Τσσίνταβα Μπουτ Εκχέ Νασφαλιμάσταρ σο Τθεράβα-λες Μπρεσά​—Μπορίνελα τι Βοηθίνελ-μαν η Αγία Γραφή;

Σο βακερέλα η Αγία Γραφή

Βα. Ο Ντεβέλ πφαμπόλα πι υπηρετόνγκε σο ισί νασφαλέ. Η Αγία Γραφή βακερέλα ι Ντεβλέσκε πιστέ υπηρετόνγκε: “Ο Ιεχωβά κα ντελ-λεν ζορ κο κρεβάτι κι νασφαλιμάσκο”. (Ψαλμός 41:3) Άμα τσσίντενα μπουτ εκχέ νασφαλιμάσταρ σο τθερένα-λες μπρεσά, ο τριν πράγματα σο ισί πιο τελέ κα βοηθίνεν τουμέν:

1. Τι μανγκέν κατά Ντεβέλ ζορ για τι νταϊντίνεν. Αντικάς κα τθερέν «ι ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα». Ανταγιά ειρήνη κα βοηθίνελ-τουμέν μα τι τσσουβέν μπουτ τουμαρέ γκίστε ντα κα ατσσικιαρέλ-τουμέν ζουρανέ.—Φιλιππησίους 4:6, 7.

2. Τι σκεφτίνεν θετικά. Η Αγία Γραφή βακερέλα: «Ο χαρούμενος γκι ισί λατσσό φάρμακος, αλλά ο πφανγκό γκι κερέλα ι τζενές τι χασαρέλ πι ζορ». (Παροιμίες 17:22) Σικλιόν τι κερέν σακάς. Ανταβά, κα κερέλ-τουμέν όχι σάντε τι νιωθίνεν χάνικ σουκάρ κάνα νακχένα προβλήματα, αλλά κα τθερέν πιο λατσσί υγεία-ντα.

3. Τι τθερέν ζουρανί ελπίδα καζόμ ντικχένα ανγκλάλ. Η ζουρανί ελπίδα σο τθερένα καζόμ ντικχένα ανγκλάλ κα βοηθίνελ-τουμέν τι αβέν χαρούμενοι ατζέ-ντα κάνα ισινέν μπρεσά νασφαλέ. (Ρωμαίους 12:12) Η Αγία Γραφή βακερέλα ότι κα αβέλ εκ ντιβές σο καέκ «τζενό να κα βακερέλ: “Ισινόμ νασφαλό”». (Ησαΐας 33:24) Ο Ντεβέλ κα νασκιαρέλ ο νασφαλίματα σο τθερέσα-λεν μπρεσά, σο ο γιατροί να μπορισάλε τι νασκιαρέν-λεν. Φιρειπείν, αντίς τι αβέλ εκ τζενό πφουρό, η Γραφή βακερέλα: «Τι αβέλ λέσκο σώμας πιο σουκάρ από αζομάν σο ισινέ τερνό· τι τθερέλ πάλι πο ζουρανιπέ αντικάς σαρ τθερέλας-λες κάνα ισινέ τερνό».—Ιώβ 33:25.

Σημείωση: Ο Μάρτυρες ι Ιεχωβάσκε, παρόλο σο τζανένα ότι ο Ντεβέλ βοηθίνελα-λεν, τζάνα κο γιατροί για τι βοηθίντιβεν κάνα ισί νασφαλέ. (Μάρκος 2:17) Αλλά, να βακερένα ι γιαβερένγκε σο θεραπεία κα τραμπίνεν. Πακιάνα ότι η απόφαση ασακέ πραγματένγκε πρέπει τι λελ-λα ο κάθε τζενό κορκορό.