Τι Ατσσικιαρές ι Ενότητα κι Κχανγκιρί

Κάνα ισινάμ γιεκ αμαρέ πφραλέντζαρ, νιωθίνασα σαρ ο βασιλιάς Δαβίδ: «Καζόμ λατσσό ντα καζόμ σουκάρ ισί τι τζουβντιόν ο πφραλά μαζί ντα ενωμέ!» (Ψαλμός 133:1) Αμαρί ενότητα να αβέλα κορκορί. Ο κάθε εκ αμένταρ κχελέλα πο ρόλος για τι ατσσικιαράς-λα.

1. Καβά σουκαριπέ τθερέλα ι Ντεβλέσκο λαός;

Άμα κα τζας εκχέ συναθροισιάτε σε εκ γιαβέρ τθεμ, παρόλο σο μπορεί μα τι αγαβές ι τσσιπ, κα νιωθίνες άνετα, σουκάρ ντα ότι μανγκένα-τουτ. Σόσκε; Επειδή διαβάνασα ι Αγία Γραφή ντα χρησιμοποιήνασα παντού ο ίδια έντυπα ντα βίντεα. Ντα μαράσα-αμέν μπουτ τι σικαβάς αγάπη ο εκ κο γιαβέρ. Κάι-ντα τι τζουβντιάσα, σαρέ “χρησιμοποιήνασα με σεβασμός ο ναβ ι Ιεχωβάσκο ντα υπηρετίνασα-λες σαρέ γιεκ”.​—Σοφονίας 3:9.

2. Σο μπορίνεσα τι κερές για τι ανές ντα τι ατσσικιαρές ι ενότητα;

«Μανγκέν μπουτ ο εκ ι γιαβερές αντράλ τουμαρέ γκίσταρ». (1 Πέτρου 1:​22) Σαρ μπορίνεσα τι κερές ανταγιά συμβουλή; Αντίς τι τσσουβές σημασία κο ατέλειες κι γιαβερένγκε, προσπάθινε τι ντικχές ο λατσσέ ιδιότητες σο τθερένα. Μα κερ παρέα σάντε τζενέντζαρ σο μπεϊντίνενα ο ίδια πράγματα τούσαρ, αλλά τι προσπαθίνες τι σικλιός πφραλέν ντα πφενίν σο ισί διαφορετικοί τούταρ. Μπορίνασα επίσης τι προσπαθίνας μπουτ τι νικαβάς ριζάσαρ σο-ντα μπέτι άποψη μπέκιμ τι τθεράς ι γιαβερένγκε.​—Διαβάνεν 1 Πέτρου 2:​17.a

3. Σο κα κερές άμα να συμφωνίνεσα εκχέ πφραλέσαρ;

Ισινάμ ενωμέ, αλλά ισινάμ ατελείς-ντα. Μπάζιμ, στεναχωρίνασα ή ατζέ-ντα πφανγκάσα ο γκι ο εκ ι γιαβερέσκο. Οτθάρ, ο Λάφι ι Ντεβλέσκο βακερέλα αμένγκε “τι συγχωρίνας ο εκ ι γιαβερές”, ντα συνεχίνελα: «Σαρ ο Ιεχωβά συγχωριντάς-τουμέν αντράλ πι γκίσταρ, αντικάς τι κερέν τουμέν-ντα». (Διαβάνεν Κολοσσαείς 3:​13) Πφανγκλάμ ο γκι ι Ιεχωβάσκο μπουτ φαρ, αλλά βοβ συγχωριντάς-αμέν. Οτθάρ μπεκλεντίνελα αμένταρ τι συγχωρίνας αμαρέ πφραλέν. Άμα αγαντάν ότι πφανγκλάν ο γκι εκχέ τζενέσκο, τζα πρώτα τούι για τι λύνες ο πρόβλημας.​—Διαβάνεν Ματθαίος 5:​23, 24.b

ΧΑΝΤΖΟΥΒ ΠΟ ΑΧΟΡΤ

4. Τι νασκιαρές ντουρ ο μπέτι απόψεις σο μπέκιμ τθερέσα ι γιαβερένγκε

Πρέπει τι μανγκάς σαρέ αμαρέ πφραλέν. Αλλά μπέκιμ τι αβέλα αμένγκε μπουτ δύσκολος τι δεχτίνας εκχέ τζενές σο ντικχίντιβελα ότι ισί διαφορετικός αμένταρ. Σο μπορίνελα τι βοηθίνελ-αμέν; Διαβάνεν Πράξεις 10:​34, 35 ντα σοράν συζητίνεν ο ερωτήσεις:

• Ο Ιεχωβά δεχτίνελα σαρ Μάρτυρες πιρέ σαρέ ι τζενέν. Σαρ πρέπει ανταβά τι επηρεάνελ οντουλά σο πακιάσα τούι ι τζενένγκε σο μπαριλέ διαφορετικά τούταρ;

• Καλά λάθος απόψεις τθερένα ο τζενέ ι γιαβερένγκε οτθέ σο μπεσέσα ντα τούι δεν πρέπει τι δεχτίνες-λεν;

Διαβάνεν 2 Κορινθίους 6:​11-13 ντα σοράν συζητίνεν ι ερώτηση:

• Τούι σο πακιάσα, σαρ κα μπορίνεας τι αβές πο πασέ πφραλέντζαρ ντα πφενίντζαρ σο μπαριλέ διαφορετικά τούταρ;

5. Τι συγχωρίνες αντράλ τι γκίσταρ ντα τι κερές ειρήνη

Ο Ιεχωβά συγχωρίνελα-αμέν αντράλ πι γκίσταρ παρόλο σο αμέν ποτές να κα χρειαζίντιβελ τι συγχωρίνας-λες. Διαβάνεν Ψαλμός 86:5 ντα σοράν συζητίνεν ο ερωτήσεις:

• Σο σικλιάσα ανταλέ εδαφιόσταρ ι Ιεχωβάσκε;

• Σόσκε τθερέσα εκτίμηση σο ο Ιεχωβά συγχωρίνελα;

• Καλά περιπτώσεις κα μπορίνενας τι ζορισκιαρέν-αμέν τι τζας-λεν λατσσές ι γιαβερέντζαρ;

Σαρ μπορίνασα τι μοιάζας κο Ιεχωβά ντα τι ατσσάς ενωμέ αμαρέ πφραλέντζαρ ντα πφενίντζαρ; Διαβάνεν Παροιμίες 19:​11 ντα σοράν συζητίνεν ι ερώτηση:

• Κάνα εκ τζενό ενοχλίνελα-τουτ ή προσβαλίνελα-τουτ, σο κα μπορίνεας τι κερές για τι τζαν πο λατσσές ο πράγματα;

Μπάζιμα, προσβαλίνασα ι γιαβερέν. Κάνα αβέλα-πες ανταβά, σο πρέπει τι κεράς; Ντικχέν ο ΒΙΝΤΕΟΣ ντα σοράν συζητίνεν ι ερώτηση:

ΒΙΝΤΕΟΣ: Κάνα Κεράσα Ειρήνη Τθεράσα Ευλογίες (6:01)

• Σαρ ντικχλάμ κο βίντεος, σαρ κερντάς ειρήνη η πφεν;

6. Τι προσπαθίνες τι ντικχές ο λατσσέ πράγματα κο πφραλά ντα κο πφενιά

Κάνα σικλιάσα πο λατσσές αμαρέ πφραλέν ντα πφενίν, ντικχάσα εμ ο λατσσέ ιδιότητες σο τθερένα αλλά εμ λένγκε αδυναμίες. Σαρ κα ντας σημασία κο λατσσέ ιδιότητες σο τθερένα; Ντικχέν ο ΒΙΝΤΕΟΣ ντα σοράν συζητίνεν ι ερώτηση:

ΒΙΝΤΕΟΣ: Αβάσα πο Σουκάρ! (5:10)

• Σο κα βοηθίνελ-τουτ τι ντικχές ο λατσσέ ιδιότητες τι πφραλένγκε;

Ο Ιεχωβά ντέλα σημασία κο λατσσέ ιδιότητες σο τθεράσα. Διαβάνεν 2 Χρονικών 16:​9α ντα σοράν συζητίνεν ι ερώτηση:

• Σαρ νιωθίνεσα σο τζανέσα ότι ο Ιεχωβά ντέλα σημασία κο λατσσέ ιδιότητες σο τθερέσα;

ΧΑΝΙΚ ΛΑΦΙΝΤΖΑΡ

Μπορίνεσα τι ατσσικιαρές ι ενότητα κι κχανγκιρί κάνα συγχωρίνεσα ι γιαβερέν ντα κάνα σικαβέσα ότι μανγκέσα σαρέ τι πφραλέν ντα τι πφενίν.

Σο Σικλιλάν;

• Σαρ κα νασκιαρές ντουρ ο μπέτι απόψεις σο μπέκιμ τι τθερές ι γιαβερένγκε;

• Σο κα κερές άμα να συμφωνίνεσα εκχέ πφραλέσαρ;

• Σόσκε πρέπει τι συγχωρίνες σαρ ο Ιεχωβά;

ΡΟΝΤΕ

Σίκλιουβ σαρ βοηθίνελα-αμέν εκ παράδειγμας ι Ιησούσκο μα τι κρίνας ι γιαβερέν.

Νίκαβ ο Κας (6:56)

Πρέπει τι βακεράς συγνώμη άμα πακιάσα ότι να φταίνασα;

«Συγνώμη​—Ο Κλειδίς για τι Τθεράς Ειρήνη ι Γιαβερέντζαρ» (Η Σκοπιά 1 Νοεμβρίου 2002)

Ντικχ σαρ σικλιλέ μερικά τζενέ μα τι ξεχωρίνεν ι γιαβερέν.

Μα Κρίνεν ι Γιαβερέν Κατά Εμφάνιση Λένγκι (5:06)

Σίκλιουβ σαρ μπορίνεσα τι λύνες εκ θέμας σο τθερέσα εκχέ τζενέσαρ πριν τι επηρεάντιβελ η ειρήνη αντρέ κι κχανγκιρί.

«Τι Λύνεν Τουμαρέ Θέματα ι Γιαβερέντζαρ Τροπόσαρ σο Σικαβέλα Αγάπη» (Η Σκοπιά, Μάιος 2016)