Η Υπόσχεση σο Ντινάς ο Ιεφθάε

Ο Ισραηλίτες μουκχλέ πάλι ι Ιεχωβάς ντα αρχισάλε τι ντεν λατρεία ψεύτικε ντεβλέντε. Κάνα ο Αμμωνίτες γκιλέ τι κερέν πόλεμος ι Ισραηλιτέντζαρ, οντουλά είδωλα να κερντέ τίποτα για τι βοηθίνεν-λεν. Για μπουτ μπρεσά, ο Ισραηλίτες τσσίντενας μπουτ. Ανταλέσκε βακερντέ κο Ιεχωβά: “Αμαρτιντάμ. Μολίνασα-τουτ, σώνε-αμέν αμαρέ ντουσμανίνταρ”. Ο Ισραηλίτες καταστραφιντέ ο είδωλα σο τθερένας ντα αρχισάλε τι ντεν λατρεία πάλι ι Ιεχωβάς. Ο Ιεχωβά να μανγκέλας γιαβέρ τι ντικχέλ-λεν τι τσσίντεν μπουτ.

Εκ πολεμιστής σο βακερένας λέσκε Ιεφθάε τραμπίντιλο για τι οδηγίνελ ι λαός κο πόλεμος σο κα κερένας με το Αμμωνίτες. Βοβ βακερντάς κο Ιεχωβά: “Άμα κα βοηθίνες-αμέν τι νικίνας κο πόλεμος, ντάβα-τουτ μο λάφι, ότι κάνα κα βουρτίναβ κχερέ, κα νταβ τούτε ι πρώτε τζενές σο κα νικιόλ τι ντικχέλ-μαν”. Ο Ιεχωβά ασουντάς ι προσευχή σο κερντάς ο Ιεφθάε ντα βοηθιντάς-λες τι νικίνελ κο πόλεμος.

Κάνα ο Ιεφθάε βουρτισάλο κχερέ, ο πρώτος τζενό σο νικίστιλο τι ντικχέλ-λες ισινέ λέσκι τσσάι, η μοναδική τσσάι σο τθερέλας. Βόι κχελέλας ντα μπασκιαρέλας ο ντέφι. Σο κα κερέλας ο Ιεφθάε; Αντάς πι γκοντιάτε πο λάφι σο ντινάας ντα βακερντάς: “Αχ, μι τσσάι! Πφανγκλάν μο γκι. Ντινόμ εκ υπόσχεση κο Ιεχωβά. Για τι ατσσικιαράβ-λα, πρέπει τι μπουτσσαβάβ-τουτ τι υπηρετίνες κι σκηνή της μαρτυρίας κι Σηλώ”. Αζομάν λέσκι τσσάι βακερντάς λέσκε: “Νταντορό, αφού ντινάν το λάφι κο Ιεχωβά, πρέπει τι ατσσικιαρές-λες. Σάντε εκ πράγμας μανγκάβα, τι νακχάβ ντούι μάσεκ κο βεσά μι αμαλινέντζαρ. Σοράν κα τζαβ”. Η τσσάι του Ιεφθάε υπηρετιντάς πίστα σαρί πι ζωή κι σκηνή της μαρτυρίας. Κάθε μπρες, ο αμαλινά λάκε τζάνας κι Σηλώ τι ντικχέν-λα.