Ο Ιεχωβά Κερέλα Λάφι κο Σαμουήλ

Ο αρχιερέας Ηλεί τθερέλας ντουέ τσσαβέν σο ισινέ ιερείς ντα υπηρετίνενας κι σκηνή της μαρτυρίας. Λένγκε ναβά ισινέ Οφνεί ντα Φινεές. Βον να ντένας καν κο νομοί κι Ιεχωβάσκε ντα συμπεριφερίντιβενας μπουτ μπέτι κο τζενέ. Κάνα ο Ισραηλίτες γκερένας πουμαρέ θυσίες κο Ιεχωβά, ο Οφνεί ντα ο Φινεές λένας ο πο λατσσό μας πουμένγκε. Ο Ηλεί τζανέλας οντουλά σο κερένας λέσκε τσσαβέ, αλλά να κερντάς τίποτα ανταλέσκε. Κα μουκχέλας-λες ανταβά ο Ιεχωβά αντικάς;

Παρόλο σο ο Σαμουήλ ισινέ μπουτ πο χουρντό κατά Οφνεί ντα κατά Φινεές, να μανγκλάς τι μοιάζελ λέντε. Ο Ιεχωβά ισινέ ευχαριστιμέ κατά Σαμουήλ. Εκ ιράτ σο ο Σαμουήλ σοβέλας, ασουντάς εκ φωνή τι βακερέλ λέσκο ναβ. Ιστίντιλο, τθαβντισάλο κο Ηλεί ντα βακερντάς λέσκε: “Ατθέ ισινόμ!” Αλλά ο Ηλεί απαντιντάς λέσκε: “Να ντινόμ-τουτ βίκος. Τζα σοβ”. Ο Σαμουήλ βουρτισάλο πι κρεβατίστε. Αζομάν αβιλό πάλι ο ίδιος πράγμας. Κάνα ο Σαμουήλ ασουντάς τριν φαρ ι ίδια φωνή, ο Ηλεί αγαντάς ότι ο Ιεχωβά ισινέ οντουβά σο ντέλας βίκος τον Σαμουήλ. Βακερντάς κο Σαμουήλ ότι αν κα ασουνέλας πάλι ανταγιά φωνή, έπρεπε τι βακερέλ: “Κερ λάφι, Ιεχωβά. Το υπηρέτης ασουνέλα”.

Ο Σαμουήλ βουρτισάλο πι κρεβατίστε. Αζομάν ασουντάς: “Σαμουήλ! Σαμουήλ!” Βοβ βακερντάς: “Κερ λάφι, σόσκε το υπηρέτης ασουνέλα”. Ο Ιεχωβά βακερντάς λέσκε: “Βάκερ κο Ηλεί ότι κα τιμωρίναβ λες ντα λέσκι φαμιλί. Τζανέλα ότι ο τσσαβέ λέσκε κερένα μπέτι πράγματα κι σκηνή της μαρτυρίας, αλλά να κερέλα τίποτα ανταλέσκε”. Ο γιαβέρ ντιβές ο Σαμουήλ πουταρντάς ο πόρτες σο τθερέλας η σκηνή της μαρτυρίας, σαρ κερέλας πάντα. Νταρέλας τι βακερέλ κο αρχιερέας οντουβά σο βακερντάας λέσκε ο Ιεχωβά. Αλλά ο Ηλεί ντινάς-λες βίκος ντα πουτσλάς-λες: “Μο τσσαβό, σο βακερντάς τούκε ο Ιεχωβά; Βάκερ-λεν μάνγκε σαρέ”. Ντα αντικάς, ο Σαμουήλ βακερντάς-λεν σαρέ κο Ηλεί.

Καζόμ ο Σαμουήλ μπαριόλας, ο Ιεχωβά συνεχίνελας τι αβέλ γιεκ λέσαρ. Σαρό κο τθεμ ο Ισραηλίτες τζανένας ότι ο Ιεχωβά τθερέλας τραμπιντό τον Σαμουήλ τι αβέλ προφήτης ντα κριτής.