Κον Ισινέ ο Ιώβ;

Κο τθεμ Ουζ, ισινέ εκ τζενό σο ντέλας λατρεία ι Ιεχωβάς. Βακερένας λέσκε Ιώβ. Ισινέ μπουτ χουλανό ντα τθερέλας μπαρί φαμιλί. Ισινέ μπουτ λατσσό ντα βοηθίνελας ι τσορορέν, ι χηρέν ντα ι τσσαβέν σο να τθερένας νταντές ντα νταγιά. Μήπως επειδή κερέλας λατσσιπέ να κα τθερέλας ποτές προβλήματα;

Ο Σατανάς ο Διάβολος τθερέλας πο γιακχά οπράλ κο Ιώβ, αλλά ο Ιώβ να τζανέλας-λες ανταβά. Ο Ιεχωβά βακερντάς κο Σατανάς: “Μήπως ντινάν σημασία μι υπηρετίστε κο Ιώβ; Καέκ κι πφουβ νανέ σαρ λέστε. Ασουνέλα-μαν ντα κερέλα ο σωστός”. Αζομάν ο Σατανάς απαντιντάς: “Αμί, ασουνέλα-τουτ ο Ιώβ, αφού αρακχαβέσα-λες ντα ευλογίνεσα-λες. Ντέσα-λες μπουτ τθανά ντα ζώα. Άμα κα λες-λεν λέσταρ σαρέ ανταλά, κα τσσιναβέλ τι ντελ-τουτ λατρεία”. Ο Ιεχωβά βακερντάς: “Μπορίνεσα τι δοκιμάνες-λες. Αλλά να μουκχάβα-τουτ τι μουνταρές-λες”. Σόσκε μουκχλάς ο Ιεχωβά ι Σατανάς τι δοκιμάνελ τον Ιώβ; Ισινέ σίγουρος ότι ο Ιώβ κα ατσσόλας σταθερός.

Ο Μπενγκ αντάς μπουτ βάσανα κο Ιώβ. Πρώτα μπουτσσαντάς μερικέ τζενέν σο βακέρντιβενας Σαβαίοι τι τσορέν λέσκε αγελάδες ντα λέσκε γαϊδούρια. Σοράν εκ γιακ μουνταρντάς σαρέ λέσκε μπρακέν. Εκ γιαβέρ ομάδα, ο Χαλδαίοι τσορντέ σαρέ λέσκε καμηλέν ντα μουνταρντέ λέσκε υπηρετόν σο αρακχαβένας-λεν. Σοράν αβιλί λέσκε η πο μπαρί ντουκχ. Σαρέ λέσκε τσσαβέ μουλέ κάνα λένγκο κχερ πελό οπρά-λέντε καζόμ χάνας ντα πίνας. Λέσκο γκι πφαμπιλό, αλλά ο Ιώβ να τσσιναντάς τι ντελ λατρεία κο Ιεχωβά.

Ο Μπενγκ μανγκέλας τι κερέλ τον Ιώβ τι τθερέλ ατζέ πο μπουτ ντουκχ. Ανταλέσκε κερντάς λέσκο σώμας τι πφερντιόλ μπαρέ πληγές, σο ντουκχάνας-λες μπουτ. Να τζανέλας σόσκε αβένας λέσκε σαρέ ανταλά μπέτι πράγματα. Αλλά συνεχίνελας τι ντελ λατρεία ι Ιεχωβάς. Ο Ντεβέλ ντικχέλας σαρέ ανταλά σο τσσίντελας ο Ιώβ, ντα ισινέ μπουτ ευχαριστιμέ λέσαρ.

Ο Μπενγκ σοράν μπουτσσαντάς τρινέ μουρσέν τι δοκιμάνεν τον Ιώβ. Βακερντέ λέσκε: “Σίγουρα αμαρτιντάν ντα προσπαθιντάν τι γκεραβές-λες. Ο Ντεβέλ τιμωρίνελα-τουτ”. Ο Ιώβ βακερντάς: “Να κερντόμ καέκ κακός”. Αλλά σοράν ανταλέσταρ σκεφτίνελας ότι ο Ιεχωβά ανέλας λέσκε σαρέ ανταλά προβλήματα ντα βακερντάς ότι ο Ιεχωβά να ισινέ δίκαιος λέσαρ.

Εκ τερνό σο βακερένας λέσκε Ελιού ασουνέλας με υπομονή ι συζήτηση. Σοράν κερντάς λάφι ντα βακερντάς: “Σαρέ ανταλά σο βακερντέν ισί λάθος. Ναστί αγαβάσα καζόμ μπαρό ισί ο Ιεχωβά. Να κα κερέλας ποτές κάτι κακός. Ντικχέλα σαρέ ο πράγματα ντα βοηθίνελα ι τζενέν σο νακχένα προβλήματα”.

Σοράν ο Ιεχωβά κερντάς λάφι κο Ιώβ ντα βακερντάς: “Κατέ ισινάνας τούι κάνα κερντόμ ο ουρανός ντα ι πφουβ; Σόσκε βακερέσα ότι να ισινόμ δίκαιος; Κερέσα λάφι αλλά να τζανέσα σόσκε αβένα μερικά πράγματα”. Ο Ιώβ αγαντάς πο λάθος ντα βακερντάς: “Κερντόμ λάθος. Τθεράβας ασουντό τούκε αλλά ακανά τζανάβα-τουτ μπαγιά. Τίποτα νανέ δύσκολος τούκε. Συγνώμη ι λαφίνγκε σο βακερντόμ”.

Αφού μπιτισάλι η δοκιμασία, ο Ιεχωβά κερντάς πάλι λατσσές τον Ιώβ ντα ντινάς-λες πο μπουτ πράγματα οντουλένταρ σο τθερέλας ανγκλέ. Ο Ιώβ τζουβντιλό μπουτ μπρεσά ντα ισινέ ευτυχισμέ. Ο Ιεχωβά ευλογιντάς τον Ιώβ επειδή ντέλας-λες καν ατζέ-ντα κάνα ισινέ δύσκολος λέσκε. Κα αβές τούι-ντα σαρ ο Ιώβ ντα κα συνεχίνες τι ντες λατρεία κο Ιεχωβά σο-ντα τι αβέλ-πες;