Ο Ιωσήφ ισινέ εκ κατά πο χουρντέ τσσαβέ σο τθερέλας ο Ιακώβ. Ο πο μπαρέ πφραλά λέσκε ντικχένας ότι ο Ιωσήφ ισινέ ο πο αγαπημέ τσσαβό λένγκε νταντέσκο. Σαρ αμντίνεσα ότι νιωθίνενας ανταλέσκε; Ζηλίνενας-λες ντα μισίνενας-λες. Κάνα ο Ιωσήφ ντικχλάς μερικά περίεργα σουνέ, βακερντάς-λεν πι πφραλέντε. Βον αμντισάλε ότι ανταλά σουνέ σικαβένας ότι εκ ντιβές κα περένας κοτσίντζαρ ανγκλά-λέστε. Οτθάρ τσσουντέ λέσκε ατζέ πο μπουτ χολί!

Εκ ντιβές, ο πφραλά ι Ιωσηφίσκε αρακχαβένας ι μπρακέν πασέ κο τθεμ Συχέμ. Ο Ιακώβ μπουτσσαντάας τον Ιωσήφ τι ντικχέλ σαρ ισί ο πράγματα οτθέ. Βον ντικχλέ ντουράλ τι αβέλ ο Ιωσήφ ντα βακερντέ ο εκ κο γιαβέρ: “Αβέλα ο τσσαβό σο ντικχέλα σαβέ τι μανγκές σουνέ. Ελάν τι μουνταράς-λες!” Αντικάς καπτιντέ-λες ντα τσσουντέ-λες εκχέ γουρνάτε σο ισινέ μπουτ αχόρτ. Αλλά ο Ιούδας, εκ κατά πφραλά λέσκε, βακερντάς: “Μα μουνταρέν-λες! Πο λατσσές τι μπικινάς-λες για τι αβέλ δούλος.” Αντικάς μπικιντέ-λες για 20 κομμάτια ασήμι μερικέ τζενέντε κατά Μαδιάμ σο ισινέ έμποροι ντα τζάνας κι Αίγυπτος.

Σοράν ο πφραλά λέσκε λιντέ εκ κατά σέα σο ιρίλας ο Ιωσήφ, μακχλέ-λες ρατ εκχέ μπουσνιάταρ, μπουτσσαντέ-λες πουμαρέ νταντέστε ντα βακερντέ: “Ανταβά νανέ εκ κατά σέα τι τσσαβέσκε;” Ο Ιακώβ αμντισάλο ότι εκ άγριος ζώος χαλάας τον Ιωσήφ. Αζομάν πφανγκιλό λέσκο γκι. Καέκ να μπορίνελας τι λοκχιαρέλ λέσκι ντουκχ.

Κι Αίγυπτος, ο Ιωσήφ μπικίντιλο σαρ δούλος εκχέ τζενέστε σο τθερέλας μπαρί εξουσία ντα βακέρντιβελας Πετεφρής. Αλλά ο Ιεχωβά ισινέ με τον Ιωσήφ. Ο Πετεφρής ντικχλάς ότι ο Ιωσήφ ισινέ λατσσό πι μπουτιάτε ντα μπορίνελας τι ντελ μπέσα λέστε. Μπουτ σουγκό, ο Ιωσήφ αβιλό υπεύθυνος σαρέ οντουλέντε σο τθερέλας ο Πετεφρής.

Η ρομνί του Πετεφρή ντικχλάς ότι ο Ιωσήφ ισινέ μπουτ σουκάρ ντα ζουρανό. Κάθε ντιβές μανγκέλας κατά Ιωσήφ τι σοβέλ λάσαρ. Σο κα κερέλας ο Ιωσήφ; Να μανγκέλας ντα βακερέλας: “Όχι! Ανταβά ισί λάθος. Μο κύριος ντέλα-μαν μπέσα ντα τούι ισινάν λέσκι ρομνί. Άμα κα σοβάβ τούσαρ, κα κεράβ αμαρτία ανγκλάλ κο Ντεβέλ!”

Εκ ντιβές η ρομνί του Πετεφρή μανγκλάς τι αναγκάνελ τον Ιωσήφ τι σοβέλ λάσαρ. Καπτιντάς λέσκε σέα, αλλά βοβ νασλό τθαβντιμάσαρ. Κάνα ο Πετεφρής βουρτισάλο πι κχερέστε, βόι βακερντάς λέσκε ότι ο Ιωσήφ μανγκλάς τι σοβέλ λάσαρ. Όμως ανταβά να ισινέ μπαγιά. Ο Πετεφρής χολιασάλο μπουτ ντα τσσουντάς τον Ιωσήφ κι φυλακή. Αλλά ο Ιεχωβά να μπισταρντάς τον Ιωσήφ.

Καζόμ ο Ιωσήφ ισινέ κι φυλακή, ο βασιλιάς κι Αίγυπτος, ο Φαραώ, ντικχλάς μερικά σουνέ σο καέκ να αγαβέλας σο μανγκένας τι βακερέν. Εκ λέσκε υπηρετόνταρ βακερντάς κο Φαραώ ότι ο Ιωσήφ μπορίνελας τι αγαβέλ σο μανγκένας τι βακερέν ο σουνέ σο ντικχλάας. Οτθάρ ο Φαραώ μανγκλάς τι γκερέν λέσκε σουγκό τον Ιωσήφ.

Ο Φαραώ πουτσλάς-λες: “Μπορίνεσα τι εξηγίνες μο σουνέ;” Ο Ιωσήφ βακερντάς κο Φαραώ: “Εφτά μπρεσά η Αίγυπτος κα τθερέλ μπερεκέτι χαμπέ, αλλά σοράν κα αβέν εφτά μπρεσά σο κα περέλ μποκχ. Τράμπινε εκχέ γκοντιαβέρ τζενές τι γκίντελ κι νάκρη πράγματα χαμάσκε για μα τι μποκχάλιβελ το λαός”. Ο Φαραώ βακερντάς: “Τραμπίναβα τουτ! Σοράν μάνταρ κα αβές ο πο μπαρό τζενό κι Αίγυπτος!” Σαρ τζανέλας ο Ιωσήφ σο μανγκένας τι βακερέν ο σουνέ ι Φαραώσκε; Ο Ιεχωβά ισί οντουβά σο βοηθιντάς-λες.

Ο εφτά μπρεσά σο αβιλέ, ο Ιωσήφ γκίντελας κι νάκρη πράγματα χαμάσκε. Σοράν, αβιλί μποκχ σαρί κι πφουβ, αβιλό ντιπ αντικάς σαρ βακερντάας ο Ιωσήφ. Αβένας σαρέ κατά τθεμά τζενέ για τι κινέν χαμπίματα κατά Ιωσήφ. Λέσκο ντατ, ο Ιακώβ, ασουντάς ότι η Αίγυπτος τθερέλα μπερεκέτι χαμπίματα, οτθάρ μπουτσσαντάς 10 κατά τσσαβέ σο τθερέλας για τι κινέν χάνικ χαμπίματα.

Ο τσσαβέ ι Ιακωβίσκε γκιλέ κο Ιωσήφ, ντα βοβ αγαντάς-λεν αμέσως. Αλλά λέσκε πφραλά να τζανένας ότι βοβ ισινέ ο Ιωσήφ. Πελέ τελέ κοτσίντζαρ ανγκλά-λέστε, σαρ ντικχλάας σουνό κάνα ισινέ τερνό. Ο Ιωσήφ μανγκέλας τι σικλιόλ άμα λέσκε πφραλά μισίνενας-λες ατζέκ. Οτθάρ, βακερντάς λένγκε: “Ισινέν κατάσκοποι. Μανγκένα τι σικλιόν κατέ ισινάμ μπίζουρανε”. Βον βακερντέ: “Όχι! Ισινάμ 12 πφραλά κατά Χαναάν. Ο εκ πφραλ αμαρό ισί μουλό ντα ο πο χουρντό ισί αμαρέ νταντέσαρ”. Αζομάν ο Ιωσήφ βακερντάς λένγκε: “Ανέν μάνγκε τουμαρέ χουρντέ πφραλές ντα κα πακιάβ-τουμέν”. Σοράν λέσκε πφραλά βουρτισάλε πουμαρέ νταντέστε.

Κάνα μπιτισάλε λένγκε χαμπίματα, ο Ιακώβ μπουτσσαντάς πάλι πι τσσαβέν κι Αίγυπτος. Ανταγιά φαρ λιντέ πουμέντζαρ εμ πουμαρέ χουρντέ πφραλές σο βακερένας λέσκε Βενιαμίν. Για τι δοκιμάνελ πι πφραλέν, ο Ιωσήφ τσσουντάς κι τσάντα του Βενιαμίν σο τθερέλας αντρέ γκιβ πο ασημένιος ποτήρι ντα σοράν κατηγοριντάς πι πφραλέν ότι τσορντέ-λες. Κάνα ο υπηρέτες ι Ιωσηφίσκε αρακχλέ ο ποτήρι αντρέ κι τσάντα σο τθερέλας ο Βενιαμίν, ο πφραλά λέσκε ντιλίντιλε. Μολιντέ τον Ιωσήφ τι τιμωρίνελ λεν ντα όχι λένγκε χουρντέ πφραλές.

Ακανά ο Ιωσήφ τζανέλας ότι λέσκε πφραλά αλλαξάλεας. Ναστί γκεραβέλας γιαβέρ οντουλά σο νιωθίνελας. Αρχισάλο τι ροβέλ ντα βακερντάς: “Ισινόμ τουμαρό πφραλ ο Ιωσήφ. Τζουβντιόλα ατζέκ μο ντατ;” Λέσκε πφραλά ναστί πακιάνας-λες ανταβά. Βοβ βακερντάς λένγκε: “Μα νιωθίνεν μπέτι οντουλέσκε σο κερντέν μάνγκε. Ο Ντεβέλ μπουτσσαντάς-μαν ακατέ για τι σώναβ-τουμέν. Τζαν σουγκό τι ανέν μι νταντές ακατέ”.

Βον βουρτισάλε κχερέ για τι βακερέν πουμαρέ νταντέσκε ο λατσσέ αμπέρια ντα τι γκερέν-λες κι Αίγυπτος. Αφού νακχλέ αζόμ μπουτ μπρεσά, ο Ιωσήφ ντα λέσκο ντατ ισινέ πάλι γιεκ.