Η Αμαρτία σο Κερντάς ο Βασιλιάς Δαβίδ

Κάνα μουλό ο Σαούλ, αβιλό βασιλιάς ο Δαβίδ. Αζομάν ισινέ 30 μπρεσένγκο. Αφού νακχλέ μερικά μπρεσά σο ισινέ βασιλιάς, εκ ιράτ ντικχλάς πι νταρατσάταρ εκχέ σουκάρ τζουβλιά. Ο Δαβίδ σικλιλό ότι λάκο ναβ ισινέ Βηθ-σαβεέ ντα ότι ισινέ παντριμέ εκχέ στρατιωτίσαρ, σο βακερένας λέσκε Ουρία. Ο Δαβίδ γκερντάς την Βηθ-σαβεέ πι παλατίστε. Σοτάς λάσαρ ντα ατσσιλί κχαμνί. Ο Δαβίδ προσπαθιντάς τι γκεραβέλ οντουβά σο κερντάας. Βακερντάς πι στρατηγόσκε τι τσσουβέλ τον Ουρία ανγκλάλ κάνα κα πολεμίνενας ντα σαρέ ο γιαβερά τι κερέν παλάλ για τι μουκχέν-λες κορκορό. Κάνα ο Ουρίας μουλό κο πόλεμος, ο Δαβίδ παντρισάλο με τη Βηθ-σαβεέ.

Αλλά ο Ιεχωβά ντικχλάς σαρέ ο μπέτι πράγματα σο αβιλέας-πες. Σο κα κερέλας; Ο Ιεχωβά μπουτσσαντάς ι προφητής Νάθαν κο Δαβίδ. Ο Νάθαν βακερντάς: “Εκ χουλανό τζενό τθερέλας μπουτέ μπρακέν ντα εκ τσορορό τθερέλας σάντε εκχέ χουρντέ μπρακές σο μανγκέλας-λες μπουτ. Ο χουλανό λιντάς κατά τσορορό ι μοναδικέ μπρακές σο τθερέλας”. Ο Δαβίδ χολιασάλο ντα βακερντάς: “Οντουβά χουλανό τζενό πρέπει τι μερέλ”. Αζομάν ο Νάθαν βακερντάς κο Δαβίδ: “Τούι ισινάν ανταβά χουλανό τζενό!” Ο γκι ι Δαβιδίσκο πφανγκιλό, ντα βακερντάς: “Κερντόμ αμαρτία ανγκλάλ κο Ιεχωβά”. Ανταγιά αμαρτία αντάς μπουτ προβλήματα κο Δαβίδ ντα λέσκε φαμιλιάτε. Ο Ιεχωβά τιμωριντάς ι Δαβιδίς αλλά μουκχλάς-λες τι τζουβντιόλ επειδή βακερέλας ι αλήθεια ντα ισινέ ταπεινός.

Ο Δαβίδ μανγκέλας τι κερέλ εκ ναός ι Ιεχωβάσκε, αλλά ο Ιεχωβά τραμπιντάς λέσκε τσσαβές, τον Σολομώντα για τι κερέλ-λες. Ο Δαβίδ αρχισάλο τι κερέλ προετοιμασίες για το Σολομώντα ντα βακερντάς: “Ο ναός ι Ιεχωβάσκο πρέπει τι αβέλ μπαρό ντα μπουτ σουκάρ. Ντα επειδή ο Σολομώντας ισί μπουτ τερνό, κα κεράβ ετοιμασίες για τι βοηθίναβ-λες”. Ο Δαβίδ ντινάς μπουτ πι λοβένταρ για τι κερντιόλ ο ναός. Αρακχλάς τζενέν σο αγαβένας τι κερέν ανταγιά μπουτί. Γκιντιντάς χρυσάφι ντα ασήμι, ντα αντάς κέδρους κατά Τύρος ντα κατά Σιδώνα. Κάνα ο Δαβίδ ισινέ μεριμάσκε, ντινάς κο Σολομώντας ο σχέδια για τι κερέλ ο ναός. Ντα βακερντάς λέσκε: “Ο Ιεχωβά βακερντάς μάνγκε τι γραφίναβ τούκε σαρέ ανταλά πράγματα. Ο Ιεχωβά κα βοηθίνελ-τουτ. Μα τι νταρές. Τι αβές ζουρανό ντα τι αρχίνες τι κερές ο ναός”.