Διαλεξάρ τε Λατρεψαρές ε Ντεβλές

1, 2. Σο σι λαζίμι τε ντουσουνούρσουν, τα σόσκε σι σημαντικό ανταά;

ΤΑΡ κι μελέτη κάι κερντάν ατάρ ι Αγία Γραφή, σικλιλάν ότι μπουτ μανουσά κάι πφενέν ότι λατρεψαρέν ε Ντεβλές σικλαρέν ή κερέν σέα κάι ιν μανγκέλ-λεν ιτς ο Ντελ. (2 Κορινθίους 6:​17) Οντάν πφενέλ αμένγκε ο Ιεχωβά τε νασάς ταρ ι χοχαμνί θρησκεία, ατάρ ι “Βαβυλώνα ι Μπαρί”. (Αποκάλυψη 18:2, 4) Σο κα κερές του; Ερ κις αμένταρ σι λαζίμι τε λελ εκ απόφαση τα τε ντουσουνούρ: “Μανγκάβ τε λατρεψαράβ ε Ντεβλές καντιάλ σαρ μανγκέλ βοβ ή καντιάλ σαρ λατρεψαράβας-λες νταά ανγκλέ;”

² Άμα νασλάν ταρ ι χοχαμνί θρησκεία, ανταά σι λατσσό. Αμά μπέλκιμ τε σι συνήθειες τα έθιμα ατάρ ι χοχαμνί θρησκεία κάι μπεενούρσουν-λεν νταά. Ακανά κα σικλιάς σαρ ντικχέλ ο Ιεχωβά κασαέ συνήθειες τα έθιμα τα σόσκε σι καντικί σημαντικό τε ντικχάς-λεν σαρ ντικχέλ-λεν βοβ.

ΕΙΚΟΝΕΣ ΤΑ ΕΘΙΜΑ Ε ΜΟΥΛΕΝΓΚΕ

3. (α) Σόσκε νταλίκ τε αβέλ δύσκολο ε μανουσένγκε τε τσσιναέν τε πακιάν κάι ε εικόνες; (β) Σο πφενέλ η Γραφή για τις εικόνες;

³ Σι μανουσά κάι, για μπουτ μπρεσά, χρησιμοποιησαρέν εικόνες ή σι-λεν σικνέ κχανγκιρά κάι πε κχερά για τε λατρεψαρέν ε Ντεβλές. Άμα κερές-λες του-ντα ανταά, νταλίκ τε αβέλ τούκε παράξενο ή λάθος-ντα τε λατρεψαρές ε Ντεβλές χωρίς κασαέ σέα. Αμά τε σερές ότι ο Ιεχωβά σικλαρέλ-αμέν σαρ τε λατρεψαράς-λες. Επίσης, η Αγία Γραφή πφενέλ αμένγκε ξεκάθαρα ότι ο Ιεχωβά ιν μανγκέλ τε πακιάς κάι ε εικόνες.​—Διαβασάρ Έξοδος 20:4, 5· Ψαλμός 115:​4-8· Ησαΐας 42:8· 1 Ιωάννη 5:21.

4. (α) Σόσκε δεν πρέπει τε κεράς έθιμα ε μουλένγκε; (β) Σόσκε πφεντάς ο Ιεχωβά κάι πο περό τε να προσπαθισαρέν τε ορμπισαρέν ε μουλένσαρ;

⁴ Σι μανουσά κάι ντεν ταρ πο σαάτο τα αραέν παρές για τε κερέν σέα πε μουλένγκε. Για παράδειγμα, κερέν ε γκιεσά ε μουλένγκε τα μπουτ αβέρ έθιμα. Αμά σικλιλάμ ότι ε μουλέ ναστίκ τε βοηθισαρέν-αμέν ή τε κερέν αμένγκε νασουλιπέ τα ότι ιν τραϊσαρέν κάπου αβρετθέ. Σι επικίνδυνο τε προσπαθισαράς τε επικοινωνισαράς ε μουλένσαρ, ζερέμ ανταλά ε σέα κάι νταλίκ τε σικάντον ότι πφενέν-λεν ε μουλέ μπέλκιμ τε σι μπενγκένταρ. Οντάν ο Ιεχωβά ντιάς κάι ε Ισραηλίτες ι εντολή τε να προσπαθισαρέν τε ορμπισαρέν ε μουλένσαρ ή τε καρουστουρούρουν-πες αβερέ σεέντε κάι σι τε κερέν ε μπενγκένσαρ.​—Δευτερονόμιο 18:​10-12· ντικ ε Σημειώσεις 26 τα 31 κάι ε παλουτνέ σελίδες.

5. Σο νταλίκ τε βοηθισαρέλ-τουτ τε τσσιναές τε πακιάς κάι ε εικόνες ή τε κερές έθιμα ε μουλένγκε;

⁵ Σο νταλίκ τε βοηθισαρέλ-τουτ τε τσσιναές τε πακιάς κάι ε εικόνες ή τε τσσιναές τε κερές έθιμα ε μουλένγκε; Πρέπει τε διαβασαρές ι Γραφή τα τε ντουσουνούρσουν μπουτ λατσσές σαρ ντικχέλ ο Ιεχωβά ανταλά ε σέα. Βοβ «ιρινίρ» κασαέ σεένταρ. (Δευτερονόμιο 27:​15) Τε προσευχισάος ερ γκιές κάι ο Ιεχωβά για τε βοηθισαρέλ-τουτ τε ντικχές ε σέα σαρ ντικχέλ-λεν βοβ τα για τε βοηθισαρέλ-τουτ τε λατρεψαρές-λες με τον τρόπο κάι μανγκέλ βοβ. (Ησαΐας 55:9) Νταλίκ τε αβές σίγουρος ότι ο Ιεχωβά κα ντελ-τουτ ι ζορ κάι χρειασάος για τε νασαλές ταρ κο τραϊπέ σα ε σέα κάι σι τε κερέν με τη χοχαμνί θρησκεία.

ΠΡΕΠΕΙ ΤΕ ΚΕΡΑΣ ΧΡΙΣΤΟΥΓΕΝΝΑ;

6. Σόσκε διαλεξαρντέ τε κερέν ε γενέθλια του Ιησού 25 Δεκεμβρίου;

⁶ Ε Χριστούγεννα σι εκ γιορτή κάι κερέν-λα μπουτ μανουσά κάι σα ι ντουνιάα, τα ε νταά μπουτ σανεντέρουν ότι όζομαν γιορτασαρέν ο γκιές κάι μπιάντιλο ο Ιησούς. Αμά ε Χριστούγεννα σι τε κερέν με τη χοχαμνί θρησκεία. Εκ εγκυκλοπαίδεια πφενέλ ότι ε Ρωμαίοι κάι πακιάνας κάι ε είδωλα γιορτασαρένας ε γενέθλια ε κχαμέσκε 25 Δεκεμβρίου. Ε μπαριμάτα ε κχανγκιρένγκε μανγκένας τε κερντόν Χριστιανοί νταά μπουτ μανουσά κάι πακιάνας κάι ε είδωλα. Καντιάλ παρόλο κάι ο Ιησούς ιν μπιάντιλο 25 Δεκεμβρίου, βον διαλεξαρντέ οντοά ο γκιές για τε κερέν λέσκε γενέθλια. (Λουκάς 2:​8-12) Ε μαθητές του Ιησού ιν κερένας Χριστούγεννα. Εκ βιβλίο πφενέλ ότι, 200 μπρεσά αφού μπιάντιλο ο Ιησούς, «κχονίκ ιν τζανέλας κάνα ακριβώς μπιάντιλο, τα εμπούκα μανουσά μανγκένας τε σικλόν ανταλέ σεέσκε». (Η Ιερή Προέλευση Σημαντικών Πραγμάτων [Sacred Origins of Profound Things]) Ε μανουσά αρχισαρντέ τε κερέν ε Χριστούγεννα περίπου 300 μπρεσά σονά ατάρ ο μεριπέ του Ιησού.

7. Σόσκε ιν κερέν Χριστούγεννα ε τσατσουκανέ Χριστιανοί;

⁷ Μπουτ μανουσά τζανέν ότι ε Χριστούγεννα τα ε σέα κάι κερέν οντοά ο γκιές, σαρ σι ε γλέντια τα ε δώρα κάι ντεν, σι τε κερέν με τη χοχαμνί θρησκεία. Για παράδειγμα, μπουτ μπρεσά νταά ανγκλέ, κάι Αγγλία τα σε μερικά τθεμά κάι Αμερική σας απαγορευμένο τε κερέν Χριστούγεννα ζερέμ σι τε κερέν με τη χοχαμνί θρησκεία. Κον κερέλας Χριστούγεννα τιμωρισάολας. Σονά αμά ε μανουσά αρχισαρντέ πάλι τε κερέν ε Χριστούγεννα. Σόσκε ιν κερέν Χριστούγεννα ε τσατσουκανέ Χριστιανοί; Ζερέμ μανγκέν τε κερέν ε Ντεβλές τε σεβινίρ σα ανταλένσαρ κάι κερέν.

ΠΡΕΠΕΙ ΤΕ ΚΕΡΑΣ ΓΕΝΕΘΛΙΑ;

8, 9. Σόσκε ιν κερένας ε πρώτοι Χριστιανοί γενέθλια;

⁸ Εκ αβέρ γιορτή κάι κερέν-λα μπουτ μανουσά σι ε γενέθλια. Πρέπει τε κερέν ε Χριστιανοί γενέθλια; Η Γραφή πφενέλ σαντέ ντουέ μανουσένγκε κάι κερντέ γενέθλια, οντολά αμά ιν πακιάνας κάι ο Ιεχωβά. (Γένεση 40:​20· Μάρκος 6:​21) Ε γενέθλια κερένας-λεν για τε ντεν δόξα ε χοχαμνέ ντεβλέν. Οντάν, ε πρώτοι Χριστιανοί «πακιάνας ότι ε γενέθλια σας εκ γιορτή κάι σι τε κερέλ με τη χοχαμνί θρησκεία».​—Η Παγκόσμια Εγκυκλοπαίδεια του Βιβλίου (The World Book Encyclopedia).

⁹ Κάι ε πουρανέ μπρεσά, ε Ρωμαίοι τα ε Μπαλαμέ πακιάνας ότι ε γενέθλια ερ κέσκε περένας κάι ο γκιές κάι σας γενέθλια εκχέ ντεβλές. Επίσης, σανεντέρουνας ότι οντοά ο ντελ μπιτσσαλέλας εκ πνεύμα κάνα μπιάντολας εκ μανούς. Ε ειδωλολάτρες πακιάνας ότι, για τε κορλάρ οντοά ο πνεύμα ε μανουσές κάι σα λέσκο τραϊπέ, ο μανούς έπρεπε τε κερέλ γενέθλια.

10. Σόσκε δεν πρέπει τε κερέν ε Χριστιανοί γενέθλια;

¹⁰ Πακιάς ότι ο Ιεχωβά μανγκέλ τε κεράς γιορτές κάι σι τε κερέν με τη χοχαμνί θρησκεία; (Ησαΐας 65:​11, 12) Άερ, ιν μανγκέλ. Οντάν ιν κεράς γενέθλια ή αβέρ κασαέ γιορτές.

ΣΙ ΣΗΜΑΝΤΙΚΟ ΤΕ ΝΑ ΚΕΡΑΣ ΚΑΣΑΕ ΓΙΟΡΤΕΣ;

11. Σόσκε κερέν ε μανουσά γιορτές; Σο πρέπει τε αβέλ ο νταά σημαντικό τούκε;

¹¹ Σι μανουσά κάι τζανέν ότι ε Χριστούγεννα τα αβέρ γιορτές σι τε κερέν με τη χοχαμνί θρησκεία, αμά συνεχισαρέν τε κερέν-λεν. Πακιάν ότι ε γιορτές σι εκ λατσσί ευκαιρία τε νακχαέν σουκάρ πε οικογενειάσαρ. Πακιάς-λες του-ντα ανταά; Ινάι λάθος τε μανγκές τε νακχαές σουκάρ κε οικογενειάσαρ. Ο Ιεχωβά κερντάς ι οικογένεια, τα μανγκέλ τε τζας λατσσές αμαρέ μανουσένσαρ. (Εφεσίους 3:​14, 15) Αμά, σι λαζίμι τε σεράς ότι σι νταά σημαντικό τε αβέλ-αμέν εκ λατσσό αμαλιπέ με τον Ιεχωβά παρά τε κεράς γιορτές ε χοχαμνέ θρησκειάκε για τε τζας λατσσές αμαρέ μανουσένσαρ. Ακ σόσκε ο απόστολο Παύλο πφεντάς: «Πάντα τε προσπαθισαρέν τε ακχιαρέν άμα οντολά κάι κερέν σι σωστά κάι ε γιακχά του Κυρίου».​—Εφεσίους 5:10.

12. Σόσκε κάι του Ιεχωβά ε γιακχά ινάι σα ε γιορτές λατσσέ;

¹² Μπουτ μανουσά πακιάν ότι ινάι καντικί σημαντικό τε τζανάς κάταρ ασταρέλ εκ γιορτή, αμά τον Ιεχωβά ινάι-λες η ίδια άποψη. Βοβ ιν μανγκέλ ε γιορτές κάι σι τε κερέν με τη χοχαμνί θρησκεία τα ε γιορτές κάι ντεν δόξα ε μανουσέντε ή εκχέ τθεμέστε. Για παράδειγμα, ε Αιγύπτιοι κερένας μπουτ γιορτές πε χοχαμνέ ντεβλένγκε. Κάνα ε Ισραηλίτες νασλέ ταρ ι Αίγυπτο, κερντέ εκ χοχαμνί γιορτή κάι κερένας ε Αιγύπτιοι τα πφεντέ ότι σας εκ «γιορτή για τον Ιεχωβά». Ο Ιεχωβά αμά τιμωρισαρντάς-λεν ανταλέσκε κάι κερντέ. (Έξοδος 32:​2-10) Σαρ πφεντάς ο προφήτη Ησαΐα, δεν πρέπει τε “ακουμπισαράς κχάντσικ κάι σι μελαλό!”​—Διαβασάρ Ησαΐας 52:11.

ΤΕ ΟΡΜΠΙΣΑΡΕΣ ΛΑΤΣΣΙΜΑΣΑΡ ΚΑΝΑ ΕΞΗΓΙΣΑΡΕΣ ΑΝΤΑΛΑ ΚΑΪ ΠΑΚΙΑΣ ΑΒΕΡΕΝΤΕ

13. Σαέ ερωτήσεις νταλίκ τε αβέν-τουτ κάνα κα λες ι απόφαση τε τσσιναές τε κερές γιορτές;

¹³ Κάνα κα λες ι απόφαση τε τσσιναές τε κερές γιορτές, νταλίκ τε αβέν-τουτ μπουτ ερωτήσεις. Για παράδειγμα: Σο πρέπει τε κεράβ άμα ε μανουσά κάι κεράβ λένσαρ μπουκί πουτσέν-μαν σόσκε ιν κεράβ Χριστούγεννα; Σο πρέπει τε κεράβ άμα ντελ-μαν κάποιος εκ Χριστουγεννιάτικο δώρο; Σο πρέπει τε κεράβ άμα μο ρομ ή μι ρομνί μανγκέλ μάνταρ τε κεράβ γιορτές; Σαρ νταλίκ τε βοηθισαράβ με τσσαέν τε να σουκουλούρουν επειδή ιν κεράς γιορτές ή λένγκε γενέθλια;

14, 15. Σο νταλίκ τε κερές άμα πφενέλ τούκε κάποιος «χρόνια πολλά» ή ντελ-τουτ εκ δώρο;

¹⁴ Σι σημαντικό τε ντουσουνούρσουν γκογκιαεριμάσαρ σο κα πφενές ή σο κα κερές σε κάθε περίπτωση. Για παράδειγμα, άμα πφενέν τούκε ε μανουσά «χρόνια πολλά», ινάι λατσσό τε να ντες-λεν σημασία. Νταλίκ απλά τε πφενές λένγκε: «Ευχαριστώ». Αμά κάνα εκ μανούς μανγκέλ τε σικλόλ νταά μπουτ, κα αβέλας λατσσό τε εξηγισαρές λέσκε. Ανταά αμά πρέπει πάντα τε κερές-λες λατσσιμάσαρ τα με σεβασμό. Η Γραφή πφενέλ: «Τουμαρέ όρμπες τε πφεντινάον πάντα λατσσιμάσαρ, σαρ τε αβέλας-λεν λον, για τε τζανέν σαρ πρέπει τε απαντισαρέν ερ κέστε». (Κολοσσαείς 4:6) Κα νταλίκ τε πφενέσας ότι μπεενούρσουν τε νακχαές σαάτο οκολένσαρ τα τε ντες δώρα, αμά επειδή ιν γιορτασαρές, κερές-λες ανταά αβερέ γκιεσέντε.

¹⁵ Σο πρέπει τε κερές άμα ντελ-τουτ κάποιος εκ δώρο; Η Γραφή ιν ντελ-αμέν κανόνες σα ε σεένγκε, αμά πφενέλ ότι πρέπει τε ασταράς τεμίζι αμαρί συνείδηση. (1 Τιμόθεο 1:​18, 19) Μπέλκιμ ο μανούς κάι ντελ-τουτ ο δώρο τε να τζανέλ ότι ιν κερές οντοϊά ι γιορτή. Ή νταλίκ τε πφενέλ: «Τζανάβ ότι ιν κερές γιορτές, αμά μανγκάβ τε νταβ-τουτ καά ο δώρο». Κάι ε ντούι-ντα περιπτώσεις, νταλίκ τε αποφασισαρές άμα κα λες ο δώρο ή άερ. Αμά σαΐ-ντα απόφαση τε λες, τε ασταρές τεμίζι κι συνείδηση. Να κα μανγκάσας τε κεράς κάτι κάι κα αραέλας αμαρό αμαλιπέ με τον Ιεχωβά.

ΤΟΥ ΤΑ ΚΙ ΟΙΚΟΓΕΝΕΙΑ

16. Σο πρέπει τε κερές άμα κι οικογένεια μανγκέλ τε κερέλ γιορτές;

¹⁶ Σο πρέπει τε κερές άμα κι οικογένεια μανγκέλ τε κερέλ γιορτές; Ινάι σωστό τε χας-τουτ λένσαρ. Μα μπιστάρ ότι σι-λεν ο δικαίωμα τε αποφασισαρέν σο κα κερέν. Τε σικαές λένγκε λατσσιπέ τα τε σεάρσουν-λεν, καντιάλ σαρ μανγκές τε σεάρουν βον-ντα τουτ. (Διαβασάρ Ματθαίος 7:​12) Αμά σο πρέπει τε κερές τε μανγκέλα κι οικογένεια τε αβές του-ντα λένσαρ κάνα κερέν γιορτές; Μπι τε αποφασισαρές σο κα κερές, κερ προσευχή κάι ο Ιεχωβά για τε βοηθισαρέλ-τουτ τε λες ι σωστή απόφαση. Ντουσούν ε σέα προσεκτικά τα ρόντε κάι Γραφή τα κάι αμαρέ έντυπα για τε σικλός νταά μπουτ ανταλέ σεέσκε. Τε ντες-τουτ γκογκί ότι μανγκές πάντα τε κερές τον Ιεχωβά τε σεβινίρ.

17. Σο νταλίκ τε κερές για τε βοηθισαρές κε τσσαέν τε να σουκουλούρουν κάνα οκολά κερέν γιορτές;

¹⁷ Σο νταλίκ τε κερές για τε βοηθισαρές κε τσσαέν κάνα ντικχέν αβερέν τε κερέν γιορτές; Μπάζι ντρομά, νταλίκ τε κανονισαρές κάτι διαφορετικό ανταλένταρ κάι κερές λένγκε ερ γκιές. Επίσης, νταλίκ τε ντες-λεν εκ δώρο για τε κερές λένγκε έκπληξη. Τα εκ ατάρ ε νταά λατσσέ δώρα κάι νταλίκ τε ντες κε τσσαέντε σι τε νακχαές λένσαρ σαάτο τα τε σικαές λένγκε αγάπη.

ΤΕ ΛΑΤΡΕΨΑΡΕΣ Ε ΝΤΕΒΛΕΣ ΚΑΝΤΙΑΛ ΣΑΡ ΜΑΝΓΚΕΛ ΒΟΒ

18. Σόσκε σι λαζίμι τε τζας κάι ε Χριστιανικές συναθροίσεις;

¹⁸ Για τε κεράς τον Ιεχωβά τε σεβινίρ, πρέπει τε μεκάς ι χοχαμνί θρησκεία, λάκε έθιμα τα ε γιορτές κάι σι τε κερέν λάσαρ. Πρέπει επίσης τε κεράς ο νταά λατσσό κάι νταλίκ για τε λατρεψαράς ε Ντεβλές καντιάλ σαρ μανγκέλ βοβ. Σαρ; Εκ τρόπο σι τε τζας βίρα κάι ε Χριστιανικές συναθροίσεις. (Διαβασάρ Εβραίους 10:​24, 25) Ε συναθροίσεις σι μπουτ σημαντικές. (Ψαλμός 22:​22· 122:1) Νταλίκ τε ντας ενθάρρυνση ο εκ οκολές κάνα σαμ σάορου μαζί κάι ε συναθροίσεις.​—Ρωμαίους 1:12.

19. Σόσκε σι σημαντικό τε πφενές αβερένγκε ο τσατσιπέ κάι σι αντί Αγία Γραφή;

¹⁹ Εκ αβέρ σέι κάι σι λαζίμι τε κερές για τε λατρεψαρές ε Ντεβλές καντιάλ σαρ μανγκέλ βοβ σι τε ορμπισαρές αβερέντε ανταλένγκε κάι σικλιλάν ταρ ι Γραφή. Μπουτ μανουσά σουκουλούρουν κάι ντικχέν τε κερντόν μπέτα σέα αντί ντουνιάα. Μπέλκιμ τζανές μανουσέν κάι σουκουλούρουν ανταλέ σεένγκε. Πφεν λένγκε ε σουκάρ σέα κάι ασουκιαρές τε κερντόν ε γκιεσέντε κάι σι τε αβέν ανγκλ’ αμέντε. Καζόμ τζας κάι ε Χριστιανικές συναθροίσεις τα πφενές αβερένγκε ο τσατσιπέ κάι σι αντί Αγία Γραφή, κα ακχιαρές ότι να κα μανγκές τε κερές ε σέα τα ε έθιμα ε χοχαμνέ θρησκειάκε. Νταλίκ τε σαν σίγουρος ότι κα αβές σεβινμίσι τα ότι ο Ιεχωβά κα ευλογισαρέλ-τουτ μπουτ ζερέμ προσπαθισαρές τε λατρεψαρές-λες καντιάλ σαρ μανγκέλ βοβ.​—Μαλαχίας 3:10.