Εκ Δοκιμή κο Βες Κάρμηλος

Ο βασίλειος Ισραήλ, σο κερέλας κουμάντος κο 10 φάρες, τθερέλας μπουτέ γκεραλέ βασιλιαδέν, αλλά εκ κατά πο γκεραλέ ισινέ ο Αχαάβ. Βοβ παντρισάλο εκχέ γκεραλέ τζουβλιάσαρ σο ντέλας λατρεία κο Βάαλ. Λάκο ναβ ισινέ Ιεζάβελ. Ο Αχαάβ ντα η Ιεζάβελ κερντέ σαρό ο τθεμ τι ντελ λατρεία κο Βάαλ ντα μουνταρντέ ι προφητέν ι Ιεχωβάσκε. Σο κερντάς ο Ιεχωβά; Μπουτσσαντάς ι Ηλιάς, ι προφητής, τι βακερέλ εκ αμπέρι κο Αχαάβ.

Ο Ηλίας βακερντάς κο βασιλιάς Αχαάβ ότι επειδή ισινέ γκεραλό, να κα ντέλας μπρισίμ κο Ισραήλ. Για πο μπουτ από τριν μπρεσά, να μπαριόλας τίποτα κο χωράφια ντα ο λαός μποκχάλιβελας. Πο σοράν, ο Ιεχωβά μπουτσσαντάς πάλι ι Ηλιάς κο Αχαάβ. Ο βασιλιάς βακερντάς: “Συνέχεια προβλήματα ανέσα! Τούι φταίνεσα σαρέ ανταλένγκε”. Ο Ηλίας βακερντάς: “Να κερντόμ με τι σουκιόλ ο τθαν. Ιτιρί τούταρ αβέλα-πες ανταβά, επειδή ντέσα λατρεία κο Βάαλ. Οτθάρ, πάμε τι κεράς εκ δοκιμή. Γκίντε σαρέ ι λαός ντα ι προφητέν του Βάαλ οπράλ κο βες Κάρμηλος”.

Σοράν ο λαός γκιντισάλο κο βες ντα ο Ηλίας βακερντάς: “Λεν εκ απόφαση. Άμα ο Ιεχωβά ισί ο αληθινός Ντεβέλ, ακολουθίνεν λες, αλλά άμα ισί ο Βάαλ, αζομάν ακολουθίνεν λες. Ελάν τι ντικχάς. O 450 προφήτες του Βάαλ πρέπει τι ετοιμάνεν εκ θυσία ντα τι ντεν βίκος πουμαρέ ντεβλές, ντα με κα ετοιμάναβ εκ γιαβέρ θυσία ντα κα νταβ βίκος μιρέ Ντεβλές, ι Ιεχωβάς. Οντουβά σο κα απαντίνελ γιακάσαρ βοβ ισί ο αληθινός Ντεβέλ”. Ο λαός συμφωνιντάς.

Ο προφήτες του Βάαλ ετοιμαντέ εκ θυσία. Ντένας βίκος σαρό ο ντιβές πουμαρέ ντεβλές: “Ω! Βάαλ, απάντινε αμένγκε!” Επειδή ο Βάαλ να απαντίνελας, ο Ηλίας πρασάλας-λες. Βακερέλας: “Ντεν βίκος καζόμ πο ζουρανές μπορίνενα. Μπέκιμ τι τσσουντάς-πες τι σοβέλ, ντα κάποιος πρέπει τι τζανγκαβέλ-λες”. Ερεσλί η ιράτ ντα ο προφήτες σο τθερέλας ο Βάαλ συνεχίνενας τι ντεν-λες βίκος. Αλλά να ντιντιόλας απάντηση.

Ο Ηλίας τσσουντάς πι θυσία σε εκ θυσιαστήριος ντα τσορντάς μπουτ πανί οπρά-λάτε. Σοράν προσευχισάλο: “Ω! Ιεχωβά, μολίναβα-τουτ, τι αγαβέλ ο λαός ότι τούι ισινάν ο αληθινός Ντεβέλ”. Αμέσως, ο Ιεχωβά περαντάς γιακ κατά ουρανός ντα πφαμπαρντάς ντιπ σαρί ι θυσία. Ο λαός ντινάς βίκος: “Ο Ιεχωβά ισί ο αληθινός Ντεβέλ!” Ο Ηλίας βακερντάς: “Μα μουκχέν ι προφητέν σο τθερέλα ο Βάαλ τι νασέν!” Οντουβά ντιβές, μουνταρντέ ι 450 προφητέν του Βάαλ.

Κάνα σικάντιλο εκ χουρντό σύννεφος οπράλ κατά ντεριάβ, ο Ηλίας βακερντάς κο Αχαάβ: “Αβέλα μπαρό μπρισίμ. Νίκλιο οπράλ τι αμαξάτε ντα τζα τι κχερέστε”. Αβιλό καρανίκι κο ουρανός κατά σύννεφα, πφούντελας μπαρμπάλ ντα αρχισάλο τι ντελ ζουρανό μπρισίμ. Τελικά, ο σουκιπέ σο πελόας κο τθαν τελειωσάλοας. Ο Αχαάβ τθάβντελας πι αμαξάσαρ καζόμ πο σουγκό αβέλας-πες. Όμως με τη βοήθεια ι Ιεχωβάσκι, ο Ηλίας τθαβντισάλο πο σουγκό κατά άμαξα! Αλλά μήπως τελειωσάλεας ο προβλήματα ι Ηλιάσκε; Ελάν τι ντικχάς.