Ο Τσσαβό Εκχέ Χηράκο Αβέλα Πάλι κι Ζωή

Καζόμ ισινέ ο βακίτι σο να ντέλας μπρισίμ κο Ισραήλ, ο Ιεχωβά βακερντάς κο Ηλίας: “Τζα κο Σαρεπτά. Εκ χήρα οτθέ κα ντελ-τουτ χαμπέ”. Κι μπαρί πόρτα κι πολιάκι, ο Ηλίας ντικχλάς εκχέ χηρά τι γκίντελ καστά. Μανγκλάς λάταρ εκ ποτήρι πανί. Καζόμ βόι τζάλας τι τσσουβέλ λέσκε πανί, ο Ηλίας βακερντάς λάκε: “Μολίναβα-τουτ, αν μάνγκε εκ κομμάτι μαντρό”. Αλλά η χήρα βακερντάς λέσκε: “Να τθεράβα ιτς μαντρό τι νταβ-τουτ. Τθεράβα χάνικ βαρό ντα λάδι σάντε για τι κεράβ χάνικ χαμπέ μάνγκε ντα μι τσσαβέσκε”. Ο Ηλίας βακερντάς λάκε: “Ο Ιεχωβά ντέλα πο λάφι ότι, άμα κα κερές μάνγκε χάνικ μαντρό, το βαρό ντα το λάδι να κα μπιτίνεν μέχρι τι ντελ πάλι μπρισίμ”.

Οτθάρ, η χήρα γκιλί πι κχερέστε ντα κερντάς μαντρό ι Ιεχωβάσκε προφητίσκε. Ντα σαρ ντινάς πο λάφι ο Ιεχωβά, η χήρα ντα λάκο τσσαβό τθερένας πάντα χαμπέ σαρό οντουβά βακίτι σο να ντέλας μπρισίμ. Ο πιθάρια σο τθερένας ο βαρό ντα ο λάδι ισινέ πάντα πφερντέ.

Αζομάν, αβιλό κάτι μπουτ μπέτι. Ο τσσαβό ι χηράκο νασφάλιλο μπουτ πφαρές ντα μουλό. Βόι μολιντάς ι Ηλιάς τι βοηθίνελ-λα. Ο Ηλίας λιντάς πι ανγκαλιάτε ι τσσαβές ντα γκερντάς-λες κο οπραϊνό δωμάτιος κι κχερέσκο. Τσσουντάς ι τσσαβές κο κρεβάτι, κερντάς προσευχή κο Ιεχωβά ντα βακερντάς: “Ιεχωβά, μολίναβα-τουτ, ντε πάλι ζωή κο τσσαβό”. Τζανέσα σόσκε κα αβέλας εντυπωσιακός τι κερέλ-λες ανταβά ο Ιεχωβά; Επειδή, σαρ τζανάσα, μέχρι αζομάν καέκ τζενό σο μουλό να αβιλό πάλι κι ζωή. Επίσης, ανταγιά χήρα ντα λάκο τσσαβό να ισινέ Ισραηλίτες.

Αλλά ο τσσαβό αβιλό πάλι κι ζωή, ντα λέλας πάλι ανάσα! Ο Ηλίας βακερντάς κι χήρα: “Ντικχ το τσσαβό ισί τζουβντό”. Βόι λιντάς μπαρί χαρά ντα βακερντάς κο Ηλίας: “Ισινάν μπαγιά τζενό ι Ντεβλέσκο. Τζανάβα-λες ανταβά επειδή βακερέσα σάντε οντουβά σο βακερέλα τούκε ο Ιεχωβά”.