Génesis

39 Atunchi, le ismaeliti ningerde ka o Jose ando Egipto. Ai bikinde les ka iek manush kotsar kai bushelaspe Potifar, kai sas o baro katar le zhandaria ai arakhelas ka o faraon ande soste godi. 2 Numa o Jehova sas le Josesosa. Pala godia gelo leske mishto, ai lesko gazda, kako manush anda o Egipto, thodias pesko kher ande leske vast. 3 Lesko gazda dias po gor ke o Jehova sas le Josesosa ai ke o Jehova kerelas te zhal leske mishto sa so kerelas. 4 Suako gies o Jose tholas pestar ai o Potifar dikhelas les lashe iakhentsa ai astardias te kerel buki pasha leste. Gadia o Potifar thodias o kher ai sa so sas les tela lesko vast. 5 De atunchara pala o Jose, o Jehova astardias te suntsol o kher katar kako manush anda o Egipto. O Jehova suntsosardias sa so sas les ando kher ai ando kimpo. 6 O Potifar meklias tela o vast le Josesosko sa so sas les. Pala godia chi mai lelas sama pe khanchestar, numa anda so kamelas te jal. O Jose kerdilo iek terno zuralo ai shukar. 7 Atunchi e rhomni katar lesko gazda astardias te dikhel po Jose ai te phenel leske: “Ale pasha mande ando than”. 8 Numa vo chi kamelas ai phenelas ka e rhomni katar lesko gazda: “Dikh, murho gazda chi jal les e briga andal bukia le khereske sostar sim me, ai thodias ande murhe vast sa so si les. 9 Nai khonik mai baro mandar ande kako kher. Vo dias man sa so si les, numa tu, tu san leski rhomni. Pala godia, sar te kerau so si nasul ai gado bezej angla o Del?”. 10 Suako gies voi mangelas katar o Jose te avel lasa, numa o Jose chi kamelas te pashol late ai chi te avel lasa. 11 Numa iek gies kai dias ando kher te kerel peski buki nas chi iek sluga kotse. 12 Atunchi voi tsirdias leske gada ai phendias leske: “Ale pasha mande ando than!”. Numa vo nashlo ai ashile leske gada ande lake vast.