Ο Ιεχωβά Ντινάς Ζορ κο Ηλίας

Η Ιεζάβελ σικλιλί οντουβά σο αβιλόας-πες κο προφήτες του Βάαλ ντα χολιασάλι μπουτ. Οτθάρ μπουτσσαντάς αμπέρι κο Ηλίας ντα βακερντάς: “Γιαβίν, κα αβές τούι-ντα μουλό σαρ ο προφήτες του Βάαλ”. Ο Ηλίας νταρασάλο μπουτ, οτθάρ νασλό ντα γκιλό κι έρημος για τι γλιτώνελ. Σοράν κερντάς προσευχή: “Ιεχωβά, να νταϊντίναβα γιαβέρ. Μουκχ-μαν τι μεράβ”. Ο Ηλίας ισινέ μπουτ κχινό, οτθάρ σοτάς τελάλ εκχέ δεντρόσταρ.

Εκ άγγελος τζανγκαντάς-λες ντα βακερντάς λέσκε γκουλντέ τροπόσαρ: “Ίστι ντα χα”. Ο Ηλίας ιστίντιλο ντα ντικχλάς εκ καρβέλι μαντρό οπράλ μπαρέντε σο πφαμπόνας ντα εκ πιρί πανί. Χαλάς, πιλάς ντα τσσουντάς-πες πάλι τι σοβέλ. Ο άγγελος τζανγκαντάς-λες πάλι ντα βακερντάς λέσκε: “Χα, σόσκε χρειαζίντιβεσα ζορ για τι κερές το ταξίδι”. Ανταλέσκε,ο Ηλίας χαλάς ατζέκ εκ φαρ. Σοράν αρχιντάς πο ταξίδι, πφιρέλας 40 ντιβεσά πρωί ντα ιράτ, μέχρι σο ερεσλό κο βες Χωρήβ. Οτθέ ο Ηλίας τσσουντάς-πες αντρέ εκχέ σπηλιάτε για τι σοβέλ. Αλλά ο Ιεχωβά βακερντάς λέσκε: “Σο κερέσα ακατέ, Ηλία;” Ο Ηλίας απαντιντάς: “Ο Ισραηλίτες να ατσσικιαρντέ πουμαρό λάφι σο ντινέ-τουτ. Περαντέ το θυσιαστήρια ντα μουνταρντέ τι προφητέν. Ντα ακανά μανγκένα τι μουνταρέν μαν-ντα”.

Ο Ιεχωβά βακερντάς λέσκε: “Τζα ντα άτσσουβ κο βες”. Πρώτα, πφουντιντάς εκ ζουρανί μπαρμπάλ ανγκλάλ κι σπηλιά. Σοράν αβιλό σεισμός ντα πο σοράν λιντάς-πες γιακ. Κο τέλος, ασουντάς εκ ήρεμη φωνή. Ιτσσαρντάς πο μούι με το παλτός σο ιρίλας ντα νικίστιλο αβρί κατά σπηλιά. Αζομάν ο Ιεχωβά πουτσλάς-λες σόσκε τθαβντισάλοας ντα νασλόας. Ο Ηλίας βακερντάς: “Σάντε με ατσσιλόμ”. Αλλά ο Ιεχωβά βακερντάς λέσκε: “Να ισινάν κορκορό. Ισί γιαβερά 7.000 κο Ισραήλ σο ντένα-μαν λατρεία. Τζα ντα κερ τον Ελισαιέ προφήτης τι θεσιάτε”. Αμέσως, ο Ηλίας γκιλό ντα κερντάς οντουβά σο βακερντάς λέσκε ο Ιεχωβά. Τούι, πακιάσα ότι ο Ιεχωβά κα βοηθίνελ-τουτ κάνα κερέσα οντουβά σο μανγκέλα τούταρ; Σίγουρα βα. Για τι ντικχάς κάτι σο αβιλό-πες κάνα να ντέλας μπρισίμ.