Ο Τελευταίος Πάσχας ι Ιησούσκο

Ο ντιβές σο κερένας ο Ιουδαίοι κάθε μπρες ο Πάσχας περέλας 14 Νισάν. Ανταβά αβέλας-πες για τι ντεν-πες γκοντί ότι ο Ιεχωβά ελευθερωντάας-λεν κατά Αίγυπτος σο ισινέ δούλοι ντα γκερντάας-λεν κο Υποσχεμέ Τθεμ. Κο 33 Κ.Χ., ο Ιησούς ντα λέσκε απόστολοι κερντέ ο Πάσχας εκχέ δωματιόστε κι Ιερουσαλήμ. Αφού χαλέ, ο Ιησούς βακερντάς: “Εκ τουμένταρ κα προδόνελ-μαν”. Ο απόστολοι σαστισάλε ντα πουτσλέ ι Ιησούς: “Κον;” Ο Ιησούς βακερντάς: “Οντουβά σο κα νταβ-λες ανταβά μαντρό”. Αζομάν ντινάς εκ κομμάτι μαντρό κο Ιούδας κο Ισκαριώτης. Αμέσως, ο Ιούδας ιστίντιλο ντα νασλό οτθάρ.

Αζομάν ο Ιησούς κερντάς εκ προσευχή, πφανγκλάς εκ μαντρό ντα ντινάς-λες κο γιαβερά απόστολοι. Σοράν βακερντάς: “Χαν ανταβά μαντρό. Σικαβέλα μο σώμας σο κα νταβ-λες τουμένγκε”. Σοράν κερντάς προσευχή ι μολιάκε, ντινάς-λα κο απόστολοι ντα βακερντάς: “Πιν ανταγιά μολ. Σικαβέλα μο ρατ σο κα νταβ για τι συγχωρίντιβεν τουμαρέ αμαρτίες. Ντάβα-τουμέν μο λάφι ότι κα αβέν γιεκ μάντζαρ βασιλιάδες κο ουρανός. Τι κερέν-λες ανταβά κάθε μπρες για τι ντεν-τουμέν γκοντί μαν”. Αντιβές-ντα ο μαθητές ι Ιησούσκε συνεχίνενα τι γκιντίντιβεν εκ φαρ κο μπρες για τι κερέν οντουβά ντιβές. Ανταγιά συνάθροιση βακέρντιβελα Ανάμνηση.

Αφού χαλέ, ο απόστολοι χαλέ-πες επειδή ο κάθε εκ βακερέλας ότι ισί ο πο μπαρό. Αλλά ο Ιησούς βακερντάς λένγκε: “Ο πο μπαρό τουμένταρ ισί οντουβά σο πακιάλα ότι ισί ο πο χουρντό ντα ότι νανέ αζόμ σημαντικός.

”Τουμέν ισινέν μο αμαλά. Βακεράβα τουμένγκε σαρέ οντουλά σο μανγκέλα μο ντατ τι βακεράβ τουμένγκε. Ατζεχάνικ κα τζαβ μι νταντέστε σο ισί κο ουρανός. Τουμέν κα ατσσόν ακατέ, ντα ο τζενέ κα σικλιόν ότι ισινέν μο μαθητές κατά αγάπη σο τθερένα ο εκ ι γιαβερέσκε. Πρέπει τι μανγκέν ο εκ ι γιαβερές σαρ μανγκλόμ-τουμέν με”.

Τελικά, ο Ιησούς κερντάς προσευχή ντα μανγκλάς κατά Ιεχωβά τι αρακχαβέλ σαρέ λέσκε μαθητέν. Επίσης μανγκλάς κατά Ιεχωβά τι βοηθίνελ-λεν τι αβέν αγαπημέ καζόμ κα κερένας γιεκ ο έργος. Προσευχισάλο τι αγιάντιβελ ο ναβ ι Ιεχωβάσκο. Αζομάν ο Ιησούς ντα λέσκε απόστολοι γκιλιαντέ ύμνους ι Ιεχωβάσκε ντα νικίστιλε αβρί. Ερεσέλας ο σαάτι σο κα ασταρένας ι Ιησούς.