Εκ Ναός ι Ιεχωβάσκε

Κάνα ο Σολομώντας αβιλό βασιλιάς κο Ισραήλ, ο Ιεχωβά πουτσλάς-λες: “Σο μανγκέσα τι νταβ-τουτ;” Ο Σολομώντας βακερντάς: “Ισινόμ τερνό, ντα να αγαβάβα μπουτ πράγματα. Μολίναβα-τουτ, ντε-μαν σοφία για τι φροντίναβ τι λαός”. Ο Ιεχωβά βακερντάς λέσκε: “Επειδή μανγκλάν σοφία, κα νταβ-τουτ μπουτ μπαρί σοφία σο να τθερέλα-λα καέκ τζενό οπράλ κι πφουβ. Ντα κα κεράβ-τουτ μπουτ χουλανό-ντα. Ντα άμα ντέσα-μαν καν κα τζουβντιός μπουτ μπρεσά”.

Ο Σολομώντας αρχιντάς τι χτίνελ ο ναός. Χρησιμοποιηντάς ο πο λατσσό χρυσάφι, ασήμι, κας ντα μπαρά. Χιλιάδες μουρσά ντα τζουβλιά σο αγαβένας λατσσές συγκεκριμέ μπουτιά, κερντέ μπουτί κο ναός. Σοράν από εφτά μπρεσά, ο ναός ισινέ έτοιμος τι αφιερώντιβελ κο Ιεχωβά. Κερντέ εκ θυσιαστήριος, ντα τσσουντέ οπρά-λέστε μπουτ πράγματα για τι ντεν θυσίες. Σοράν, ο Σολομώντας πελό κοτσίντζαρ ντα κερντάς προσευχή: “Ιεχωβά ανταβά ναός νανέ αζόμ μπουτ μπαρό ή αζόμ μπουτ σουκάρ για τι αξίνελ τούκε, αλλά μολίνασα-τουτ, δέχτινε αμαρί λατρεία ντα ασούν αμαρέ προσευχές”. Σαρ ντικχλάς ο Ιεχωβά ο ναός ντα ι προσευχή ι Σολομωντάσκι; Κάνα ο Σολομώντας τελειωντάς πι προσευχή, αμέσως πελί γιακ κατά ουρανός ντα πφαμπαρντάς ο πράγματα σο ισινέ οπράλ κο θυσιαστήριος. Ο Ιεχωβά σικαντάς αντικάς ότι μπεϊντιντάς μπουτ ο ναός. Κάνα ο Ισραηλίτες ντικχλέ-λες ανταβά, χαιρισάλε.

Ο βασιλιάς Σολομώντας ισινέ γνωστός για τη σοφία σο τθερέλας σαρό κο Ισραήλ, αλλά εμ τθεμέντε σο ισινέ ντουρ. Ο λαός τζάλας κο Σολομώντας για τι βοηθίνελ-λεν λένγκε προβληματέντζαρ. Ατζέ-ντα η βασίλισσα κατά Σεβά γκιλί ντα κερντάς λέσκε δύσκολες ερωτήσεις για τι δοκιμάνελ-λες. Κάνα ασουντάς λέσκε απαντήσεις βακερντάς: “Να πακιάβας οντουλά σο ασουντόμ τούκε, αλλά ακανά ντικχάβα ότι τθερέσα πο μπουτ σοφία οντουλάταρ σο βακερντέας μάνγκε. Το Ντεβέλ, ο Ιεχωβά ευλογιντάς-τουτ”. Η ζωή ι Ισραηλιτένγκι ισινέ μπουτ σουκάρ, ντα ο λαός ισινέ χαρούμενος. Αλλά ο πράγματα κα αλλάνενας.