Εκ Φύλακας Σικλιόλα ι Αλήθεια

Κο Φίλιπποι, ισινέ εκ υπηρέτρια σο αντρέ-λάτε ισινέ εκ δαίμονας. Ο δαίμονας κερέλας-λα τι αβέλ μάντισσα, ντα ανταλέ τροπόσαρ νικαβέλας μπουτ λοβέ ντα ντέλας-λεν πι αφεντικόντε. Κάνα ο Παύλος ντα ο Σίλας γκιλέ κο Φίλιπποι, ανταγιά τσσάι τζάλας παλά-λέντε μπουτ ντιβεσά. Ο δαίμονας κερέλας-λα τι ντελ βίκος ακαλέ λαφίντζαρ: «Ακαλά τζενέ υπηρετίνενα ι Ντεβλές σο Ισί Πο Οπρέ Σαριλένταρ». Οτθάρ, ο Παύλος βακερντάς κο δαίμονας: “Κο ναβ κι Ιησούσκο, τι νικιός λάταρ!” Αζομάν, ο δαίμονας νικίστιλο κατά τσσάι.

Κάνα λάκε αφεντικά αγαντέ ότι κα τσσιναβένας τι νικαβέν λοβέ λάταρ, νευριασάλε μπουτ. Ασταρντέ ι Παυλός ντα ι Σιλάς, γκερντέ-λεν κο άρχοντες κι τθεμέσκε ντα βακερντέ λένγκε: “Ακαλά μουρσά να ασουνένα ο νόμος ντα ανένα μπαρί βαβούρα κι πόλη!” Αζομάν οντουλά σο κερένας κουμάντος ντινέ ι διαταγή τι νταπέν ι Παυλός ντα ι Σιλάς ντα τι τσσουβέν-λεν κι φυλακή. Ο φύλακας τσσουντάς-λεν εκχέ φυλακιάτε σο ισινέ ντιπ καρανίκι ντα πφαντάς λένγκε πιντρέ καστέντε.

Καζόμ ο Παύλος ντα ο Σίλας γκιλιαβένας ύμνους κο Ιεχωβά, ο γιαβερά φυλακισμέ ασουνένας-λεν. Αζομάν αντρέ κι ιράτ, εκ ζουρανό σεισμός κουνιαντάς σαρί ι φυλακή. Ο πόρτες ι φυλακιάκε πουτάρντιλε, εμ ο αλυσίδες εμ ο καστά σο ισινέ πφάντε λένγκε πιντρέντε. Ο φύλακας τθαβντισάλο κι φυλακή σο ισινέ ο Παύλος ντα ο Σίλας ντα ντικχλάς ότι ο πόρτες ισινέ πουταρντέ. Αζομάν νικαντάς πι τσσουρί για τι μουνταρέλ-πες σόσκε αμντισάλοας ότι σαρέ ο φυλακισμέ νασλέας.

Αλλά ο Παύλος ντινάς βίκος: “Μα κερ κακός τι νεαυτόστε! Ισινάμ σαρέ ακατέ!” Ο φύλακας γκιλό ανγκλάλ κο Παύλος ντα κο Σίλας ντα πελό λένγκε πιντρέντε. Σοράν πουτσλάς-λεν: «Σο πρέπει τι κεράβ για τι σώντιβαβ;» Βον βακερντέ λέσκε: “Τούι ντα οντουλά σο ισί τι κχερέστε πρέπει τι πακιάν κο Ιησούς”. Αζομάν ο Παύλος ντα ο Σίλας σικλιαρντέ-λεν ο λάφι ι Ιεχωβάσκο, ντα μπολντιλό εμ ο φύλακας εμ σαρί λέσκι φαμιλί.