Να Τσσιναβέλας-λεν Τίποτα

Εκ τζενό σο ισινέ μπανγκό μπεσέλας ντα μανγκέλας λοβέ κάθε ντιβές ανγκλάλ κι πόρτα κι ναόσκι. Εκ απόγευμας, ντικχλάς ι Πετρός ντα ι Ιωαννής τι ντεν αντρέ κο ναός ντα βακερντάς λένγκε: “Μολίναβα-τουμέν, ντεν-μαν κάτι”. Ο Πέτρος βακερντάς: “Τθεράβα τι νταβ-τουτ κάτι πο λατσσό κατά λοβέ. Κο ναβ κι Ιησούσκο, ίστι ντα πφιρ!” Αζομάν ο Πέτρος βοηθιντάς-λες τι ιστίλ, ντα ο τζενό αρχισάλο τι πφιρέλ! Μπουτ τζενέ σο ντικχλέ ανταβά θαύμας χαιρισάλε αζόμ μπουτ σο μπερεκέτι τζενέ λένταρ αρχισάλε τι τθερέν πίστη κο Ιησούς.

Αλλά ο ιερείς ντα ο Σαδδουκαίοι χολιασάλε μπουτ. Καπτιντέ ι αποστολόν, γκερντέ-λεν κο δικαστήριος ντα πουτσλέ-λεν: “Κον ντινάς-τουμέν ι ζορ τι κερέν λατσσές ανταλέ τζενές;” Ο Πέτρος βακερντάς: “Λιντάμ ανταγιά ζορ κατά Ιησούς Χριστός, σο τουμέν μουνταρντέν-λες”. Ο αρχηγοί ι θρησκειάκε ντινέ βίκος: “Τσσιναβέν τι κερέν λάφι ι Ιησούσκε!” Αλλά ο απόστολοι βακερντέ: “Πρέπει τι κεράς λάφι λέσκε. Να κα τσσιναβάς”.

Κάνα μουκχλέ ι Πετρός ντα ι Ιωαννής τι νασέν, βον γκιλέ κο γιαβερά απόστολοι ντα βακερντέ λένγκε σο αβιλόας-πες. Κερντέ προσευχή γιεκ, ντα βακερντέ κο Ιεχωβά: “Μολίνασα-τουτ, βοήθινε-αμέν τι αβάς μπίνταρανε για τι μπορίνας τι συνεχίνας τι κεράς το έργος”. Ο Ιεχωβά ντινάς-λεν πο άγιος πνεύμας, ντα συνεχιντέ τι βακερέν ο λατσσέ αμπέρια ντα τι κερέν λατσσές ι τζενέν. Καζόμ τζάλας, ατζέ πο μπουτ τζενέ τθερένας πίστη. Ο Σαδδουκαίοι ζηλίνενας αζόμ μπουτ σο ασταρντέ ι αποστολόν ντα τσσουντέ-λεν φυλακή. Αλλά αρατί, ο Ιεχωβά μπουτσσαντάς εκχέ αγγελός τι πουτρέλ ι πόρτα σο τθερέλας η φυλακή ντα τι βακερέλ κο απόστολοι: “Βουρτίνεν κο ναός, ντα σικλιαρέν οτθέ”.

Κάνα ντισιλό, κο Σάνχεδριν, κο δικαστήριος σο τθερένας ο αρχηγοί ι θρησκειάκε, σικλιλέ σο αβιλό-πες ντα βακερντέ λένγκε: “Η φυλακή ισί κλειδωμέ, αλλά ο μουρσά σο τσσουντένας αντρέ νασλέ! Ισί κο ναός ντα σικλιαρένα ι τζενέν!” Ατζέκ εκ φαρ, ασταρντέ ι αποστολόν ντα γκερντέ-λεν κο Σάνχεδριν. Ο αρχιερέας βακερντάς: “Ντινόμ-τουμέν εντολή μα τι σικλιαρέν ι Ιησούσκε!” Αλλά ο Πέτρος απαντιντάς: «Πρέπει τι ντας καν πρώτα ι Ντεβλές, σο ισί αμαρό άρχοντας, ντα όχι ι τζενέν».

Ο αρχηγοί ι θρησκειάκε χολιασάλε αζόμ μπουτ σο μανγκένας τι μουνταρέν ι αποστολόν. Αλλά εκ Φαρισαίος, ο Γαμαλιήλ, ιστίντιλο ντα βακερντάς: “Τθερέν τουμαρί γκοντί! Μπορεί ο Ντεβέλ τι ισί μπαγιά ανταλέ τζενέντζαρ. Μανγκένα μπαγιά τι τσσουβέν-λεν ι Ντεβλέσαρ;” Βον ασουντέ λέσκι συμβουλή. Ντα αφού νταπλέ ι αποστολόν ντα ντινέ-λεν ι εντολή τι τσσιναβέν τι κερέν ο έργος, μουκχλέ-λεν τι νασέν. Αλλά ανταβά να τσσιναντάς ι αποστολόν. Συνεχιντέ τι μουτθαβέν μπίνταρανες ο λατσσέ αμπέρια, εμ κο ναός αλλά εμ κχερ κχερέστε.