Σαρ κα Σταματίνεν ο Πόλεμοι;

Ο ΝΤΕΒΕΛ ΚΑ ΚΑΤΑΣΤΡΑΦΙΝΕΛ Ι ΤΖΕΝΕΝΓΚΕ ΚΥΒΕΡΝΗΣΕΙΣ

Ο Ντεβέλ κα καταστραφίνελ ι τζενένγκε κυβερνήσεις κο πόλεμος σο κι Αγία Γραφή βακέρντιβελα Αρμαγεδδώνας.a (Αποκάλυψη 16:16) Αζομάν, ο «βασιλιάδες σαρέ ι πφουβιάκε» κα γκιντίντιβεν για τι κερέν ο πόλεμος «σο κα αβέλ-πες κο μπαρό ντιβές κι Παντοδύναμε Ντεβλέσκο». (Αποκάλυψη 16:14) Ο Αρμαγεδδώνας ισί ο πόλεμος ι Ντεβλέσκο σο κα σταματίνελ σαρέ ο γιαβερά πόλεμοι.

Ο Ντεβέλ κα νασκιαρέλ ι τζενένγκε κυβερνήσεις ντα κα ανέλ εκ κυβέρνηση σο κα κερέλ κουμάντος κατά ουρανός ντα να κα καταστραφίντιβελ ποτές. (Δανιήλ 2:44) Ο Ντεβέλ τραμπιντάς πι Τσσαβές, ι Ιησού Χριστός, για τι αβέλ Βασιλιάς λέσκε βασιλειάτε. (Ησαΐας 9:6, 7· Ματθαίος 28:18) Ανταγιά κυβέρνηση ισί η Βασιλείαb σο ο Ιησούς σικλιαρντάς πι μαθητέν τι προσευχίντιβεν λάκε. (Ματθαίος 6:9, 10) Σαρέ ο τζενέ κα αβέν ενωμέ τελάλ κατά κυβέρνηση ι Ιησούσκι σο Βοβ κα κερέλ κουμάντος σαρί κι πφουβ.

Ο Ιησούς να χρησιμοποιήνελα πι εξουσία σαρ ι τζενένγκε κυβερνήσεις σο ντικχένα σάντε πουμαρό συμφέρον. Επειδή ισί δίκαιος ντα να ξεχωρίνελα ι τζενέν, καέκ να κα ανησυχίνελ μήπως να κα σικαβέν λέσκε δικαιοσύνη επειδή ισί γιαβερέ τθεμέσταρ ή τθερέλα γιαβέρ κουλτούρα. (Ησαΐας 11:3, 4) Επίσης, ο τζενέ να κα χρειαζίντιβελ τι μαρέν-πες για τι αρακχέν πουμαρό δίκιος. Σόσκε; Επειδή ο Ιησούς μανγκέλα τι τθερέν ειρήνη σαρέ ο τζενέ. «Κα σώνελ ι τσορορέν σο ντένα βίκος για βοήθεια, ντα οντουλές σο να ντένα-λες σημασία ντα να τθερέλα καεκχές για τι βοηθίνελ-λες . . . . Κατά στεναχώρια ντα κατά ντουκχ κα σώνελ-λεν».​—Ψαλμός 72:12-14.

Η Βασιλεία ι Ντεβλέσκι κα καταστραφίνελ σαρέ ο όπλα σο υπαρχίντιβενα κι πφουβ. (Μιχαίας 4:3) Επίσης, κα καταστραφίνελ ι πφιρνέ τζενέν σο να μανγκένα τι τσσιναβέν τι πολεμίνεν ντα οντουλέν σο κερένα ζιάνι κο γιαβερά. (Ψαλμός 37:9, 10) Σαρέ ο μουρσά, ο τζουβλιά ντα ο χουρντέ κα νιωθίνεν αρακχαντέ κάι-ντα τι αβέν κι πφουβ.​—Ιεζεκιήλ 34:28.

Κάνα κα κερέλ κουμάντος η κυβέρνηση ι Ντεβλέσκι σαρό κο ντουνιάς, σαρέ ο τζενέ κα τθερέν ι πο λατσσί ζωή. Κα εξαφανίντιβεν ο προβλήματα σο τσσίντενα ι τζενέν τι πολεμίνεν, σαρ ισί ο τσοροριπέ, η μποκχ ντα ότι ο τζενέ να τθερένα κάι τι μπεσέν. Σαρέ κα τθερέν τι χαν μπερεκέτι λατσσό χαμπέ ντα εκ σουκάρ τθαν για τι μπεσέν.​—Ψαλμός 72:16· Ησαΐας 65:21-23.

Η Βασιλεία ι Ντεβλέσκι κα εξαφανίνελ σαρέ ο μπέτι πράγματα σο ανένα ο πόλεμοι. Αντρέ ανταλέντε νανέ σάντε ο πληγές σο τθεράσα κο σώμας, αλλά ο πληγές σο τθεράσα αντρέ αμαρέ γκίστε-ντα κατά μπουτ μπέτι πράγματα σο αβένα-πες κο πόλεμοι. Ατζέ-ντα ο τζενέ σο μουλέ κα αναστίντιβεν ντα κα τζουβντιόν πάλι κι πφουβ. (Ησαΐας 25:8· 26:19· 35:5, 6) Ο φαμιλιά κα αβέν πάλι γιεκ ντα ο τζενέ να κα ντεν-πες γκοντί καέκ μπέτι πράγμας σο αβιλό-πες επειδή «ο πουρανέ κα νασέν».​—Αποκάλυψη 21:4.

Ο ΝΤΕΒΕΛ ΚΑ ΝΑΣΚΙΑΡΕΛ Ι ΑΜΑΡΤΙΑ

Κάνα η Βασιλεία ι Ντεβλέσκι κα κερέλ κουμάντος σαρί κι πφουβ σαρέ ο τζενέ κα ντεν λατρεία ι Ιεχωβάςc σο ισί ο μόνος αληθινός Ντεβέλ, εκ «Ντεβέλ σο σικαβέλα αγάπη ντα μανγκέλα ι ειρήνη». (2 Κορινθίους 13:11) Ο τζενέ κα σικλιόν τι τζουβντιόν με ειρήνη. (Ησαΐας 2:3, 4· 11:9) Σαρέ ο τζενέ σο ντένα καν κο Ντεβέλ να κα συνεχίνεν τι αβέν αμαρτωλοί, αλλά κα αβέν τέλειοι.​—Ρωμαίους 8:20, 21.

Ο ΝΤΕΒΕΛ ΚΑ ΚΑΤΑΣΤΡΑΦΙΝΕΛ Ι ΜΠΕΝΓΚΕΣ ΝΤΑ ΛΕΣΚΕ ΔΑΙΜΟΝΕΝ

Η Βασιλεία ι Ντεβλέσκι κα καταστραφίνελ οντουλέν σο ανένα ο πόλεμοι, ι Μπενγκές ντα λέσκε δαιμονέν. (Αποκάλυψη 20:1-3, 10) Άμα καταστραφισάλε βον κα υπαρχίντιβελ μπουτ «ειρήνη».​—Ψαλμός 72:7.

Μπορίνενα τι αβέν σίγουροι ότι η υπόσχεση σο ντινάς ο Ντεβέλ τι σταματίνελ ο πόλεμοι κα νικιόλ μπαγιά. Βοβ εμ μανγκέλα εμ τθερέλα ι ζορ τι σταματίνελ ο πόλεμοι.

• Ο Ντεβέλ τθερέλα ι σοφία ντα ι ζορ σο χρειαζίντιβελα για τι σταματίνελ ο πόλεμοι ντα ι βία. (Ιώβ 9:4) Μπορίνελα τι κερέλ σο-ντα μανγκέλα.​—Ιώβ 42:2.

• Πφανγκιόλα ι Ντεβλέσκο γκι κάνα ντικχέλα ι τζενέν τι τσσίντεν μπουτ πράγματα. (Ησαΐας 63:9) Επίσης, «μισίνελα σαρέ οντουλέν σο μανγκένα ι βία».​—Ψαλμός 11:5.

• Ο Ντεβέλ πάντα ατσσικιαρέλα πο λάφι ντα ναστί βακερέλα ψέματα.​—Ησαΐας 55:10, 11· Τίτο 1:2.