέν-λες ανταβά, έπρεπε τι σικλιόν τι χαλαβέν πο χάνικ λοβέ. Όμως, νταρένας ότι να κα αβένας μπαγιά ευτυχισμέ άμα κα τζουβντιόνας πο χάνικ λοβέντζαρ. Κάνα ο Μπίνιαμ αβιλό Μάρτυρας ι Ιεχωβάσκο εκχέ τθεμέστε σο να μουκχέλα τι αβέλ-πες ο έργος, τζανέλας ότι κα τζάνας λέσαρ κόντρα. Ανταβά νταραβέλας-λες. Αλλά πο μπουτ νταρέλας πι τζενένταρ κάνα κα λένας αμπέρι λέσκε νεβέ θρησκειάκε. Η Βαλερί σικλιλί ότι τθερέλας εκ μπουτ σοβαρός καρκίνος ντα να ισινέ εύκολος τι αρακχέλ εκχέ γιατρός σο κα κερέλας ο χειρουργείος χωρίς τι τσσουβέλ λάκε ρατ. Σαρ αγαβάσα, νταρέλας ότι κα μερέλας.

2. Σόσκε χρειαζίντιβελα τι μαράς-αμέν τι κεράς κουμάντος αμαρί νταρ;

² Νταρασάλεν τουμέν ποτές ασακέ πραγματένταρ; Μπουτ αμένταρ νταρασάλαμ. Άμα να σικλιλάμ τι κεράς κουμάντος αμαρί νταρ, μπέκιμ κα τραμπίνας τι κεράς πράγματα σο κα κερέν ζιάνι κι φιλία σο τθεράσα ι Ιεχωβάσαρ. Ανταβά μανγκέλα ο Μπενγκ. Προσπαθίνελα επίσης τι χρησιμοποιήνελ ι νταρ για τι κερέλ-αμέν μα τι ντας καν κο νόμοι κι Ιεχωβάσκε ούτε κι εντολή τι βακεράς ο λατσσέ αμπέρια. (Αποκ. 12:​17) Ο Μπενγκ ισί πφιρνό, να τζιτζίνελα καεκχέσκε ντα τθερέλα μπαρί ζορ. Αλλά μπορίνενα τι αρακχαβέν-τουμέν λέσταρ. Σαρ;

3. Σο κα βοηθίνελ-αμέν τι κεράς κουμάντος αμαρί νταρ;

³ Άμα ισινάμ σίγουροι ότι ο Ιεχωβά μανγκέλα-αμέν ντα ισί πασέ αμέντε, ο Μπενγκ ναστί κα νταραβέλ-αμέν. (Ψαλμ. 118:6) Για παράδειγμας, ο τζενό σο γραφιντάς ο Ψαλμός 118 νακχλάς μπαρέ δυσκολίες. Τθερέλας μπουτέ ντουσμανίν, σο μερικοί τθερένας εξουσία (εδάφια 9, 10). Μπάζιμα, ο τζενέ ζορισκιαρένας-λες μπουτ (εδάφιος 13). Ντα ο Ιεχωβά ντινάας-λες πφαρί διόρθωση (εδάφιος 18). Αλλά βακερντάς: «Να κα νταράβ». Σόσκε να νταρέλας; Τζανέλας ότι παρόλο σο λέσκο Ντατ, ο Ιεχωβά, διορθωντάας-λες, μανγκέλας-λες μπουτ. Ισινέ σίγουρος ότι, σο-ντα τι νακχέλας, λέσκο λατσσό Ντεβέλ ισινέ πάντα οτθέ για τι βοηθίνελ-λες.​—Ψαλμ. 118:29.

4. Καλέ πραγματένταρ να κα νταράς άμα ισινάμ σίγουροι ότι ο Ντεβέλ μανγκέλα-αμέν;

⁴ Πρέπει τι αβάς σίγουροι ότι ο Ιεχωβά μανγκέλα-αμέν. Ανταβά κα βοηθίνελ-αμέν τι κεράς κουμάντος (1) ι νταρ ότι ναστί κα ντας αμαρέ φαμιλιάτε ο αναγκαία, (2) ι νταρ κατά τζενέ ντα (3) ι νταρ κατά μεριπέ. Ο πφραλά σο βακέρντιλε κι πρώτη παράγραφος μπορισάλε τι κερέν κουμάντος πουμαρί νταρ σόσκε ισινέ σίγουροι ότι ο Ντεβέλ μανγκέλα-λεν.

Ι ΝΤΑΡ ΟΤΙ ΝΑΣΤΙ ΚΑ ΝΤΑΣ ΑΜΑΡΕ ΦΑΜΙΛΙΑΤΕ Ο ΑΝΑΓΚΑΙΑ

5. Σο κα μπορίνελας τι ανέλ άγχος εκχέ Χριστιανόσκε σο τθερέλα φαμιλί; (Ντικχέν ι φωτογραφία κι ανγκλαϊνί σελίδα)

⁵ Εκ Χριστιανός λέλα σοβαρά ι ευθύνη τι ντελ ο αναγκαία πι φαμιλιάτε. (1 Τιμ. 5:8) Άμα τθερένα τουμέν-ντα φαμιλί, κο νασφαλιπέ κι Κορωνοϊόσκο μπέκιμ νταρένας ότι κα χασαρέν τουμαρί μπουτί. Μπέκιμ νταρένας ότι ναστί κα ανένας ο μαντρό τουμαρέ φαμιλιάτε ντα να κα ποκινένας ο ενοίκιος ή ο δάνειος ι κχερέσκο. Ντα μπέκιμ νταρένας ότι, άμα κα χασαρένας τουμαρί μπουτί, ναστί κα αρακχένας γιαβέρ. Ή, σαρ ο Νέστορ ντα η Μαρία, μπέκιμ πακιάνας ότι να αβέλα-πες τι τζουβντιόν πο χάνικ λοβέντζαρ. Ο Μπενγκ ντικχέλα ανταγιά νταρ ντα ισταβέλα οτθέ για τι κερέλ αμένγκε ζιάνι.

6. Σο μανγκέλα ο Μπενγκ τι κερέλ-αμέν τι πακιάς;

⁶ Ο Μπενγκ μανγκέλα τι κερέλ-αμέν τι πακιάς ότι ο Ιεχωβά να πφαμπόλα αμένγκε ντα ότι κορκορέ μαράσα-αμέν τι ανάς ο αναγκαία αμαρέ φαμιλιάκε. Οτθάρ, μπέκιμ τι αμντίνας ότι πρέπει τι κεράς σο νακχέλα αμαρέ βαστένταρ για τι ατσσικιαράς αμαρί μπουτί, ατζέ-ντα άμα ανταβά μανγκέλα τι βακερέλ ότι να κα ντας καν κο αρχές κι Γραφιάκε.

7. Καγιά σιγουριά ντέλα-αμέν ο Ιησούς;

⁷ Ο Ιησούς, σο τζανέλα πι Νταντές πο λατσσές σαριλένταρ, ντέλα-αμέν ι σιγουριά ότι αμαρό Ντεβέλ “τζανέλα καλά πράγματα τθεράσα ανάγκη πριν αμέν τι μανγκάς-λεν λέσταρ”. (Ματθ. 6:8) Ο Ιησούς τζανέλα επίσης ότι ο Ιεχωβά ισί έτοιμος τι ντελ-αμέν οντουλά σο τθεράσα ανάγκη. Σαρ Χριστιανοί, ισινάμ αντρέ κι φαμιλί κι Ντεβλέσκι. Ο Ιεχωβά ισί ο Σορό ανταλέ φαμιλιάκο, ντα μπορίνασα τι αβάς σίγουροι ότι κα κερέλ οντουβά σο βοβ βακερντάς τι γραφίντιβελ κο εδάφιος 1 Τιμόθεο 5:8.

8. (α) Σο κα βοηθίνελ-αμέν τι κεράς κουμάντος ι νταρ ότι να κα ντας αμαρέ φαμιλιάτε οντουλά σο τθερέλα ανάγκη; (Ματθαίος 6:​31-33) (β) Σαρ μπορίνασα τι μοιάζας κο αντρόγυνος σο γκερέλα χαμπέ εκχέ πφενιάκε σαρ ντικχάσα κι φωτογραφία;

⁸ Άμα ισινάμ σίγουροι ότι ο Ιεχωβά μανγκέλα αμέν ντα αμαρί φαμιλί, νανέ αμένγκε δύσκολος τι πακιάς ότι κα τθεράς οντουλά σο χρειαζίντιβασα. (Διαβάνεν Ματθαίος 6:​31-33) Ο Ιεχωβά μανγκέλα τι ντελ-αμέν οντουλά σο τθεράσα ανάγκη, ντα κερέλα-λες ανταβά μανγκιμάσαρ ντα αντράλ πι γκίσταρ. Κάνα λατσσαρντάς ι πφουβ, να ντινάς-αμέν σάντε ο πράγματα σο κα χρειαζίντιβαας για τι τζουβντιάς. Λατσσαρντάς μανγκιμάσαρ μπουτ πράγματα οπράλ κι πφουβ σο κα ντένας-αμέν μπαρί χαρά. (Γέν. 2:9) Ατζέ-ντα άμα μπάζιμα τθεράσα σάντε οντουλά σο χρειαζίντιβασα, ισί λατσσό μα τι μπιστράς ότι ντάσα-λεν πέρα σόσκε ο Ιεχωβά βοηθίνελα-αμέν. (Ματθ. 6:​11) Χρειαζίντιβελα τι ντας-αμέν γκοντί ότι σο-ντα μουκχάσα ακανά ισί μπουτ χουρντό ανγκλάλ οντουλέντε σο κα ντελ-αμέν αμαρό λατσσό Ντεβέλ, εμ ακανά εμ κο ντιβεσά σο κα αβέν. Ανταβά αγαντάς ο Νέστορ ντα η Μαρία.​—Ησ. 65:​21, 22.

9. Σο σικλιάσα κατά Νέστορ ντα κατά Μαρία;

⁹ Ο Νέστορ ντα η Μαρία τθερένας εκ σουκάρ κχερ ντα λατσσέ μπουτιά κι Κολομβία. Βον βακερντέ: «Σκεφτίναας τι τζουβντιάς πο απλά ντα τι κεράς πο μπουτ πράγματα ι Ιεχωβάσκε, αλλά νταράας ότι να κα αβάας ευτυχισμέ άμα κα τζουβντιάας πο χάνικ λοβέντζαρ». Σο βοηθιντάς-λεν τι κερέν κουμάντος πουμαρί νταρ; Αντέ πουμαρέ γκοντιάτε σαρέ οντουλά σο κερντάς λένγκε ο Ιεχωβά για τι σικαβέλ ότι μανγκέλα-λεν. Επειδή ισινέ σίγουροι ότι κα ντέλας-λεν οντουλά σο χρειαζίντιβενας, μουκχλέ πουμαρέ λατσσέ μπουτιά. Μπικιντέ πουμαρό κχερ ντα γκιλέ τι μπεσέν εκχέ τθανέστε σο η ανάγκη τι βακέρντιβεν ο αμπέρια ι Βασιλειάκε ισινέ πο μπαρί. Σαρ νιωθίνενα σο τραμπιντέ τι κερέν-λες ανταβά; Ο Νέστορ βακερέλα: «Ντικχλάμ καζόμ μπαγιά ισί ο εδάφιος Ματθαίος 6:​33. Πάντα τθεράας οντουλά σο χρειαζίντιβαας, ντα ισινάμ πο ευτυχισμέ ακανά».

Ι ΝΤΑΡ ΚΑΤΑ ΤΖΕΝΕ

10. Σόσκε νταρένα ο τζενέ ο εκ κατά γιαβέρ;

¹⁰ Οτθάρ μπερί σο ο Αδάμ ντα η Εύα γκιλέ κόντρα κο Ιεχωβά, ο τζενέ κερένα ζιάνι ο εκ ι γιαβερέσκε. (Εκκλ. 8:9) Για παράδειγμας, ισί τζενέ σο χρησιμοποιήνενα πουμαρί εξουσία μπέτι τροπόσαρ, γιαβερά κερένα μπαρό ζιάνι κο τζενέ, τσσαβέ κο σχολείος προσβαλίνενα ντα νταραβένα πουμαρέ συμμαθητέν, ντα γιαβερά τζενέ να τζιτζίνενα ούτε πουμαρέ φαμιλιάκε. Άκ’ σόσκε ο τζενέ νταρένα κατά γιαβερά τζενέ! Σαρ μανγκέλα τι χρησιμοποιήνελ ο Μπενγκ ι νταρ κατά τζενέ;

11, 12. Σαρ χρησιμοποιήνελα ο Μπενγκ ι νταρ κατά τζενέ για τι κερέλ αμένγκε ζιάνι;

¹¹ Ο Μπενγκ μανγκέλα τι κερέλ-αμέν τι νταράς αζόμ μπουτ κατά τζενέ σο κα τσσιναβάς τι βακεράς ο λατσσέ αμπέρια ή κα τσσιναβάς τι κεράς γιαβερά πράγματα ι Ιεχωβάσκε. Κερντάς μερικές κυβερνήσεις τι τσσιναβέν αμαρό έργος ντα τι τζαν αμέντζαρ κόντρα. (Λουκ. 21:​12· Αποκ. 2:​10) Κι Μπενγκέσκο ντουνιάς, μπουτ τζενέ πφιραβένα λάφια σο νανέ μπαγιά για τι κερέν ζιάνι ι Ιεχωβάσκε Μαρτυρένγκε. Τζενέ σο πακιάνα ανταλά λάφια μπέκιμ πρασάνα-αμέν ή ατζέ-ντα μανγκένα τι νταπέν-αμέν. (Ματθ. 10:​36) Κερένα αμένγκε εντύπωση σαρέ ανταλά σο κερέλα ο Μπενγκ; Νάα. Κερέλας-λεν ι πρώτε Χριστιανόνγκε-ντα.​—Πράξ. 5:​27, 28, 40.

¹² Ο Μπενγκ να νταραβέλα-αμέν σάντε αντράλ κατά κυβερνήσεις σο τζάνα αμέντζαρ κόντρα. Μερικοί νταρένα πο μπουτ οντουλένταρ σο κα κερέλ λένγκι φαμιλί κάνα κα σικλιόλ ότι αβιλέ Μάρτυρες παρά κατά νταπ σο μπέκιμ τι χαν. Πφαμπόνα μπουτ πουμαρέ τζενένγκε ντα μανγκένα τι σικλιόν ντα τι μανγκέν βον-ντα ι Ιεχωβάς. Πφανγκιόλα λένγκο γκι κάνα ασουνένα πουμαρέ τζενέν μα τι κερέν σεβαστικός λάφι ι αληθινέ Ντεβλέσκε ντα λέσκε υπηρετόνγκε. Όμως, μπάζιμα ασακέ τζενέ σο κι αρχή τζάνας κόντρα, σοράν σικλιλέ ι αλήθεια. Αλλά βακερέν χάι ότι αμαρέ τζενέ να μανγκένα τι τθερέν καέκ σχέση αμέντζαρ ιτιρί κατά νεβέ πράγματα σο πακιάσα. Σο κα κεράς;

13. Κάνα αμαρέ τζενέ κερένα-αμέν πέρα, σαρ βοηθίνελα-αμέν η σιγουριά ότι ο Ντεβέλ μανγκέλα-αμέν; (Ψαλμός 27:10)

¹³ Κοβλιαρένα αμαρί ντουκχ ο μπουτ σουκάρ λάφια ι εδαφιόσκε Ψαλμός 27:​10. (Διαβάνεν) Κάνα ντάσα-αμέν γκοντί καζόμ μπουτ μανγκέλα-αμέν ο Ιεχωβά, να νταράσα σο κα αβέλ-πες ατζέ-ντα άμα αμαρί φαμιλί κα κερέλ-αμέν πέρα. Ντα ισινάμ σίγουροι ότι κα ευλογίνελ-αμέν σο κεράσα υπομονή. Ο Ιεχωβά, μπουτ πο λατσσές σαριλένταρ, μπορίνελα τι ατσσικιαρέλ-αμέν κι ζωή, τι ντελ-αμέν ι ζορ τι αβάς ήρεμοι ντα τι βοηθίνελ-αμέν τι ατσσάς πασέ λέστε! Ανταβά αγαντάς ο Μπίνιαμ.

14. Σο σικλιάσα κατά Μπίνιαμ;

¹⁴ Ο Μπίνιαμ αβιλό Μάρτυρας ι Ιεχωβάσκο παρόλο σο τζανέλας ότι κα τζάνας λέσαρ μπουτ μπαρί κόντρα. Ντικχέν σαρ κερντάς κουμάντος ι νταρ κατά τζενέ επειδή τζανέλας ότι ο Ιεχωβά μανγκέλα-λες. Βοβ βακερέλα: «Η κόντρα ισινέ πο μπαρί οντουλάταρ σο τθεράβας μι γκοντιάτε. Αλλά οντουβά σο νταράβας ατζέ πο μπουτ κατά κόντρα ι κυβερνησιάκι ισινέ η κόντρα μι φαμιλιάκι. Νταράβας ότι μι απόφαση τι αβάβ Μάρτυρας ι Ιεχωβάσκο κα πφανγκέλας ο γκι μι νταντέσκο σο να ισινέ κι αλήθεια ντα ότι μι φαμιλί κα βακερέλας ότι ισινόμας άχρηστος». Αλλά ο Μπίνιαμ ισινέ σίγουρος ότι ο Ιεχωβά πάντα αρακχαβέλα οντουλέν σο μανγκέλα. Βοβ βακερέλα: «Ανάβας μι γκοντιάτε σαρ βοηθιντάας ο Ιεχωβά γιαβερέν τι νταϊντίνεν ο προβλήματα ι λοβέντζαρ, ι αδικία ντα ι βία. Τζανάβας ότι, άμα κα ατσσάβας πασέ κο Ιεχωβά, βοβ κα ευλογίνελας-μαν. Ασταρντέ-μαν μπουτ φαρ ο ασκέρια, ατζέ-ντα βασανιντέ-μαν, αλλά αζομάν ντικχλόμ μι γιακχίντζαρ καζόμ μπουτ βοηθίνελα-αμέν ο Ιεχωβά άμα ατσσάσα πιστοί λέστε». Ο Μπίνιαμ ντικχέλας σαρ Ντατ ι Ιεχωβάς, ντα λέσκε λαός σαρ πι φαμιλί.

Ι ΝΤΑΡ ΚΑΤΑ ΜΕΡΙΠΕ

15. Σόσκε ισί λατσσό μπάζιμα τι νταράς κατά μεριπέ;

¹⁵ Η Γραφή βακερέλα ότι ο μεριπέ ισί εκ ντουσμάνι. (1 Κορ. 15:​25, 26) Σάντε σο σκεφτίνασα ο μεριπέ μπέκιμ αγχώνασα, ντα πο μπουτ κάνα νασφάλιβασα πφαρές αμέν ή εκ τζενό σο μανγκάσα μπουτ. Σόσκε νταράσα κατά μεριπέ; Επειδή ο Ιεχωβά κερντάς-αμέν τι μανγκάς τι τζουβντιάς για πάντα. (Εκκλ. 3:​11) Η νταρ κατά μεριπέ μπορίνελα τι βοηθίνελ-αμέν τι αρακχαβάς αμαρί ζωή. Για παράδειγμας, τσσίντελα-αμέν τι τραμπίνας τι χας χαμπέ σο κα κερέλ αμένγκε λατσσιπέ, τι κεράς γυμναστική, τι τζας κο γιατρός ντα τι λας φάρμακα κάνα χρειαζίντιβελα ντα μα τι τσσουβάς σε κίνδυνος αμαρί ζωή σινανέ.

16. Σαρ μανγκέλα τι χρησιμοποιήνελ ο Μπενγκ ι νταρ κατά μεριπέ;

¹⁶ Ο Μπενγκ τζανέλα ότι ισί αμένγκε σημαντική αμαρί ζωή. Βακερέλα όμως ότι κα μουκχάς σαρέ οντουλά σο τθεράσα, ατζέ-ντα αμαρί φιλία ι Ιεχωβάσαρ, για τι ατσσάς τζουβντέ. (Ιώβ 2:4, 5) Σο μπαρό λάθος κερέλα! Αλλά επειδή ο Μπενγκ ισί οντουβά «σο τθερέλα ι ζορ τι ανέλ μεριπέ», χρησιμοποιήνελα ι νταρ κατά μεριπέ για τι κερέλ-αμέν τι μουκχάς ι Ιεχωβάς. (Εβρ. 2:​14, 15) Μπάζιμα, τζενέ σο ισί κι Μπενγκέσκε βαστά βακερένα ότι κα μουνταρέν-αμέν άμα να κα μουκχάς αμαρί πίστη. Γιαβερά φαρ, ο Μπενγκ μπέκιμ τι ντικχέλ ότι τθεράσα εκ πφαρό νασφαλιπέ ντα τι χρησιμοποιήνελ-λες για τι κερέλ-αμέν τι νασάς κατά Ιεχωβά. Γιατροί ή αμαρέ τζενέ σο νανέ κι αλήθεια μπέκιμ ζορίνενα-αμέν τι τσσουβάς ρατ, σο ανταβά τζάλα κόντρα κο νόμος κι Ντεβλέσκο. Ή μπέκιμ εκ τζενό τι προσπαθίνελ τι κερέλ-αμέν τι λας εκ γιαβέρ θεραπεία σο τζάλα κόντρα κο αρχές κι Γραφιάκε.

17. Σόσκε δεν πρέπει τι νταράς κατά μεριπέ σαρ βακερένα ο εδάφια Ρωμαίους 8:​37-39;

¹⁷ Παρόλο σο να μανγκάσα τι μεράς, τζανάσα ότι ο Ιεχωβά να κα τσσιναβέλ τι μανγκέλ-αμέν άμα αβιλό-πες ανταβά. (Διαβάνεν Ρωμαίους 8:​37-39) Κάνα ο αμαλά ι Ιεχωβάσκε μερένα, βοβ ατσσικιαρέλα-λεν πι γκοντιάτε, σαρ τι αβένας τζουβντέ. (Λουκ. 20:​37, 38) Μπεσέλα σαρ σαρ τι ανέλ-λεν πάλι κι ζωή. (Ιώβ 14:​15) Ο Ιεχωβά ποκιντάς πααλίς για τι “τθεράς ζωή για πάντα”. (Ιωάν. 3:​16) Τζανάσα καζόμ μπουτ μανγκέλα-αμέν ο Ιεχωβά ντα καζόμ μπουτ πφαμπόλα αμένγκε. Οτθάρ, αντίς τι μουκχάς ι Ιεχωβάς κάνα ισινάμ νασφαλέ ή ισί ανγκλ’ αμέντε ο μεριπέ, ντάσα λέσκε μπέσα για τι κοβλιαρέλ αμαρί ντουκχ, τι ντελ-αμέν σοφία ντα ζορ. Ανταβά κερντάς η Βαλερί ντα λάκο ρομ.​—Ψαλμ. 41:3.

18. Σο σικλιάσα κατά Βαλερί;

¹⁸ Κάνα η Βαλερί ισινέ 35 μπρεσένγκι, σικλιλί ότι τθερέλας εκ μπουτ σοβαρός καρκίνος. Ντικχέν σαρ βοηθιντάς-λα ο μανγκιπέ τι κερέλ κουμάντος ι νταρ κατά μεριπέ. Βόι βακερέλα: «Κάνα σικλιλάμ ότι τθεράβας καρκίνος, αλλαξάλι σαρί αμαρί ζωή. Χρειαζίντιβελας τι κεράβ εκ μπουτ μπαρό χειρουργείος για μα τι μεράβ. Κερντόμ λάφι μπουτέ γιατρόντζαρ, αλλά καέκ να μανγκέλας τι κερέλ ο χειρουργείος χωρίς τι τσσουβέλ μάνγκε ρατ. Νταράβας, αλλά σο-ντα τι αβέλας-πες, να μανγκάβας τι τσσουβάβ ρατ αφού ο Ντεβέλ βακερέλα αμένγκε μα τι τσσουβάς. Σαρί μι ζωή ο Ιεχωβά σικαντάας μάνγκε καζόμ μπουτ μανγκέλα-μαν. Ακανά τθεράβας εκ ευκαιρία τι σικαβάβ λέσκε με καζόμ μπουτ μανγκάβα-λες. Κάθε φαρ σο λάβας μπέτι αμπέρια, μανγκάβας ατζέ πο μπουτ τι κεράβ ο γκι ι Ιεχωβάσκο ντα μα τι μουκχάβ ι Μπενγκές τι νικίνελ. Τελικά, κερντόμ ο χειρουργείος χωρίς τι τσσουβάβ ρατ ντα γκιλό μπουτ λατσσές. Παρόλο σο ατζέκ ατζέκ τθεράβα χάνικ προβλήματα κι υγεία, ο Ιεχωβά πάντα ντέλα-αμέν σο-ντα χρειαζίντιβασα. Για παράδειγμας, κο σαββατοκύριακος πριν τι σικλιάς ότι τθεράβας καρκίνος, κερντάμ κι συνάθροιση ο μάθημας “Αντιμετωπίστε με Θάρρος τις Αντιξοότητες της Εποχής Μας”.c Ανταβά μάθημας κοβλιαρντάς μπουτ αμαρί ντουκχ. Διαβαντάμ-λες μπουτ φαρ. Ασακέ μαθήματα ντα αμαρό λατσσό πνευματικός πρόγραμμας βοηθιντέ μαν ντα μι ρομές τι τθεράς ειρήνη αντρ’ αμέντε, τι αβάς ήρεμοι ντα τι λας σωστές αποφάσεις».

ΚΕΡΑΣΑ ΚΟΥΜΑΝΤΟΣ ΣΟ-ΝΤΑ ΝΤΑΡ ΤΘΕΡΑΣΑ

19. Σο κα αβέλ-πες ατζεχάνικ;

¹⁹ Ι Ιεχωβάσκε βοηθειάσαρ, Χριστιανοί σαρό κο ντουνιάς κερντέ κουμάντος μπαρέ δυσκολίες ντα γκιλέ κόντρα κο Μπενγκ. (1 Πέτρ. 5:8, 9) Μπορίνενα τι κερέν-λες τουμέν-ντα ανταβά. Ατζεχάνικ, ο Ιεχωβά κα ντελ κο Ιησούς ντα οντουλέντε σο κα κυβερνίνεν λέσαρ ι εντολή τι “καταστραφίνεν σαρέ ο μπέτι πράγματα σο κερέλα ο Μπενγκ”. (1 Ιωάν. 3:8) Σοράν ανταλέσταρ, ο υπηρέτες ι Ντεβλέσκε κι πφουβ “να κα νταρέν καεκχέ πραγμάσταρ ντα τίποτα να κα κερέλ-λεν τι ιζράν”. (Ησ. 54:​14· Μιχ. 4:4) Μέχρι τι αβέλ-πες ανταβά όμως, χρειαζίντιβελα τι μαράς-αμέν τι κεράς κουμάντος σο-ντα νταρ τθεράσα.

20. Σο κα βοηθίνελ-αμέν τι κεράς κουμάντος σο-ντα νταρ τθεράσα;

²⁰ Δεν πρέπει τι τσσιναβάς τι μπαριαράς αμαρί σιγουριά ότι ο Ιεχωβά μανγκέλα ντα αρακχαβέλα πι υπηρετόν. Κα βοηθίντιβας άμα κα σκεφτίνας ντα κα κεράς λάφι οντουλένγκε σο κερντάς ο Ιεχωβά ανγκλέ για τι αρακχαβέλ πι υπηρετόν. Ντα μπορίνασα τι ντας-αμέν γκοντί σαρ βοηθιντάς-αμέν τι ντας πέρα μπαρέ δυσκολίες. Ι Ιεχωβάσκε βοηθειάσαρ, μπορίνασα τι κεράς κουμάντος σο-ντα νταρ τθεράσα!​—Ψαλμ. 34:4.