Η Απλή Ζωή Ανέλα Χαρά
Ο ΝΤΑΝΙΕΛ ΝΤΑ Η ΜΙΡΙΑΜ παντρισάλε κο 2000, τον Σεπτέμβριο, ντα τθερένας εκ λατσσί ζωή κι Βαρκελώνη σο ισί κι Ισπανία. Ο Ντανιέλ βακερέλα: «Επειδή τθεράας λατσσέ μπουτιά, μπορίναας τι χας κο λατσσέ εστιατόρια, τι τζας ταξίδια γιαβερέ τθεμέντε ντα τι ιριάς πααλίς σέα. Αλλά να μπιστράας τι κεράς ο έργος-ντα». Όμως, αζομάν αβιλό-πες κάτι.
Σε εκ συνέλευση κο 2006, ο Ντανιέλ ασουντάς εκχέ ομιλιάτε ι ερώτηση: «Αμέν κεράσα ο πιο λατσσό σο μπορίνασα για τι βοηθίνας οντουλέ τζενέν σο οδηγίντιβενα κο μεριπέ τι τσσουβέν-πες κο ντρομ σο γκερέλα-αμέν κι αιώνια ζωή;» (Παροιμίες 24:11) Η ομιλία εξηγίνελας ότι τθεράσα ι ευθύνη τι βακεράς κο τζενέ ο λάφια ι Γραφιάκε για τι τθερέν βον-ντα ι ευκαιρία τι σώντιβεν. (Πράξεις 20:26, 27) Ο Ντανιέλ βακερέλα: «Αισθάντιβαβας ότι ο Ιεχωβά κερέλας λάφι μάνγκε». Η ομιλία βακερέλας επίσης ότι ισινάμ πιο ευτυχισμέ όταν κεράσα πιο μπουτ πράγματα κο έργος κι Ιεχωβάσκο. Ο Ντανιέλ τζανέλας ότι ανταβά ισινέ μπαγιά επειδή μπορίνελας τι ντικχέλ ότι η Μίριαμ, σο αρχισάλιας ο σκαπανικός, ισινέ μπουτ ευτυχισμέ.
Η ομιλία επηρεαντάς αζόμ μπουτ τον Ντανιέλ σο αποφασιντάς τι κερέλ εκ μπαρί αλλαγή πι ζωγιάτε. Αρχισάλο τι κερέλ μπουτί πιο χάνικ σαάτια, λιντάς ο σκαπανικός ντα σκεφτίνελας καζόμ χαρά κα τθερέλας βοβ ντα η Μίριαμ αν κα υπηρετίνενας οτθέ σο η ανάγκη ισί πιο μπαρί.
ΠΡΩΤΑ Ο ΔΥΣΚΟΛΙΕΣ—ΣΟΡΑΝ ΜΠΟΥΤ ΣΟΥΚΑΡ ΑΜΠΕΡΙΑ
Κο 2007, τον Μάιο, ο Ντανιέλ ντα η Μίριαμ μουκχλέ πουμαρέ μπουτιά ντα γκιλέ τι μπεσέν κο Παναμάς, εκχέ τθεμέστε σο τθερένας ξαναγκιλό πριν. Κα τζάνας τι βακερέν ο λατσσέ αμπέρια σε διάφορα νησιά κο Αρχιπέλαγος Μπόκας ντελ Τόρο κι Καραϊβική Θάλασσα. Ο πιο μπουτ τζενέ σο μπεσένα οτθέ ισί κατά φυλή Ενγκάμπε. Ο Ντανιέλ ντα η Μίριαμ σκεφτίνενας ότι, ι λοβέντζαρ σο τθερένας, κα μπορίνενας τι μπεσέν κο Παναμάς περίπου οχτώ μάσεκ.
Τζάνας κο νησιά βαρκάσαρ ντα χρησιμοποιήνενας ποδήλατα οτθέ. Ντένα-πες γκοντί ι πρώτη φαρ σο γκιλέ πουμαρέ ποδηλατέντζαρ—περίπου 30 χιλιόμετρα κο βεσά, αβρί κι μπαρί κάψα. Ο Ντανιέλ τσσιντιλό-πες αζόμ μπουτ σο γκιλό τι μπαϊλντίνελ. Όμως, ο φαμιλιά κατά φυλή Ενγκάμπε δεχτίνενας-λεν πουμαρέ κχερέντε, ειδικά όταν ο Ντανιέλ ντα η Μίριαμ σικλιλέ χάνικ λάφια λένγκε τσσιμπάτε. Σε χάνικ καιρός τθερένας 23 μελέτες.
Σο αβιλό-πες όταν τελειωσάλε λένγκε λοβέ; Ο Ντανιέλ βακερέλα: «Με δάκρυα, σκεφτίναας ότι κα βουρτίναας κι Ισπανία. Ισινάμας μπουτ στεναχωριμέ σο κα μουκχάας ι τζενέν σο κεράας-λεν μελέτη». Αλλά εκ μάσεκ πιο σοράν, λιντέ μπουτ σουκάρ αμπέρια. Η Μίριαμ βακερέλα: «Βακερντέ αμένγκε τι υπηρετίνας σαρ ειδικοί σκαπανείς. Καζόμ χαρούμενοι ισινάμας σο μπορίναας τι συνεχίνας αμαρί υπηρεσία!»
Η ΠΙΟ ΜΠΑΡΙ ΧΑΡΑ ΣΟ ΤΘΕΡΕΝΑ
Κο 2015, επειδή αβιλέ-πες κάποιες αλλαγές κι οργάνωση, ο Ντανιέλ ντα η Μίριαμ έπρεπε τι τσσιναβέν τι υπηρετίνεν σαρ ειδικοί σκαπανείς. Σο κα κερένας ακανά; Τθερένας εμπιστοσύνη κι υπόσχεση σο ισί κο εδάφιος Ψαλμός 37:5: «Μουκχ κο Ιεχωβά το ντρομ· τι στηρίντιβες λέστε, ντα βοβ κα βοηθίνελ-τουτ». Αρακχλέ μπουτί για τι μπορίνεν τι κερέν ο τακτικός σκαπανικός, ντα αντιβές υπηρετίνενα εκχέ εκκλησιάτε κο Βεράγκουας κο Παναμάς.
Ο Ντανιέλ βακερέλα: «Πριν τι νασάς κατά Ισπανία, να ισινάμας σίγουροι άμα κα μπορίναας τι τζουβντιάς εκ απλή ζωή. Αντιβές τζουβντιάσα απλά ντα να λειπίνελα αμένταρ κάτι σημαντικός». Καγιά ισί η πιο μπαρί χαρά σο τθερένα; Βακερένα: «Τι βοηθίνας ταπεινέ τζενέν τι σικλιόν ι Ιεχωβάσκε—τίποτα να μπορίνελα τι ανέλ πιο μπαρί χαρά!»