Μπορίνασα τι Τσσουβάς Τέλος κο Πόλεμοι;

Ο ΚΥΒΕΡΝΗΣΕΙΣ ΠΡΟΣΠΑΘΙΝΕΝΑ ΤΙ ΚΕΡΕΝ Ι ΟΙΚΟΝΟΜΙΑ ΠΟ ΛΑΤΣΣΙ

Στόχος: Τι κερέν πο λατσσό ο τρόπος σο τζουβντιόνα ο τζενέ. Ανταβά μπορίνελα τι βοηθίνελ για μα τι υπαρχίντιβεν τσορορέ ντα χουλανέ, επειδή ανταβά ισί εκ βασικός λόγος σο μπορεί τι αβέν-πες πόλεμοι.

Εμπόδιος: Ο κυβερνήσεις πρέπει τι αλλάνεν ο τρόπος σο χρησιμοποιήνενα ο λοβέ. Κο 2022, χαλαντέ 30 δισεκατομμύρια ευρώ πραγματέντε σο κα βοηθίνενας τι αβέλ πο λατσσί η ζωή μπουτέ περιοχιέντε. Όμως, ανταλά λοβέ ισινέ μπουτ χάνικ ανγκλάλ οντουλέντε σο χαλαντέ για το στρατός.

«Χαλαβάσα πο μπουτ λοβέ για τι βοηθίνας ι τζενέν σο επηρεάντιβενα κατά πόλεμοι παρά για τι ντικχάς σαρ μα τι αβέν-πες ο πόλεμοι ντα τι υπαρχίντιβελ ειρήνη».​—Αντόνιο Γκουτέρες, γενικός γραμματέας κι Αμερική.

Σο βακερέλα η Αγία Γραφή: Ο κυβερνήσεις, ο κανόνες ντα ο νόμοι σο ισί κο ντουνιάς μπορίνενα τι βοηθίνεν ι τσορορέν, αλλά ποτές να κα μπορίνεν τι νασκιαρέν για πάντα ο τσοροριπέ.​—Δευτερονόμιο 15:11· Ματθαίος 26:11.

Ο ΚΥΒΕΡΝΗΣΕΙΣ ΠΡΟΣΠΑΘΙΝΕΝΑ ΤΙ ΑΝΕΝ ΕΙΡΗΝΗ ΑΝΤΡΑΛ ΚΑΤΑ ΣΥΜΦΩΝΙΕΣ

Στόχος: Τι ερεσαβέν ή τι λύνεν ο διαφορές σο υπαρχίντιβενα με ειρήνη αντράλ κατά συζήτηση με σκοπός τι αβέν-πες πράγματα σο κα κερέν λατσσιπέ κο ντούι-ντα μεριές.

Εμπόδιος: Εκ ή πο μπουτ τθεμά μπορεί μα τι μανγκέν τι κερέν λάφι για τι λύνεν ο διαφορές σο υπαρχίντιβενα ή τι δεχτίνεν εκ συμφωνία. Επίσης, ο συμφωνίες σο αβένα-πες για τι υπαρχίντιβελ ειρήνη χαλάντιβενα εύκολα.

«Ο συμφωνίες σο κερένα ο κυβερνήσεις για τι ανέν ειρήνη να τθερένα πάντα επιτυχία. Εκ συμφωνία σο κερένα ντούι τθεμά μπορεί τι αβέλ αζόμ άδικη σο κα ανέλ ατζέ πο μπουτ πόλεμοι πο σοράν».​—Ρέιμοντ Φ. Σμιθ, Αμερικανική Διπλωματία.

Σο βακερέλα η Αγία Γραφή: Ο τζενέ πρέπει τι “ρόντεν ι ειρήνη”. (Ψαλμός 34:14) Όμως, μπουτ τζενέ αντιβές νανέ “αφοσιωμέ, . . . να μανγκένα τι αλλάνεν γνώμη, . . . [ισί] προδότες”. (2 Τιμόθεο 3:1-4) Ασακέ χαρακτηριστικά να μουκχένα μερικέ τζενέν σο ισί πολιτικοί ντα τθερένα λατσσό γκι τι τσσουβέν τέλος κο πόλεμοι.

Ο ΚΥΒΕΡΝΗΣΕΙΣ ΠΡΟΣΠΑΘΙΝΕΝΑ ΤΙ ΝΑΣΚΙΑΡΕΝ Ή ΤΙ ΜΕΙΩΝΕΝ Ο ΟΠΛΑ ΣΟ ΤΘΕΡΕΝΑ

Στόχος: Ο κυβερνήσεις προσπαθίνενα τι νασκιαρέν πράγματα σο μπορίνενα τι μουνταρέν μπουτέ τζενέν σαρ ισί ο πυρηνικές βόμβες ντα μπουτ γιαβερά ασακέ πράγματα.

Εμπόδιος: Ο τθεμά μπουτ φαρ να μανγκένα τι μειώνεν πουμαρέ όπλα επειδή νταρένα ότι κα χασαρέν πουμαρί ζορ ντα πουμαρί ικανότητα τι αρακχαβέν-πες. Ατζέ-ντα άμα ο τθεμά κα νασκιαρένας σαρέ πουμαρέ όπλα, να κα μπορίνενας τι νασκιαρέν ο λόγοι σο πολεμίνενα ο τζενέ.

«Μπουτ κατά κυβερνήσεις σο ντινέ υπόσχεση τι νασκιαρέν πουμαρέ όπλα σοράν κατά 1991 να ατσσικιαρντέ πουμαρό λάφι. Σαρ επίσης ότι κα λένας πρακτικά μέτρα για τι μειώντιβεν ο κίνδυνοι, μα τι τζαν κόντρα ο τθεμά ο εκ κο γιαβέρ, ντα τελικά τι τζουβντιάς αντρέ εκχέ ντουνιάστε σο κα υπαρχίντιβελ ειρήνη».​—«Η Διασφάλιση του Κοινού μας Μέλλοντος: Μια Ατζέντα για τον Αφοπλισμό».

Σο βακερέλα η Αγία Γραφή: Ο τζενέ πρέπει τι μουκχέν ο όπλα ντα τι «κερέν πουμαρέ σπαθιά αλέτρια». (Ησαΐας 2:4) Όμως, για τι σταματίνελ ο πόλεμος, να ερεσέλα σάντε ανταβά επειδή η βία αβέλα αντράλ κατά γκι ι τζενέσκο.​—Ματθαίος 15:19

Ο ΚΥΒΕΡΝΗΣΕΙΣ ΚΕΡΕΝΑ ΣΥΝΕΡΓΑΣΙΕΣ ΓΙΑ ΤΙ ΤΣΣΟΥΒΕΝ ΤΕΛΟΣ ΚΟ ΠΟΛΕΜΟΙ

Στόχος: Ο κυβερνήσεις κερένα συνεργασίες με γιαβερά κυβερνήσεις για τι αβέν αρακχαντέ άμα κα κερέν λένγκε επίθεση ο ντουσμάνια. Πακιάνα ότι εκ γιαβέρ κυβέρνηση να κα αρχίνελ πόλεμος λέντζαρ, επειδή άμα κα κερέλας-λες ανταβά έπρεπε τι τσσουβέλ-λεν πιο μπουτ στρατόσαρ.

Εμπόδιος: Η νταρ ότι κα πολεμίνεν μπουτ τθεμά μαζί, να ανέλα ι ειρήνη. Ο τθεμά να ατσσικιαρένα πάντα πουμαρό λάφι, ούτε συμφωνίνενα κο τρόπος σο κα αντιμετωπίνεν πουμαρέ ντουσμανίν ντα κάνα κα κερέν-λες ανταβά.

«Παρόλο σο η Κοινωνία των Εθνών ντα ο Ηνωμένα Έθνη κερντέ μπαρί προσπάθεια για τι βοηθίνεν ο κυβερνήσεις τι κερέν συνεργασίες με γιαβερά κυβερνήσεις, ανταλά συνεργασίες να τσσουντέ τέλος κο πόλεμοι».​—«Εγκυκλοπαίδεια Μπριτάνικα».

Σο βακερέλα η Αγία Γραφή: Ο πο μπουτ φαρ ισί πο λατσσό κάνα μπουτ τζενέ συνεργαζίντιβενα ο εκ ι γιαβερέσαρ. (Εκκλησιαστής 4:12) Όμως, ι τζενένγκε κυβερνήσεις ντα οργανώσεις να μπορίνενα τι ανέν ειρήνη ντα ασφάλεια. «Μα ντεν τουμαρί μπέσα κο άρχοντες ούτε κο τσσαβό εκχέ τζενέσκο σο ναστί ανέλα σωτηρία. Κάνα τσσιναβέλα τι λελ ανάσα, βοβ βουρτίνελα κι τσικ· οντουβά ντιβές λέσκε σκέψεις χασάρντιβενα».​—Ψαλμός 146:3, 4.