Αρακχλάμ ο “Μαργαριτάρι σο Τθερέλα Μπαρί Αξία”

Γουίνστον, ρόντεας ι Ντεβλέσκε χουρντιαρέλα. Βάκερ αμένγκε ανταλέσκε.

Μπαριλόμ εκχέ κτημάστε κο Κουίνσλαντ κι Αυστραλία. Μι φαμιλί να ασχολίντιβελας ι θρησκειάσαρ. Τζουβντιάας ντουρ κατά γιαβερά τζενέ, οτθάρ να κεράβας μπουτ λάφι τζενέντζαρ σο να ισινέ μι φαμιλιάταρ. Κάνα ισινόμας περίπου 12 μπρεσένγκο, αρχισάλομ τι ρόνταβ ι Ντεβλέσκε. Προσευχίντιβαβας ντα μανγκάβας τι σικλιάβ ι αλήθεια λέσκε. Σοράν νασλόμ κατά κτήμας ντα αρακχλόμ μπουτί κι Αδελαΐδα, κι Νότια Αυστραλία. Κάνα ισινόμας 21 μπρεσένγκο, γνωριντόμ την Παμ κο διακοπές σο κεράβας κο Σίντνεϊ. Κερντάς μάντζαρ λάφι για την αγγλοϊσραηλιτική θρησκευτική ομάδα, σο βακερέλα ότι ο λαοί κι Βρετανία αστάρντιβενα κατά ντες φυλές ι Ισραηλιτένγκε σο λιντέ-λεν ντουρ κατά βόρειος βασίλειος κο όγδοος αιώνας Π.Κ.Χ. Κάνα βουρτισάλομας κι Αδελαΐδα, κερντόμ λάφι ανταλέσκε εκχέ μουρσέσαρ μι μπουτιάταρ σο κερέλας μελέτη ι Μαρτυρέντζαρ. Κερντάμ λάφι σάντε χάνικ σαάτια. Βακερντάμ πιο μπουτ οντουλένγκε σο πακιάνας ο Μάρτυρες. Αζομάν, αγαντόμ ότι λάβας απάντηση κι προσευχή σο κερντόμας κάνα ισινόμας χουρντό. Σικλιάβας ι αλήθεια Οντουλέσκε σο κερντάς-μαν ντα λέσκε Βασιλειάκε! Αρακχλόμας ο “μαργαριτάρι σο τθερέλα μπαρί αξία”.​—Ματθ. 13:​45, 46.

Παμ, τούι-ντα αρχισάλαν τι ρόντες ανταβά μαργαριτάρι κάνα ισινάνας τερνί. Σαρ αρακχλάν-λες τελικά;

Μπαριλόμ εκχέ φαμιλιάτε σο ασχολίντιβελας μπουτ ι θρησκειάσαρ κι πόλη Κοφς Χάρμπορ σο ισί κι Νέα Νότια Ουαλία. Μο ντατ, μι ντάι ντα μο παππούδες πακιάνας ο σικλιαριπέ οντουλένγκο σο βακερένα ότι ο Βρετανοί αστάρντιβενα κατά ντες φυλές ι Ισραηλιτένγκε. Μο χουρντό πφραλ, μι μπαρί πφεν, με ντα μπουτ μι ξαδελφόνταρ, σικλιλάμας χουρντιαρέλα ότι ο Βρετανοί ισί ο τζενέ σο τραμπιντάς ο Ντεβέλ. Με όμως να πακιάβας ντα να νιωθίναβας πασέ κο Ντεβέλ. Κάνα ισινόμας 14 μπρεσένγκι, γκιλόμ μπουτέ κχανγκιρίντε σο τθερένας ο Αγγλικανοί, ο Βαπτιστές ντα ο Αντβεντιστές της Έβδομης Ημέρας. Αλλά να βοηθιντέ-μαν τι σικλιάβ ι Ντεβλές.

Σοράν γκιλάμ τι μπεσάς κο Σίντνεϊ. Οτθέ γνωριντόμ τον Γουίνστον, σο αβιλόας για διακοπές. Σαρ βακερντάς πιο τζανγκλέ, ο συζητήσεις σο τθεράας ι θρησκειάκε κερντέ-λες τι αρχίνελ μελέτη ι Μαρτυρέντζαρ. Από αζομάν, ο γράμματα σο μπουτσσαβέλας μάνγκε ισινέ πφερντέ εδαφιόντζαρ! Κι αρχή ανησυχισάλομας ντα χολιασάλομας. Αλλά σιγά σιγά αγαντόμ ότι ανταγιά ισί η αλήθεια.

Κο 1962, γκιλόμ τι μπεσάβ κι Αδελαΐδα για τι αβάβ πιο πασέ κο Γουίνστον. Κανονιντάας τι μπεσάβ εκχέ αντρογυνόστε σο ισινέ Μάρτυρες, κο Τόμας ντα κι Τζάνις Σλόουμαν, σο υπηρετιντέας σαρ ιεραπόστολοι κι Παπούα Νέα Γουινέα. Βον ισινέ μπουτ λατσσέ μάντζαρ. Ισινόμας σάντε 18 μπρεσένγκι, ντα βοηθιντέ-μαν τι σικλιάβ πιο μπουτ ι Ιεχωβάσκε. Οτθάρ, κερντόμ με-ντα μελέτη ντα μπουτ σουγκό αγαντόμ ότι αρακχλόμ ι αλήθεια. Κάνα παντρισάλαμ με τον Γουίνστον, αμέσως αρχισάλαμ τι κεράς αμαρέ ζωγιάτε μπουτ πράγματα κι υπηρεσία κι Ιεχωβάσκι. Ανταβά μπαριαρντάς αμαρί εκτίμηση για το πολύτιμος μαργαριτάρι σο αρακχλάμ παρόλο σο τθεράας μπουτ δοκιμασίες αμαρέ ζωγιάτε.

Γουίνστον, βάκερ αμένγκε σαρ ισινέ ο πρώτα μπρεσά κι υπηρεσία κι Ιεχωβάσκι.

Χάνικ πιο σοράν αμαρέ μπιαβέσταρ, ο Ιεχωβά πουταρντάς αμένγκε ι πρώτη «μπαρί πόρτα» σο οδηγίνελας μπουτ μπουτιάτε, ντα κα πουτάρντιβενας ατζέ πιο μπουτ πόρτες. (1 Κορ. 16:9) Ι πρώτη σικαντάς-λα αμένγκε ο πφραλ Τζακ Πόρτερ, σο ισινέ επίσκοπος περιοχής αμαρέ χουρντέ κχανγκιριάτε. (Ακανά ισινάμ ο ντούι-ντα κι Επιτροπή του Τμήματος κι Αυστραλασία) Ο Τζακ ντα λέσκι ρομνί, η Ρόσλιν, βακερντέ αμένγκε τι λας ο τακτικός σκαπανικός, ντα τθεράας ανταβά προνόμιος παντς μπρεσά. Κάνα ισινόμας 29 μπρεσένγκο, μανγκλέ αμένταρ τι υπηρετίνας κο έργος περιοχής κο νησιά κο Νότιος Ειρηνικός, σο αζομάν τθερέλας λένγκι ευθύνη ο γραφείος τμήματος κο Φίτζι. Ανταλά νησιά ισινέ ο Αμερικανικές Σαμόα, Σαμόα, Βανουάτου, Κιριμπάτι, Ναούρου, Νίουε, Τοκελάου, Τόνγκα ντα Τουβαλού.

Οντουλά μπρεσά, ο τζενέ σε μερικά νησιά σο ισινέ πιο ντουρ να ντένας μπουτ μπέσα κο Μάρτυρες κι Ιεχωβάσκε, οτθάρ έπρεπε τι αβάς προσεκτικοί ντα γκοντιαβέρ. (Ματθ. 10:​16) Αμαρέ κχανγκιρίντε ισινέ χάνικ πφραλά, ντα μπάζιμα ναστί ντένας-αμέν εκ τθαν για τι μπεσάς. Οτθάρ, πουτσάας ι τζενέν κο γκαβά άμα ισινέ εκ τθαν για τι μπεσάς, ντα βον ισινέ αμέντζαρ πάντα μπουτ λατσσέ.

Γουίνστον, ενδιαφερίντιβεσα μπουτ για τη μετάφραση. Σόσκε;

Αζομάν, ο πφραλά κο νησίς Τόνγκα τθερένας χάνικ φυλλάδια ντα βιβλιάρια κι τσσιπ τόνγκαν. Κερένας μελέτη ι τζενέν κατά αγγλικός βιβλίος Η Αλήθεια που Οδηγεί στην Αιώνιο Ζωή. Οτθάρ, κάνα αβιλί-πες εκ σχολή πρεσβυτερόνγκι σο ατσσικιαρντάς σταρ εβδομάδες, τριν πρεσβύτεροι σο τζανένας χάνικ αγγλικά βακερντέ τι μεταφράνεν ο βιβλίος Αλήθεια κι τσσιπ τόνγκαν. Η Παμ γραφιντάς-λες κι γραφομηχανή ντα σοράν μπουτσσαντάμ-λες για τι εκτυπώντιβελ κο γραφείος τμήματος κο Ηνωμένες Πολιτείες. Σαρί ανταγιά μπουτί ατσσικιαρντάς οχτώ εβδομάδες. Παρόλο σο η μετάφραση να ισινέ μπουτ λατσσί, οντουβά βιβλίος βοηθιντάς μπουτέ τζενέν σο κερένας λάφι ι τόνγκαν τι σικλιόν ι αλήθεια. Η Παμ ντα με να ισινάμ μεταφραστές, αλλά οντουβά σο αβιλό-πες κερντάς-αμέν τι ενδιαφερίντιβας για τη μετάφραση.

Παμ, η ζωή κο νησιά ισινέ διαφορετική κατά Αυστραλία;

Ισινέ μπουτ διαφορετική! Μερικέ τθεμέντε, ισινέ μπουτ κουνούπια, μπουτ κάψα ντα υγρασία, ποντίκια, νασφαλίματα ντα μπάζιμα να τθεράας μπουτ χαμπέ. Όμως, κο τέλος κάθε ντιβεσέσκο ηρεμίναας κάνα ντικχάας ι ντεριάβ κατά φάλε​—σαρ βακέρντιβενα κι τσσιπ σαμόαν ο κχερά σο να τθερένας ντουβάρια ντα οπράλ ισινέ κερντέ πουσέντζαρ. Ιράτ ο φως κατά τσσιμούτ σο ντικχίντιβελας κι ντεριάβ λέλας-πες αζόμ μπουτ σο ντικχίντιβενας ο φοίνικες. Ασακέ σουκάρ σαάτια κεράας σκέψεις ντα προσευχίντιβαας, ντα ανταβά βοηθίνελας-αμέν τι τθεράς αμαρέ γκοντιάτε ο λατσσέ πράγματα ντα όχι ο μπέτι.

Μανγκλάμ μπουτ ι χουρντέν. Ασάας μπουτ λέντζαρ ντα αβέλας λένγκε μπουτ περίεργος κάνα ντικχένας αμέν, ι παρνέν. Κάνα γκιλάμας κο Νίουε, εκ χουρντό τσσαβό ασταρντάς ο βας του Γουίνστον σο ισινέ πφερντό μπαλά ντα βακερντάς: «Σο σουκάρ πούπουλα». Μάλλον να ντικχλάας αζόμ μπαλαλέ βαστά ντα να τζανέλας σαρ βακέρντιβελας οντουβά σο ντικχέλας!

Στεναχωρίντιβαας μπουτ κάνα ντικχάας καζόμ τσορορέ ισινέ ο τζενέ. Τζουβντιόνας μπουτ σουκάρ τθανέστε, αλλά να τθερένας φάρμακα, γιατρόν ντα μπουτ πανί. Όμως, αμαρέ πφραλά να ανησυχίνενας. Λένγκε, ανταγιά ισινέ η φυσιολογική ζωή. Ισινέ ευτυχισμέ επειδή τθερένας πουμαρί φαμιλί, εκ τθαν για τι ντεν λατρεία ντα ο προνόμιος τι δοξάνεν ι Ιεχωβάς. Λένγκο παράδειγμας βοηθιντάς-αμέν τι τθεράς αμαρέ γιακχά κο πιο σημαντικά πράγματα ντα τι ατσσικιαράς απλή αμαρί ζωή.

Μπάζιμα, Παμ, χρειαζίντιβελας τι ακχαρές πανί ντα τι κερές χαμπέ με εκ νεβό τρόπος. Σαρ μπορισάλαν τι κερές-λες;

Μο ντατ βοηθιντάς-μαν ανταλέσκε. Σικλιαρντάς-μαν μπουτ σημαντικά πράγματα, σαρ για παράδειγμας τι πφαμπαράβ γιακ για τι κεράβ χαμπέ ντα τι τζουβντιάβ χάνικ πραγματέντζαρ. Κάνα γκιλάμ κο Κιριμπάτι, μπεσλάμ εκχέ χουρντέ κχερέστε σο οπράλ ισινέ κερντό πουσέντζαρ, τελέ τθερέλας κοράλλια ντα ο ντουβάρια ισινέ από μπαμπού. Για τι κεράβ χαμπέ, έπρεπε τι χαντζουβάβ εκ γούρνα για τι πφαμπαράβ γιακ, ντα τσσουβάβας καρύδες για μα τι μερέλ. Πανί λάβας κατά χανίγκ ντα χρειαζίντιβελας τι μπεσάβ κι σειρά γιαβερέ τζουβλίντζαρ. Για τι νικαβέν ο πανί, τθερένας εκ κας περίπου ντούι μέτρα εκχέ σολέσαρ κι άκρη, κάτι σαρ καλάμι ματσσένγκε. Αλλά αντίς τι τσσουβέν αγκίστρι κο σολό, πφάντενας εκ τενεκία. Κάθε τζουβέλ κάνα αβέλας λάκι σειρά φουρτίνελας ι τενεκία κι χανίγκ ντα τινιάνελας απότομα πο βας. Η τενεκία βουρτίνελας ντα πφερντιόλας. Αμντίναβας ότι ισινέ απλός​—μέχρι σο αβιλί μι σειρά. Φουρτιντόμ ο σολό μπουτ φαρ, αλλά η τενεκία απλά ατσσόλας οπράλ κο πανί! Αφού ασάντιλαμ, εκ τζουβέλ αβιλί τι βοηθίνελ-μαν. Ο τζενέ πάντα βοηθίνενας-αμέν ντα ισινέ μπουτ λατσσέ αμέντζαρ.

Ο ντούι-ντα μανγκλέν τουμαρό διορισμός κο νησιά. Μανγκένα τι βακερέν αμένγκε χάνικ πράγματα σο ντένα-τουμέν γκοντί;

Γουίνστον: Χρειαζίντιβαας χρόνος για τι σικλιάς κάποια έθιμα. Για παράδειγμας, κάνα αμαρέ πφραλά καλίνενας-αμέν τι χας, ντένας-αμέν σαρό ο χαμπέ σο τθερένας. Κι αρχή, να τζανάας ότι έπρεπε τι μουκχάς κάτι λένγκε-ντα. Χάας σαρέ οντουλά σο τσσουβένας ανγκλ’ αμέντε! Κάνα σικλιλάμ-λες, μουκχάας χαμπέ λένγκε-ντα. Παρόλο σο κεράας ασακέ λάθη, ο πφραλά αγαβένας-αμέν. Ντα χαιρίνενας μπουτ σο ντικχένας-αμέν κάθε σιοβ μασεκά κάνα τζάβας λένγκε κχανγκιριάτε σαρ επίσκοπος. Ο πφραλά κο νησιά να ντικχένας πφραλέν γιαβερέ κχανγκιρίνταρ, εκτός αμένταρ.

Επίσης, κάνα τζάας κο κχανγκιριά ντιντιόλας λατσσί μαρτυρία κο τζενέ. Μπουτ τζενέ αμντίνενας ότι ο πφραλά νικαντέ ανταγιά θρησκεία πουμαρέ γκοντιάταρ. Οτθάρ, κάνα ντικχένας ντουέ ξενόν κατά ίδια θρησκεία τι τζαν κο πφραλά, ο τζενέ αγαβένας σο θρησκεία ισί ντα ατσσόνας πουταρντέ μόσαρ.

Παμ: Εκ κατά πιο σουκάρ πράγματα σο ντάβα-μαν γκοντί αβιλό-πες κο Κιριμπάτι. Οτθέ ισινέ εκ κχανγκιρί χάνικ πφραλέντζαρ ντα πφενίντζαρ. Ο μοναδικός πρεσβύτερος, ο Σίνικαϊ Μάτερα, κερέλας ο πιο λατσσό για τι φροντίνελ-αμέν. Αβιλό εκ ντιβές ντα ασταρέλας εκ σεβλί σο αντρέ τθερέλας σάντε εκ βαντρό. «Ισί τουμένγκε», βακερντάς. Αζομάν ισινέ μπουτ δύσκολος τι αρακχές εκ βαντρό κχανιάκο. Ανταβά χουρντό πράγμας σο κερντάς αντράλ πι γκίσταρ συγκινιντάς-αμέν μπουτ.

Χάνικ μπρεσά πιο σοράν, Παμ, ατσσιλάν κχαμνί αλλά χασαρντάν ι μαξιμίς. Σο βοηθιντάς-τουτ τι νταϊντίνες;

Ατσσιλόμ κχαμνί κο 1973 κάνα ισινάμας κο Νότιος Ειρηνικός. Αποφασιντάμ τι βουρτίνας κι Αυστραλία ντα σταρ μασεκά πιο σοράν πελό μάνταρ ο μαξίμι. Πφαμπιλό αμαρό γκι. Η ντουκχ σο τθεράβας μι γκίστε κοβλιλί κάνα νακχλό ο καιρός, αλλά ποτές να νασλί ντιπ μέχρι σο λιντάμ ι Σκοπιά 15 Απριλίου 2009. Ο θέμας «Ερωτήσεις από Αναγνώστες» τθερέλας ι ερώτηση: «Κα αναστίντιβελ εκ μαξίμι σο μερέλα πι νταγιάκε περέστε;» Ανταβά θέμας αντάς αμαρέ γκοντιάτε ότι ο Ιεχωβά κα αποφασίνελ σο κα κερέλ ντα βοβ κερέλα πάντα ο σωστός. Κα νασκιαρέλ σαρί ι ντουκχ σο τθεράσα ανταλέ πφιρνέ ντουνιάστε, αντράλ πι Τσσαβέσταρ σο κα «καταστραφίνελ σαρέ ανταλά μπέτι πράγματα σο κερέλα ο Μπενγκ». (1 Ιωάν. 3:8) Ο θέμας βοηθιντάς-αμέν επίσης τι εκτιμίνας ατζέ πιο μπουτ ο πολύτιμος «μαργαριτάρι» σο τθεράσα σαρ λαός ι Ιεχωβάσκο! Κάι κα αβάας άμα να τζανάας σο κα ανέλ η Βασιλεία;

Κάνα μουλό αμένταρ αμαρό μαξίμι, λιντάμ πάλι ι ολοχρόνια υπηρεσία. Υπηρετιντάμ χάνικ μάσεκ κο Μπέθελ κι Αυστραλία ντα σοράν αρχισάλαμ πάλι ο έργος περιοχής. Κο 1981, αφού υπηρετιντάμ κι Νέα Νότια Ουαλία ντα κο Σίντνεϊ, καλιντέ-αμέν κο γραφείος τμήματος κι Αυστραλία, σαρ βακέρντιβελας αζομάν, ντα συνεχίνασα τι υπηρετίνας οτθέ.

Γουίνστον, βοηθιντέ-τουτ οντουλά σο σικλιλάν κο Νότιος Ειρηνικός κι υπηρεσία σο τθερέσα ακανά κι Επιτροπή του Τμήματος κι Αυστραλασία;

Βα, μπουτέ πραγματέντε. Πρώτα, μανγκλέ κατά πφραλά κι Αυστραλία τι τθερέν ι ευθύνη για το Αμερικανικές Σαμόα ντα για το Σαμόα. Σοράν, ο γραφείος τμήματος κι Νέα Ζηλανδία αβιλό γιεκ με το γραφείος τμήματος κι Αυστραλία. Ακανά, αντρέ κο τομέας σο τθερέλα ι ευθύνη ο γραφείος τμήματος κι Αυστραλασία ισί ο Αμερικανικές Σαμόα, ο Σαμόα, ο Ανατολικός Τιμόρ, η Αυστραλία, η Νέα Ζηλανδία, ο Νησιά Κουκ, ο Νίουε, ο Τοκελάου ντα η Τόνγκα. Τθεράβας ο προνόμιος τι ντικχάβ μπουτ ανταλέ τθανένταρ κάνα γκιλόμ σαρ ομιλητής κατά Μπέθελ. Οντουλά σο σικλιλόμ κάνα ισινόμας ανταλέ πιστέ πφραλέντζαρ ντα πφενίντζαρ κο νησιά βοηθίνενα-μαν ακανά σο υπηρετίναβα-λεν κατά γραφείος τμήματος.

Τέλος, κα μανγκάβας τι βακεράβ ότι η Παμ ντα με τζανάσα μπουτ μπρεσά ακανά ότι να ρόντενα ι Ντεβλέσκε σάντε ο μπαρέ τζενέ. Ισί τερνέ-ντα σο μανγκένα οντουβά “μαργαριτάρι σο τθερέλα μπαρί αξία”, ατζέ-ντα άμα λένγκε τζενέ να ενδιαφερίντιβενα λέσκε. (2 Βασ. 5:2, 3· 2 Χρον. 34:​1-3) Σίγουρα, ο Ιεχωβά ισί Ντεβέλ σο μανγκέλα ι τζενέν ντα μανγκέλα τι τζουβντιόν σαρέ, χουρντέ ντα μπαρέ!

Κάνα η Παμ ντα με αρχισάλαμ τι ρόντας ι Ντεβλέσκε 50 ντα πιο μπουτ μπρεσά πιο τζανγκλέ, να τζανάας κατέ κα ερεσάας. Η αλήθεια ι Βασιλειάκι ισί σίγουρα εκ μπουτ πααλίς μαργαριτάρι! Μανγκάσα τι ατσσικιαράς ανταβά πολύτιμος μαργαριτάρι σαρέ αμαρέ ζοριάσαρ!