Εκ Νεβό Αρχηγός ντα Ντούι Μπίνταρανε Τζουβλιά

Αφού ισινέ αρχηγός κο λαός κι Ιεχωβάσκο μπουτ μπρεσά, ο Ιησούς του Ναυή μουλό 110 μπρεσένγκο. Καζόμ τζουβντιόλας, ο Ισραηλίτες ντένας λατρεία ι Ιεχωβάς. Αλλά κάνα ο Ιησούς του Ναυή μουλό, βον ντένας λατρεία κο είδωλα, σαρ κερένας ο Χαναναίοι. Επειδή ο Ισραηλίτες τσσιναντέ τι ντεν καν κο Ιεχωβά, βοβ μουκχλάς κο Χαναναίος βασιλιάς Ιαβίν τι κερέλ ι ζωή λένγκι δύσκολη. Ο λαός μολιντάς ι Ιεχωβάς τι βοηθίνελ-λες. Ανταλέσκε, ο Ιεχωβά ντινάς-λεν εκχέ νεβέ αρχηγός, τον Βαράκ, σο βοβ κα βοηθίνελας ι λαός τι βουρτίνελ κο Ιεχωβά.

Η Δεββώρα, εκ προφήτισσα, ντινάς βίκος τον Βαράκ για τι βακερέλ λέσκε οντουβά σο βακερντάς ο Ιεχωβά: “Λε 10.000 μουρσέν ντα τζα τι αρακχές ι στρατός του Ιαβίν κι λεν Κισών. Οτθέ κα νικίνες τον Σισάρα, σο ισί ο αρχηγός κο στρατός του Ιαβίν”. Ο Βαράκ βακερντάς κι Δεββώρα: “Κα τζαβ σάντε άμα κα αβές τούι-ντα μάντζαρ”. Βόι βακερντάς: “Κα αβάβ παλά-τούτε. Αλλά τι τζανές ότι να κα μουνταρές τούι τον Σισάρα. Ο Ιεχωβά βακερντάς ότι κα μουνταρέλ-λες εκ τζουβέλ”.

Η Δεββώρα γκιλί με το Βαράκ ντα λέσκε στρατόσαρ κο βες Θαβώρ για τι ετοιμάνεν-πες τι πολεμίνεν. Κάνα ο Σισάρα σικλιλό-λες ανταβά, γκιντιντάς ο άμαξες σο τθερέλας για το πόλεμος ντα πι στρατός κι κοιλάδα σο ισινέ πο τελέ. Η Δεββώρα βακερντάς κο Βαράκ: “Αντιβές ισί ο ντιβές σο ο Ιεχωβά κα ντελ-τουτ ι νίκη”. Ο Βαράκ ντα ο 10.000 μουρσά λέσκε γουλίστιλε ούρια κατά βες για τι αρακχέν ι ζουρανέ στρατός του Σισάρα.

Ο Ιεχωβά αζομάν κερντάς ι λεν Κισών τι πλημμυρίνελ. Ο άμαξες κολλισάλε κι κοβλί τσικ. Ο Σισάρα μουκχλάς πι άμαξα ντα τθαβντισάλο. Ο Βαράκ ντα ο στρατός λέσκο νικιντέ ι στρατός του Σισάρα, αλλά ο Σισάρα νασλό! Τθαβντισάλο ντα γκεραντάς-πες κο τσαντίρι εκχέ τζουβλιάκο σο βακέρντιβελας Ιαήλ. Βόι ντινάς-λες τι πιλ τθουτ ντα ιτσσαρντάς-λες εκχέ κουβερτάσαρ. Ο πολεμιστής ισινέ μπουτ κχινό ντα σοτάς. Αζομάν, η Ιαήλ γκιλί σιγά σιγά πασέ-λέστε ντα καρφωντάς λέσκο σορό εκχέ καστέσαρ. Ο Σισάρα μουλό.

Σοράν αβιλό ο Βαράκ ντα ρόντελας για τον Σισάρα. Η Ιαήλ νικίστιλι πι τσαντιρίσταρ ντα βακερντάς λέσκε: “Έλα αντρέ. Ακατέ ισί ο τζενό σο ρόντεσα”. Ο Βαράκ ντινάς αντρέ ντα ντικχλάς ότι ο Σισάρα ισινέ μουλό. Ο Βαράκ ντα η Δεββώρα ντινέ δόξα ι Ιεχωβάς εκχέ γκιλιάσαρ επειδή ο Ιεχωβά βοηθιντάς ι Ισραηλιτέν τι νικίνεν πουμαρέ ντουσμανίν. Από αζομάν ντα για 40 μπρεσά, ο Ισραήλ τθερέλας ειρήνη.