Ο Ιωάννης Πουτρέλα ο Ντρομ

Ο Ιωάννης, ο τσσαβό σο τθερέλας ο Ζαχαρίας ντα η Ελισάβετ, αβιλό προφήτης κο μπάριπε. Ο Ιεχωβά χρησιμοποιηντάς-λες για τι σικλιαρέλ ι τζενέν ότι κα αβέλας ο Μεσσίας. Αλλά αντίς τι σικλιαρέλ κο συναγωγές ή κο πόλεις, ο Ιωάννης σικλιαρέλας κι έρημος. Τζενέ σαρί κατά Ιερουσαλήμ ντα κατά Ιουδαία τζάνας για τι σικλιόν κατά Ιωάννης. Βοβ σικλιαρέλας-λεν, ότι για τι κερέν ο γκι ι Ντεβλέσκο, έπρεπε τι τσσιναβέν τι κερέν γκεραλέ πράγματα. Κάνα ασουνένας ι Ιωαννής, μπουτ τζενέ μετανιώνενας πουμαρέ αμαρτιένγκε, ντα βοβ μπολέλας-λεν κι Λεν Ιορδάνης.

Ο Ιωάννης τθερέλας εκ απλή ζωή. Ο σέα σο ιρίλας ισινέ κερντέ κατά καμηλάκε μπαλά ντα χάλας ακρίδες ντα αβγίν. Ο τζενέ τθερένας περιέργεια τι σικλιόν ι Ιωαννίσκε. Ατζέ-ντα ο Φαρισαίοι ντα ο Σαδδουκαίοι σο ισινέ μπουτ μπαρικανέ τζάνας για τι ντικχέν-λες. Ο Ιωάννης βακερντάς λένγκε: “Πρέπει τι αλλάνεν ντρομ ντα τι μετανιώνεν. Μα αμντίνεν ότι ισινέν ξεχωριστοί σάντε επειδή βακερένα ότι ισινέν τσσαβέ ι Αβρααμίσκε. Ανταβά να μανγκέλα τι βακερέλ ότι ισινέν τσσαβέ ι Ντεβλέσκε”.

Μπουτ τζενέ τζάνας ντα πουτσένας ι Ιωαννής: “Σο πρέπει τι κεράς για τι αβέλ ι Ντεβλέσκο γκι;” Ο Ιωάννης βακερέλας κο Ιουδαίοι: “Άμα τθερένα ντούι σέα, τι ντεν ο εκ εκχέ γιαβερέστε σο τθερέλα-λες ανάγκη”. Τζανέσα σόσκε βακερέλας-λες ανταβά; Μανγκέλας τι τζανέν λέσκε μαθητές ότι, για τι κερέν ο γκι ι Ντεβλέσκο, έπρεπε τι μανγκέν ι γιαβερέ τζενέν.

Ο Ιωάννης βακερντάς κο τζενέ σο γκίντενας ο φόροι: “Τι αβέν έντιμοι ντα μα τι τσορέν καεκχέσταρ”. Βακερντάς κο στρατιώτες: “Μα τι λεν λοβέ αποτσοράλ καεκχέσταρ ντα μα τι βακερέν ψέματα”.

Επίσης, γκιλέ κο Ιωάννης ιερείς ντα Λευίτες ντα πουτσλέ-λες: “Κον ισινάν; Σαρέ μανγκένα τι σικλιόν”. Ο Ιωάννης βακερντάς: “Ισινόμ εκ τζενό σο ντέλα βίκος κι έρημος, σο γκερέλα ι τζενέν κο Ιεχωβά, σαρ βακερντάας ο Ησαΐας”.

Ο τζενέ μπεϊντίνενας μπουτ σαρέ οντουλά σο σικλιόνας κατά Ιωάννης. Μπουτ λένταρ πουτσένας άμα ο Ιωάννης ισινέ ο Μεσσίας. Αλλά βοβ βακερντάς λένγκε: “Αβέλα εκ τζενό πο μπαρό μάνταρ. Με να ισινόμ άξιος ούτε λέσκε τεραχά τι νικαβάβ. Με μπολάβα πανίσαρ, αλλά βοβ κα μπολέλ-τουμέν άγιε πνευμάσαρ”.