Ο Άγγελος ι Ιεχωβάσκο Αρακχαντάς ι Εζεκιάς

Ο Ασσύριοι, σο τθερένας ο πο μπαρό βασίλειος, λιντέας ο βασίλειος του Ισραήλ σο τθερέλας ο 10 φάρες. Ακανά ο Σενναχειρείμ, ο βασιλιάς κατά Ασσυρία, μανγκέλας τι λελ ο βασίλειος του Ιούδα-ντα σο τθερέλας ντούι φάρες. Αρχισάλο τι λελ ο πόλεις του Ιούδα ι εκ παλάλ κατά γιαβέρ. Αλλά η πόλη σο μανγκέλας πο μπουτ ισινέ η Ιερουσαλήμ. Όμως οντουβά σο να τζανέλας ο Σενναχειρείμ ισινέ ότι ο Ιεχωβά αρακχαβέλας ι Ιερουσαλήμ.

Ο Εζεκίας, ο βασιλιάς κατά Ιούδας, ντινάς μπουτ λοβέ κο Σενναχειρείμ για μα τι κερέλ επίθεση κι Ιερουσαλήμ. Αν-ντα ο Σενναχειρείμ λιντάας ο λοβέ, μπουτσσαντάς πι ζουρανέ στρατός για τι λελ ι Ιερουσαλήμ. Ο λαός κι πόλη νταρέλας επειδή ο Ασσύριοι, καζόμ τζάλας, αβένας πο πασέ. Αζομάν ο Εζεκίας βακερντάς: “Μα νταρέν. Ο Ασσύριοι ισί ζουρανέ, αλλά ο Ιεχωβά κα κερέλ-αμέν πο ζουρανέ λένταρ”.

Ο Σενναχειρείμ μπουτσσαντάς ι Ραβσακής κι Ιερουσαλήμ για τι πρασάλ ι λαός. Ο Ραβσάκης ατσσιλό αβρί κατά πόλη ντα ντέλας βίκος: “Ο Ιεχωβά ναστί βοηθίνελα-τουμέν. Μα μουκχέν ι Εζεκιάς τι χουχαβέλ-τουμέν. Να υπαρχίντιβελα ντεβέλ σο μπορίνελα τι αρακχαβέλ-τουμέν αμένταρ”.

Ο Εζεκίας πουτσλάς ι Ιεχωβάς σο τι κερέλ. Ο Ιεχωβά βακερντάς λέσκε: “Μα ντάρα οντουλένταρ σο βακερέλα ο Ραβσάκης. Ο Σενναχειρείμ να κα λελ ι Ιερουσαλήμ”. Σοράν, ο Εζεκίας λιντάς κάποια γράμματα κατά Σενναχειρείμ. Ο γράμματα βακερένας: “Μα τζα μάντζαρ κόντρα. Ο Ιεχωβά να μπορίνελα τι αρακχαβέλ-τουτ”. Ο Εζεκίας κερντάς προσευχή: “Μολίναβα-τουτ, Ιεχωβά, αράκχαβ-αμέν, για τι σικλιόν σαρέ ότι σάντε τούι ισινάν ο αληθινός Ντεβέλ”. Ο Ιεχωβά βακερντάς λέσκε: “Ο βασιλιάς κατά Ασσυρία να κα τσσουβέλ-πες κι Ιερουσαλήμ. Κα αρακχαβάβ μι πόλη”.

Ο Σενναχειρείμ ισινέ σίγουρος ότι ατζεχάνικ η Ιερουσαλήμ κα αβέλας λέσκι. Εκ ιράτ ο Ιεχωβά μπουτσσαντάς εκχέ αγγελός κο στρατόπεδος σο τθερένας ο Ασσύριοι αβριάλ κατά πόλη. Ο άγγελος μουνταρντάς 185.000 στρατιωτέν! Ο βασιλιάς Σενναχειρείμ χασαρντάς πι πο ζουρανέ στρατιωτέν. Να μπορίνελας τι κερέλ κάτι γιαβέρ, χασαρντάς ντα γκιλό πέσκε κχερέ. Ο Ιεχωβά αρακχαντάς ι Εζεκιάς ντα ι Ιερουσαλήμ, αντικάς σαρ ντινάας πο λάφι ότι κα κερέλας. Άμα κα αβέας αζομάν τούι κι Ιερουσαλήμ, κα ντέας μπέσα κο Ιεχωβά;