Εκ Βασίλειος Ιλιάντιβελα κο Ντούι

Ο Ισραήλ τθερέλας ειρήνη καζόμ ο Σολομώντας ντέλας λατρεία ι Ιεχωβάς. Αλλά σοράν παντρισάλο μπουτέ τζουβλίντζαρ γιαβερέ τθεμένταρ, σο βον ντένας λατρεία κο είδωλα. Χάνικ χάνικ, ο Σολομώντας αλλαξάλο, ντα αρχισάλο βοβ-ντα τι ντελ λατρεία κο είδωλα. Ο Ιεχωβά χολιασάλο. Βακερντάς κο Σολομώντας: “Λάβα ι βασιλεία τι φαμιλιάταρ ντα κα ιλιαβάβ ο Ισραήλ κο ντούι. Κα νταβ ο πο μπουτ φάρες σε εκ υπηρέτης τιρό, ντα τι φαμιλί κα κερέλ κουμάντος σάντε ο χάνικ φάρες”.

Ο Ιεχωβά σικαντάς ξεκάθαρα οντουβά σο μανγκέλας τι κερέλ εκχέ γιαβερέ-ντα τροπόσαρ. Εκ υπηρέτης ι Σολομωντάσκο, ο Ιεροβοάμ, ισινέ ανγκλάλ κο ντρομ κάνα ντικχλάς ι προφητής Αχιά. Ο Αχιά πφαραντάς εκ κατά σέα σο ιρίλας 12 κοτορέντε ντα βακερντάς κο Ιεροβοάμ: “Ο Ιεχωβά κα λελ ο βασίλειος του Ισραήλ κατά φαμιλί ι Σολομωντάσκι ντα κα ιλιαβέλ-λες κο ντούι. Λε ο 10 κοτορά ανταλένταρ επειδή τούι κα αβές βασιλιάς κο 10 φάρες”. Ο βασιλιάς Σολομώντας ασουντάς ανταβά σο αβιλό-πες ντα μανγκέλας τι μουνταρέλ τον Ιεροβοάμ! Οντουλέσκε, ο Ιεροβοάμ νασλό ντα γκιλό κι Αίγυπτος. Πο σοράν, ο Σολομώντας μουλό ντα αβιλό βασιλιάς λέσκο τσσαβό ο Ροβοάμ. Αζομάν νασλί η νταρ κατά Ιεροβοάμ ντα βουρτισάλο κο Ισραήλ.

Ο πρεσβύτεροι κο Ισραήλ βακερντέ κο Ροβοάμ: “Άμα ισινάν λατσσό ι λαόσαρ, αζομάν ο λαός κα αβέλ αφοσιωμέ τούτε”. Αλλά λέσκε τερνέ αμαλά βακερντέ λέσκε: “Πρέπει τι αβές γκεραλό ι λαόσαρ! Τσσουβ-λεν τι κερέν ατζέ πο πφαρί μπουτί!” Ο Ροβοάμ ασουντάς ι συμβουλή πι τερνέ αμαλένγκι. Ισινέ γκεραλό ι λαόσαρ, ντα ο λαός γκιλό λέσαρ κόντρα. Κερντέ βασιλιάς τον Ιεροβοάμ κο 10 φάρες, σο βακέρντιλε ο βασίλειος του Ισραήλ. Ο γιαβερά ντούι φάρες βακέρντιλε ο βασίλειος του Ιούδα, ντα ατσσιλέ αφοσιωμέ κο Ροβοάμ. Ο 12 φάρες κατά Ισραήλ ιλιάντιλε κο ντούι.

Ο Ιεροβοάμ να μανγκέλας τι τζαλ λέσκο λαός τι ντελ λατρεία κι Ιερουσαλήμ, σο ισινέ κο βασίλειος του Ροβοάμ. Τζανέσα σόσκε; Ο Ιεροβοάμ νταρέλας ότι ο λαός κα τζάλας λέσαρ κόντρα ντα ότι κα τσσίντενας κατά Ροβοάμ. Οτθάρ, λατσσαρντάς ντούι χρυσά μοσχάρια ντα βακερντάς κο λαός: “Η Ιερουσαλήμ ισί μπουτ ντουρ. Μπορίνενα τι ντεν λατρεία ακατέ”. Ο λαός αρχισάλο τι ντελ λατρεία κο χρυσά μοσχάρια ντα τι μπιστρέλ ατζέκ εκ φαρ ι Ιεχωβάς.