Ο Ιησούς Μουτθαβέλα ο Λατσσέ Αμπέρια ι Βασιλειάκε

Χάνικ πο σοράν πι μπολντιμάσταρ, ο Ιησούς αρχισάλο τι βακερέλ: “Η Βασιλεία ι Ντεβλέσκι ισί πασέ”. Ο μαθητές τζάνας παλά-λέστε καζόμ ισινέ κι Γαλιλαία ντα κι Ιουδαία. Κάνα ο Ιησούς βουρτισάλο κι Ναζαρέτ, οτθέ σο μπαριλόας, γκιλό κι συναγωγή, πουταρντάς ο ρόλος του Ησαΐα ντα διαβαντάς ζουρανές: “Ο Ιεχωβά ντινάς-μαν άγιος πνεύμας για τι μουτθαβάβ ο λατσσέ αμπέρια”. Σο μανγκέλας τι βακερέλ ανταβά; Ότι, παρόλο σο ο τζενέ μανγκένας τι ντικχέν ι Ιησούς τι κερέλ θαύματα, ο πο σημαντικός λόγος σο λιντάας ο άγιος πνεύμας ισινέ για τι μουτθαβέλ ο λατσσέ αμπέρια. Αζομάν βακερντάς οντουλένγκε σο ισινέ οτθέ: “Αντιβές αβέλα-πες μπαγιά ανταγιά προφητεία”.

Σοράν ο Ιησούς γκιλό κι Ντεριάβ κι Γαλιλαία, ντα οτθέ ντικχλάς σταρέ τζενέν, σο ισινέ ψαράδες. Βακερντάς λένγκε: “Ελάν μάντζαρ, ντα κα κεράβ-τουμέν ψαράδες τζενένγκε”. Ισινέ ο Πέτρος, ο Ανδρέας, ο Ιάκωβος ντα ο Ιωάννης. Βον μουκχλέ αμέσως πουμαρί μπουτί ι ματσσέντζαρ ντα αβιλέ λέσκε μαθητές. Γκιλέ σαρί κι Γαλιλαία, για τι κερέν λάφι για τη Βασιλεία ι Ιεχωβάσκι. Κερένας λάφι κο συναγωγές, κο αγορές ντα κο ντρομά. Κατέ-ντα τι ισινέ, τζάνας παλά-λέντε μπουτ τζενέ. Ο αμπέρια ι Ιησούσκε ερεσλέ παντού, ατζέ-ντα κι Συρία σο ισινέ μπουτ ντουρ.

Σοράν ο Ιησούς ντινάς μερικέ μαθητέντε ι ζορ τι κερέν λατσσές ι τζενέν ντα τι νικαβέν δαιμονέν. Γιαβερά μαθητές ισινέ παλά-λέστε καζόμ τζάλας κατά εκ πόλη κι γιαβέρ ντα κατά εκ γκαβ κο γιαβέρ για τι μουτθαβέλ ο λατσσέ αμπέρια. Μπουτ πιστά τζουβλιά, σαρ η Μαρία η Μαγδαληνή, η Ιωάννα, η Σουσάννα ντα γιαβερά, φροντίνενας ι Ιησούς ντα τζάνας παλά-λέστε.

Αφού σικλιαρντάς πι μαθητέν, ο Ιησούς μπουτσσαντάς-λεν τι μουτθαβέν ο λατσσέ αμπέρια. Καζόμ ισινέ κι Γαλιλαία, μπουτ τζενέ αβιλέ μαθητές ντα μπολντιλέ. Ισινέ αζόμ μπουτ ο τζενέ σο μανγκένας τι αβέν μαθητές, σο ο Ιησούς μοιασκιαρντάς-λεν εκχέ χωραφίσαρ σο ισινέ έτοιμος γκιντιμάσκε. Οτθάρ βακερντάς λένγκε: “Κερέν προσευχή κο Ιεχωβά για τι μπουτσσαβέλ γιαβερέ-ντα τζενέν τι γκίντεν ο χωράφι”. Σοράν τραμπιντάς 70 τζενέν κατά μαθητές λέσκε ντα μπουτσσαντάς-λεν ντούι ντούι για τι μουτθαβέν ο λατσσέ αμπέρια σαρί κι Ιουδαία. Σικλιαρένας σαβέ τι μανγκές τζενέν για τη Βασιλεία. Κάνα ο μαθητές βουρτισάλε, κερένας σαρ σαρ για τι βακερέν κο Ιησούς σο αβιλόας-πες. Ο Μπενγκ να μπορίνελας τι κερέλ τίποτα για τι σταματίνελ ανταβά έργος.

Ο Ιησούς κανονιντάς τι συνεχίνεν ο μαθητές λέσκε ανταβά σημαντικός έργος κάνα βοβ κα βουρτίνελας κο ουρανός. Βακερντάς λένγκε: “Μουτθαβέν ο λατσσέ αμπέρια σαρί κι πφουβ. Σικλιαρέν ι τζενέν ο λάφι ι Ντεβλέσκο ντα μπολέν-λεν”.