Ντούι Νεβέ Πφραλά κο Κυβερνών Σώμας

5 ΟΚΤΩΒΡΙΟΥ 2024, αβιλί ακαγιά ειδική ανακοίνωση κι μπρεσέσκι συνέλευση: Ο πφραλά Τζόντι Τζέιντλι ντα Τζέικομπ Ραμφ διορισάλε τι υπηρετίνεν κο Κυβερνών Σώμας ι Ιεχωβάσκε Μαρτυρένγκο. Ο ντούι-ντα πφραλά υπηρετίνενα πιστά ι Ιεχωβάς μπουτ μπρεσά.

Ο πφραλ Τζόντι Τζέιντλι μπιάντιλο κο Μισούρι, κι Αμερική ντα μπαριλό κι αλήθεια. Λέσκι φαμιλί μπεσέλας εκχέ τθεμέστε σο υπαρχίντιβενας μπουτ χάνικ Μάρτυρες. Οτθάρ, γνωριντάς μπουτέ πφραλέν ντα πφενίν διαφορετικέ τθεμένταρ σο τζάνας οτθέ για τι βοηθίνεν κο έργος. Σικαβένας μπουτ αγάπη ντα ισινέ ενωμέ ντα ανταβά ισινέ κάτι σο κερντάς λέσκε μπαρί εντύπωση. Μπολντιλό 15 Οκτωβρίου 1983, κάνα ισινέ τερνό. Μπεϊντίνελας μπουτ ο έργος ντα κάνα τελειωσάλο ο λύκειος αρχισάλο ο σκαπανικός κο Σεπτέμβριος 1989.

Κάνα ο πφραλ Τζέιντλι ισινέ χουρντό, λέσκο ντατ ντα λέσκι ντάι γκερένας εμ λες εμ λέσκε πφενιά για τι ντικχέν ο Μπέθελ. Ανταβά κερντάς-λεν τι μανγκέν τι υπηρετίνεν κο Μπέθελ, ντα άκ’ ανταβά κερντέ ο ντούι-ντα. Ο πφραλ Τζέιντλι γκιλό κο Μπέθελ κο Γουόλκιλ κο Σεπτέμβριος 1990. Κι αρχή υπηρετιντάς κι Καθαριότητα ντα σοράν κο Ιατρικός Τμήμας.

Αζομάν ο κχανγκιριά σο κερένας λάφι ισπανικά αρχισάλε τι αβγατίντιβεν ντα χρειαζίντιβενας πφραλέν για τι βοηθίνεν. Οτθάρ, ο πφραλ Τζέιντλι γκιλό εκχέ ανταλέ κχανγκιρίνταρ ντα αρχισάλο τι σικλιόλ ισπανικά. Χάνικ πο σοράν, γνωριντάς την Ντάμαρις, εκχέ πφενιά σο κερέλας σκαπανικός οντουλέ περιοχιάτε. Τελικά παντρισάλε, ντα αβιλί βόι-ντα τι υπηρετίνελ κο Μπέθελ.

Κο 2005, ο ντατ ι πφραλέσκο Τζέιντλι ντα ο ντατ ντα η ντάι λέσκε ρομνιάκε χρειαζίντιβενας βοήθεια. Οτθάρ νασλέ κατά Μπέθελ για τι φροντίνεν-λεν. Σαρό ανταβά βακίτι υπηρετίνενας ο ντούι-ντα σαρ τακτικοί σκαπανείς. Ο πφραλ Τζέιντλι ισινέ εκπαιδευτής κι Σχολή Υπηρεσίας Σκαπανέα, ντα βοηθίνελας κι Επιτροπή Προσέγγισης Νοσοκομείων ντα κι Περιφερειακή Επιτροπή Οικοδόμησης.

Κο 2013, ο πφραλ ντα η πφεν Τζέιντλι γκιλέ πάλι κο Μπέθελ για τι βοηθίνεν κι οικοδόμηση κο Γουόργουικ. Οτθάρ μπερί, υπηρετιντέ επίσης κο Πάτερσον ντα κο Γουόλκιλ. Ο πφραλ Τζέιντλι υπηρετιντάς κο Τοπικός Τμήμας Σχεδιασμού/Οικοδόμησης ντα κο Υπηρεσίες Πληροφοριών για Νοσοκομεία. Κο Μάρτιος κο 2023, αβιλό βοηθός κι Επιτροπή Υπηρεσίας. Καζόμ σκεφτίνελα ο διορισμοί σο τθερέλας ανγκλέ, βακερέλα: «Μπάζιμα, εκ νεβό διορισμός ντικχίντιβελα τούκε σαρ βες. Αλλά κάνα νιωθίνεσα αντικάς, πρέπει τι ντες-τουτ γκοντί τι στηρίντιβες κο Ιεχωβά επειδή βοβ κερέλα τι αβέλ-πες».

Ο πφραλ Τζέικομπ Ραμφ μπιάντιλο κι Καλιφόρνια, κι Αμερική. Κάνα ισινέ χουρντό, λέσκι ντάι ισινέ αδρανής αλλά προσπαθίνελας τι σικλιαρέλ-λες πράγματα κατά Γραφή. Επίσης κάθε μπρες τζάλας τι ντικχέλ πι μπαμπά, σο ισινέ σταθερή κι αλήθεια. Βόι βοηθιντάς-λες τι μπεϊντίνελ ι αλήθεια ντα αντικάς κάνα ισινέ 13 μπρεσένγκο μανγκλάς τι κερέλ μελέτη. 27 Σεπτεμβρίου 1992, κάνα ισινέ τερνό, μπολντιλό. Ισί μπουτ σουκάρ σο λέσκι ντάι αρχισάλι πάλι τι τζαλ κο έργος ντα κο συναθροίσεις. Επίσης λέσκο ντατ ντα λέσκε πφραλά αρχισάλε τι κερέν πρόοδος ντα μπολντιλέ.

Καζόμ ισινέ τερνό, ο πφραλ Ραμφ ντικχέλας καζόμ ευτυχισμέ ισινέ ο σκαπανείς. Οτθάρ, κάνα τελειωσάλο ο σχολείος, αρχισάλο ο σκαπανικός κο Σεπτέμβριος κο 1995. Κο 2000, γκιλό τι μπεσέλ κο Εκουαδόρ για τι υπηρετίνελ οτθέ σο η ανάγκη ισινέ πο μπαρί. Οτθέ γνωριντάς την Ίνγκα, εκχέ σκαπανισσά κατά Καναδάς, ντα παντρισάλε. Σοράν πουμαρέ μπιαβέσταρ, γκιλέ σε εκ πόλη για τι βοηθίνεν εκχέ χουρντέ ομιλόστε σο τθερέλας χάνικ πφραλέν. Αντιβές, υπαρχίντιβελα οτθέ εκ ζουρανί κχανγκιρί.

Σοράν, ο πφραλ ντα η πφεν Ραμφ διορισάλε ειδικοί σκαπανείς ντα σοράν ανταλέσταρ αρχισάλε ι υπηρεσία του επισκόπου περιοχής. Κο 2011, καλιντέ-λεν τι τζαν κι Γαλαάδ, κι τάξη 132. Σοράν κατά σχολή, υπηρετιντέ διάφορε τθεμέντε κο ντουνιάς. Επίσης τθερένας ι χαρά τι κερέν μπουτ υπηρεσίες σαρ ισί ο Μπέθελ, ο ιεραποστολικός έργος ντα ι υπηρεσία του επισκόπου περιοχής. Ο πφραλ Ραμφ τθερέλας επίσης ο προνόμιος τι σικλιαρέλ κι Σχολή για Ευαγγελιστές της Βασιλείας.

Ιτιρί κατά Κορωνοϊός, ο πφραλ ντα η πφεν Ραμφ βουρτισάλε κι Αμερική. Καλιντέ-λεν τι υπηρετίνεν κο Μπέθελ κο Γουόλκιλ, σο οτθέ ο πφραλ Ραμφ λιντάς εκπαίδευση για τι κερέλ μπουτί κο Τμήμας Υπηρεσίας. Πο σοράν, διορισάλε πάλι κο Μπέθελ κο Εκουαδόρ, σο οτθέ ο πφραλ Ραμφ υπηρετιντάς κι Επιτροπή Τμήματος. Κο 2023, γκιλέ κο Γουόργουικ. Κο Ιανουάριος κο 2024, ο πφραλ Ραμφ διορισάλο βοηθός κι Επιτροπή Υπηρεσίας. Καζόμ σκεφτίνελα ο τθεμά σο υπηρετιντάς, βακερέλα: «Οντουβά σο κερέλα ξεχωριστός εκ διορισμός νανέ ποτές ο τθεμ, αλλά ο τζενέ σο υπηρετίνεσα λέντζαρ».

Εκτιμίνασα μπουτ ι πφαρί μπουτί σο κερένα ανταλά πφραλά ντα ισί αμένγκε μπουτ σημαντικοί.​—Φιλιπ. 2:29.